أنـا كاتبة موضوع عن هالمشكلة ,,
اقريه يا قلبي .. هذا هو نسخته لك :
عنوان الموضوع :
و لا مرّة انخطبتِ ؟ تشوفين البنات ينخطبن و أنتِ لا ؟ تعالي يا قلبي فديتك ^_^
بسم الله الرحمن الرحيم
السلام عليكم و رحمة الله و بركاته
أهلين حباااايب قلبي ,, وحشتوني مرآآآآآ ,, آآآد كيــــــــــــــــــدا :ggdw:
منذ مبطي ما حطيت موضوع ,, حياكن الله حبايبي ,,
حبيت أكتب هالموضوع ,, عشان أبث الأمل في قلوب أخواتي و حبيباتي في الله فديتهن ,, ^__^
أخواتي و حبيباتي آللي تتقطّع قلوبهن عشان فلانة و علانة و غيرهن انخطبن و هن لسّة باقي بحسرتهن يتألمّن و يندبن حظوظهن ,,
كثير نسمع من البنات ,, أنـا انخطبت 3 مرّات ,, و آللي تقول أنـا انخطبت 7 مرات ,, و آللي تقول أنـا انخطبت مرّتين
و يمكن تكون الوحدة فينـا في سن زواج ,, بس ما انخطبت و لا مرّة و تسمع مثل هذا الكلام ^^ ..
فتجلس في حيرة من أمرها ,, و يداخلها شيء من الشك و الحزن و الإحباط ,,
فلانة و علانة انخطبن كثير ,, أختي انخطبت كثير ,, صديقتي انخطبت كثير ,, بنت عمي انخطبت كثير
آللي حواليني انخطبن كثير ,, بس أنـا ما انخطبت و لا مرة ,, يا ترى وش هو السبب ؟
هل هذا معناهـ إني إنسانة ماهوب مرغوب فيني ؟
هل هذا معناهـ إن سمعتي فيها خلل ؟ أخلاقي ؟ شخصيتي ؟ شكلي الظاهري ؟ نسبتنا ماهيب زينة ؟
فتجلس المسكينة توسوس و يآكلها القهر و الهم ,, و يستغلّها الشيطان أقوى استغلال !!
فـ تجلس مكتئبة و متكدرة و السبب : إن البنات ينخطبن و هي لا ,,
و يمكن تفكر تكلّم و تُقيم علاقة محرّمة ,, عشان تحس إنها أنثى ممكن تنحب و ينعجب فيها !!
الله المستعان و لا حول و لا قوّة إلا بالله ..
طيب كلمة بسيطة لكل بنوتة عسولة تفكّر بكذا و تشوف نفسها محبطة عشان المحروس ( زوج المستقبل 
) ما بعد دق الباب ,,
أقول لها يا قلبي ,,
العبرة ,, ماهيب بكثرة عدد الخطّاب ! أبدًا
أنتِ بالنهاية بتتزوجين واحد ,, ! صح يا حلوة ^__^
فما يهم انخطبتِ مرّة .. مرتين .. عشرين .. ستين << أوما عاد .. أو ما انخطبتِ و لا مرة
هذا كله ماااا يهم ,, :rerrerek:
لأنك بالنهاية ما راح تتزوجين إلا واحد ,, ما قدّامك إلا رجّال واحد ترتبطين فيه ^__^
فعلى أيش الحزن و الهم و الضيقة ؟
وش صار يعني إن فلانة انخطبت ثلاث أو أربع مرات و أنتِ لا ؟ :bbbiu:
السؤال آللي يطرح نفسه من قلب :
هل فلانة هذي تزوّجتهم كلهم ؟
عشان أتضايق إن ثلاثة خطبوها و أنـا لأ ؟
بالنهاية هي ما راح تآخذ إلا واحد منهم ,, و يا ترى هل أخذت واحد منهم ؟
و إلا حظها ما صاب مع أي واحد من هالثلاثة أو الأربعة آللي دقّوا بابها ؟
معناهـ ما فيه فرق بينك و بينها ,, اللهم هي انخطبت 3 أو 4 مرات و ما تم نصيبها ( يعني ما استفادت شي )
و أنتِ ما انخطبتِ و لا مرّة ,,
فالرابط المشترك بينكن ,, إن أنتِ ما بعد جاء نصيبك و لهذا ما انخطبتِ
و هي ما بعد جاء نصيبها و لها ما توفّقت مع أي واحد من هالخطّاب ..
