اللي تشوف نفسها محبوبه واجتماعيه تدش تنقذني تعبت نفسيااا ساعديني ادعيلج بالحرم

[نوره 99]

الصراحه أنا ماشوف نفسي محبوبه ولا عندي صديقات واجد
بس أول شي لازم تشيلين من بالك فكرة أنهم ما يبون يسولفون معك وأنك ماتبين تفرضين نفسك ع أحد
لأن هالفكره عششت في مخي طوال سنوات الدراسه والنتيجه محد صادقني
هالشي علمني أقدم نفسي للناس واتفاعل معهم في اهتماماتهم وأحاول اجذبهم لاهتماماتي
لا تقولين استحي و لاتنتظرين احد بينزل عليك من السنه ويطلب صداقتك

 

[شيختهم$$]

اشكر كل بنت ردت علي جزاكم الله خير
فعلا استفدت من كل كلمه كتبتوها وحتى اللي قالو احنا نفسج حسسوني بالامان ان وضعي طبيعي لووول
واللي قالو يابختج واحسن لج البنات ماوراهم الا المشاكل همن صح كلامهم
بس في نقطه احب اوضحها انا ابي رفيجات بالجامعه بس مو نظام طلعات وقز وفونات 24 ساعه لان انا اصلا هاديه ما احب جذي
وراح ادعيلكم بأذن الله بالحرم لكل وحده ردت علي ان ربي ينولها مرادها ويحقق لها كل امنيتها ويسعدها ويوفقها بحياتها
ومشكورين وايد

 

[•» عزتے تهينگ «]

والله انا مع الناس عادي اللي اشوفها تسولف اسولف وياها بس مو لدرجة الصداقة عادي يعني
الللي اعرفهم تقدرين تقوولين معارف يعني مو قراب حيل
الا ثنيتن بس الحمدلله
اما الباقي ولا ببالي كله مصالح وكذب شتبين فيهم
مووفقه حبي

 

[mo0onya]

حبيبتي انتي لا تقولين جذي ولا تشككين بنفسج .. انا الحمد لله مشاء الله تبارك الرحمن من البنات الي تقولين عنهم الكل يدورني ويفقدني ولله الحمد بس لازم انتي تتجرئين وتتعرفين على بنات مؤدبات وخلوقات من عمرج مو مشكله لو تستحين مره على مره تتعودين بس الانطوائيه وايده مو زينه عليج .. وهمن حبيبتي مو تتعرفين على اي احد خصوصا بالجامعه !! انا ماتعرفت الا على بنت وحده معاي وعلاقتي فيها طيبه الحمدلله بس الباقي صديقاتي من ايام الثانوي .. انتي حاولي تكونين متحدثه جريئه لو مثلا بنات يسولفون بجامعه وانتي عندج فكره عن الموضوع عادي شاركي فيها وسولفي وعبري عن رايج انتي مهمه !!! لازم تعرفين هشي انتي طيبه وحبوبه واي بنت تتشرف ترافجج وانا اولهم ! الي عليج ثقي بنفسج ! وتركي عنج خرابيط الثانوي لانهم ولا شي هم منو عشان يزعزعونج؟! لاهم حبايبج ولا اهلج ولا صديقاتج قطي حجيهم وراظهرج وخلي الايام الحلوه بويهج


انا ما اتردد اني اكون صديقتج وتشرفيني يالغلا ^_^
​

 

[سبأ ~]

عادي حبيبتي ما أشوف إنها أزمة أو مشكلة ؛ تدرين ليش ؟؟
لأن الحين نادرا نااااااادرا تعرفين قد ايش نادرا إنك تلاقين صديقات مو مصلحجيات أو بعضهم تقولين يا بختي فيهم مجرد ما ينتهي الرابط اللي بينكم مثلا تخلصين دراستك تلاقينها تقطع علاقتها بشكل مفاجئ تكون ماخذتك بس صديقة بشكل مؤقت
وترى نسبة كبيييرة من اللي تشوفينهم سوا ومع بعض وتقولين يا بختهم ما تدرين كل وحدة وش تحمل بنفسها على الثانية
أنا ما أقول مافيه نهائيا بس ماتدرين وش بنفوسهم لكن الأغلبية كذا
ويمكن ربي رحمك عشان نيتك الصافية وقلبك الطيب وما بغى يصدمك ،​

