بنات انصحوني اعتبروني مثل اختكم ...

[مياسه الحساسه]

السلام عليكم
اخواتي انا عندي مشكله يمكن البعض ما يشوفها كبيره بس والله مأثره على نفسيتي حيييييييل
بنات قبل 8 ايام زوجي سافر دوله خليجيه قال عنده توقيع عقود وانه يبي يكون موجود
للعلم زوجي هو وسيط يعني وجوده مو ضروري ولو تم الموضوع بيوصله حقه في التوسيط بين البايع والمشتري
المهم هو علمني قبل سفره بيوم انه بيسافر .. وانا قلتله طيب خذني معاك منها اغير جو ومنها انت تشوف اشغالك ..للأسف قال مقدر وبيكون معاي ناس وبنشغل
المهم انا قلتله سوي اللي تبيه انا تعبت من حواراتنا ونقاشتنا بدون فايده وانك تسوي اللي براسك وأنا ما ينوبني من هالنقاشات الا الصداع والقولون والتعب النفسي
المهم زوجي ثاني يوم سافر في الصباح وكنت انا نايمه جا قالي بسافر وسلم علي وقال منتي مودعتني انا غمضت عيوني وطنشته من القهر ..
المهم سافر زوجي وجلس 8 ايام في سفرته وانا كنت حدي متضايقه لاني ودي اغير جو واحس نفسيتي منعفسه من البيت واولادي ودي ارتاح واغير جو وانا واياه لحالنا
المهم رجع زوجي وانا كنت عند اهلي ... جا سلم واخذنا انا المهم ما استقبلته زي الناس بوزي شبرين لاني من جد متضايقه يابنات
رجعنا بيتنا وجا يسلم علي دفيت وجهه وهو راح يلعب مع عيالنا
بعدين جاني يعطيني هديه جابها لي ...وانا دفيتها وقمت جلست برا الغرفه في الصاله

الزبده بنات
ان انا زوجي شغله متعب يعني هو يغيب عن البيت يومين ويومين عندي واليومين اللي عندي يقضيها مشاوير او يقابل اخوياه في القهوه
ما انكر انه يمشيني بس يابنات مو كل مكان يحب يوديني فيه غيره مرره واحيان سبة الغيره يخرب علي التمشيه وجوي ينعفس
يعني يابنات احس زوجي دايم مشغول وانا الفراغ ذبحني .. لي سنه وشوي مخلصه جامعه واحس بفرااغ كبير ..
يعني يابنات احس زوجي فيه انانيه دايم يبيني انا اراعي ظروفه وعمله وهو لاا
غير كذا بنات زوجي من النوع الهادي او باارد وانا صرت مرره عصبيه حتى على عيالي صرت اعصب .. كله من اوضاعه اللي لابد انا اتحملهاا
بنات لا طلعت اتمشى معاه عيالي يتعبوني واحس ما استانست
ولا تركتهم عند اهلي وحبيت اروح مكان معين يقول لا ما ينفع كله شباب او فيه حركات ما نروحه
وانا تعبت من الروتيييييييييين احس كرهت نفسي ...
غير كذا يابنات ماعندي علاقات اجتماعيه يعني ماعندي صاحبات اطلع معاهم استانس معاهم
علاقتي بكل الناس عاديه او قريبه للسطحيه وماعندي اخوات يعني عندي فرااغ يذبح
غير كذا بنات انا من النوع الخجول والحساس ...
يعني لو كنت مثلا اروح لناس ولقيت منهم حركات تجرحني ماعاد اروح اتجنبهم
كمان علاقتي باهل زوجي لها تقريبا سنه سطحيه جداا
وماعدت احب ازورهم بسبب انهم من قبيله وحريم اخوان زوجي كلهم من نفس قبيلتهم وانا الوحيده من برا القبيله
ما احسهم يندمجون معاي وهم بصراحه اسلوبهم مرا دفش وينقدون على كل شي تعبت معاهم
والله ادري هالموضوع بقلب روسكم فيه بس ودي تساعدوني
وودي اعرف كيف اتصرف مع زوجي من جا امس من السفر وانا ما اكلمه ومتضايقه
وجزاكم الله خير مقدما

 

[ام فواازي]

