بنات طالبتكم تشاركون بهالحملة لمصلحة بلدنا الكويت

[diorella]

بنات حرام واما الساءل فلا تنهر
لا تعطونهم بس لا تهزؤنهم ..
انا والله اذا سلم علي الهندي اول اعطي واحس اني مرتاحه
بس الحين مثل ماقلتوا صار شي مزعج ..
اذا سلم عي الحين ارد السلام واركب السياره .. جني ما ادري ههه

 

[كراميل]

لا أعوذ بالله ما نهزئهم
بس ما نبي نعودهم عالرباده و الطراره و نخليهم يشوفونا كنوز تمشي على الأرض
والحمدلله مافي بيت بالكويت مو مستقطع من حسابه لعمل الخير و يطرش للجان المعترف فيها صدقات طول السنه

 

[ورده بنفسجيه]

افا عيج سويت لهم عريضه

ومشكوره على التنبيه والله ما دريت الا منج

 

[الغاليه نونو]

والله يابنات صج الربع دينار والا النص دينار ماراح نفقرنا بس هالهيلق اللي يطرون اغلبيتهم مومحتاجين والاغلبيه يطرون وهم قادرين علي الشغل اول شى بالكويت محد يموت من اليوع الخير وايد المسايد يالله من فضلك بايام رمضان وبالايام العاديه عامره بهالاكل والهدوم مكوده حق الفقير والغني الكل يقدر يلبس ويعيش بالكويت وهالطراروه انا ماعطيهم بالايام العاديه وحتي برمضان اشووفهم بالسووووق اشكثرهم وماعطيهم بس اقول لها الله يعطيج حجيه

انا حطيت لي حصاله بالبيت وكل شهر افتحها اشوف جم فيها واللي يطلع اخذ منه مبلغ واتصدق فيه باقرب مسيد وباجي المبلغ اشتري فيه اكل وكل ليلة يمعه اوديه مسيد منطقتنا عليهم بالعافيه وياريت لو تسوووون هالطريقه وترتاحون نفسيا من هالطراروه والحين يالله بروح الموقع وابي اقول رايييي

 

[كراميل]

طشه ورشه : هاهاههاهاها ضحكتيني يوم قلتي عريضه .. شقرديه يا أمر

الغاليه نونو : والله خوش طريقه .. جزاك الله خير .
انا طريقتي شويه تشبهج .. انا سمعت بدرس مره فكره و كثر ما اقدر قاعده احاول التزم فيها .. تحطين حصاله و تحطين فيها اي مبلغ حتى لو خرده الصبح و هم بالمغرب .. لان الملائكة تستغفر للي يتصدق بالصبح لي المغرب واللي يتصدق المغرب لي الشروق .. و لما تنترس اوديها وحده من اللجان

 

[كراميل]

للرفع

 

[غلطة حياتي]

صج قلبج على هالديره تسلمين اختي على الموضوع وانا معااااااااااااااااااااااج

 

[Fouz]

تسلمين أختي و الله يكثر من أمثالج، و الحين بشوف الموقع و اكتب شكوتي، و سالفة الزبالة هذي كله من المصانع اللي تطلب قواطي البيبسي الفاضية و يعطونهم فلوس بدالهم عاد هذول يعفسون الزبالة و يكودونها حق الذبان و القطاوة و الريحة

 

[aBoOoRa]

مشكوره حبوبه عالحمله الرائعه وانا معاج وان شاء الله نفتك من الحلات الموطبيعيه الي قاعده تصير بالديره من الير كويتين والمتسولين

وخاصه الي عند الشاميه موووووووول

ماحبها قطيعه تخرع الواحد​

 

[ii DareeN ii]

يعطيج العافيه حبيبتي ياما نشوف من هالاشكال مره واقفه يم الجامعه ولا ايني واحد لابس لبس بحريه ويطق الدريشه ويقولي اختي السياره وقفت وماعندي فلوس والله من التدوده عطيته وغير ملوت الاشارات غير الي يتمشون بسوق مغطين ويوهم والي يطقون البيبان والي يدرعمون بغرف المستشفي بس شالحل اليهال يقولون نخاف نوقفهم ولا نلحقهم يركضون بالشارع ويندعمون الله كريم والله الديره متروسه تسول

 

[كراميل]

athari : حبيبتي والله .. مو احنا شنو ذابحنا الا حبنا لهالديره الطيبه

Fouz : هلا والله حبوبه .. مو المطلوب فرض مخالفات لهالمصانع .. ما ادري ليش كثر ما نتكلم بهالموضوع ما نشوف رد فعل قوي من المسئولين ! علشان جذي نبي نفضه قويه و وقفه وحده .

aBoOoRa : اللي عند الشاميه ؟ أكيد تقصديت معصومه .. هذي مينونه الله لا يبلينا .. الشرهة على الصاحين اللي مافيهم شي

DareeN : بحريه ! قاموا يلبسون أزياء تنكريه بعد ؟ وهاللي بالبحريه مع ويهه ماعنده موبايل يدق على اهله و الا تاكسي يوصله و يحاسبه لما يوصل ؟ والله حاله .. قاموا بتفننون بعد

 

[كراميل]

منو بعد طرشت للموقع ؟؟؟

واللي طرشوا خل يقولون لنا شنو كان رد خدمة المواطن لهم و رد الداخليه بعد

يالله نبي همتكم معانا

 

[كويتية أصيلة]

بس يا ربي انا حدهم يكسرون خاطري هذول اللي يبيعون فوط

هذول الوحيدين اللي يكسرون خاطري

 

[كراميل]

كويتية إي اليمنيين .. صج عاد هذيله يكسرون الخاطر بس هم كثرتهم مو زينه و لا لازم نكون على نياتنا .

