انا مدرسة رياضيات ابتدائي ادرس 4و1 اي مساعدة انا جاهزة

[كويت النهار]

السلام عليكم يا امهات
الله يقويكم ويصبركم
انا حبيت ازكي العلم الي عندي واساعدكم في شرح المنهج وكيف توصلين المعلومة لبنتج او ولدج

انا راح اشرح درس درس من الفترة هذي للصف الرابع و الاول

تابعوني في شرح العدد الزوجي والفردي للصف الاول

وانماط الضرب للصف الرابع

 

[سيدة الكويت]

الله يعطيج العافيه وعساج على القوه

انزين تشرحين رياضيات منهج امريكى

 

[السنعة2]

جزاك الله خير

 

[*ماي الورد*]

ييتي بالوقت المناسب حبيبي و جزاج الله خير
يننا منهج الرياضيات مال رابعة وايد صعب
ومال اولى سريع مايمدي يخلص مهارة الا يدش بالثانية

 

[القرآن ربيع قلبي]

الله يجزاج خير ويجعله في ميزان حسانتج

قواج الله وكثر الله من امثالج وابشري بالاجر

 

[كويتية صغيرة]

ان شاء الله بميزان اعمالك
جزاكي الله خير

 

[كويتيه مول]

واللي يعافيج ركزى على منهج اولى سريع بصراحه
والطالب صعب يركز ساعدينا الله يجزاج خير

 

[حلم الطفولة]

مشـكوره ماتقصرين ... ناطرينج ونبي نشوف موضوع متميز ان شالله

 

[هدولى]

يعطيج العافيه .

 

[كويت النهار]

مشكووورين وماسوينا شي هذا واجبنا
معاكم حق المنهج سريع جدا لان المفروض لطالب متاسس من الرياض نفس الاجانب وعشان يكون المنهج له فايدة لازم الوزارة تطور رياض الاطفال ويدرسون الارقام وهكذا
"]اليوم راح اشرح درس العدد الزوجي والفردي لاولى



بداية لازم الطفل يربط بين الكلمة ومعناه باللغة العربية عشان تثبت معاهم المعلومة

يعني جيبي لولدج فردة حذاء واحدة من احذيته وقولي له هذي كم فردة ؟؟؟ يقول واحدة تقولين له فرد يعني واحد <<<تعيدين فيها

انزين لو احط الفردة الثانية جنب بعض شنو نسميهم ؟؟؟ زوج من الاحذية ليش زوج لانهم مع بعض مايصير البس فردة واحدة لازم اثنان مع بعض يعني زوج معناها اثنان مع بعض <<<<< تعيدين عليه

مثال اخر :: الحلق (تراجي ) الترجية الوحدة نسميها فردة يعني فرد يعني واحد
انزين الترجية احطها لحالها والا لازم ثنتين ؟؟ لازم اثنين مايصير اخلي اذوني بترجية وحدة
اذا ترجيتان( مع بعض)انتبهي لازم مع بعض نسميه زوج


الان انتقل للدرس

كيف اعرف الارقام اذا فردية او زوجية؟؟؟؟

الرقم الفردي هو الذي استطيع ان اوزعه على شكل ازواج ويبقى واحد واحنا قلنا كلمة واحد تساوي فرد اذا رقم فردي

مثال العدد 1 اهو فردي لانه واحد
العدد 3 كيف اعرف اذا فردي او زوجي
انتي خليه يرسم العدد كله على شكل ازواج مثال يرسم دوائر
راح يصير دائرتين مع بعض بمجموعه ودائرة بروحها اذا بقي واحد اذا واحد هو فرد اذا فردي
وهكذا على الاعداد الفردي وهي 1-3-5-7-9

الاعداد الزوجي:
هو العدد الذي استطيع ان اوزعه على شكل ازواج (اثنان اثنان ) والباقي صفر
مثال
العدد 4
راح ارسم دائرتين مع بعض بمجموعة ودائرتين مع بعض والاحظ اني وزعت العدد اربعة علة شكل ازواج ولم يبقى شيء
اذا العدد 4 عدد زوجي

وهكذا على باقي الاعداد الزوجية
2-4-6-8-10

اي استفسار انا جاهزة

 

[الحراير]

مشاءالله شرحج حلو ونبي بعد مسائل وضرب شلون نعلمهم والله مليت من المدرسين
والله يجزاج خييييييييييير ماقصرتي

 

[سيدة الكويت]

كويت النهار ...شرح روعه الله يحرم ايدج من النار

وفكره الدوائر حلوه ....كملى واحنا بانتظارج

 

[الحراير]

وووووووووينج كويت النهار محتاجينج كملي

 

[بدوية اصيلة]

مشكووووووووووورة يعمرى ما قصرتى وعيدكم مبااااااااااارك

 

[كويت النهار]

عيـــدكــم مــبارك

ســوري تاخرت عليـكم

وألحيــ،ن بــكمــل لـكــم الــشرح

الصف الرابع ( أنماط الضرب )

الضرب في 2

نواتج الضرب في 2 دائما احادها زوجيه
اي 0,2,4,8

مثال 2x 35 = 70
نلاحظ ان العدد 70 احاده صفر ( زوجي )

سؤال هل العدد 954 ناتج ضرب عدد ما في 2 ؟ نعم لان احاده 4 (عدد زوجي ) <<<< يعني يقبل القسمة على 2

 

[كويت النهار]

أنماط الضرب في 9

أي عدد يضرب في 9 ناتج الضرب مجموع أعداده يساوي 9

9x3 = 27 <<<< اجمعي ارقام الناتج 27 ( 2+7=9)

325 ضرب 9 =2925 <<< اجمع الناتج 5+2+9+2 = 18 <<< اجمع لاحصل على رقم واحد يصبح 1+8 = 9

 

[دانة الدنيا@]

مشكوره ويعطيج العافيه انا ولدي برابع ابتدائي وبنتي باولى ودايخه بينهم

 

[كويت النهار]

دانة الدنيا اي سؤال انا بالخدمة حتى لو على الخاص

 

[الحراير]

ابيج توضحين جدول الضرب اكثر لرابعه ابتدائي والله يوفقج ويجزاج خير

 

[الصابرة المحتسبة]

يعطيج العافية يقلبي وجزاج الله خير

ويعل ربي يسمح دربج ويشرح صدرج ويسخرلج عيال الحلال ويرزقج أطيب ما في الدنيا اللهم آمين