ما تزوجت الا بعد ما استمريت عالاستغفار مو اقل من شهرين بنيه الزواج من الشخص اللي في بالي ( مع العلم ان زواجي منه كان شبه مستحيل ) وتقريبا كنت فاقده الأمل وعلى فكره عمري من عمرج تقريبا .. استغفاري كان بالشهر فوق ال 30 ألف مره ( يعني تقريبا باليوم ألف مره ) + صلاة ركعتين قضاء الحاجه من بعد الساعه 12 وبعد صلاتي أقعد أدعي ربي بكل أدعية تفريج الكرب مع الثقه التامه وحسن الظن بالله بتحقيق أمنيتي
وقت الدوره طبعا ما كنت اصلي الركعتين لكن أدعي كل الادعيه اللي مستمره عليها من بعد الساعه 12 .. وكان عندي نيه بقراءه سوره البقره كل يوم بس ما قدرت أكملها ولا مره للأسف ,, واكتفيت اني احطها على أذوني قبل لا أنام وأنام على صوتها
كنت استغفر بالسياره وبكل وقت أكون فاضيه فيه ,, وبهالفتره أذكر اني قطعت الأغاني والمسلسلات والتلفزيون بكبره وحتى برامج التواصل من انستقرام ووتس اب وغيره
حبيبتي بقولج شي أهم شي خلي عندج يقين ان الله راح يستجيب لج وثقي تماما 100% ووكلي أمرج لربج واحسني الظن بالله لأن الله يعطي الانسان على قد ظنه فيه ,, ان ظنيتي سوء راح تلقينه جدامج وان احسنتي الظن هم راح تلاقينه .. انا الحمدلله ثقتي بالله كانت عميا سبحان الله وهذا الشي الوحيد اللي كان مهون علي
الاستغفار كنت دايما أقرا عنه وأنوي اني ابتدي فيه بس للاسف ما أستمر يعني حدي يوم او يومين وخلاص ,, اقري بالنت القصص اللي تحققت بعد الاستغفار وراح تعطيج دافع قوي نفسي
وآخر نصيحه وضروري ضروري تسوينها .. الصدقه الصدقه الصدقه بنيه الزواج // وحاولي انها ما توصل الا لناس فعلا بحاجه وعازه لها ( مثل يتيم أو أرمله أو شخص ليس له مدخول مادي ) وحطي خط تحت محتاجين لها مع الاستمرار فيها وعدم قطعها حتى بعد تحقيق اللي ابالج ,, وربي يوفقج ويرزقج بالزوج الصالح اللي يسعدج ويعوضج
