الله يخليكم قولوا لي هل انا طبيعيه او لا

[الصبر مفتاح]

انا عضوه معاكم هني

دخلت باسم يديد عشان اخذ راحتي بدون حواجز وجذي

انا يايه اليوم ومثل مايقولون ابي افضفض

لاني وحيدة امي وعندي اخوان

ابوي من ثلاث أشهر عطاكم عمره بحادث

ماتتصورون شلون كنت معتمده عليه ابكل شي

ابوي شي وايد كبير بالنسبه لي

احب امي بس اهو غير

من كبرت وانا احس باشياء ماقدر افسرها

حلمت بوايد اشياء قبلها بجم شهر كنت خايفه عليه والعن بليس

ومن يا اليوم إلى ياا اخوي الجبير وقعد يحجي لأمي وشلون امي قعدت تلطم

قلت اكيد اهو مافي غيره

سمعتهم يقولون بالانعاش ماقدرت اروح لهم خفت اللى ابالي صج

والله مو متذكره شلون يالي الخبر

احس كل شي صار بسرعه بغمضة عين

والى اليوم جني بحلم

والله العضيم وربي شاهد علي

ماقدر احد يجيب طاريه لي ماقدر اقعد جني ياهل اسد اذوني

تغيرت وايد اشياء فيني اولهم على الصعيد الشخصي

صرت ماحب اطلع ولا اختلط باقرب الناس لي

شكلي وايد تغير

اقوم من النوم افز جني ياهل ادور على احد ينبي مافيه

ابي اطلع اصرخ اسوي أي شي مو قادره

ابطل الليتات وادور بداري

صرت مثل المينونه

ابي ابجي وجنا احد بداخلي يقولي واذا بجيتي راح يرد من الواقع شي

قاعده احلم فيه وايد وهذا الشي وايد ماثر فيني

ادري مابيدكم شي بس ابي احد يقولي شسوي تذكروا ان مافي شي يضيع عند رب العالمين

انتوا مثل خواتي وابيكم تساعدوني ادعولي بظهر الغيب ان الله يريح خاطري

واذا عندكم رقم دكتوره نفسيه واي أي احد اقدر اتواصل معاه بالنت لاتبخلون علي

قاعده اكتب لكم واحاول اصف بالكلام وماني عارفه

لعل وحده منكم تعرف لحالتي تعطيني نصايح تطيب الخاطر

والله وايد تعبانه احس حتى النفس صعب علي

شسوي شورا علي

ناطرتكم لاتخلوني والله بوفقج من ترد علي راح ادعي لها بظهر الغيب

 

[Killer^Girl]

عورتي قلبي
الله يرحمه ويغفر له
ويصبرج ويريح بالج
حاولي تضغطين على نفسج شويه وتطلعين من الجو الي انتي فيه
ادري شي صعب بس لما تحاولين بتلقين نفسج شوي شوي رضيتي بالامر الواقع

 

[عهد الغرام]

الله يعينج والله يغفر لابووج ان شالله

وااله ماعرف وان شالله البنات يفيدوونج

 

[الصبر مفتاح]

شلون اطلع من حالتي وانا مانسيت وفاة يدي

قبل ابوي باربع شهور

كل يوم مااحط ينبي على مخدتي الا ودموعي تسبقني

والله محد يدري بحالتي الا ربي

ابي احجي مع احد بس شلون

حتى لو حجيت مع اخواني مو مثل الخوات

مشكوره على النصيحه

 

[دلع العتبان]

قلبي ابشري ياعمري برحمه الله وفرج كربتج انتي بحاله عاديه جدا جدا اي انسان يفقد حبيب وغالي عليه جي يصير عليه

انتي مؤمنه ومسلمه ماعليج الحين الا انج تصلين ركعتين ونيه صافيه تدعين الله يخلصج من هالحاله الي هيه اقل من عاديه لانه مجرد هم وسيزول مايحتاج حتى طبيب شلون تبين طبيب وطبيبج هوه القران والدعاء

ابوج ربي يحمه ويسكنه فسيح جناته ادعيله بالرحمه مايبي منج الحزن والهم لو يدري الحين جان هوه زعل عليج الحين الدعاء ترى يوصل له وهو بقبره تصدق له وادعيله بالرحمه وانتي اصلا راح تتجاوزين هالمرحله لانها مساله وقت بس خليج مع الله


