بنات انا اللي مصدومه من زوجها بعد لعه لي وحبه صار مايبيني رديت على كل اسئلتكم

[هاجس الشوق]

لا حول ولا قوة الا بالله العلي العظيم وحسبي الله وحده نعم الوكيل

مادري شقولج الله يعنج ويعين ريلج ويعين اهله على انفسهم

رايي انه لا تتسرعين وتخربين بيتج انتي طلعتي من بيتج عن طيب خاطر ردي مثل ما طلعتي ولا تكبرين السالفة مايخصج فأهله خلهم يقولون اللي يبونه ادعيلهم الله يعينهم على انفسهم

ريلج بينج وبنه يهال حرام العشرة تضيع فتفاهة وسوالف امه واخته وعمته ومادري منو سوالف فاضيه لو كل الناس تسوي نفسج كان حريم الكون كلهم مطلقات

اهتدي بالله وردي بيتج وريلج مافي شي مقعده على الواتس اب غير الفراغ انتي عطيتيه فرصة يشغل نفسه فشي سلبي ردي بيتج ولا يهمج شيقولون عنج

باجر لا طلقتي بتتحسفين عمرج كله بعدين ماراح تغيرين ريلج غير بالاسوء نصيحة والله ابيلج الخير ردي بيتج واذا على امه بوسي ايدها صبح وليل وعامليها بالطيب بتكسبينها غير امه مايخصج فأحد ريال اذا تبيه يحطج فعيونه حطي امه فعيونج مافي احد بالدنيا يعطيج شر وتردينه بالطيب الا وييج عقب فترة ندمان يعتذر ويبوس ريلج والحياه يبيلها صبر عشان تستمر

الله يهدي الجميع ويعينهم على انفسهم ويعيني يارب

 

[مطيرية والعزليه]

الله يفك ضيقتج ويفرج همج ياااارب
ويسخره لج غصبا عنه ويرده لج ولعيالج


وحسبي الله علي بيفرقون بينكم

 

[دآيم آلحب]

صح كلامهم حسسيه انج سعيده ومستانسه ولا هامج شي

اهني اهوا بيحس انج متغيره بيشتغل تفكيره بيقول شلي اشغلها عني

جربي هالكلام اسبوع وان شاءالله تحصلين نتيجه لان كثر الدق يفج اللحام

كل مادقيتي اول شي بيمل وثاني شي انتي قاعده تحسسينه انه كل حياتج وانج بتموتين اذا ابتعد

راويه انج فرحانه وان ولا شي هامج فالدنيا واضحكي وسولفي لايهمج شي

مرده اذا يبيج يدل طريقج , وعليج بالاستغفار وقيام الليل

 

[eman_21]

ما ابي اضيق خلقج بس والله العظيم سالفتج بالضبط نفس سالفة اختي لدرجة ان عبالي اهي انتي اللي كاتبة الموضوع ..

تدرين شنو نهايتها طلقها بكل برود .. وصدمها ليلة العيد بدون اي سبب قالها روحي زوري أهلج استانسي عندهم اليوم الثاني داقه امه تقول طلقها ..

هذا ولد أمه وقالها اذا اهلي ما يبونج ما ابيج واختي توها طالعه من النفاس عندها بنيه
ولا تقولين جمال قمر مقعد واحلا منه اهو وخواته السحوت

شوفي نصيحتي لج اللي مثل هذا طنشيه ولا تلاحقينه عشان ما يقطج على صخر وانتي تحبينه وهالنوعيه بسويها فيج بدون اي سبب بس انه مل وشاف نفسه انج تلاحقيته وميته عليه مالت عليه

وبالاخير اقولج الله يفرجها عليج ويكتبلج الخير

 

[ام القمرالمطيري]

والله ماودي ازعلج بس مادري ليش احس شايفله شووفه
لان الرجال مايصبر يعيش بدون بناات وهذا اول كان زين معاج وفجاه قلب ومايفرق عنده وجودج من غياابج
وانتي تقولين انه لي طلع الكل يخزه ويطالعه
وكله عالواتس اب والتلفون
صدقيني الرجال لوو هو شاري مرته مايسمع لاهله

هذا مووجاهل ولا مجنون عشان يسمع لاهله

بس هو مشتهي انه يسمع لهم

فالحل مثل ماقالو الخوات الي قبلي طنششي لاتدقيين

غيري روتين حياتج اشغلي نفسج واكشخي واذا في مناسبه مشتركه روحي للعرس وارقصي وانتي حدج كاشخه خل الحريم يوصلون لاهله وله انج اتهبلين وماهزج غيابه

