بس ابي افضفض

[english muffin]

سلام عليكم بنات
شلونكم ؟ شلون رمضان معاكم ؟
مبارك عليكم الشهر ..

بنات انا نفسيتي وايد تعبانة و سالفتي طويلة شوي يمكن تجوفونها سخيفة بس حطو روحكم مكاني وبتحسون باللي احس فيه

اول شي افهكم بالشخصيات
ح انسان محترم طيب حبوب كل الي امتناه فيه و يحبني وكلشي كلشييييي فيه بيرفكت بالنسبة لي طبعا وشغلته زينة ودارس وفاهم
ن انسان بالغصب خلص الثانوي وكان فاشل وصايع
أ بنية استغفر الله الله يستر عليها كانت تحاجي شكثر وشكثر تصير في علاقات طبعا انا اعرف سوالفها خبركم بنات وندري عن سوالف البنات

بنات انا تعرفت على ح وصرت معاه من سنتين تقريبا اهو رفيج اخوي واهله وايد كلوس حق اهلنا و اهلنا متربين مع بعض وطبعا بيتنا واهلي يدرون عنا لان علاقتنا مب علاقة لعب وتسلية .. و ن يصير ولد عمة ح و أ تصير بنية اعرفها .. ضيعتو والا للحين ؟ لوول
المهم

مرة أ ياتني تسألني عن ن لانها تدري انا بعلاقة مع ولد خاله قلت لها الصبي صراحة لعوب وفاشل وجذي جذي الاعقب شهر دريت انهم في علاقة مع بعض و عقب تقريبا 9 اشهر من علاقتهم ملج عليها
بناات مابي اقول لكم شعوري يوم الملجة مادري شلون اوصفه .. ماكنت محترة لان مافي شي احتر عليه بس مادري
تخيلو أ يات تكلمني وبطريقة غير مباشرة تعايرني انه انا و ح لحين ماملجنا وعلى فكرة انا اصغر من أ بـ 4 سنين !!!!!
ونقدر انقول انقرررررررت لانها دخلت عائلتهم قبلي وصارت منهم وتقعد مع اهل ح وجذي

عقب ملجتهم صارت ملجة اخت ز والحين ملجت بنت اخت ح وانا بس اطالع من بعيد لبعيد انطر دوري
وعلى فكرة الحين ولد خالتي بيملج على اخت ن تخيلو يعني !!

بتقولون ليش لحين احنا ما ملجنا !
احنا قاعدين نجهز كلشي من الحين بنات تعرفون الدنيا شلون صايرة مانقدر نملج و نوهق عمرنا و ح انسان جدا واعي و فاهم مايخطي خطوة الا حاسبها صح وطبعا ما يمشي عنده شي اسمه اتزوج على حساب ابوي
فشسوى ؟ قام و سوى جمعية لانه مايأمن بالقروض و قام بنى مثل ملحق في بيتهم
الملحق بيجهز نقدر نقول على شهر 4 لان ينطرون اخوه يطلع من البيت حق يبدون فيه واخوه بيطلع شعر 12 او 1 ان شاء الله
والجمعية بيحصلها شهر 6 2011
بنااات انا تعبااااااانة
ماقدر اصبر وايد صبرت .. اهو كاسر خاطري كله يقول لي احنا ياما صبرنا كلها 10اشهر وتعدي
مابيدنا شي ولايقدر يسوي شي ادري بس مادري شلون اصبر روحي كليوم اصيح مللته لوعت جبده بنفسيتي الزفت
واحنا وايد نحب بعض ونبي بعض بس انا تعبت كل الي بعمرنا ملجو من اهله والي اصغر منا واحنا لحين
يقول لي احنا مب يهال حق نستعيل ونوهق عمرنا .. ادري والله ادري بس تعبببت وانا اصبر

سوري وايد سولفت بس كنت ابي افضفض :ssssso:

 

[أرنوووبة]

رد : بس ابي افضفض

و عليكم السلام عزيزتي .. علينا و عليج يا رب

حبيبتي لا تقارنين حياتج بحياه الاخرين. هذا اول طريق للفشل. عليج بنفسج و بس لان كل انسان ظروفه و طريقته تختلف من شخص الى اخر. انتي و خطيبج قاعدين تحاولون تخططون حياتكم صح, و الحياة المبنية على اسس قوية اهيا اللي راح تدوم بأذن الله. اما اللي يبدون من غير اي تخطيط و تفكير راح يتوهقون اول ما تواجهم مشاكل. الزواج مو لعبه، الزواج مسئوليه كبيرة و تأسيس اسره. و كون خطيبج يبي يعتمد على نفسه هذا شي جميل لان اهله مو دايمين له و اهوا يبي يبني نفسه بنفسه و لازم بدال لا تحسسينه بالتأنيب شجعيه على انه يسلك خطوات صحيحة تؤدي على نجاحه و حمسيه ان يجهز بأسرع وقت ممكن عشان في النهاية لما الله يجمعكم مع بعض ان شاء الله راح تكونين انتي الكسبانه. اما اللي يسمعونج كلام عشان يحرونج و يغثونج فما عليج منهم.. و اصلا تحسين ان من اسلوبهم انهم ما يحرونج الا لأن من داخلهم يدرون ان اختياراتهم غلط و يبون يدارون نفسهم عن طريق التركيز على الاخرين بدل لا يشوفون نفسهم. ترى ربج اعلم بوضعهم الطبيعي تلقين يا متحسفين يا محترين يا نجرة... و من معرفتي بالحياه هالنوعية من الزيجات مليء بالمشاكل العويصة اللي ما يعرفون يحلونها الا بالصراخ. صبري و ان شاء الله يعوضج كل خير على صبرج و يعطيج على قد نيتج يا رب

