بزور الكويت لمدة 3 ايام .. ساعدوني.. ايش الاماكن اللي لازم ازورها ؟؟

[حلوة و خليجية]

السلام عليكم

ما شالله عليكم المنتدى عجبني كثير و الحلو انكم متعاونين و يدكم وحدة

انا انشالله بزور الكويت بكره و لمدة 3 ايام فقط ؟؟
بحثت في النت لقيت اماكم كثيرة و احترت .. وش رايكم ايش الاماكم اللي لازم ما افوتها ؟؟

و عندي سؤال ثاني ؟؟
وين الاقي محلات الملابس الكويتيه ؟؟ صراحدموديلاتكم عجيبة و مميزة و ما في منها عندنا ( على فكرة انا جارتكم من السعودية)

شكرا لتعاونكم :yaaaaaarb:

 

[ام الحلوووين]

حياج الله ياقلبي والكويت بتنور

حسب ياقلبي شنو قصدج بملابس الكويتيه دراريع والا بدلات

ووين بتسكنين عشان نقولج الاماكن القريبه ومايضيع الوقت

 

[ام الحلوووين]

انتي من وين من السعوديه >>>>> حدي ملقوفه بس لا بجي والله وابي اسالج بعد خخخخخخخخخخ

 

[حلوة و خليجية]

رد : بزور الكويت لمدة 3 ايام .. ساعدوني.. ايش الاماكن اللي لازم ازورها ؟؟

حياك الله اختي قصدي البدلات يعني مثل ملابس شوجي و الممثلات الكويتيات مثلا لمياء طارق ؟؟

انا من الدمام و اي شي تبين بالدمام ة الخبر انا حاضرة لعيونك
شكرا

 

[ام الحلوووين]

حيالله من جا

شوفي حبيبتي اذا بسكنين بالمنطقه العاشره وحلو وارخيص نفس اللي انتي تبين

عندج البيرق تلقينه في منطقه العقيله و كويت ماجيك في ابو حليفه وعندج الكوت في الفحيحيل

وهذولي كلهم بينهم وبين بعض مشوار 10 دقايق وكلهم فيهم اللي تبين واسعارهم حيل زينه

اما داخل الديره عندج الافنيوز كبير واحس اغلبه سبورت بس حلو وعندج سوق شرق وعندج الفنار والمارينا والمهلب

واذا بغيت شغل ماركات الرايه الصالحيه بس غااااااااااااااااااااااااااااااااااالي

وحياج واي شي حاضرين راسليني ع الخاص لاني ماارد للموضوع

 

[فرووتي]

البدلات هني راح تعجبج حيل

ومثل ماذكرتلج ام الحلوين .. وعندج بعد مجمع الحمرا مول والعربيد بلازا يم بعض بالفروانية لبسهم حلووو

واذا تبين دراريع حلوة واسعارها زينه تلقينه بالعربيد مال الدراريع ورا جمعية الفروانية

وانصحج بالافنيوز والتمشي فيه والقعده والمطاعم الحلوة

واذا تبين الاماكن الشعبية عندج سوق المباركية << مالك الا سوق المباركية يا ولد الحجيه

واذا عندج اي استفسار انا حاضرة

وحياج الله بديرتج الكويت :*

 

[غَـنْـجَـى و دَلـوعْ]

الملابس اللي تبينها تلقينها بالمعارض حق المصممات الكويتيات ، دشي قسم كويتيات مول للأزياء و شوفي إعلانات المعارض وين صايرين و اختاري اللي قريب من مكان سكنج و روحي طلي عليهم

و إذا تبين شغلات حلوة و رخيصة روحي مجمع البلوكات اهوا سوق أقمشة و الدور اللي فوق كله خياطين
تلقين عندهم جلابيات و مرات فساتين و بدل جاهزة و حلوة و أسعارها أحسن من المحلات و المعارض ..

