انا والدوام

[ريــمـ]

من اول الصبح وانا خنقتني العبرة وودي افضفض
انا كملت اسبوع من توظفت

بحاول اغطي اللي مضايقني وتحملوني

انا بكل صراحة توظفت بواسطة

عمي إنسان واصل الله يزيده من فضله

بس اشدد على نقطة اني انا ما طلبت مساعدته إلا بعد ما ركضت من مكان لي مكان لمدة سنة

ولما ياست من اني اتوظف لجأت بعد الله لمساعدة عمي

والله أكرمني بوظيفة ف مكان حلو


يا بنات انا قبل هالوظيفة اشتغلت متطوعة وبعد ما اخلص المدة اسمع من رفيجاتي اللي فنفس الدائرة أنهم وبعد سنين لازالو يشيدون فيني ويسالون عني لأني اتعب وأهلك عمري وكل هذا لأني أموت ف تخصصي وأعشقه ومايهمني التعب بس تهمني لذة الإنجاز والله تغمرني الفرحة لما اخلص شغلي وكان ويمر الوقت كانه ساعة وأبقى لي بعد ساعات الدوام واشتغل على المطلوب وغير المطلوب

بس مع هذا كله مالقيت وظيفة وبعد طول انتظار توظفت ومتحمسة حدي وقاعدة أحاول أبذل كل اللي عندي

بس للاسف تحطمت والله

تخيلو ياتني موظفة على اول الصبح وتحاجيني بكل برود ولا كأنها قاعدة تقط علي حجي يبط الرأس
ليش معينينج عندنا؟ ماكو وظايف شاغرة ولو مقدمة فال دوائر اللي فيها نقص أحسن لج ولا تخبرين باجي الموظفين اني قلتلج هالكلام بس كلهم يسألون

حسيت كان كفخوني وحبست دمعتي غصب

انا لقيت وظيفة عشان اتشرط ؟؟؟


حسستني اني انا زيادة عن حاجتهم ومب مرغوب فيني وكررت كلمة ماكو نقص اكثر من مره

وبالفعل قمت ألاحظهم يتكلمون عني شعور يألم ومب حلو ويجرح


والله اني محتاجة هالراتب وأهلي متاملين فيني

الظروف صعبة والله اعلم بالحال والله والله اني حاطة امي وأبوي جدام عيوني وماتخيل اني اخذلهم ومتحملة لعيونهم ولو مب محتاجة هاذي الوظيفة مستحيل أتحمل هالاهانات اللي قاعدة أشوفها بشكل مباشر كأني جماد او كرسي او طاولة

والله لو مب الحاجة والله والله لو مب الحاجة

شو اسوي؟

 

[floragucci]

لا تسالين فيهم اكبر طاف

اهيا لو عندها شغل جان مانشبت لك وقعدت تحبط فيج وتحش فيج

تقريبا هذا الوضع بكل وزارات الكويت موظفين زياده عن الحاجه بس مو معناته مانشتغل

تلقينها اهيا مقزرتها مرضيات واستاذات

ماعليج منها داوم كل يوم وبكل تفاؤل وشقي الضحكه واذا عندج وقت فراغ اقري كتاب او دخلي النت او دقي على احد سولفي معاه

اهم شي ضحكي جدامها واذا طولت لسانها قوليلها انا مثل ماتعينت هني اقدر اطردج من وظيفتج او انقلج اخر الدنيا باتصال واحد وقفيها عند حدها

موفقه

 

[لبى ابو متعب]

ماعليك منهم يا اختي
خلك ياجبل مايهزك ريح
خلي كل همك بشغلك ولاكأنك تشوفين احد
والله ياااااااااارب يوفقك ويرزقك

 

[كويتيه فرنسيه]

خل تولي زين اخاف وزارة ابوها

عادي كل الوزارات جذي الاغلب قاعد من غير شغل او يبصمون ويردون بيوتهم

اذا كلمتج مره ثانيه قولي لها لااشتغلت في وزارة ابوج تعالي تكلمي زفيها تلقينها محتره منج وعشان جذي تحاول تستفزج

 

[Lubna85]

"إن لم تكن ذئباً أكلتك الذئاب"

حطيه شعارج بالدوام، البنات ما يرحمون بالدوامات وبالحكومة أردى وأردى، الوزارة مو وزارة أبوها، ومو اهي تقرر وين يحطونج، وانتي خلج واثقة من نفسج وشوي شوي بيتعدل الوضع وبتعرفين كل بنت عدل ومنو اللي تقعدين معاه ومنو اللي بس تسولفين وياه شوي ومنو اللي تتجنبينها نهائيا بس السلام وعليكم السلام..

طبعا ليمن حطيتلج الشعار ما أقصد صيري شريرة، لا بس راويهم إنج مو سهلة ولج شخصية قوية، ومو كل من هب ودب يقط عليج كلمة تسكتينله، وإذا من الحين ما راويتيهم إنج قوية، بياكلونج، وإذا على كلامج إنج ماشاءالله شاغولة، فاشتغلي وثبتي نفسج، بس مو يقصون عليج ويكرفونج كراف واهم جاي وقهوة، سوي بس اللي تتطلبه وظيفتج لا غير..