الحياه كلها جي واحنا كلنا ميتين والحمدالله مؤمنين بقضاء الله وقدره مومثل الكفار اللي يجزع من رحمه الله ومن الهم

هالهم تكفير ذنوب وماعليج الا انج تدعين دعاء الهم بكل صلاه وبكل حزه

( اللهم اني عبدك ابن امتك ناصيتي بيدك ماضي في حكمك .....لاخر الدعاء )


وابشررررررررررررررري لانج استعنتي بالله وخليتي البشر

ولا تحزني لانه الله معاج بكل مكان وبكل وقت

واستغفري وااااااااايد وربي الاستغفار مثل السحر يزول الهم والغم بلمح البصر


وربي يرحم ابوج ويسكنه فسيح جنانه وصالح المسلمين

 

[عبير العنزي]

ياقلبي حالتج طبيعيه

لانج فقدتي انسان غالي عليج

يبيلج فتره طويله شوي عشان تبدين تنسين وتتأقلمين مع الوضع

وصار فيج نوع من الخوف والحزن والخوف من المجهول

حياتي علاجج شي واحد بس هو اللجوء الى الله عز وجل

اول شي خلج مؤمنه بقضاء الله وقدره

ثاني شي اطلبي للمرحوم الله يرحمه وادعيله وتقربي لله وقولي انا لله وانا اليه راجعون كل ماتذكرين مصيبتج بفقدان ابوج

حياتي كلنا بنموت انا وانتي وابوج وابوي وامي وامج كل من عليها فان

اذا كان حبيبنا رسول الله مات لو كان في انسان مخلد بالدنياا كان رسول الله احق بالخلود لان الامه الاسلاميه محتاجه وجوده

لكن والله ياحبيبتي مايدوم غير وجه الله سبحانه وتعالى

بعد ليش الجزع والخوف من الموت

ادري الفراق صعب لكن الاصعب هو الجزع والاعتراض على قضاء الله وقدره

صلي واستغفري واقري قرآن وادعي واهديها الى روح المرحوم

قال صلى الله عليه واله و سلم (إذا مات العبد انقطع عمله إلا من ثلاثة صدقة جارية أو علم ينتفع به من بعده أو ولد صالح يدعو له)

حياتي حالتج طبيعيه بس مثل ماقلت لج هي صدمه وخوف

علاجها اللجوء لله ,

وتحتاجين الى وقت اكثر

والله يطمن قلبج ويرحم موتانا وموتى المسلمين ويجمعنا معاهم يوم القيامه

تحت ظل عرش الرحمن يوم لاظل الا ظله

 

[* بنت المطر *]

ريضه توج انا ابوي له 13 سنه ولي يومج قبل لانام اتذكره وابجي لكن قدر الله وماشاء فعل الحمدلله جاب عيال

ويقولج اللي خلف مامات تواصلي معاه حبيبتي تواصل روحي تصدقي له راح تحسين بقربه منج ادعيله ناجيه ويترتاحين

ان شالله اليوم نبجي عليهم وباجر ينبجي علينا هذا حال الدنيا الله يرحم الحال الله يمسح على قلبج ويصبرج ان شالله

ويقوي عزيمتج

 

[ادري واداري]

عظم الله اجرج ياعمري
الله يمسح على قلبج ويجمعج فيه بالفردوس الاعلى .. قولي امين ..

حبيبتي قاعد يصير معاج جذي لان الي فقدتيه رحمه الله عليه مو شويه
ادري فراقه صعب عليج بس شنسوي مالنا الا الصبر

يا حبيبتي الحزن ما يفيد
اذا حسيتي العبره خانقتج
استغفري ربج اقري قران وقولي (( اللهم اني عبدك ابن عبدك ابن امتك ماض في حكمك عدل في قضائك اسالك بكل اسم هو لك سميت به نفسك او انزلته في كتابك او علمته احدا من خلقك او استاثرت به في علم الغيب عندك ان تجعل القران ربيع قلبي ونور صدري وجلاء حزني وذهاب همي ))
ولانامت الناس حطي سجاتدج يانظر عيني وصلي لله وادعي لابوج بالرحمه
وتصدقي له دايما
روحي انتي وامج واخوانج اعتمروا له
حاولي تطلعين من البيت
لا تقعدين بروحج