هو بينقهر وبيعرف انج قويه
والرجال يمموت عالبنت الواثقه والقويه

وادعي واستغفري دايما وخلج دايما تقرين سورة البقره وتصدقي

ياارب يفرج همج ويهدي ويسخرلج زوجج

 

[PinkCherry]

ها حبيبتي شلونج؟ والله من فتحت عيني على طول فتحت المنتدى اتطمن عليج ..ومثل ماقالو لج وقلت لج اهتمي بنفسج وبعيالج وقطيه ورى ظهرج لانه مايستاهل والريال بايع ..بيعيه هو واهله ولاتحطينهم على بالج انتي لازم تغيرين جو وتريحين نفسيتج طلعي تمشي ساااااااافري روحي اعراس وتكشخي انتي مو محتاجته حتى تعيشين سعيده ومرتاحه ..ولو انتي من النوع الكيرلس نكت بقول لج قطي عياله عليه وعطيه اياها كاش "بتزوج "صدقيني يصير لج آدمي لكن انتي قلبج ضعيف ماتسوينها..آنه وحده من اهلي صار لها مثلج ومو عندها واحد وله اثنين عندها 5 يهال كل يومين قال لها روحي بيت اهلج نامي وكانت كله في بيت اهلها ماياخذها الا في الليل هي وعيالها وفي فتره كانت محتاجه له وعياله محتاجينه تركم وسافر شهرين ما سال عنهم ..قلت لها دزي له انج بتودين عياله بيت اهله وانج في بيت اهلج وخلاص ماتبينه مع العلم اهله جذابين وهو ولد امه مثل حالتج يعني ومايبون عياله اصلا دزت له هالمسج تصدقين اللي كان مايتصل ولايسال على طول اتصل وهي ماردت عليه حاول وحاول اخر شي دز لها مسج يقول لها هو يحبها ويبيها وانه بيرجع في اقرب فرصه وفعلا رد واخذها واخذ عياله والحين صار يسويها يادهينه لاتنكتين يمكن مو لانه يموت فيها لكن لانه يدري انها اذا تركته وتركت عياله محد يبيهم لا هو ولاعياله ومحد يصبر على مزاجه وعلى مزاجية اهله وجذبهم ..اختي اذا عندج اي طريقه تخلينه يحس انه راح يتوهق ويتعلق بدونج استخدميها اذا كنتي تبينه..بس في نفس الوقت انتي اي قرار تاخذينه اخذيه لانه الاحسن لج اولا ولعيالج ثانيا لاتحطين مصلحة احد قبل مصلحتج...طمنينا عليج وآنه انشالله رايحه العمره راح ادعي لج في بيت الله ..الله يجبر بخاطرج ويساعدج وياخذ بحقج من اللي ظلموج.

 

[عهد الغرام]

الله يعينج ويوفقج بس عجبني رد بنك شيري غ الاقل حاولي

 

[الوردة المكنونة]

زوجي نفس زوجج ويمكن العن وقدرت اغيره بس بصراحه التغيير صار بسنين مو بيوم ويومين تعبت معاه ومع امه وااااايد بس الحمدالله تغير ١٠٠٪ صارت حياته بس بيته وعياله وكثر ما يسمع من اهله يطنش ولا يهتم وما ياكل الا طباخي طبعا اهله حاطين في بالهم اني ساحرته والله عالم اني مو مالت هالخرابيط يعني باختصار اذا تبين تكملين حياتج مع هالشخص لازم التحملين وتنازلين واااايد واذا ما تقدرين انسي هالشخص وخلج عند اهلج

 

[Mjnont '3lay]

ادعي الله انه يقدم لج كل مافيه خير لج والله يفرج عنج كربتج

 

[ام كوثر2007]

غريبه ردود البنات ...


المرا عندها ولد .. لا وحامل بعد .. والشي الاكبر انها تحبه ؟؟


يعني ترضونها علي خواتكم ؟؟؟؟؟ ترضون الوحده يخترب بيتها بردودكم هذى ؟ الله يهديكم .



حبيبتي كلامج ما دش مخي .. تقولين عقب سالفه امه وطقت الباب تراضيتوا وبنفس اليوم رحتي بيت اهلج .

جان نطرتي جم اسبوع وعقب رحتي ؟؟؟؟؟؟؟


ليش بنفس اليوم ؟

المهم الحين ما ينفع ليش وشحقه ..


هذا ريلج ابو عيالج .. وااذا علي امه حطي براسج شي . ترا محد دايم لحد .. اليوم امه موجوده باجر بتموت ..