والله يوفقج، وتفاءلي بالخير، الشغل نعمة والله، مو بس فلوس لا بالعكس هم يكون لج شي تسوينه وحياة، والله يكتبلج اللي فيه الخير

 

[ماكواسم2]

امبيه انتي قصة .والله البنات باجر يقطونج بمشاكل وتطلعين بفضيحه ..حبييتي كبري عقلج وكوني حريصه وانا مع الاخت اللي قالت : قولي مثل ما توظفت اهنيه اقدر اشيلج .......... بصراحه كسرتي خاطري

 

[oshi_q88]

خلييهآ آتوللي مآعلييج منهآ خو ببعد لايكون على حسسآب آبوهآ
خلييج بششغلج وٍسمعي مني وطلعي منآك
مآعلييج من آي آحد ولا تدخلين بششي ولاتختلطيين بششششي

 

[افريقيا]

قعدي بمكانج ومالج شغل بحد ولا تحجين مع اي احد قعدي ساكته بس تكلمي بالشغل اللي ايج يعني معاملة

او المسؤول يطلب منج شغل ولهي نفسج بكتاب او نت اذا كنتي فاضيه وذا احد تكلم عن فلان وعلان لا تكلمين

عنه و لا تنقلين حجي سمعي وسكتي

 

[نـعـومـه]

اهيه شكو ؟؟؟

لا مسؤول ولا مدير

جان قلتيلها ليش حرام اتوظف ؟

لاتعطينهم ويه ترا حقاره الهاديه الطيبه يدوسون عليها انا بنات دوام الاحظ يحشون فيني كنت اضايق عقب قلت بطقاق اهمه اللي بيتآثمون وانا باخذ اجرهم بس اذا زاد الشي عن حده حاولي تنقلين مكان ثاني

 

[M!ss Pa!n]

جان قلتي لها ليش عسى ماشر انتي الي بتعطيني معاش اخر الشهر ؟ ولا الوزارة وزارة ابوج وانا طرارة ياية

حالي من حالج اشتغل ومالج شغل فيني انتي تادين شغلج وبس انتي مو المسئولة ولا المديرة حتى تتفلسفين علي

وي اما ناس تقهر بعد !

 

[Patcholli]

اللي تكلمت موظفه
لاهي مديره ولاهي مسؤله ولاهي وزارة ابوها
قوليلها المكان لو مافيه شاغر جان مايابوني وجان ودوني مكان ثاني
وانا الحمدلله لاني زينه واشتغل كل مكان يبوني حتى لو مافيه شاغر يطلعونلي شاغر من تحت الارض
ولاتحرقين قلبج عليها شكلها شايفه شغلج وميته قهر تخاف تاخذين مكانها

 

[Shinexo]

شتبي ؟

حقريهآ تولي بدل مآترحب فيج تسوي جذي صج مآتستحي ,

تلآقينهآ حآقده ومآتبي حد يكون آحسن منهآ ,

حسني علآقتج في آلبآقين آلآ هي بس لآتعطينهم ويه زود و لآتخلينهم يمسكون عليج ممسك ~

آلله يسهل عليج شغلج :*

 

[عـيّــآره]

ليش الراتب ينزل من جيب ابوها

تولي ماعليج منها

واللي تغثج وقفيها عند حدها هالنوعيه من الناس مايفهمون الا لغتهم

اي والله ليش مداومه اخ بس ليتني مكانج جان صارت علوووم ​

 

[Om.hsoone]

من صجج معوره راسج و قلبج ع شان وحده الله يستر عليها قطت وجهها و قالت كلام الجهال بس يقولونه !!
والله اداوم و استانس بدوامي و اللي مو عاجبه الطوف تارسه الوزاره خل يطقون راسهم بكل الطوف
بس اخاف طاقه باب بيتها تطريين منها ؟؟ و الا تاخذين من جيب ابوها المعاش ؟؟
اصلا المفروض راده عليها الرد السنع و مع ابتسامه عرييييضه قولي حبيبتي نص الوزارات مو محتاجه موظفيين بس شنو تبين الناس تقعد ببيوتها تنطر تفضى الوزاره !!!
و هي الظاهر شافت كلامها اثر فيج و كان مبين ع وجهج الضيقه قامت تزيد

 

[قلب زوجي وولدي]

حبيبتي توج اسبوع الله يعينج على الدوامات والبنات

خلي عندج لسان وذيبه ومحد بيتعرض لج

وللي تكلمج ردي عليها لا تكستين وزارة ابوها عشان تتكلم

 

[زهره الخليج]

الله يكوون في عونج ياقلبي..

