بنات عفيه الكل يشارك ابي رايكم ؟

[توته79]

شلونكم بنات ..ومبارك عليكم الشهر مقدما :eh_s(6):
بدش بالموضوع على طول
انا صارلي 3سنين متزوجه وعندي بنت وولد ولدي عمره سنه وبنتي سنتين كنت ساكنه مع اهل زوجي وبصراحه ماكانت علي اي مسئولية لابرمضان ولا شي والحين بنطلع انشالله بعد جم يوم بشقة بروحنا فأول مره بتصير مسئوليه علي وانا عندي خدامه وحده وياي رمضان وتعرفون عمر عيالي يبيله مجابل هل راح تقدر الخدامه تقوم بشغل البيت واجابل اليهال وبرمضان تدرون الشغل يزيد ..انا كنت مفكره اخذ خدامة امي اهيه عندها ثنتين بشنو تنصحوني فيه خدامه وحده تكفي والا اييب ثنتين لان قاعده افكر فيها تنظيف البيت والملابس والكوي والمطبخ انا طبعا ايدي بايدها بس يمكن لاني ماعندي خبرة بشغل البيت .و مابي اخلي ريلي يحس بتقصير او انه وضعه تغير من بيت اهله .يريت تفيدوني .

 

[لانا]

علينا وعليج حبوبه...
اذا انتي ماتداومين تروالي مالا داعي خدامتين وحده كافي وبعدين انتوا شخصين مع الخدامه يعني كميات الاكل اللي راح تسوونها مووايد ...بس لازم تساعدين الخدامه يعني انتي تمسكين اليهال واهي بالمطبخ او العكس بس رتبي الشغل ووزعيه بينج وبينها...ولما تزورين اهلج او حمولتج خليها تكوي وتغسل ....ولا تحاتين وايد راح تتعودين بسرعه على الوضع..

 

[توته79]

up......................

 

[رهوف]

يعتمد انتي موظفة او لا ... وخدامتج تشيل المطبخ بروحها برمضان او لا

بس آنا رايي ان اذا يبتي خدامة ثانية بتتعود خدامتج عالربادة ولما تروح بيصير مالها خلق تشتغل آنا اقول انتي وياها تساعدوا وكل شي بالتنظيم يصير يعني الحلويات اشتري جاهز او سوي من بالليل وكمية وحطيهم بالثلاجة
اشتر كبب وسمبوسة مثلجين وقت الحاجة بس قليهم الهريس واليريش من الجمعية والطبق الرئيسي والشوربة هينين
والله آنا اداوم واسوي جذي ولا تتوترين ترا الشغلة سهلة واليهال حطيلهم فيديو بدارهم صج صغار بس هم يريحج شوي بارني وتليتبيز وتقزر ان شاء الله
ورمضان حلاااااااااااته بالتعب الله يعينج ومبروك الشقة اليديدة

 

[السدرة2]

يعتمد عليج إذاإنتي موظفه تقدري ن تحطين عيالج بحضانه انا أسوي جذيه وعيالي صغار ونظمي امورج مع الخدامه انج تمسكين اليهال اذا إهيه مشغوله ولعكس صحيح اهم شي لا تييبين ثانيه لان يمعتهم مامنها الا الا المشاكل وإستعين ي ببعض الاكلات إلي تقدرين تحضرينها بشكل سريع والله يوفقج

 

[tabaskom]

السلام عليكم
حبيبتي يعتمد ... اذا انتي تشتغلين و الله فاتحها عليج و عندج مكان
تقدرين اتييبين مربيتين للمنزل
و بعدين لا تضغطين على عمرج يايج ارمضان و حنه اليهال و لويتهم
و بعدين تبين تطبخين و تنفخين و اتطرشين حق بيت حمولتج و هم بعد اتجابلين ريلج(اذا اهوه متعود انج كله يمه) و اتدارينه
و السلام ختام

 

[توته79]

مشكورين بنات عالردود
والله يبارج فيج رهوف

 

[الغاليه نونو]

سمعيني يمه انتي خلي تنظيف الشقه بالليل علشان الصبح لاقعدتي بتدخلين المطبخ تلقين البيت نظيف واليهال خليهم بغرفتهم لايطلعون بره يحوسون الدنيا حطيلهم فيديو والا اي شى يلهيهم وانتي جابلي الطبخ وخلصي شغلج كله بهالوقت خلي الخدامه يمهم ولي خلصتي من المطبخ وسنعتي فطورج كله روحي حق اليهال وخلي الخدامه تدش المطبخ تلبق الماعين وتغسلهم وتنظف المطبخ

بالوقت الي تكونين فيه يم عيالج انتي نظفي غرفتهم وسنعيها واخذيلج دشش ولبسي وكشخي نطري الفطور وعساج من عواده كل سنه وكل عام

 

[أحب ترابها]

البنات ماقصرروا قالو الي كنت بقوله بس حبيت اضيف لاتحاتين السنه الوقت قبل الفطور طويل يمديج ترتاحين اذا موظفه ودشين المطبخ علي الساعه اربع سوي الاساسيات تري رمضان للعباده مو لطبخ وانتم عائله صغيره يعني اكيد معزومين علي الفطور كذا مره خل نومة عيالج قبل لا تصلين التراويح وصلي بدارهم والخدامه بهالوقت تغسل المواعين وتنظف البيت الملابس ما في احسن من الغساله الاوتوماتيك بتريحج وتريحها والله يبلغنا رمضان ويعينا علي حسن عبادته

 

[بنت ناصر]

اذا بتيبين خدامتين
ييبي كل وحده جنسيه عشان وحده اتفتن على الثانيه )))))