والله زين ذكرج بهديه ومازعل يوم صديتيه وحذفتي هديته
اللي انتي في من الفراغ انا نفسج جذي قبل بس الحين لا والله شغلت وقتي اخذ عيالي العصر اروح الممشى منها امشيهم اخليهم ينطلقون ومنها اشم هوا واحرك دمي عيالي ينامون الساعه 6 ونص من ينامون اطلع ازور اهلي او اطقطق بالنت والتي في او احورف بنفسي مااقعد جذي ضايق خلقي ادبر لي شغله اسويها
حبيبتي الرجال مو متزوجج عشان يمشيج ويونس الزواج مو جذي اذا كان معاملته حلو لج و يصرف عليكم مايبخل حمدي ربج غيرج يموتها من الطق وصابره وغيرج مهملها والصرف عليها من الى وساكته وانتي زعلانه لانج متملله حمدي ربج لاتتكبرين عالنعمه وانتي بنفسج تقولين شغله متعب يعني تصيرين انتي والشغل عليه ماترحمينه

 

[عشقي الجنوب]

الله يكون بعونك اتوقع لوفيه شي يجذبه بالبيت صدقيني ليطلع وقت فراغ ويجلس معك ,,ابدي بنفسك نظمي وقتك ووعيالك مو اذا جاء يلقى البيت صرااخ في صرااخ شجعيه شاركيه في شغله لو بالكلمه الحلوه خليك قريبه بعيده بحيث انه اذا بغاك يلقاك جنبه بس مايملك مادري شلون اشرح لك يارب تكونين فهمتي قصدي انتب باين انك قاطعه كل العلاقات ومركزه عليه تعرفي كوني لك علاقات اشغلي نفسك اذا جاء يرتاح بالبيت انتبهي انتبهي تنفرينه منك بالشكوى من العيال ومشاكلك وتحاسبينه على تقصيره اختاري الوقت المناسب وناقشيه ,,لأني متأكده بما ان ماعندك علاقات اكيييد بتحطين كل شي عليه ,,,كنت نفس حالتك بالضبط لاكن قررت اغير وفعلا ارتحت كثير صار هو اللي يطاردني وكله يدق علي ومسجات ووينك ولهت عليك من زمااااان ماقلتي لي شنو بخاطرك ؟؟والحين صاير يستانس اذا دش وحصلني فاضيه صاير يتحرى الكلمه مني وكله اذان صااااااااااااااااااااااغيه ههههههههههه

هذي الحياة توم وجيري مرات انا اطارد زوجي ومرات هو يطاردني هع

 

[!الجادل الصعب!]

الحين مشكلتج الفرآغ .. ليش تحطين الحره فيه وهو رآيح لشغل غيره يروح
لخرآبيط ويآويل زوجته اذا زعلت ..
كنتي تقدرين تقولين له يحدد وقت تسآفرون فيه بروحكم ..
اشغلي نفسج فبيتج وعيآلج .. شوفي لج علآقآت .. هوآيه اي شي
عشآن ماتطلعين ضيقتج فيه ..

 

[منو انت]

شوفي انا ماالومج صح الواحد يعني دايم يبي لنفسه الشي الاحسن

بس انتي الله يهديج حياتج كله اهو وهذا غلط الحمدالله ليش تقولين عندج فراغ بالعكس لو ترتبين وقتج عدال ماراح تحصلين فراغ

واكبر غلط يصير محور حياتج زوجج يمكن في حريم على بالهم هذا صح بالعكس هذا غلط لان مفروض نفسج وراحتج لها وقت وعيالج لهم وقت واهلج لهم وقت

يعني لو يومج يكون منسق شوي مع عيالج اذا يدرسون وشوي تروحين حق امج وشوي ترتبين بيتج ماراح يكون في وقت فراغ

بعدين جربي يوم تروحين سوق يوم اخذي عيالج روحي سينما يوم تمشي بس رتبي وقتج انا اشوف ان ماعندج فراغ بس انتي مارتبتي الوقت عدل

 

[قنــــــــــوت]

بصراحه كسر خاطري ..... زوجج مايستاهل منج هالجفوه ...

وتقدرين تحسسينه بحاجتج لتغيير روتين حياتج بطريقة ارقّ ...