بالنسبة لي عادي أتعرف وأدخل وأسولف وأندمج بس سحباتي كثيرة من بعد أول لقاء باختصار مو أتقرب منها ونصير صديقات ثم أسحب لا من أول ما أعرفها اشوفها تنفع أو لا وبعدها أقرر سبحان الله يا ترتاحين أو العكس لأنهم بنظري كثير صديقات مصالح أو بنفوسهم غرض أو مؤقتات فما أبي أنصدم وأتعب أكثر مما شفته وواجهته​

أنتِ حاولي تغيرين بطبعك شوي أول نصيحة خليك مبتسمة دائما بوجه أي شخص يطالعك أو يكلمك أنا ألاحظ البعض لما يكلمهم أحد ما يطالعون حتى بوجه اللي يكلمهم ويصدون ويختصرون كلامهم فطبيعي اللي كلمه ما راح يميل له عشان كذا ابتسمي خليك بشوشة سولفي اخذي وعطي انصتي للي جالس يحاكيك تفاعلي معه بردك وتعابير وجهك عطيه فرصة يحكي مثل ما أنتِ تحكين لا تقاطعين كلامه إذا هو عنده شيء ويستلزم إنه يحكي اتركي له الفرصة يحكي أكثر مما تحكين لحد ما تحسينه خلص قولي له اللي عندك
يعني شوي شوي وبتجتازين السالفة وبتنمين من نفسك أكثر والصداقة مو كل شيء أهم شيء راحة البال والنفس وش فايدة لا صار عندك صديقات وعالين قلبك ومو مرتاحة معاهم​

آسفة كثرت حكي بس حبيت أقول لك اللي عندي
والله يكون بالعون ..​

 

[ملح @ شمر @]

يالله
شكثررررر صديقاتي سواء بالجامعه او من الاقارب
لكن
صداقتهم
مصلحة x مصلحه


ريحي راسك اختي
والعيب مو فيك حبيبتي الناس تغيرت اول بسهوله وبعفوية تصادقين وتلقين صديقات
لان نفوسهم صافية وقلوبهم نظيفة

الحين يتنقون اللي لهم مصلحة فيه مايهمهم طيبة وحبوبة خاصة بنات الجامعه




​

 

[بعـــيد الشــوح]

يـــــــــــــــــــــــــــــــــــــــــــــــــاحبيبتي كلامي موجه لك ولغيرك ،،

اول شي انتي تعرفين نفسك زين انتي حزينه ولا بشوشه طبقة صوتك عاليه ولا منخفضه ..
شوفي حبيبتي عيون الانسان مرآته بعض الناس عيونه طافيه ((هههه يعني مافيها دفء )) وبعضهم عيونه فيها حزن يجذبك وبعضهم الي انا اركز عليه وانا منهم عيونه تلمع اولا لانهم بشوشين ثانيا لانهم واثقين من نفسهم ثالثا ما عندهم خوف ..

حبيبتي الانسان من بيئته انتي حركيه في البيت لك حس في البيت زي ما يقولون جيرانكم الي حواليكم بناتهم مايجونكم ما تروحين معهم ..

وقبل كل هذا الانسان اذا مو ايمانه بالله قوي يكون مزعزع الشخصيه مهما كان سواء ذكر او انثى قوة الايمان بالله ياحبيبتي تعطي القلب الدفء والطمأنينه والثقه بالنفس وتجعل انه ايظا يقابل اناس صالحين ..

بالنسبه لي اعتبريني اختك من اليوم وما ابيلك الا التوفيق بالنسبه للجامعه الحمد لله انا من اول يوم تعرفت على 10 بنات رقم قياسي وكل بنت عرفتني على بنات ثانين حتى اذا جيت عند الكافتريا اسولف مع البنات عادي وانا ما اعرفهم تخيلي نسولف مده طويله وبعدين كل وحده بعد ما تحاسب تروح في طريقها ذكرتيني لما كنت اخر سنه وحده من البنات راحت معي لاحد مباني الكليه وكل شوي توقفني بنت وتسولف معي لدرجة انها سألتني قالت تعرفين كل بنات الكليه قعدت اضحك وقلت لها قولي ماشاء الله ..

