بلييييز بروح تركيا وأبي مساعدتكم

[cat-koota]

السلام علييييكم بنات شلووووونكم ؟؟

بنات بلييييز ابي مساعدتكم
انشالله بالصيف بروح تركيا

ابيكم تقولون لي وين اروح فيها وين تنصحوني اقعد؟ شنو المناطق الحلوه فيها؟؟
شكثر حلاته اقعد فيها ؟؟ شنو الاماكن الحلوه ؟؟ بلييييييييييز ابي كل شي يخصها لاتبخلون علي
وشكرا​

 

[همسQ8]

الاسواق
اسطنبول
فيها شارع الاستقلال فية فنادق وفية محلات
ومجمع اس مركز وفيها منطقة اسمها عصمان بيك كلها محلات ومنطقة كبيرة حييل حييل يعني راح تتعبين وانتي ماخلصتي منها

بورصة احلى سوق
مجمع اس مركز و مجمع سفير بلازا

يالوا
قبال البحر كل محلات ملابس

واحلى شئ في بورصة جبل اولودا روعة

واسطنبول ازعاج جنة قاعدة باوروبا في قلعة توب كابي سرايا لي فيها شعرة الرسول وسيفة وشغلات تاريخية حلوة حييل وتقدرين تطلعين من اسطنبول الي يالوا بعبارة(سفينة)وترجعين بنفس اليوم


يالوا حلوة وهادئة في المناطق الجبلية في الحمامات مثل الحمام المغربي (الترميل) من ماء النبع فيها شلال في اعلى جبل بيالوا

 

[نوراا السعودية]

هلا حبيبتي شخباارك الغالية
انا رحت مرة لتركيا احلى شي هناك اسطنبول تجنن فيها
1-جبل العراايس مرة حلو (هذا ياطويلة العمر كل العرايس يوم الزواج العصر يلبسون فساتينهم ويروحون هناك
اشكالهم مرة حلوة والبيبي اللي يسوون طهور العيال يعني هم بعد يروحون قبل موعد الطهور يكونون لابسين لبس الملاك الابيض احلى شي اكلي من الجبل الخبز اللي بالتاوة بالبطاطس يجنن )
2-ميني تركيا (هذا منتزة فية معالم تركيا كلها على شكل خاارطة مجسمة يعني كل مبنى مهم يكون مجسم وامامة جهااز يتكلم بالتركي والانجيزي والعربي حسب الكرت اللي تشترينة لة بعد مرة حلو فية مقهى حلو وبتنبسطين فية)
3-القوارب او الرحلات السياحية طبعا تركيا غالية وكل مالها تصير اغلى واغلى انا خبري فيها 2003 كانت غالية نوعا ما بس رديت لها 2005 ولقيتها غلت اكثر بس بصرااحة تستاهل بالنسبة للقواارب تلقينها على شط ترابيا تلقين هنااك قواارب اجار بالساعة الحلو انك تقدرين تمرين السوبر ماركت وتاخذين اللحم والدجاج
والاشيا حق الشوي وتشوين هناك او الشباب اللي بالمركب يشوون لك لا نهم العادة يكونون 2 واحد يسوق وواحد يخدم يجننون اسعاار المركب بالساعة حسب فخاامتة مثلا اللي ركبنبا كان 100 دولار الساعة احنا خذيناة 3 ساعات وتمنيتهم اكثر من الوناسة
4-الاسوااق وما ادراك ما الاسواق عندهم نوعين اسوااق النوع الاول وهو الاسواق الشعبية وتسمى
البازارات - هذي حلوة لا تطوفك بتقولين بيئة وكذا بس حلوة وحسب البازار اللي انتي راايحة لها طبعا هي على ايام الاسبوع يعني يوم الجمعه مثلا يكون في تراابيا البازار والخ
النوع الثاني الاسوااق التجارية الظخمة وهذي مجمعاات مثل متروسيتي و اق مركز اسمة كذا
وبعد كثير بس وربي ناسيتهم
بعد فية شاارع عثمان بيك الظااهر انة كذا بس مرة حلو شااارع كبيييييييييييير وفية محلات مو بمجمعات لا مفتوحة
5- المطاااعم عاد تركيا مشهورة بالمطااعم مثل مطعم النملة وشروان او شرفان هذا مقابل المتروسيتي
حلو وصااحبة مسلم
وبعد حصااار مطعم حصاار لاااااااااااا يفوتك يجنن روما نسي يطل على مضيق البسفور يموووت حلو مرة
ينفع حق لمن تبين تسوين مفالجاة حق اللي معك عيد ميلاد او شي تتفقين معهم ويضبطون كل شي
وبعد اممممممممممم انا لاني ما احب المشوياات ولاني نباتية ما انبسطت على المطااعم والباقي نسيتهم
اي فية منطقو اولوس تجنن تهبل حديقتها حلوة ومطعمها خطيررر

وبس لي رجعة عشاان اقولك على السكن واخيرا وليس اخرا عندي رقم وحدة مرشدة سيااحية تقدر تفيدك اذا تبينها اعطيك اياة<<<<<<<<<<<حطيتي الرقم من البداية وما تعبتي عمرك هههههه