اذا تغلينه صج لا تنسينه بدعائج
مثل ماقال الرسول صلى الله عليه وسلم بما معناه (( اذا مات ابن ادم انقطعت اعماله الا ثلاث صدقه جاريه وعلم ينتفع به وولد صالح يدعوا له )) ادعي له دايما
احسن الصدقات سقي الماء
اذا عندج امكانيه ماديه احفروا بير بافريقيا او الدول الفقيرا توصل له ترا
سوي له شي او ابنوا له مسجد
سبحان الله في ناس سووا جذي واحلموا باهلهم وفسروه وطلع التفسير ان الصدقه اوصلت لاهلهم بقبورهم
عسى يرحم موتانا وموتاكم ويجمعنا فيهم بالفردوس

 

[نور ستايل]

عظم الله اجرج حبيبتي

استغفر كثيييييير واقري له القرآن وترحمي له

الله يريح قلبج ان شاء الله

 

[نور ستايل]

عظم الله اجرج حبيبتي

استغفر كثيييييير واقري له القرآن وترحمي له

الله يريح قلبج ان شاء الله

 

[sunshine☼]

ياحياتي أنتِ والله ..,

مافيها شي يابنت الحلال انا عارفة إنه شي صعب على الإنسان إنه يفقد إنسان غالي وعزيز على قلبه خصوصا الوالدين ..

بس ثِقي بالله وتوكلي عليه ... وتيقني بعد إذن الله إنه يجمعك بأبوك بأعالي الجِنان ... ,

هو ميت مايحتاج غير الدعاء ... البكاء يأذيه ..

الله يغفر له ويبدله داراً خيراً من دارِهِ ... ويسكننا مع أحبابنا بجنة الفردوس الأعلى ..​

 

[شيماء المطيري]

الله يرحمه برحمته الواسعة ويصبرج ويعوضج غير ان شاء الله

عزيزتي أبوج بوضع محتاج الدعوة والصدقة وعمرة اذا باستطاعتج مو محتاج الحزن والدموع اذا تحبينه ادعيله والحزن هذا شي طبيعي بالانسان أصلا الانسان اللي ما تدمع عيونه انسان مو طبيعي

قضي وقتج بالقرآن وروحي عمرة وشربي ماي زمزم طلعي مع رفيجاتج ولا تخلين الحزن ينسيج أمويمتج تراها محتاجتلج بهالوقت تخففين عنها-----دعواتي لج

 

[زوجة ضابط طيار]

وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ وَنَقْصٍ مِنَ الْأَمْوَالِ وَالْأَنْفُسِ وَالثَّمَرَاتِ وَبَشِّرِ الصَّابِرِينَ)

اقري الايه شوفي انه اللي تمرين فيه ابتلاء من رب العالمين ويبشرج

اذا صبرتي لكن الحاله اللي تمرين فيهاا حالة وحده معترضه

كانج رافضه امر رب العالمين المفروض تقولين الحمدالله على قضائه قدر الله ومشاء


فعل وتبدين حيااتج وكل ماطرى عليج ادعيله برحمه والمغفره اذا صج تحبينه

اهو الحين مايبي منج غير الدعاء حزنج على فراقه وعذابج مراح يفيده بشي

ادعيله سويله برادة ماي سبيل واصل اهله سددي ديونه اذا عليه دين عشان روحه ترتااح

لكن بجي وحزن حتى ربي يغضب عليج كانج معترضه على القدر تعوذي من ابليس

وصلي ركعتين واخلصي الدعاء له والله رااح يلهمج الصبر والسلوان عسى الله

يرحمه ويجعل مثواه جناات الفردوس وجميع موتى المسلمين اللهم امين

 

[هيبة ملك]

ياقلبي عليج
عليج بالصبر وقراءة القرآن الكريم

وربي يعينج

 

[روانتي 12]

ترا عادي لما احد يموت من اهلج لا سمح الله لازم يعاانين من هالاشيئاااء مثل تعب و ضيق و الهم و الغم

و تصير حالتج حاله وبعدهاا بجم سنه خلاص ولا كأن صار شي وصدقيني هالشي راح يروح عنج

بس انتي نطري و شوفي ..

وعسسسى الله يوفقج ويحقق الي ببالج ويبعد عنج كل شر

 

[غنآآآتي]

تعوذي من الشيطان يا قلبي وحالتج طبيعيه لانج فاقد اعز الناس الله يرحمه ويغفرله ان شاء الله وكل ما تذكرتيه ادعيله كثري استغفار اقري قرآن صلي تعوذي من الشيطان
سويله عمل خير اسأل الله ان يجعلنا من اهل الخير ان شاء الله
والله يعينج ويفرجها عليج يارب ..