يعني اللى بيبقاله انتي وعيالج بس ..


تقولين صبرتي 7 شهور ؟ عيل شيقولووون اللى اصبروا ثمان وعشر سنين ؟؟؟؟؟؟؟


الصبر ليش يسموونه صبر ؟ لانه ماله وقت معين .. واذا صبرتي رب العالمين بيجازيج علي صبرج ..


وانا صراحه ما اشوف انج صبرتي ذاك الصبر اللى تقدرين تقولين عن نفسج صابره..


كلميه وحاجيه .. واذا ما رد .. شيلي شلايلج وردي بيته


واللى يسال او يقول اشفيج وما فيج . قولي اتوحم تعبانه من الحمل ورقعيها انج كنتي عندهم بسبب الحمال مو شي ثاني .

وحاولي قد ما تقدرين تعاملين امه وتحطينها بمقام امج الله يخليها لج .

يعني الحين امج لا قطت عليج حجوه والا سالفه تحقدين عليها وتكرهينها ؟


صفي نيتج اشوي عشان الله يبارك لج .. مالج الا بيتج وريلج ..

باجر لا تطلقتي منو بيطل بويهج وانتي ام لطفلين ؟؟؟؟؟؟؟


فكري بعقلج ومو كل شي يكتبونه البنات تمشين وراه

كل وحده لها ظروفها ولها عقدها ونظرتها للحياه .. اللى مجروحه من ريال واللى مطلقه وللى حياتها متلخبطه واللي واللي ..


عشان جذى اقولج لا تخربين بيتج بيدج انتي دامج تحبينه .. لا تخسرينه ..

وعسى الله يسهل عليج امورج .

 

[آنثى طآغيه]

ماقصرتووو بنات شاكره لكم تفاعلكم معااااي ... بنااااات قلت لابوي بدق عليه بشوف شنو سالفته بتفاهم معه ابوي عند قالي ماتسوين شي من وراي والله العظيم ازعل اذا دقيتي عليه ابوي يقول اعرفهم منافقين يقلبون السوالف اذا تبين كرامتج لاتدقين عليه ولاتنبشين عنه يقول ياما وياما اكون مع ابوه دواوين " على فكره ابوه وابوي عشرة عمر " الموووهم يقول ابوي بالدواوين يقول ولدي فلان اخو زوجته قاله اختي تموت ان خليتها ومدري شنو يقول ابوي شايفين نفسهم وايد وان الناس عندهم مايسون بيزه وهم والله مافيهم شي زود ..وابوي ما الومه من قبل جم يوم كان ابوي رايح لام الهيمان ومار من يم بيت حمولتي وكان بيروح لاجارهم قريب منهم وكان زوجي طالع مع ابوه من باب بيته يعني شافو ابوي وهو نازل للجيران وهم واقفين ولا قالو لابوي شلونك ياجد ولدنا حاقرينه كان جاهل مار من عندهم مو رجال كبير بالسن ودخل ابوي بيته رفيجه اللي هو جار حمولتي وبعدها بفتره اتصل ابو زوجي على ابوي ما ادري توه يستوعب او توه يتذكر او او ...وابوي كان ضايق من هالموقف شلون رفيجه وعشرة عمر يسوي نفسه مايشوفه مارد عليه واتصل مره بس يابنات والله والله والله ابوي عيونه تغورق على حالي ومتقطع قلبه بس يقولي يابووج عزي نفسج تلقيناها ترضين يتكلمون فيج بالدواوين وفيني بنت فلان ؟ قلت لا يبه قال خلاص اللي كاتبه الله بيصير باعج بيعيه محد ميت الا بيومه وابوي يقولي حتى انا مثلج ودي اعرف ليش يسون جذي هم يبونا نبدي ونتكلم معهم ولا يبونا يدسون علينا ونسكت يقصد زوجي وبس نبهني اذا دقيت بيزعل علي وانا ما ابي اخسر ابوي عشان زوجي زوجي مو محط ثقه بالعكس.. بديت اخاف منه وراحت ثقتي وصج انهرت بس بالنهايه ما اتقبل اعيش مع واحد مايبيني واليوم جاني ابوي يقولي ابو زوجج دق علي .. انا قلبي وقف ظنيته جاب لموضوعنا طاري طلع بس داق يسلم على ابوي ويقوله وين هالغيبه قاله ابوي ابد مشاغل الدنيا ولاهي مع ولدي بنخطب له قال مشالله بس ولا قال شلون ولد ولدي ولا زوجة ولدي بس داق يسلم ويقول وين الغيبه .. ولما سكره من ابوي قال ابوي والله داق بيدور السوالف وبيشوف ابوي بيبدا ويفاتحهم بالموضوع ولا لا .. ابوي عارف لابوه خبز ايده يقول اتوه عن تفكير عيالي واخواني لكن ما اتوه عن تفكيره " يقصد تفكير ابو زوجي" ولا والله قبل الحريم يقولون لا لا انثى طاغيه زوجها مستحيل ياخذ عليها او يطلقها لانهم كانو يشوفون الدلع واضح بعيوني وعيونه >>> كل هالكلام حبيت افضفض لكم واقولك اخر التطورات وحبيت ارد على اللي تقولي تفاهمي معه ماودي اخسر ابوي عشانه والله يوم شفت عيون ابوي تغورق بالدموع على حالي ونفسيتي عرفت منو اللي يستاهل ومنو اللي مايستاهل وطبعا ابوي موقف اخوي قايل له لاتتدخل وهم بعد اخوي معصب يقول شنو هذا وين شخصيته شماغ وعقال بس منظر ,,,, دعواتكم خواتي لي