 

[بنت البحر]

انا ما عجبتني تركيا وايد غاليه لو رايحه اوروبا احسن وسوقتهم نار ومجمعاتهم حاره اموت واعرف ليش مايطولون على التكيف تلقين الجو حلو بره وداخل السوق حر بس نصيحه عندهم هناك وايد فضيات خواتم اخذي نرى كد ومد مايصدي كلش وكلما البسهم يسالون عنهم هذي الحسنه الوحيده

 

[أرنوبهـ]

ياحلو تركيا وربي تجنن
آه شوقتيني
شوفي حبيبيتي انا خبري فيها سنة 2003 الصراحة خيال
رحت لاسطنبول ( معالم - جزيرة الاميرات -اسواق ) كأنك في اوروبا وتخوف شوي مافيها امان
بورصة ياحلوها والله ( احلى شي فيها الجبل - الثلج - سوق الاحد - الشلالات - الاسواق - المنتزهات )
بولو ابان ( كانك في زلمسي الصراحة بحيرة هادية حيل حيل حيل تشمل فندقين وبحيرة تحيط فيها الفندقين والبقيات والحناطير وجوها الرومانسي احلى شي مافيها اسواق)
اما يلوا ماعجبتني اشكال الناس فيها تلوع الكبد

بس هذا اللي اذكره من زمان والله بس كانت شي خيااااااااااال الرحلة

الله يسهل عليج يالغالية والبنات ماراح يقصرون في الردود ان شاءالله واذا حبيتي تستفيدين اكثر في منتديات سفاري حلوه حيل فيها كل شي

 

[cat-koota]

مشكووووووريييييييييييييييييين حبايبي ماقصرتوا وانشالله اخدمكم

 

[COOCOO-STYLE]

روحي اسطنبول حق التسوق وبورصه طبيعه ووناسه لا تنسين تروحين جزيره الاميرات في استطنبول والاسواق نفس اللي ذكروهم البنات

 

[كوكب الدرر]

انا رحت تركيا اربع مرات لأني بصراحة وايد استانست فيها

كانوا ناسها وايد طيبين بس بعدين سمعت إن معاملتهم للعرب تغيرت

وأكثر مكان استانسنا فيه اهو بورصة لأن فيها أماكن سياحية أكثر

في الشلال الصغير والشلال الكبير والتلفريك علشان تشوفين الثلج على الجبل بس شرط تروحين آخر شهر 6 أو أول شهر 7 لأن بعدين الثلج يذوب وعلى هالجبل كله أسواق ومطاعم يعطونكم اللحم مع الفحم وانتوا تشوونه يعني متعة مع الجو الحلو ويمكن احيانا يكون الجو على الجبل بارد يعني إذا معاج يهال لازم تاخذين معاج بلوزات احتياط علشان يلبسونها فوق هدومهم إذا صار برد لأن مرة واحنا قاعدين نشوي مرت علينا غيمة وصرنا بوسطها لأن الجبل عالي فالغيمة غطتنا مثل الضباب فبدل ما نستخدم الفحم للشوي استخدمناه للتدفي صج كانت متعة

واحنا دايما نأجر باص مع مترجم ومرة الباص ودانا مزرعة ونزلنا ضيوف عند أصحابها كانوا وايد كرما امهم تخبز بالفرن وأبوهم يصعد الشجر يقطع لنا فواكه ومن ضمنها عطانا بندق أخضر

وإذا مريتوا على مزرعة فيها خوخ استأذنوا أهلها وهم ما يقصرون راح يقطعون ويعطونكم ولا يطوفج خوخهم طعمه عجيب مو مثل اللي اييبونه لنا

ومرة بعد مرينا على مزرعة أهلها قاعدين يقطعون عرموط ( كمثرى ) وعطونا سطل كامل وغصب خلونا ناخذه طبعا من غير فلوس

وفي الطريج حق الشلال الكبير في عين ماي حارة يسبحون فيها أو يغسلون اريولهم

وعندكم حديقة كبيرة حق اليهال فيها العاب وقوارب وبوظة لذيذة وحيوانات اسمها اليوني بارك

كل اللي قلته كان في بورصة ومنها تقدرون تروحون تيرمال اللي اهي حمامات السلطان وهناك في حمامات إذا تبون تتسبحون تاخذون معاكم صابونكم وملابسكم وإذا ما تبون تتسبحون يكفي المناظر الطبيعية اللي فيها وهم فيها سوق ومطاعم وماي حار

أما اسطنبول فأنا شخصيا ما عجبتني لأن العواصم دايما رسمية يعني بس متاحف وأسواق لكن ما فيها طبيعة

بس ممكن منها تروحون جزيرة الأميرات بالعبارة والجزيرة ما فيها سيارات بس عربانات تجرها الخيول ، فيها محلات ومطاعم

ومع اني رحت اربع مرات بس لو احد الحين يقول لي بروح تركيا أروح معاه