بالنسبة للملل اللي عايشته .... لو تشغلين وقت فراغج بهواية معينه .... او تاخذين دورات شرعيه او كمبيوتر ...

طوري نفسج .... واشغلي نفسج مع عيالج اكثر ...

اطلعي معاهم اماكن عامه .... ونسيهم ... واستانسي ...

عسى الله يفرج همج ... ويسخر لج ريلج ويسخرج له ..

 

[معشوقتي امي]

حبيبتي كل الرجال لهم ظروفهم الخاصه بس انتي ماكان لازم عليج تصدينه ........حسسيه انج مضايقه بس باسلوب حلو فيه دلع راح يطخ صدقيني تري الرجال قلوبهم قلوب اطفال الرجال مايحب الحرمه تكشر انا عارفه انها شغله تضايق بس يمكن صح مكانج ماكان له داعي للسفره كان بامكانج تقولين له اطالبك سفره شهر عسل اذا تبي ارضي عليك وين كيد النسااااااااااااااااااا الله يسخر قلبه لج يارب

 

[أعشقه]

ياشيخه وسعي صدرك ولا تخربين ع نفسك وبكرى تكبر المشكله وثمن تندمين
زين منه تذكرك بهديه وهو قالك مايقدر يوديك عشان معه ناس .. يعني لو رحتي معه وماقدر يطلعك او يمشيك هم بتزعلين وبتقولين رحت معه ولا اهتم او ماجلس معي فكري فيها صح
حاولي تخليه بفتره معينه يكون فيها فاضي ويطلعك تمشيه بمكان مارحتي فيه يعني تغير نفس
وبعدين وش يمنعك ماتسوين لك صحبه وصديقات وهذا وانتي تو متخرجه من الجامعه وين البنات الي كنتي معهم
حاولي تتواصلين مع الناس وخلي يومك فيه تفائل عشان تعيشين
الله يسهل امورك

 

[بيتي بوب بس كويتيه]

حبيبتي انا قبل جذي
بس من توظفت تغيرت ١٨٠ درجه والله أني وحده ثانيه
تعرفت على بنات اطلع معاهم اشتركت بنادي
واصلا انا اقوله سافر فج عنا شوي ابي اشتاقلك وانت تشتاقلي
حبي نفسج قبل لا تحبينه بترتاحين

 

[مارشميلو..]

اوووووووف نفس حالتي من الفراغ هذا يمه هههههه
تدورين المشاكل وتحسين ان مافي شي عاجبك
مالنا حل الا نشتغل بس للحين وزاره الخدمه حالفين مايوظفونا هههههه
انا اقول ادخلي معهد اخذي لك لغه ولا كومبيوتر اشتركي بنادي
شوفي انتي شتحبين وسويه
بس لاتنكدين ع الرجال ينحاش ويدور له شي يونسه بدالك
وترى ماغلط بالعكس هو رايح شغل وجاب لك هديه بعد ماقصر
وعسى الله يوفقكم

 

[محتارة وبصيح]

مسكين تراه يحبج بس قدري ظروفه وكفاية انه ياب لج هدية

 

[Dark SouL]

جنج تقولين سالفتي

بس المشكله ان زوجج يسافر لشغل ,, وانا زوجي الصبح دوام والعصر جامعه ويرد البيت حييييييييييييييل تعبان وماله خلق لا انا ولا ولدي :"( والوحده حيل متعبتني وصايرة انطوائية لا روحات ولا طلعات ولا رفيجات الكل لاهي ببيته وزوجه واولادة

 

[Tom ♥ Jerry]

,



آنتي قلتي انا جآمعيه و خلصتي دراسه ,،
يعني بس نآطره الوظيفه ، حبيبتي الوظيفه رآح تعفس حياتج و تغير الروتين ،
بتخليج تقولين ودي اقعد بالبيت مآ آدآوم ،
بس كلها ايام و هالآحساس الي انتي تحسين فيه الحين
طبيعي يمر على كل ربه بيت مآ عنده شغل .، !
و آنتي مآ عندج شغل ،


انا آنصحج بهالفتره على مآ تتوظفين ،
آنه تروحين دورة أو نآدي أو اي شي تشغلين نفسج فيه
و ياكثر الدورات الي تفيد و تستانسين فيها و منهآ تتعرفين على بنات بعد :*

دورة مكيآج دورة لغه آنقليزيه اي دورة تحبينهآ ،
رآح تفيدج وآيد و تلهيج شوي !