هذا بالنسبه لي النصائح الي اوجها لك خليكي دائما مبتسمه حاولي دخولك القاعه ملفت مو شرط بحركه عادي حتى لو ابتسامه واهم نقطه خلي عينك تدور عل البنات وناظريهم وابتسمي لازم يكون لك صوت في القاعه شاركي مع الدكتورة او الدكتور اسئلي الي جنبك حتى ينتبهون البنات لك سلمي عليهم كلهم عاادي مرات السلام يكفي انك تتعرفين على البنات والله من جد استحدثي حديث واهم شي صوتك مسموع حتى الدكتورة سولفي معها المعيده المسؤله عنك تعرفي عليها وكلامك لا يكون مختصر خلي كلامك بشوش حت تحبك الناس ،،

لما كنت في الكليه المعيدات يعرفون اسمي وانا ما اعرفهم ومستغربه واذا مروا علي حتى لو مع بنات يسلمون علي ههه والبنات الي معي ينقهرون واذا غبت خاصة ايام المعمل تسئلني ليش غايبه وانتي كنتي غايبه المرة الماضيه وبعدين ترى مو شرط تتعرفين بس على بنات قسمك ترى افظل اذا مو في قسمك حتى مسؤلات الامن سولفي معهم هههه الظاهر اني ما خليت احد الا وسولفت معه وترى هذي المتعه الوحيده الي اذكرها من الكليه ..

اخذي كلامي على محمل الجد ..وبالتوفيق يااختي ..

 

[عاشقتها>>]

شوفي حبيبتي انا بقولج صج عندي وااايد بنات من صفي لاااااكن اعرف منو لي ومنو علي >>> يعني شنووو بقولج
احنا ثلاث بنااات حيييييل مع بعض لاكن نقعد مع بنات الصف الي ورا ونسولف معاهم ونضحك بس وقت الصج لي احتجت احد اروح لرفيجاتي الاثنين

فهمتي بس للامانه انا اساعد كل البنات مو مدحا فيني لاكن هذا الصج يعني مو بس رفيجاتي الاثنين لا كل البنات الي اقعد معاهم .... بس السؤال اهني شلون تقعدين معاهم ..

انا بقولج شلون دخلت قلوب البنات مثل ماتعرفين كل وحده ولها عيوب ومشاكل انا دخلت من هالباب حاولت اساعدهم اسأل عنهم عشان جذي صار لي مكان بينهم

والله وليم الحين اتذكر وحده ابوها سوا حادث المهم ليمن داومت كان ماعندي رقمها فليمن داومت سألت بس عن ابوها وسلمت عليها وشفت اخبارها
والله ليلحنها مبتسمه بويهي وتسلم علي بس عشان محد سأل عن ابوها غيري ....

ولاتنسين ابوي من دعائج انه يشوف يدي لان ابوي عنده ضروف مايقدر يشوف يدي وان الله يفرج همه اهوا وامي امييين

واتمنى اني افدتج ....

 

[photoshopia]

حبيبتي انتي مافيج ششي .. بس البنات على حسب نوعيتهم .. يعني اذا هم يسولفون وكذا هم يبون وحده تسولف
اخدمي غيرج ساعديهم شنو يبون وكذا لا تصيرين مغروره تقربي لربج ترا المصلي يبين من وجهه واذا شفتي احد مايصلي مراح تعرفينه بس يجيج شعور تقولين ياربي ماسووا لي شي بس اكرهه !
فهمتيني ؟!
الحين اول شي تسوينه تختارين لج صديقه سولفي معاها حبيها افهميها اسمعيها وكذا خليج اجتماعيه وخدومه ومو مغروره والكل بيحبج صدقيني

 

[Şhώasha . . ~]

- بنات آهيا تدري ان في ناس مب زينين وتنصدمين منهم
لكن لابد انها تخالط و تعرف هالناس اشكالهم وصفاتهم
و تفكيرهم وآهدافهم و ليش اهما جذي !

تنصدم يوم يومين ولكن تتعلم بعدين ، عيل شنهي
الحياه من غير ماتتعلم وتخطي وتجرب و تتعرف !
بعد لازم ، باجر وراها زواج و وراها عيال و حموات وآلخ...
يعني على اقل مشكلة مابتعرف تتصرف وياها
لانها ماتعودت تخالط الناس !


