اللبس و الميك اب بوضعي اليديد شلون ؟

[اميره1980]

السلام عليكم

انا ارملة و بعد عدتي قاعدة افكر بطريقة لبسي شلون بتكون
قبل وقاة زوجي كنت البس بدلات و مكياج و ساعات البس عبايات بس في اماكن معينة

الحين و بوضعي اليديد ماني عارفة شلون ستايلي يكون
يعني البس اسود و عبايات و جذي و لا شلون ؟؟

مع العلم ان عمري ببداية الثلاثينات

 

[عسوله زوغه]

يا حياتي عظم الله جرج والله يصبر قلبج وقلب اهله

شووفي لازم الواحد يتغير بعد كل مرحله واذا انتي كنتي تلبسين ملون قبل لا يموت زوجج واللحين تبين تلبسين ملون لما توفى براحتج بس خلي هالبس بأمكان مناسبه ولبسي العبايه احتراما لاهل الزوج عشان ما يزعلون عرفتي لانه في ناس عن ناس تفرق يمكن تشرهون عليج يقولون اي مسرع ماتوفي وقامت تلبس عرفتي قصدي


والعمر كله لج يارب وعسى ربي يرزقج بالي تتمنيه ويملي حياتج من جديد

والحياه جدامج مره ثانيه

 

[$ بنت علمي $]

وعليكم السلام والرحمه

الله يرحمه برحمته ويغفرله يارب ويرزقج يارب

البسي عبايات. احسن

توه ماصارله سنه ماتقدرين تلبسين بدل وتردين ستايلج القديم وكلام الناس مايرحم

 

[Alias]

عادي بما انج طلعتي من الحداد البسي علي كيفج لا تهتمين بكلام الناس

 

[Alias]

عادي بما انج طلعتي من الحداد البسي علي كيفج لا تهتمين بكلام الناس

 

[نونه المنكوشه]

حبيبتي خليج ع طبيعتج مثل ماكنتي خلاااص خلصتي العده مالج شغل بالناس

 

[خالتي قموش]

لبسي عبايه على الاقل خل تمر سنه
وان شاء الله يعوضج خير
حبيبتي نصيحه اخت لاختها
لا تلبسين فاتح الحين
ادري بعدج صغيره
بس الناس ما ترحم

 

[اميره1980]

يا حياتي عظم الله جرج والله يصبر قلبج وقلب اهله

شووفي لازم الواحد يتغير بعد كل مرحله واذا انتي كنتي تلبسين ملون قبل لا يموت زوجج واللحين تبين تلبسين ملون لما توفى براحتج بس خلي هالبس بأمكان مناسبه ولبسي العبايه احتراما لاهل الزوج عشان ما يزعلون عرفتي لانه في ناس عن ناس تفرق يمكن تشرهون عليج يقولون اي مسرع ماتوفي وقامت تلبس عرفتي قصدي


والعمر كله لج يارب وعسى ربي يرزقج بالي تتمنيه ويملي حياتج من جديد

والحياه جدامج مره ثانيه

مشكورة حبيبتي على الكلام الطيب
بالنسبه لاهل زوجي ما يشوفوني الحين لاني رحت سكنت في بيت اهلي و انا ما عندي عيال منه
امي تقولي الحين خلاص ما يصيرولج يعني اخوانه و خواته مو حموانج لو عندج عيال منه يصيرون عمامهم بس انتي الحين علاقتج فيهم انتهت و مالج شغل فيهم

 

[اميره1980]

وعليكم السلام والرحمه

الله يرحمه برحمته ويغفرله يارب ويرزقج يارب

البسي عبايات. احسن

توه ماصارله سنه ماتقدرين تلبسين بدل وتردين ستايلج القديم وكلام الناس مايرحم

انا حاطه في بالي العباية
بس في اماكن معينة ما تصلح لها العباية و انا متعودة على البدلات و المكياج

 

[ام الدرر]

حبوبة
الله يخلف لج بخير ان شالله
اتصور باليمعات وبين الحريم ممكن تردين على لبسج القديم
بس الميك اب اعتقد تخلينه ناعم وبسيط افضل
والعباة مثل ماقلتي للاماكن اللي متعودة تلبسين فيها عباة​

 

[عسل سل]

لبسي على مزاجج بس شي معتدل فتره قصيره عقبها ردي حق لبسج الاولي

 

[ماحب حريم خواني]

عظم الله اجرج حبيبتي..والله يغمد روحه الجنه...
حبيبتي لما تطلعين من الحداد لبسي علئ كيفج..بصراحه النااس بتتكلم علئ اي شي ماتسكت واللي يلتفت للناس ويراقب كلامهم بيخسر ..سوي اللي يعجبج

 

[VET-Nour]

عظم الله اجرج

بس سؤال قبله كنتي متزوجه وتوفى زوجج وتزوجتي ولا هذا زوجج نفسه؟ جنه قاريه لج موضوع من قبل انه توفى او شيء جذي؟؟



البسي الي تبينه عادي الملابس مو مقياس للحزن , ؛)

 

[ديانا سبنسر]

ردي لبسج القديم تدريجيا يعني اول شي عياية وميك اب بسيط وشوي شوي تثقلين فيه لان موحلوة بحقج توج طالعة وفل ميك اب الحريم ماراح يرحمونج

 

[بنوتهq8]

الله يرحمه وعظم الله اجرج انا اقول لو اظلين لابسه عبايه جم شهر احسنلج تفتكين من كلااااااام الناس وبعدها عاااااااادي ردي الحياة الطبيعيه وحتى لو تكلموا على الاقل انتي سويتي الى عليج *

 

[manoooram]

الله يصبر قلبج والله يرحمه برحمته
حبيبتي ابتدي تلبسين البدل بعد سنه من وفاته
وبيمعات الحريم خلي الميك اب خفيف وناعم وبدلج الحلوة الذربه لبسيها بيناتهم
وبالأماكن معينه اللي متعوده فيها تلبسين عبايه خليج على العبايه

 

[انا لها شمس]

عظم الله اجرج
والله يرحمه عورتي قلبي بعدج صغيره

وياحياتي مفروض انتي من نفسج تعرفين جواب سوالج
ريلج حبيبج وصديقج وعشتي معاه احلا ايامج لو كان يووووم واحد يبقى ذكرى حلوه

تسالينا احنا شنو البس واتمكيج؟؟؟؟؟؟؟؟

وصحيح الاسود مومقياس حزن لان اكيد اللي بالقلب اكثرررررر

لكن حاولي انج تلتزمين بعباتج

لان اللي يجرحج راح يجرح اهله وخواته واخوانه

واذا زرتيهم ابتعدي عن المكياج واللبس حرام راعي شعورهم

وانتي بعد السنه فكري بالكشخه

انشغلي بالدعاء له اختميله قران

تصدقي عنه


الله يرحمه ويعينج

 

[عزوتي خمس صقور]

الله يرحمه ان شاء الله ويرحم مواتنا وموتى المسلمين
بوجهه نضري البسي بالتدريج مو مره وحده جيه قويه

 

[brettey]

لبسي الي تبينه منتي مجبوره ترضين الناس

 

[sh_mashael]

لبسي اللي تبينه


و عظم الله اجرج