ام زوجي

[بحرينيه كوول21]

هلا خواتي شلووونكم
طبعا كنت كاتبه موضوع عن اهل زوجي وتصرفاتهم معاي
وصار لي سننه مارحت لهم ولا كلمتهم
عاد ام زوجي بتسوي عمليه يوم الثلاثه وقررت اروح لهم بأجر
كنت شايله الهم ومتضايقه ومادري شسوي او شلون أتعامل معاهم
طبعا من جفت أحلام اليوم فطسسست على التعليقات عليها وغيرت جو
شلون أتعامل معاهم بكره وشسوي
أودي معاي شي لو اروح يدي فاضيه
واذا سوو لي حركات اسكت لو ارد
ساعدوني موو عارفه شسوي

 

[ام فواازي]

روحي هذول اهل زوجج وعيالج مايصير تقطعين فيهم منشان عين تكرم مدينه
اخذيلها معاج هديه سنعه و حلو وفطاير و لج الاجر ان شاءالله
ولو احد قط كلمه او حركه عليج ترفعي عن مستواه و جنج ماشفتيه وهو اللي بيتفشل

 

[~*~الملكة~*~]

روحي وخيركم من يبدأ بالسلام

 

[غلاي رورو]

روحي لها وانتي محتسبه الاجر عند ربي

واي كلام او نغزات تسمعيها ولا تشوفيها كانك ماتشوفين شي واحسن لك تكوني ساكته اغلب الوقت وبابخت من زار وخفف

قد ماتقدري كوني رسميه عشان تبعدي عن المشاكل وبكذا تكوني بعدتي عن المشاكل وزي ماقالت ام فوازي خذي هديه وفطاير

 

[نشيج الروح]

روحي لها طبعا وتحمدي لها بالسلامة وان كلموج او اجرحوج ابتسمي( دوسي على قلبج) ولا تطولين بالقعدة...

 

[قموووره]

مهما يكونون هذيل اهل عيالج ومايصير تقطعين عيالج عنهم
روحيلهم واخذي شي معاج لا تروحين فاضيه وسوي الواجب الي عليج ومهما سمعتي طوفي انتي سوي باصلج ولاتتحسفين مهما شفتي او سمعتي والله يصلح ما بينكم​

 

[ماتغير شي]

روحي لها مهماا كان هذي ام ريلج

أخذي معااج حلااا او ورررد


وإذا احد قط عليييج حجي طنشي جنج ما تسمعين ياماااا قطو علينا حجي وسكتنااا


والله يوفقج

 

[رنيم الروح]

روحي حبيبتي وخذي معاك شي لا تروحين وايدك فاضيه وعلى الكلام والحركات طنشي وكانك مو داريه عن شي التطنيش وسيله رائعه في هالحاله

 

[برنسيسة2007]

اكييييد لااازم تروحين
واخذي معاج شي واحد بس سنع ياحلا او هديه وانا افضل الهديه لان الرسول قال تهادوا تحابوا
والمره الكبيره اتحب الهديه
واذا خايفه يقطون عليج كلام خلي زوجج معاج طول الوقت ولاتطويل واذا جيتي بتروحين سلمي علا ام زوجج وقولي لها زيارة المريض ٥دقايق مانبي انتعبج وادعيلعا بالشفا واطلعي

وبشرينا بااااجر شنو صار عليج

 

[! بــدويه وآآيــد !]

،


حبيبتي روحي بس مو بروحج رجلج على رجل زوجج عشان اي شي يصير يصير جدام عينه وتتفادون الموقف
ولاتطولين شوي تحمدي لها بالسلامه واخذي معاج حلوو وفطاير

 

[مشاعر ضايعه]

خيركم من يبدأ بالسلام
وزيارة المريض واجب وفيها اجر
حطي في بالج رايحه ترضين ضميرج وبالاول والاخير هي ام ريلج
واذا سمعتي حجي طنشي وترفعي
بتكبرين بعينهم اكثر
والله يصلح حالكم ويهديكم ويسخركم لبعض

 

[الاهله]

بحرينيه شخبارج الغاليه

انا مثلج اهل زوجي صار لي فتر طويله مقاطعتهم يجيبون لي الهم من ارجع وانا مشاكل مع زوجي بسبب كلامهم

وقطاتهم علي الله يسامحهم والله الواحد الي فيه كافي يكفي هم تاخر الانجاب الي مايحسون ويقولون هلانسانه ماتنزاد بلعكس

الله يعينج وانا حاسه فيج لان وضعج واجد يشبه وضعي الله يعينا بس

 

[الجوهرا]

ماقصروا البنات معاج والله يكون معاج وتخلص زيارتج على خيييييير

 

[بحرينيه كوول21]