 

[القصيدة]

السلام عليكم و رحمة الله و بركاته

زوجك يحبك و شاريك الله يخليكم لبعض و يسخركم لبعض

أنتي زعلتي و هو حاول يراضيك بأكثر من طريقة

أتمنى تراضينه و كافي تتغلين عليه حتى ما يمل

بالنسبة لوقت الفراغ الصبايا ما قصروا بالحلول و برضو أنتي حاولي تغيرين جو البيت لما يكون زوجك موجود

موفقة الغاليــــــــــــة :eh_s(7):

​

 

[لباسةالعقد]

ماادري يمكن استنتاجي بعيد بس انا اتوقع اذا كنتي تاكلين حبوب منع الحمل اتوقع هي اللي متعبة نفسيتج ولاعبة فيها لعب
وخلينا نكون واقعيين اذا ماعندج خادمة ووقتج لبيتج ولعيالج وزوجج ومافي تغيير بحياتج اكيد بتكونين عصبية ومالة من كل شي
جددي بحياتج غيري بشكلج مولشخص معين لذاتج بسسسس

 

[مياسه الحساسه]

تسلمون اخواتي
الله يفرح قلوبكم ياارب
وصادقين الفراغ هو اللي متعبني من خلصت جامعه وانا اخلاقي تغيرت وصرت دايم طفشانه ودايم معصبه
خصوصا انا ماعندي شغل في البيت ... عندي خادمه تساعدني
واولادي صغار اكبرهم 3 سنين وشوي
والحمد لله تكلمت مع زوجي وفهمني الوضع وانا اتسامحت منه
وقلت له باخذ دورة تجميل ووافق الحمد لله
مشكورات اخواتي كلامكم له دور في ان نفسيتي ترتاح
الله لا يحرمكم الاجر
ويسخرلكم من تحبون ويقر عيونكم في اولادكم ياارب

 

[(*ام عهــــد *)]

الله يسعدج يارب
الحمدلله انكم تفاهمتو

 

[استشارات]

" أفضل الذكر لا إله إلا الله وأفضل الدعاء الحمد لله "

 

[ريحانة الجبل]

حبيبتي انا حاسة فيك بس ارد واقونلك حمدي ربك زوجك جاء من السفر لبيت اهلك واخذك اما انا فزوجي لما يرجع من السفر يروح البيت ويتصل ويقول يعني ما تدرين اني اليوم اوصل ليش ما ناطرتني في البيت يالله تعالي ويا عيالك وياب لك هدية وانا ما شفت الهدية الا قبل خمسة عشر سنة يوم الملكة ، والله ما قصدي احسدك لا تفهميني غلط بس ابي اوريك انك في نعمة غيرك محروم منها ، حمدي ربك وبعدين ربك يزيدك من نعيمه ( ولأن شكرتم لأزيدنكم ) صدق الله الغظيم "" الحل :
- رتبي وقتك مع عيالك بحيث لما يرجع البيت يكونون نايمين او على الاقل ما يحتاجونك وفهميهم ان بابا لما يجي انا ابي اقعد معاه
- اول ما يجي سوي لك قعده معاه وشوفي شنو اهتماماته ( بورصة ، كرة قدم ، افلام ، سياسة ) حاولي تثقفين نفسك بهذه المواضيع عشان يكون عندكم مناطق للحوار ويحس انك فاهمته ويكون هذا دافع له عشان يكون معاك وقت طويل ويفكر انه لما ياخذك معاه في السفر راح يستانس ويروح عليه الوقت بسرعة مو بثقل
- لما تكونين معه في قعده حلوه صارحيه بمشاعرك بالوحدة وطلبي اقتراحاته ( بدون هواش ونكد )
- خصصي لكم يوم طلعة عائلية مع اليهال بعد ما تتفقين معاه على يوم يناسبه
- باقي وقتك اشغليه ويانا على النت بعد ما تخلصين شغل بيتك
اتمني ان افدتك وموفقة

 

[عاشقة الاسلام]

صراحه الخوات كفوا وفوا واتمني تسمعين نصايحهم