اولا السلام عليكم و رحمة الله و بركاته
موضوعج بوقته و من اهم المواضيع
اليوم بإذاعة القران برنامج الواحه مستضيفين الدكتور طارق الطواري و شارك معاهم الدكتور الثويني
تكلموا عن الظواهر السلبيه من بناتنا و شبابنا
و طريقة تعاملهم مع بعض و المجتمع و سبب سلوكهم الخاطئ و تصرفاتهم المتهوره
و تكلموا عن دور الاسره و الداخليه و البيئه
بصراحه الحلقه كانت فوق الرائعه و المشاركين المتصلين يفرحون يحسسونج ان في ناس شكثر رافضين اللي قاعد يصير
شي يثلج الصدر الصراحه
ان في ناس للحين متمسكين بالدين و العادات و التقاليد و الرقي و الوقار و الاحترام
موضوع الحلقه كان اسمه الانفلات الاخلاقي و راح يكون هذا الموضوع على مدار اسبوع
اتمنى الكل يتابعه
انا راح اعقب على كلامج نقطه نقطه
اولا رايي بتعريفج تعريف سليم و شامل
ثانيا : الملابس
اااااااااااااااه منهم
بتكلم عن البنات و انواعهم
السفور من غير حجاب : ( البعض ) التنوره القصيره حيل و لا فتحتها شطولها و لا ضيجه مادري شلون تمشي فيها مسافات طويله و البديات الحفر و العلاق و الصدر كله طالع استغفر الله و طبعا تهول لج بعمرها غصب اللي مايشوف يشوف تجبرج تخزينها تشوش بشعرها و لبسها ضيج و تقولج انا كول عشان احط نورمل ميك اب @@ تقص على نفسها
المتحجبات : ( البعض ) ملفعها تحته بيتهم كله من الكبه برج ايفل يتحدون منو اكبر , و تلاقين رقبتها تبين و لا قفاها من ورا , البنطلونات السكني اللي استغفر الله ياربي مرسوم جسمها كله و كل شي طالع و بارز طبعا الكل فاهم جان من ورا و لا من جدام كل شي واضح و فوق ما اهو ضيج يكون لووو وست @@ و طبعا بعضهم الله يستر علينا و عليهم تتفنن بالاندروير لانها تكون متعمده انه يطلع لو تسوي اي حركه استغفر الله , و تلبس لج قميص ضيج صوب الصدر الزرار بينقطع , و لا البدي اللي رسمة ملابسها الداخليه مبينه موديله شلون , و الجم طبعا يكون ثلاث ارباع عشان الساعه و محل الاكسسوارات بالايد الثانيه يبين , و المكياج طبعا لازم حمرا حمره و تلاقينها لي ضحكت ودج تسحبين من فلوسج و تعطينها تروح تسوي اسنانها على حسابج
المحجبات و عبي جتف : ( البعض ) العبايه ضيجه و تتفنن فيها جنها رايحه عرس و لا تكون عبايتها ملفته للنظر و فيج خير تنصحينها تقول انا لابسه عبايه و متستره @@ مفهوم العبايه و الحجاب يختلف من عقليه لي الثانيه
النقابات : طبعا في اللي عباية جتف و اللي عباية راس و مبين منو اللي تبي الستر و حاشمه نفسها و منو اللي لابسته عبط و منو المغصوبه و منو الرقله اللي تلفت النظر
و خل اقولج نقاط عامه تشمل هالاقسام من البنات ( الحواجب ) ياربي ودي اشتري كل تاتو و لا قلم حواجب و لا شدو اسود من السوق و احرقم عشان كلهم يستخدمون البني , و بعدين ترا خلصنا من سالفة الجايينيز يبا الحين كله طبيعي بيبي فيس لي طليتي بوجها ترتاحين مو تخترعين
و عليهم حركات تنرفز تخلي غصب يتحرشون فيهم مثل رنات التلفون , اكسسوار تحطه على جنطتها و لا سيارتها و لا اي شي معاها يلفت النظر و يخلي الكل يعلق , طريقة المشيه @@ ترا يبين و يعرفون منو المحترمه و منو الرقله اللي تبي التحرش و حابه تلعب فيها دور الثقيله اللي امة محمد ميته علي خخخخخخخخخخخخخخخ و الله غباء
الحين عاد دور الشباب
طبعا اختيارهم للألوان البعض منهم ودي اعطي كفين اقوله هذا حق اختك مو لك , وردي بنفسجي فسفوري , اوكي خلك سبورت و كول على قولتك بس مو جذي اختار اللوان سنعه انت رجل وين وقارك وين حشمتك و ين هيبتك جدام اهلك ياربي محد قام يحاتي نظرة الناس له
انا بالنسبه لي اذا مو دشداشه ووزار و جريمه ما اسميه رجال
الهلاقه بالكلام
مو سج بسراحه سمونه سرسور @@ الغوا حرف الصاد من القاموس !!
الوذع مو اوكي مذاد حيوي معذل يعني معضل @@ حرف الضاد قام يعور حنجهم !!
موبي يعني مابي مودري يعني مادري
امبيه واي ليش >> تصفهم ورا بعض و انا انطر متى تعطيني جمله مفيده !!
و المصيبه شبابنا صاروا نفسهم
عيب استحوا خيلوا على وجيهكم حشموا نفسكم احترموا اسامي عوايلكم
لبسوا تكشخوا بسنع على ركاده و حشمه ووقار فرضي احترامج و هيبتج خلي الكل يمدح ادبج و رزتج مو خفت عقلج و رقالتج
خلي الناس تقول و الله و ستين نعم مو تف و سف
لي قالو هذي بنت فلان و لا اخت فلان و لا زوجة فلان خلج واجهه لأسرتج عكسي تربيتج و افكارج و كل شي تحبينه بشخصيتج بلبسج بإسلوبج بهدوئج و بإبتسامه هاديه و صوت واطي خلج نسمه مو دلاله و سوالفج انتي و رفيجاتج الكل يسمعها
وااااي وربي بعدي ماخلصت بس ماقول غير ربي يهديهم و يصلحهم
مشكوره حبي و اسفه على الاطاله