حبيبااااااتي أنتو والله ينشد فيكم الظهر
عاد الموضوع كنت كاتبته امس الساعه ١٢ بالليل ومانزل الا الحين
المهم بقول لكم شصااار
طبعا ما نمت الا الفجر من المحاتات والتفكير
قعدت الصبح الساعه ٨ طلعنا من البيت طبعا انه مع زوجي
ورحت خذت هديه وباقه ورد وكنت خايفه على قلبي مقبوض
ومتضاايقه وخلاااص بهون مابروح وزوجي مسكين كان
مايبي يضغط علي وكله يقول لي براحتج
اخر شي وصلنا عند باب البيت (ام زوجي فالبيت للحين ماترقدت بالمستشفى)
ادري ان وحده من حمولتي فالبيت وتميت قاعده فالسيارة تقريبا ١٥ دقيقه
المهم دخلنا واستقبلتنا حماتي وبعدين عمتي ام زوجي قعدنا اول شي انه ساكته
ماتكلمت وكنت رسميه جداا واطالع التلفزيون
شوي والا زوجي صك التلفزيون وقال لهم سمعو يا جماعت الخير لووول
انه اليوم يبت لكم بحرينيه بس مابي الاشياء الي قبل صارت تنعاد
تراها غاليه عندي واحبها وأموت فيها واهيه كل شي عندي بالدنيا
ومابي وحده غيرها واهي ام عيالي وهذي نصيبي
انه ساكته ماتكلمت
ام زوجي ردت وقالت إحنا بعد نحبها ونودها ومانرضى عليها
حماتي قالت يالله اهم شي طاح الحطب ورد عليها زوجي قال
حتى لو طاح الحطب بس لازم نتحجى وقالي تكلمي وقولي الي عندج
احم احم يه دوري
قلت لهم ترا اي زوجين يصير بينهم مشاكل بس لما يكون في طرف ثالث
اهني المشاكل تزيد وتزيد قاطعني زوجي وقال يعني مثل ما إحنا مانتدخل
بخوانه او اي احد ثاني بالبيت بعد مانبي احد يتدخل فينا
يعني خلاص نبي نعيش
ردت علي حماتي وقالت انه اسفه وسامحيني
الا تقول ترا إحنا كنا نقول حق فلان الا اهو زوجي ان نبي نجوفج ونقعد معاج
قلت لها ترا ما كان يقول لي لان اهو يعرف حالتي النفسيه
انه ببدايه ٢٠١١ سافرت لندن مو عشان دراسه بس لان عندي انه شهاده من جامعتي
الي بالبحرين وقعدت ٤ شهور بلندن تغربت بس عشاان اقعد بروحي بس عشان افكر
طبعا انه سافرت بروحي
المهم ورجعت البحرين حالتي النفسيه ماساه ومايعلم بها الا الله ورحت تعالجت عند دكتور نفسي
انه هني قعدت اصيح وعمتي يات قعدت يمي ولمتني وبأستني على راسي مسكينه وحملني بعد يات قعدت
يمي تهدا فيني وزوووووووجي حبيبي صااااح عووور قلبي من جفته يصيح خلاص انه وقفت
طبعا صار فلم ذيج اللحظه
ووعدوني ان مايصير شي ولا يزعلوني وانهم كانو يحاولون يتجربون مني بس زوجي ما كان يقول لي ولا كان راضي
لان كان يجوف حالتي النفسيه شلون
وبعدها قمنا الا يقولون لي تعالي بكرا على غداا قلت لهم ان شاءالله ومشينا
طبعا انه همممم وانزاح من قلبي *

 

[الزيـــــ^^ـــــن]

زين الحمدالله .. مبروووك والله لايفررقكم ..

 

[نرجس الحياة]

السلام عليكم
حبيبتي اكيد راح تكون نصيحتي من نصيحة البنات من الواجب انك تروحي تزوريها وتاخذي معك هدية، ولا تنسي انهم اهلك انت كمان وهاي تسمى صلة رحم ومهما يصير هاي تكون ام زوجك مهما عملت راح تكون بنظره احسن ام ويحبها وحطي مكانك مكانه اذا قاطع اهلك راح ترضي ولا لاء؟ انت اصبر في سبيل رب العالمين وعلى وجه زوجك وربي يفرج همك ويهدي النفوس ان شاء الله

 

[Le chat]

بعد عمري فرحتلج مع اني مادري شاللي بينكم بس الله يهينج بريلج مبين خوش ريال والله يهدي سركم ويبعد عنكم الضيقه والمشاكل ويقوم ام زوجج بالسلامه

 

[صدى الجروح]

الحمدلله ياااااارب سبحان الله ان مع العسر يسرا ربي لك الحمد ماتضيق تضيق الا وربج يفرجها من واسع ابوابة ربي لك الحمد. يبات اللي تقرا رسالتي تدعي لبنتي بالعناية والحمدلله يارب ع كل حال.

 

[ام الحلوااات]

روحي هذول اهل زوجج وعيالج مايصير تقطعين فيهم منشان عين تكرم مدينه
اخذيلها معاج هديه سنعه و حلو وفطاير و لج الاجر ان شاءالله
ولو احد قط كلمه او حركه عليج ترفعي عن مستواه و جنج ماشفتيه وهو اللي بيتفشل

مــــعـــــــــاهــــــــــــاااااا :eh_s(15)::eh_s(15):

 

[Patcholli]

اسعي بالخير وروحيلها حبيبتي ترى سنه مده طويله واتوقع شي طبيعي تحسين بالظيقه والتوتر ..
وبما انج من زمان مو رايحه فشله تدشين عليهم وايدج فاضيه بوكيه ورد وصحن حلو معاج وروحيلهم
لاتطولين بالزياره ربع او نص ساعه بالكثير ومن تحسين ان في حركات هشك بشك سلمي عليهم وتحمديلها بالسلامه وردي بيتج


ونصيحه بعد لاتروحين بروحج خلي زوجج معاج طول الوقت عشان لحد يتجرا يقط حجوه مني ولا مناك لزقي فيه