تحياتي

 

[lovely jojo]

ياقلبي الله يوفقج معاه بس ليش ما تملجون هالفترة وجهزو شالمشكله اللي اقصده ان يكون في شي رسمي..

 

[english muffin]

أرنوووبة

مشكووورة حبيبتي كلامج ريحني وانا فاهمة قصدج عدل بس مادري شفيني مو قااااادرة اشيلهم من بالي مب حسد بس مادري شنو

و جوجو
مانقدر حبيبتي واهو مايرضى يقول انتي مب رخيصة حق اخذج وماسوي لج شي ومن هالحجي
وعلى فكرة تره اهو بره البحرين يعني شغله اهني بس يروح مع الشغل كل شهر 14 يوم بره الديرة يقول لي انا مابي اخذج و اهدج كل شهر واسافر وصار له 6 اشهر يممكن يدور شغل ثاني

 

[أرنوووبة]

رد : بس ابي افضفض

و الله حاسة فيج يا قلبو و ادري شعورج ناتج من شنو. تشوفين غيرج مستقر مع شريك حياته مع انهم قص و لزق و انتوا اللي عن حب للحين معلقين. انا ما كنت بكتب قصة حياتي اون لاين لكن راح اقولج اللي اقدر عليه عشان ترتاحين. ترى كنت في موقف مشابه لموقفج و الحمد و الشكر لله الحين صار من الماضي و سالفة نتكلم عنها انا و زوجيو مرات نضحك عليها. ياما تعبنا ياما غرنا و احنا نشوف غيرنا و ياما بجينا و تغربنا اهوا بديرة و انا بديرة و نقول متى متى متى، و لكن سبحان الله مرت الايام و الشهور و سنييييييين و ربنا فرجها و تزوجنا و الحين الله رزقنا بأحلى عيال ربي يخليهم و ابوهم لي و يخليني لهم ان شاء الله و يحمينا من كل شر و ضر. فلا تيأسين اللي الله كاتبه لاااازم يصير و لو بعد حين و يقولون من صبر نال و ان شاء الله تنالين..

و ادري ما تحسدينهم بس تتمنين اللي عندهم يكون عندج و هذا مو حرام بالعكس حقج. بحق الشهر الفضيل اقول يا رب يجمعكم و يقدرج على الصبر و اذا تبين تفضفضين او ودج تقولين شي لاااااااا تستحين و دزيلي رسالة و ان شاء الله ربي يقدرني على مساعدتج و مواساتج كثر ما اقدر

تحياتي

 

[english muffin]

ادري شعورج ناتج من شنو. تشوفين غيرج مستقر مع شريك حياته مع انهم قص و لزق و انتوا اللي

^^
بالضبببببببببببببط

انا الحين بس ادعي الله يصبرني و ترتاح نفسيتي
بعد شهر بروح عرس بنت اخته بجوفهم كلهم هناك بينبط قلبيييي

 

[يوآش يوآش]

رد : بس ابي افضفض

الله يعينج ..

 

[قوطي نيدو]

الله يعينج

 

[فاقده حنان ابوه]

الله يعينج ويهون عليج

.........

 

[english muffin]

شكرا بنات

 

[منيرة خالد]

لا تقارنين حياتج مع حيات غيرج


وان شاء الله تتزوجين عن قريب

 

[حجيه هيونه]

ماشالله عليكم الله يكملكم بالعقل

ليش متضايقه هانت مابقا وايد

اهم شي تبدون صح

والاحلى من هذا راح تصيرين انتي العروس بالعايله وهذا احلى شي "


ان شاء الله انه التأخير من صالحكم ولاتشغلين نفسج بالباقي اهم شي انتي وياه موافقين

 

[غنج اهلها]

ماقدامج الاالصبر

شنو مستعيلة علية صبري .. مدام الزوج موجود خلاص

كلة سوالف بيت وتكوين نفس وطبيعي الامر يتاخر .. وكل تاخيرة فيها خيرة من رب العالمين

ربي يوفقكم ويسعدكم ويجمعكم عاجلاغير اجل

 

[english muffin]

هنونة
مشكوورة حبيبتي جزاج الله الف خير

ان شاء الله يابنات الوقت يمشي بسرعة وافتك
انا طوووول عمري والله عايشة مالي في احد واستانس للناس ومافكر بحياة احد مشغولة بحياتي
مادري شمعنىىى في هالسالفة صايرة افكر واقارن