 

[وردة الدوحه]

أنا من 8 سنين مات أخوي الكبير بسكته قلبيه وفي اليوم الثالث من العزا توفى أبوي بعد بسكته قلبيه وبعدها بسنه توفى أخوي الثاني ايضا بسكته قلبيه الحمدلله والشكر على كل حال بس حبيت أقولج لان يمكن لي شفتي مصيبت غيرج تهون عليج مصيبتج
بس تدرين شنو الحل الوحيد انج تكثرين من قراءة القران والصلاه على النبي وتكثرين من الصلاه والدعاء وابعدي كلللل البعد عن الاطباء النفسيين لانج انتي طبيبة نفسج وانتي ادرى باللي بداخلج
معليه حبيبتي السالفه ليحين فرش ومأثره فيج بس صدقيني الايام بتمر وبتعدي بسرعه وراح تتذكرين أبوج بالخير
وان شاء الله ربي يجمعكم بالاخره
ولا تنسين تتصدقين له وتدعين له
والله يصبرج ويأجرج ويهون عليج
وبعد نصيحه ثاانيه مهمه جداااااااااااااااااااااااااااااااااااااااااااا
لاتمسكين صيحتتتتتتتتتتتتتتتتتتتتتتتج
متى ماجاتج صيحي وفرغي اللي بداخلج كله
والصياح وايد يخفف على المهموم
وبعدين كتمان الصيحه يسبب أمراض وايد خطيره ويسبب جلطات بعيد الشر عنج
والله يحميج يااارب

 

[ريحانه الشرق]

الحمدلله ع كل حال..............................امسحي دموعك واذكري الله وصلي....وافتحي كتاب الله اهووا الدواء,,,الله يصبرك.

زوري محاضراات يطيب قلبك ويسلى....

 

[أم^تركي]

عادي شي طبيعي انا ليومج سبحان الله لما انام اشوف بنت عمي وتقولي عن كل شي مع انها الحين 10 سنين متوفيه
تشوفني وتكلم معاي جنها تدري عن كل شي والله لما اقول خواتي يتعجبون بس انا اقولج كل ما تذكرينه روحي تصدقي لو تشترين ماي بدينا وزعي على اي احد بشارع او بالإشارة قولي ثوابه له
ودعاء له
الله بصيرج ويصبرنا ويشرح قلوبنا

 

[ReDLOve]

حبيبتي والله قلبي تقطع علللييييج

شوفي انا عمتى كانت مثلج لما توفت يدتي الى اهى امهاا عمتى كبيره و مو متزوجه و كانت صديقه امها كانت تبجي من دون سبب و حاشتها حاله هستيريه بس تصيح ما تنااام و حالتها حااله و اي احد تشوفه قاعد يمها تقوله اقرى علي شوى تبي تهدا مهي عاارفه شلوون تمت على هاالوضع سنه تقريبا او اقل شوى

و لزمت الاستغفاااار و التسبيح و قراءه القرأن كل ما فضت واهي قاعده و قمنا نسفرها ونروح الشاليه و نسوى جو و الحين الحمدالله على كل حال صااارت واااااااااااايد احسن صجج تتذكر و ودها تصيح بس تقدر تمسك روحها مو مثل قبل

الله انعم علينا بنعمه النسياااان و هذا شي لو نشكر الله عليه ليل نهار ما نوفيه

الى ابي اقولج اياه لا تستسلمين لهالوضع الى انتى فيه الشيطان قاعد يلعب عليج وهذى فرصته لانج ضعيفه ابهالوقت

قوى نفسج بقوة ايمانج بربج و حاولي تسافرين و تطلعين اشتركي بنادي طلعي روحج من الجو الى انتى فييه ربي بسااعدج ياعمري

و على فكره ان يدج توفى و بعده ابوج عسى الله يرحمهم انا امى مرت ابنفس الشي عمها توفى عقب ابوها عقب اخوى الصغير

شوفي الوضع لاكن امى ايمانها بالله قوي بفتره عدت هالمرحله الحرجه ياعمري

و عسى الله يسااااعدج و يسهل عليج و يحفظج