شفتِ وشلون السالفة سهلة و بسيطة ؟ بس حنـا الله يهدينا مناشبين أعمارنا ما فينا صبر
و إلا أنتِ وش عندك حبيبة قلبي .. يخطبونك 6 مرّات و ما يتم الزواج مع أي واحد منهم ,, و إلا إنك ما تنخطبين و لا مرة ؟
طبعًا أكيد تتمنين إنك ما تنخطبين و لا أي خطبة ما يكون مصيرها ( زواج ) ,, صح ؟
يعني لو تطلّين على أوضاع البنات آللي حولك لابد تلاحظين هالشغلة ,, أبعطيك مثال :
بنت عمرها 25 سنة مثلاً ,,
من صكّت الـ 18 سنة و هي تنخطب ,, على مدار هالسبع سنوات ,, و لمّا صكّت الخمس و عشرين أعرست و تم نصيبها !
بنت ثانية عمرها 25 أيضًا ,,
ما انخطبت و لا مرة !! تشوف خويّاتها أعرسن و هن أمهات 18 و 20 ,, و هي لسة باقي ما أحد دق الباب !!
و يوم صكّت الخمس و عشرين ,, جاها النصيب الطيب و تزوّجت ,,
أول خاطب جاها كان آخر خاطب يجيها ( لأنوهـ تزوّجها ) ^__^ ,,
بالله وش أحسن عندك أختي الكريمة ؟ وضع البنت الأولى آللي تنخطب من يوم عمرها 18 و ما تم موضوعها إلا آخر مرة
و إلا البنت آللي ما سبق لها أن انخطبت و يوم صكّت الخمس و عشرين انخطبت و أعرست ؟
أكيد الثانية أحسن بكثير !!
أجل عاجبك يتكشّفون عليك الشباب و يشوفوك و يعرفون تفاصيل جسمك و وجهك و شعرك و زينك و حلاك
و بالأخير ما يصير فيه نصيب ؟
عاجبك يشوفك 6 أو 7 خطاب و ما تتوفقين مع أي واحد منهم ,, أما إنهم ما يعجبونك و أنتِ آللي ما تعجبينهم ؟
والله هذا قمّة الإحباط ؟
بس هذا مهوب معناهـ إني أعيب على البنت آللي تنخطب أكثر من مرة و ما تتوفق !
لا والله ما أعيب عليها بالعكس ,, بس القصد أوصل لكن نقطة مهمة جدًا
إن الشغلة من أساسها ( قسمة و نصيب )
لا يداهمك الإحباط عشان أختك أو بنت عمك أو صديقتك ينخطبن و أنتِ لا ,,
عفوًا حبيبة قلبي مهوب أنتِ آللي تحددين موعد زواجك أو مصيرك الإجتماعي عانس أو متزوّجة ,,
هذا كله قضاء و قدر !! ,, و اسألي الله من فضله و علّقي قلبك فيه و تفائلي ,,
انظري للموضوع بنظرة تفائلية ,, اخلعي نظارة اليأس من عينك !!
مهوب معناهـ إن فلانة انخطبت و أنتِ لا يعني فيك نقص أو عيب أو هي أحسن منك أو إنك أقل منها ,,
لا أبدًا حبيبة قلبي ,, ما أحد يقدر يحدد هالشي إلا الله سبحانه و تعالى ,,
أنتِ بس لو تدرين عن آللي بيصير في المستقبل أقسم بالله ما كنتِ اخترتِ إنك تتزوجين إلا بالوقت آللي الله سبحانه و تعالى مختارهـ لك ,,
لا ينبغي لنـا أن نتعامل مع الله بعقولنا الناقصة ,,
وحدة من قريباتي انخطبت 17 مرة !! سبع طعش مرة و هي تنخطب !!