هذي مشكله الحكووومه جذي موظفينها ...... انا نفسج كنت متحمسه وشاده

حيييل لدرجه وحده من موظفات دقت علي مسؤله الشعبه وقالت لها جات بنت تشتغل

ومن جات (حسبي الله نعم الوكيل عليها ) ورتني نجوووم قايله ... لانها ماتبي حد يشتغل عندها

تبي فقط حش وقيل وقال .. لانه تبي سنع ومدح لها عند المسؤؤل والباقي تبيهم يحشوون وطالعات

ياليت القدمااااااااء الاغلبيه منهم ينشالون ......مالهم لزمه ويجطوون شباب توووووه متحمس






الله يكون في عووونك هذووول يبون حش ويقيل وقال فقط ....... تخيلي انا صرت نفسهم الحين

بس شلت نفسي عن الحش وقيل والقال ,,,,,, الي ان افرجها ربنا بمسؤله توها جايه من برها

شالت كل الخمه مايشتغلووون وان شاء الله رئيسه شعبه تلحقهم ,,,,,,



مالك شغل فيهم ياقلبي ,,, سوووي شغلك ولا تسمعييين كلامهم رااح يهد حيلك مثل ماهدوو حيلي

الله يهد حيلها مثل ماسوويت فيني ,,,,

 

[زهره الخليج]

شكلك توووك فرش ماتعرف الموظفات الحقيرات البعض منهم ,,

1ـ خلييك بارده وسريعه الرد ,,, في اي غلط او كلام عادي يتكلمونه معاج
2ـ لا تحشين وان حشووو قوومي عشان ماتثبت عليج
3ـ ان وحده زعلت علي ثانيه ومعها الحق وقالت زعلي معاااي وتعالي عندي سوولفي خليها
تولي ومالك شغل فيهم بطقاق فيهم
4ـ قطوو كلام ونقزاات لفيي عليهم وقولي عن منو تتكلمون عني وان ردووو باسلوب وقح علي طوول
للمسؤل وان مانفعك قول انا مقدمه شكووه عليهم لا تخااافين والله يخااافون منك

ان كنتي بنت مو ام لساااااان

5 ـ اي سالفه عند مسؤؤل وقولي عن انجازاتك وكل ورقه للانجازاتك او فكره عطيه وخليك بنت قدام عيوونه

عشان لو اشتكوو يعرف انه بنت شغيله ,,لانه وانا اختك ماحد راح يمدحك عنده ان كان هذووول معاج موظفات
الخمه

لو قدرتي تنتقلييييييييين حاولي يصير ان كنتي اداراه تنتلقييين الي الاقسااااااام الثانيه عن طريق مسؤل الي مسؤل

الثاني,

ان بغيتي شي ردي ل برساله لاني ماارجع الي كتبته


وربي يحفظج من هذوووول الموظفااات الخمه

 

[الجادل الطرقا]

جان قلتيلها وين الأماكن الشاغرة؟ وظفيني فيها
هذا رزقج سواء من واسطه ولا لأ هذي الوظيفة الله اللي كتبها لج
وانتي ما تشتغلين عندهم ولا هم بيدفعون راتبج من جيبهم
خلي شخصيتج قوية حياة العمل غير أيام الدراسة
بعد فترة لما يعرفونج عدل ويحتاجونج بشغل راح تتغير نظرتهم لج
والله يوفقج إن شاء الله

 

[كويتية طيبه حنونه]

خليها تولي ومالج شغل فيها اكيد اهي تشوف ان انتي افضل منها يا شهادة يا اكشخ يا تكونين احلى منها او انها تشوف انج افظل منها بشي معين او ان الكل يهتم فيج لأنج موظفه جديدة
بعدين البنات بالدوام كل وحده تناشب الثانية
داومي ولا تهتمين منها يمكن تحتر وسامعة انج مشتغله بواسطة ومكانج راقي خايفة من واسطتج انها تميزج عنها او عن كل البنات كوني نبيه بالتعامل معاها ومع غيرها
ولما تكلم بكلام ما يعجبج عطيها نظرة ونزلي راسي كانج تستهزاين منها ولا تردين عليها خليج راقيه بطريقتج معاها ومع الكل وفرضي احترامج عالكل لا تقعدين مع اي وحده من صديقاتها او غيرها خليج بحالج ولا تبجيين كلشعشان ما تعرف نقطة ضعفج وتعاملي مع مسؤلينج بثقة مو تبجين
والشغل اصلا ماله علاقه بالمادة محتاجة ولا مو محتاجه العمل للمراة يعتبر كيان لها
عاد ياما بتشوفين اشكال تلوع الجبد وتغث
الله يحفظج حبيبتي

 

[Zinab BH]

حقريها حبيبتي ولا كأنج تسمعينها واذا يت تتشكى قولي لها روحي كلمي المدير اذا عندج اي اعتراض على وجودي و اكليها تبن ولا تسكتين عنها خل تولي هذا رزق من الله لا تعيفينه ولا عليج