مب كل شي عندكم بتنصدمين بتنصدمين .. وبعدين الناس آجناس


آول شي حبيبتي آنتي آي برج ( ورجاء لحد يدخل سالفة حرام و حلال )
* اول نقطة اهيا الابراج ، لازم تعرفين انتي اي برج ..
الاسد ولا الدلو و لا لاقوس ..آلخ

الحين بتقولين شنو يدخل الابراج بالموضوع ... يدخل حبيبتي
الابراج تساعدج على اكتشاف جوانب من شخصيتج
تخليج تعرفين الناس شنو نظرتهم عنج ... يعني مثلا

برج الجوزاء : - يقولون آنه غشمرجي و حبوب .
- صحبته حلوه و مرحه و حب يغامر
- مزاجي بشكل كبير
- اللي يكلمه بفظاظه يا يرد عليه ببرود او نفس اسلوبه و اخس .
- يعرف يقنع .

مثلا هاي صفات بشكل عام منها سلبي و منها ايجابي نفس شخصية كل انسان .

يعني مثلا اول نقطة تعرفين الناس يحبون صحبتج ولا لا ! ، او مثلا الناس يحسون انج خجوله ، او يحسون انج مغروره ، يحسون انج مسكينه و على نياتج و مب مالت صداقه

جذي يعني ... و تحاولين شوي شوي تغيرين وتركزين ع الاشياء السلبيه و توعدين نفسج تغيرينها ..

- ثآني خطوه ..
حولي تضغطين على نفسج قد ماتقدرين ... اذا كانت فيج هالصفه : انج تستحين تتحجين مع احد و ترتبين الكلام و عقب تقولينه او تترددين ترى هذي اقولج اياها اسوأ صفه و هي اللي ماتخليج تكونين صدآقات

* الحل ؟ : انج تضغطين على نفسج ... اكيد تسألين نفسج شلون و من اي نااحيه !!! ... انا بقولج
مثلا في يوم تاخري ع الكلاس بس شوي يعني بس 5 دقااايق .... وادخلي بتلاقينها مليانه اكيد ونصهم يقعدون بنفس الاماكن كل يوم .. روحي مثلا عند شلة بنات حسيتيهم وناسه و قعدتهم حلوه ... او عند وحده قاعده بروحها او ثنتين الي يناسبج ... روحي اقعدي يمهم ... ابتسمي بويههم وقولي لهم صباح الخير .. بيردون عليج طبعا .. قولي لهم : ممكن اقعد يمكم .؟؟ .. عسا بس مافاتني شي ..؟؟ ... بيقولون لج لا توه الدكتور مثلا او الدكتوره مابدوا يشرحون شي ... قولي لهم مثلا اي الشوارع زحمه اليوم بيقولون لج ايي مثلا او بيتفاعلون وياج .. ودخلي سالفه ورا سالفه شوي شوي ... على مايوصولون باقي الطلبة ... واكيد اهما بيسولفون ..

اليوم الثاني تاخري بعد و سوي نفس الحركه و خلي بنج و بينهم مثلا كرسي .. او قعدي وراهم ... طبعا بعد ماتسلمين عليهم .. و و قومي من مكاانج بحجة ان مب واضح شي و قولي لهم عادي اقعد يمكم .. لان ما يبين عدل ورا؟؟
و شوي بعد سولفي معاهم لان مايسكتكم الدكتور لووول
قولي لهم والله سوالفكم حلوه و قعدتكم ماتنمل .. الله لا يفرقكم ان شاء الله وجذي .. عاد اهما بيستانسون ...
مثلا قولي حق وحده ستايلج حلو ... او طريقة لفتج حلوه ... او عطرج مثلا لو ... شامته انا من قبل بس ماتذكر اسمه جذي يعني .. بس لاتمدحينها وااايد جنج واحد من الشباب !!! ... لا طريقة مدج بنوتيه يعني واااو عطرج اينن ... او درجة الروج حلوه ماشاء الله وعليج احلى ...

.... ( اذا حابة اني اكمل لج كلميني خاص واذا حسيتي اني ما افدتج وايد على عيني ورااسي .. يمكن غيرج يقرى و يستفييد )
لان ماشاء الله واايد ناااس تنفع وياااهم هالطريقة .. وكذآ وحده اعرفها صآرت عندها قوه و جرأه تخالط الناس ...

موفقة :*