و ما صار نصيبها إلا مع الخاطب رقم 17 !! يعني 16 واحد شافها و ما تم نصيبها !!
البنت قامت تشك بنفسها !! كرهت شي اسمه زواج !! صارت نفس آللي فقدت الأمل !
16 واحد يخطبها و ما يتم الموضوع ؟
يعني أنـا عندي ما أنخطب و لا مرّة أهون علي من إني أنخطب 16 مرة و ما يتم الموضوع مع أي واحدن منهم !!
لكن الخيرة فيما اختارهـ الله طبعًا ,, أنـا أريد و أنت تريد و هو سبحانه جّل في علاهـ ( يفعل ما يريد )
بالنهاية إحباطك ما يفيدك بشيء لأن أمر الله هو آللي نافذ !!
و هذا هي الحمد لله توفّقت مع آخر خاطب ( رقم 17 ) ,, و الحين ولدت و جابت ولد ,,
و سمعت إن زوجها يعشق التراب آللي تمشي عليه :ggdw:
سالفة ثانيـة ..
واحد من الشباب ظل يخطب و يخطب و يخطب و يخطب و كل البنات يرفضونه !!
ما بقى بنت ما تقدّم لها .. ما بقى بنت ما دق بابها .. و ما فيه نصيب !
الولد تعبت نفسيته !! صار يتساءل أنـا وش فيني حتى البنات يرفضوني ؟ ,,
و بالأخير أعرس على شيخة البنات !!
بنت جمال و زين و أصل و فصل و سنع و أخلاق و دين و هالبنت تصير أخت صديقتي !
و يا سبحان الله توفّق نصيبه مع أحسن البنات !! .. و من أول أيش ؟ ما فيه بنت وحدة راضية إنها تتزوجه ! @.@
يعني يا أختي الحبيبة لا تبتأسين لو ما انخطبتِ !!
لا تزعلين و تتحبطين لو كثروا خطابك و ما تم نصيبك مع أي واحدن منهم !!
لا يصير بخاطرك إن فلانة انخطبت و خلّفت قبلك و أنتِ باقي ما بعد أعرستِ
يا حبيبة قلبي لسة ما جاء ( آللي يستاهلك ) ,,
ما تدرين بمصلحتك أكثر من رب العالمين ^^
و أحب أذكرك بكلام الله سبحانه و تعالى :
{ وَلاَ تَتَمَنَّوْاْ مَا فَضَّلَ اللّهُ بِهِ بَعْضَكُمْ عَلَى بَعْضٍ }
و أذكرك بـ سلاح الدّعاااااااااااااااااااء ,,
من كم يوم سمعت محاضرة للشيخ الداعية خالد الراشد ,,
اسم المحاضرة ( أمّن يجيب المضطر إذا دعاهـ )
والله المحاضرة كلمة روعة قليل فيها ,,
نبّهتني على أشياء كنت غافلة عنها من جد !!
يا ليت تسمعونها بنات ,,
و ودي والله تسمعون قصة الزوج العقيم و الزوجة العاقر ( يعني العيب من الأثنين ) تخيّلن !! مهوب واحدن منهم !
يعني مرة حالتهم صعبة ,,
و بالأخير ,, أيش صار ؟
و السبب ؟
اسمعوا المحاضرة أزيـــن :
http://sub5.rofof.com/09wbnfm4/Am'mn_yjyb.html
لا تنسوني من صالح دعواتكن حبايبي ,,
و أسأل الله العظيم رب العرش العظيم أن يرزق جميع الأخوات أزواجًا صالحين أتقياء
و صلِّ اللهم و بارك على نبيّنا محمد و على آله و صحبه أجمعين
احترامي و تقديري
ترانيم القصيم 
