بنت المنصور
New member
- إنضم
- 6 نوفمبر 2009
- المشاركات
- 1,706
- مستوى التفاعل
- 0
- النقاط
- 0
ادري ان حنا في مجتمع فيه قوانين وتحكمه ضوابط ولو مافي قانون المجتمع يصير كانه غابه و الانسان لازم يلتزم بالقانون
عشان نعيش بمجتمع سلس ومرن وبعدين يرتقي المجتمع وبالتالي نرتقي معاه .....الخ
بس في ناس تحت القانون وفي ناس فوق القانون وفي ناس بين وبين وهذا شي الكل يعرفه ، الحياة ماهي منصفه
بكل الكره الارضيه ...
طبعا الحين انتو كلكم تسالون شنو الموضوع؟ انا اقول لكم شنو الموضوع
اليوم وانا طالعه من الكليه وانا بالشارع كانت في دوريه مرور واقفين على صوب بالشارع ويشوفون اي مخالفات
بالسياير بحكم طبيعة عملهم ، وانا مشاء الله علي الليسن منتهي من سنه ولا جددته والسيارة التامين منتهي وما جددته
ومخالفه بكذا شغله بعد فاول ما شفت الدوريه قلت اوف الحين شيفكني المهم انتبه طبعا هو علي ووقفني على صوب
وكان موقف كذا سيارة غيري بعد مخالفين ، المهم ياني يكلمني يقول لي ابي الليسن وطبعا عطيته وهو منتهي وشاف
بالكمبيوتر عنده انو السيارة مومؤمنه وكذا شغله مثل ما قلت لكم فقال لي من وين ابدي ووين انتهي انتي مصيبه
لووووول الريال مسكين كان قمه في الاحترام والادب معي ، السيارة الي جدامي كانت فيها حرمه تقريبا بالاربعين من
عمرها وما ادري ليش كان موقفها يعني ما عرفت شنو مخالفتها في هاذي الاثناء الي هو يكتب لي مخالفه فيها
مر ((امير)) بسيارته والظاهر انه طالع طلعة شخصيه يعني ماكان معه احد ماشي بسيارته برورحه وطبعا
الامير بسيارته كان بكل شي مخالف بكل شي وطاف بهدوء ومافي احد كلمه طبعا في هاذي الاثناء
سلمني الاخ المخالفه بكل ادب وانا اخذتها بالوقت هذا نزلت الحرمه الي بالسيارة الي جدامي ويات
حق الريال الي قاعد يسلمني المخالفه وقالت له ليش ماوقفت فلان الفلاني من شوي طاف وما اشوفك كلمته
قال لها يا طويله العمر انا مالي سلطه عليه هذا امير انا ما اقدر اكلمه قالت له اها يعني لك سلطه علينا
انا ما باخذ المخالفه ولا بدفعها وبدت شوي شوي تعلي صوتها عليه وشوي شوي بدت تسبه !!! ليش هذا
موعدل وهذا ظلم وما ادري شنو انا ما باخذ المخالفه لو شنو تسوي ومستمره بالصراخ جدام الناس!!!
اولا: ماله داعي ترفعين صوتج جدام الناس وعلى الريال لان طول عمرنا تربينا انو من الذرابه انو صوت
الحرمه مايعلى عن مستوى معين ...
ثانيا: الاخ الي طاف هو (( امير)) فشي طبيعي القانون مو عليه هو يعني لو الي طاف شخص عادي حاله من حالنا
وماعطاه مخالفه من باب انو والله من جماعتنا ولا من اهلنا ولا صاحبه هني لج الحق انج تعصبين وماتاخذين المخالفه
لكن الي طايف امير يعني شي طبيعي انو بيكون غير ، الحين مدير قسم وهو مدير قسم يكون له مميزات غير عن
باقي الموظفين فمابالج بأمير؟؟
ثالثا: الريال المسكين هذا الي واقفه تهزاينه لو وقف الامير بس وقفه راح ينفصل من شغله بنفس الدقيقه وهو يمكن يكون مسؤول عن عايله وعلى الله و على معاشه ....
بتقولين ظلم؟ موعدل؟ في قانون؟ احنا دوليه ديموقراطيه؟ دوله ماترضى بالغلط ؟ القانون يكفل لنا المسواة؟
بقولج بسج احلام ورديه واخذي المخالفه وانتي ساكته ....
لي متى بنعيش بالخيال ؟؟ صحيح في اشيا لازم تتطبق لكن بنفس الوقت في اشيا واضحه جدام عينا
في طبقات في مميزات لكل طبقه ومافي ديره بالعالم كله الامير والمواطن العادي يتساون فيها بالحقوق
والواجبات وبعدين اذا بتتكلمين عن الظلم والعدل انتي الحين يمكن حتى وظيفتج ماخذتها بواسطه هذا مو ظلم
لغيرج ؟يمكن كان في احد احق فيها بس بواسطاتج قدرتي تاخذينها صحيح لو انج مو كفوء ما استمريتي فيها
بس هو ممكن كان بياخذها لولا الواسطه تدخلت وخلتج انتي مكانه هذا مو ظلم؟ ولا لان الموضوع بصالحج صار
غفورا رحيم ولما يكون مو بصالحج شديد العقاب؟ وغيرها من الامور الي ممكن تمر علينا ممكن تكون بصالحنا
بس هي ظلم لغيرنا وممكن تكون بصالح غيرنا وظلم لنا ....
هدفي من الموضوع كله انو انا مع القانون ومع تطبيقه وبنفس الوقت مع ان الواحد يتقبل انو في امور اكبر منا
وطبقات ممكن تكون لها مميزات اكثر منا و ماله داعي نحمل الاشخاص الي مالهم ذنب المسؤوليه مثل الشرطي هذا
مسكين يعني الحرمه الي ماعجبها الموضوع وتبي تصارخ وتتكلم ماله داعي تطلع لسانها على المكسين هذا عندج
لسان طلعيه على الامير نفسه وقولي له ليش يصير جذي انت حالك من حالي مثل ما انا راح ادفع مخالفه انت ملزوم
تدفعها .....