 

[ام كوثر2007]

والله يا قلبي انتي ابخص وانتي ادرا بحالج ..

دام علي قولتج ما تبين تخسرين ابوج .. قعدي عنده خليه يتكفل فيج ويتحمل مسؤوليتج انتي والاطفال الاثنين اللى عندج .

صراحه انا ما شفت اهل جذى .. يعني المفروض يعينونج والواحد ما فيها شي لا بادر اهو بالصلح .. مافيها كرامات هذى

هذا مستقبل مرا وعيااال ..

بس مثل ما قلت لج انتي ابخص .. وعسى الله يكتب لج اللى فيه الخير

 

[شوق المسافر]

انسي كل حاجه هالفتره وحاولي تشوفين وين الخطا ومواقع الضعف فحياتك الدينيه وحاولي تقوينها يعني ماتهتمين فالسنن والرواتب اهتمي ماتقرين قران الا كل فتره وفتره مثلا من الجمعه للجمعه اقري قران اكثر بعدين يمكن اللي فيكم عين حاولي ترقين نفسك اكثر ويمكن ترا تكون منك العين يعني حسدتي نفسك من كثر مايدلعك عادي ترا تحصل لي يعني اذا مرت فتره حسيت ان زوجي مدلعني مافي مشاكل بس دققت على وضعنا من غير ماقول ماشالله استغفر الله يتغير شوي بس ارجع ارقي نفسي واكثري من الاستغفار والصدقه حاولي تنسينه شوي اهتمي بنفسك اكثر وبدينك ترا ان صلحت علاقتك مع ربك صلحت علاقاتك مع الناس يعني قيسي حياتك على هالمقياس اذا كانت حياتك الدينيه زينه وتهتمين فيها قبل كل شي صارت حياتك الاجتماعيه والعمليه تمام لاتخلين مخلوق يشغلك عن الخالق فكري اكثر شي بربي واكثري من ذكره (( اذكر الله يذكرك)) صدقيني بتحقق امانيك وبتجيك الدنيا راااغبه بس هاه موتقربين من الله عشان الدنيا لاااا تقربي من الله عشان ترضينه عشان الاخره عشان القبر اللي كلنا بننحط فيه ... يمكن تقولين الاخت قلبت علي محاضره دينيه سامحيني بس ترا احيانا الانسان من تقصيره ربي يعاقبه واخر نصيحه لك اختي الله الله في قيام الليل رب العباد يكون في السما الدنيا يقول من داعي استجب له هل من مستغفر اغفر له ... الله يرد لك زوجك رد جميل

 

[ملح الدنيآ.]

الخواات ماقصرو وهمن كلام اخت خالتهم صح بينيله انج عايشه حياتج عاديه خليه يحس بغلطه

وعليج بالاستغفار وقيام الليل وقولي لا حول ولاقوه الا بالله 100 مره

عسى الله يهدي ريلج وييسر امورج يارب العالمين ​

 

[popa]

الله يعينج ويهدي زوجج وايسر امورج

 

[ميسو44]

الله يعينك ويصلح الاموربينكم وحسبي على الاهل اللي يخربون بين الرجال وزوجته الله يردها في بناتهم

 

[دلووعه نواف]

