من جد مو سهلين هالحريم
وحده زوجها دايم يدعي عليها
و بيوم من الايام زميلتي كانت تصحي زوجها لصلاة الفجر بصوت عالي لان نومه ثقييل
المهم الرجال عصب وقام وهو زعلان وقال بدعي عليك بين الاذان والاقامه يارب يجعلك البكم وماعاد اسمع صوتك بحياتي
وعاد هي من النوع الي بالها طويل
رجع زوجها من الصلاه وهي نايمه على سريرها ويناديها يا فلانه يافلانه ابي فطور وهي ساكته هو استغرب لانها دايم ترد بسرعه!
راح عند اذنها وناداها ابد ماترد قام الرجال يحركها ويقول فلانه فلانه قامت وهي تناظر فيه وساكته
قالها اكلمك انا!
حركت يدينها تفهمه انها ماتقدر تتكلم قالها شلون وتاشر بكتفها تقول مدري
انصدم وجلس يستغفر ووجهه مقلوب وهي ساكته!
وراح الدوام وكل شوي يتصل فيها وتفتح الخط وهي ساكته انهبل الرجال وندم
رجع البيت وجلس يحاول معاها تنطق ولكنها ماقدرت،ووداها المستشفى وصلحت فحوصات في قسم النساء وطلعت ومعاها ورقه وقلم ولمن سالها زوجها كتبت تقول الدكتوره انتي طبيعيه 100% ولكن السبب مو واضح!
قال لها بوديك بكره لشيخ يقرا عليك يمكن يفرجها الله! ووداها للشيخ ولمن قرا عليها كانت طبيعيه 100%ماتاثرت ولاشي!
قال الشيخ مادري يمكن المستشفى ينفعها!
زوجها احتار وعرف ان اللي صار بسبب دعوته بس ماحب يقول لها شي!
رجعوا البيت كتبت له بورقه(هذا جزاي اني حريصه عليك من الذنب تدعي عليه بهذي الدعوه لكن ماقول الا حسبي الله ونعم الوكيل)وكتبت له انا نفسيتي تعبانه ماقدر انام جنبك بنام لحالي، زوجها تحسف تاسف لها واعتذر!
ومرت على السالفه ثلاثه ايام وراح زوجها جابلها هديه خاتم ذهب واليوم الرابع جاب لها ورد ويعتذر منها،وهي تقول كتبت له انا ماعاد اقدر اصحيك للصلاه لانك ماتقدر تسمعني وش لسواة؟
قالها عادي هزيني من كتفي وبصحى
صارت ترش عليه مويه ويصحى وهو مفجوع بس يسكت لانه مايبي يزعلها ! ومر اسبوع والوضع مثل ماهو والزوج صار شايل هم بالدوام مايكلم احد وبالبيت يترضاها ويفكر في علاج لزوجته وصار يقرا عليها ويجيب لها ماء مقري فيه ووصى على موية زمزم ويتفاهمون مع بعض عن طريق الاوراق والكتابه وتعدل زوجها معها كثير وتعدل بصلاته ولكن بعدايش! صارت كل صباح تكتب له كلام يقطع قلبه المهم بعد اسبوعين من الوضع هذا بدات تتكلم وسجدت سجود شكر وهي كانت تمثل عليه طبعا بس ماعلمته للحين وهو انبسط ووعدها يوديها تعتمر=d
إن كيدهن عظيم خوش حركه =d