 

[TLG]

الله يعطيج العافيه

 

[atooma]

سلااااااااام كله عسلللل على احلى منتدى بالنت كله
انا قاعده اقرى الموضوع وضغطي ارتفع ماعساي اطلع من البيت الا الطرار قبلي وصلو لمصافط بيتنا والله مصخره يبطوووووون الجبد ولااااازم نتعاون يمكن الداخليه تحرك دمها شوي وتصيدهم اكثرهم بدون اقامه والله يعيييين

 

[كراميل]

TLG الله يعافيج يا رب

atooma : هلا بأتومه اسمج يونننننس يذكرني بفطومتنا
اي والله .. كلامج عدل . بس يا ريت من يسوي شي

 

[Amory]

مشكوره وزين ما سويتي

 

[كراميل]

Amory : العفو حبوبه

 

[إستبرق الكويت]

وماذا يحدث في شهر رمضان ؟

تكثر عمليات التسول في الكويت خلال شهر رمضان المبارك وغالبية المتسولون من النساء والأطفال ونشهدهم عند المساجد والأسواق وحتى البيوت

وقبل شهر رمضان بشهر - إسبوعان تفتح الشئون أبوابها لاصدار الفيز للإلتحاق بعائل , وتكثر دخول العوائل للكويت وخصوصاً من بعض الدول العربية المشهورة بعمليات التسول والتي تتخذ التسول مهنةً مربحة لها

والمعروف إن إصدار الفيز يحتاج لرسوم مالية , والفحص الطبي يحتاج لرسوم مالية , والضمان الصحي بحاجة لرسوم مالية والإقامة كذلك

هذا ناهيك عن السكن والإيجار

إن كان كل ذلك سيتحمله المعيل للأسرة , فكيف يكون محتاجاً ولا مورد مالي للأسرة سوى التسول ؟

لا أعلم متى سنرى الكويت بشكل حضاري , دون متسولين , دون باعة متجولين عند الإشارات , دون نصب على المواطنين من قبل جموع مقيمين همهم إستنزاف ما يجيب المواطنين من عملات حتى وإن كانت عملات حديدية !

لم تتساهل الحكومة معهم , ولم تسهل لهم إصدار الفيز ودخول الكويت وتدعهم يمارسون عمليات النصب بحجة الحاجة ؟


دفع البلاء والصدقة والتبرعات تقدمها الكويت لتلك الدول وللأسر المحتاجة , كما إن الجهات الخيرية بفروعها منتشرة في الكويت ولا تتوانى عن مساعدة المحتاجين

ولكن وجود هؤلاء في شوارع الكويت منظر غير حضاري خصوصاً إن النسوة منهن يتخذن العباءة الكويتية ستاراً لهم وكأن المتسولات كويتيات وهذا ما يعكس صورة مغايرة لما نرتضيه لبلدنا الكويت والشعب الكويتي بالإضافة الي أن الإستغراب هنا من الحكومة التي تسهل لهم عملية الدخول والتسول دون رادع !

والله شاهد على ما أقول قبل إسبوعان تحديداً جاءت إلي إحدى النسوة العربيات من سوريا أو الأدرن لا أعلم تحديداً دخلت علي في مكتبي وإنتظرت خروج المراجعين لتطلب مني الخروج معها خارج المكتب لأنها تريد محادثتي بأمر خاص ! وإذا بها تشرق وتغرب بالحديث عن حالتها المادية وزوجها الذي يمر بوعكة صحية وكل هذا وأنا أعتقد إنها تريد إستثناءاً من دفع قيمة الطابع

وإذا بها تدخل في موضوع عدم تمكنها من دفع الإيجار وحين طلبت منها تحديد ماتريده بالضبط مني وأنا لا أعرفها حتى فقالت أريد منك مساعدتي في دفع الايجار وحين طلبت منها أن تدلني على من دلها علي رفضت كما رفضت إعطائي رقم هاتفها وحين التقصي عنها ورجوعي بالذاكرة للخلف قليلاً تذكرت إنها كانت قبل أيام مراجعة عندنا ودفعت مادفعت من رسوم مالية !

التسول اليوم مقترن بصورة كبيرة بالنصب , لهذا وجب توجيه تبرعاتنا لمن يحتاجها فعلاً وليس من ينصب علينا بحجة الحاجة وإن الكويتيين جيوبهم ملئى بأموال النفط !

الموضوع قديم وذو صلة بما أدليتم به أخواتي وهذا الحاصل بالكويت مع الأسف ​