لازم تزورين الأفنيوز بس روحي له الصبح
لأنج لو رحتي بالليل منتي شايفة فيه شي من الزحمة و بتلوع جبدج روحي له الصبح مبجر أحسن ..

روحي مارينا مول مجمع حلو و صغيرونو و يمه بتلقين مارينا كرسنت كله مطاعم حلوة و صاير ع البحر و قعداته حلوة

روحي المركز العلمي إذا معاج عيالج حييل حلو و هم زوري مجمع 360

روحي مجمع الكوت و المنشر هذول صايرين يم بعض بمنطقة الفحيحيل و حيل هااااديييين ما تلقين فيهم الزحمة إلا بالويك إند


بعد وين وين يا بنات ؟؟؟ ؟؟؟ ؟؟؟



و حياج الله بالكويت ..~

 

[sweet_fatooma]

تبين فناتك واشياء غريبة روحي بيت ديفا بشرق يم مستشفى الاميري
ودار يوشا بيوت الغانم يم الكنيسة

 

[ذهـبـيـة ~]

رد : بزور الكويت لمدة 3 ايام .. ساعدوني.. ايش الاماكن اللي لازم ازورها ؟؟

أول شي حياج الله بديرتج الثانية الكـويـت :eh_s(17):

روحي الأفنيوز ، مجمع كبير وكل شي فيه ملابس اكسسوارات وتكرمين جواتي و جناط .. اللي تبينه

وفيه كافيهات ومطاعم واايدة وسينما كبيرة ،، راح يعجبج :eh_s(22):

عندج مارينا مول و سوق شرق و 360 وديسكفري و سوق السالمية واايد حلوين

مجمع البيرق و المنشر و الكوت و كويت ماجيك ..

و إذا تبين أزياء راقية عندج واايد مصممات روحي طلي عالمعارض ..



وحياج الله :33_1185028183:

 

[حلوة و خليجية]

رد : بزور الكويت لمدة 3 ايام .. ساعدوني.. ايش الاماكن اللي لازم ازورها ؟؟

مشكورين و جزاكم الله خير كلكم ما قصرتو

بس دخلت كويتيات مول ما لقيت محلات المصممات ؟؟؟

اذا ممكن احد يدلني على كم محل بالسالمية او حولها ؟؟

 

[سعادتي برضى ربي]

رد : بزور الكويت لمدة 3 ايام .. ساعدوني.. ايش الاماكن اللي لازم ازورها ؟؟

تبين فناتك واشياء غريبة روحي بيت ديفا بشرق يم مستشفى الاميري على البحر
ودار يوشا بيوت الغانم يم الكنيسة (نفس كلامها )

والبلوكات في منطقه شرق ضروري لانه فوق في خياطين واشياء بتعجبج

واذا معاج اطفال تبين تلعبينهم ديسكفري

 

[مطيـووره]

رد : بزور الكويت لمدة 3 ايام .. ساعدوني.. ايش الاماكن اللي لازم ازورها ؟؟

عندج العربيد حلو حق دراريع ويمكن تلاقين موديلات حق نفانيف قصيرة وحياج الله

 

[حلوة و خليجية]

رد : بزور الكويت لمدة 3 ايام .. ساعدوني.. ايش الاماكن اللي لازم ازورها ؟؟

مشكورين و ما قصرتو
اختي مطيورة مجمع العربيد وين الاقيه ( العنوان )
شكرا

 

[♥ SWeeRa ♥]

رد : بزور الكويت لمدة 3 ايام .. ساعدوني.. ايش الاماكن اللي لازم ازورها ؟؟

حبيبتي مجمع العربيد مال الدراريع غير العربيد السوووق
وكلهم بالفروانيه ..

وعربيد الدراريع يبيلج فرفره ومزاج رايق
"عربيد الدراريع عند جمعيه الفروانيه"



تلقين دراريع قصيره ودراريع طويله ..

 

[فوشيه عجيبه]

البنات ما قصرو مشالله عليهم