الله يعينج ويصبرج .. والله حسب خبرتي الرجال مايحب اللي تذل نفسها وتلحق وراه .. الجنه والنار ماهي بيده مايشوف شر
اصبري واشغلي نفسج , اطلعي سوق , زوارات يعني سلي نفسج , والواتس اب كنسليه ريحي قلبج ولا انج تقعدين تلاحقينه متى دش ومتى طلع !
والله ملاحقه يجييب لج النكد , او في طريقه ثانيه حاولي تحتوينه تعوضين مكان امه البسي كل يوم وتكشخي وخليه بس معاج روحي وردي معاه دقي عليه كل شوي يعني صيري ام وزوجه وحبيبه وكل شي , ولو باعتقداني الطريقه الاولى انفع لج

 

[Hello_kitty]

حبيبتي الله يكون بعونج انه مع كلام اخت خالتهم فعلا ريلج واهله شوكتهم لازم تنكسر الطيبه والسنع والتسامح ما يفيد مع الكل
((ان انت اكرمت الكريم ملكته وان انت اكرمت اللئيم تمردا))

وريلج واهله من النوع الثاني ماراح يقولون عفيه عليها وكفوا بنت اياويد شاريه بيتها وريلها لأ بيتمادون ويتكلمون ويشهرون

فيج وبيتعززون ويذلوونج ويتشمتون للأسف..انتي اللي عليج تسمعين كلام ابوج وعفيه عليه هذا عزوتج وظهرج مارضى لج

الذل ولا رضى ان يدوسون فوق راسج مثل ما الريال واهله عندهم كرامه انتي بعد واهلج عندكم كرامه مدام ما غلطتي والغلط

والعيب طلع منهم لا تخافين ولا تحاتين رب العالمين معاج ومالله بغافل عما يعملون.. ويمكرون ويمكر الله والله خير الماكرين

ويابخت من بات مظلوم ولا نام ظالم حتى بالدين ملزوم اهو اللي يراضيج ويطيب خاطرج اذا غلطان وملزوم يحفظ اسرار حياتكم الشخصيه وما

يتكلم عنج وينقدج حتى هذا اهو محاسب عليه وحق من حقوقج ان يصونج ويصون خصوصياتج وما يطيع امه بشي اللي يخرب بيوت الناس

ويهدمها وامه بتحاسب على مدح محارم الناس جدام اعيالها وتفرق بين الريال ومرته حسبي الله ونعم الوكيل بهالأشكال
والحمدلله ان عندج هالأهل ..اللي نفس اهلج تفتخرين فيهم وتشدين فيهم الظهر مو مثل الأهل اللي بنتهم تييهم مطروده مطقوقه او منهانه ويرجعونها والريال يشبعها ذل وقهر واهم يتطمشون..حبيبتي انتي لج قدرج ومكانتج وعزوتج لا ترخصين بنفسج ..الله كرم الإنسان لا تسمحين لأي بشر يهينج ويهين اهلج..الزواج رحمه وموده مو عبوديه وذل مثل مفهوم بعض البنات للأسف اللي ما تسوي حق روحها قدر لا ريال ولا الناس بيقدرونها

انصحج عشان ما تتعبين توكلي على الله وقطي كل همج على اللي ما تنام عينه لا تفكرين اهو شيفكر شنو بيسوي بيطلق بيتزوج بيرجعج.. ابدا شيليه من بالج
اللي الله كاتبه بيصير..رددي دايما اللي فيه خير الله بيكتيه لج وربي ماراح يضيعج ولا تخسرين ولا دقيقه تفكرين بفعله وردة فعله

الله سبحانه وتعالى بيدبر كل امورج وبيسرها لج..طلعي واستانسي وونسي ولدج واذا ضعفتي او تبين تبجين ابجي وفضفضي

بس لرب العالمين لا تدزين مسج ولا تدقين ولا تنزلين عمرج وتوطين راسج ابوج والله يمسح على قلبج ويصبرج ويردلج زوجج ردا جميلا

 

[دلوعة أبوهآ]

الله يعينك ويفرج همك ..

 

[A_M_A]

آول شئ آنتي حآمل آلحيين ؟؟

شريط آلحمل حقج ؟؟

آذآ حقج آقولج

رآح يكون عندج منه طفلين

آختي آلله يعييينج ويسهل آمررج

فوضي آمرررج لرب آلعآلميين

ولآتتصلين عليه ولآتدزين له مسجآآت

ولآشئ وآنسييه وآستآنسي وآطلعي وروحي وتعآلي

وآلي ربج كآتبه رآآح يصير مآرآح تقدرين تغيرين نصيبج

وعلييج بسورة آلبقررة وآلدعآء

ولآتنسين آلصدقة

وخلي على لسآنج دآيم كلمة آلحمدلله

...