بنات منو تدرس بالجامعه العربيه المفتوحه او عندها فكره عنها ياريت تردون علي

[lolO29]

بنات انا ودي ادرس بالجامعه العربيه المفتوحه اذا احد عنده فكره عن الجامعه او احد يدرس هناك بس بعرف اذا اهي الجامعه زينه ولا فاشلة وشكرا

 

[معلمه متميزه]

مشاركة: بنات منو تدرس بالجامعه العربيه المفتوحه او عندها فكره عنها ياريت تردون علي

انا ادرس فيها .. ليش فاشله !!!!!! بالعكس الجامعه قوية وايد ومعتر ف فيها ..

بالنسبه للتخصصات ..

ادب انجليزي ..

ادارة اعمال ( انظمه اداريه )
ادارة اعمال ( اقتصاد )
الحاسوب

التربيه ( التخصص الوحيد الي باللغه العربيه ) ولاكنه مغلق حاليا للمستجدين ..


هذا اعلان التسجيل للمستجدين ..

تعلن الجامعه العربية المفتوحة - الكويت

عن فتح باب تقديم طلبات القبول للعام الجامعي 2006 - 2007 للفصل الدراسي الأول من الفترة :

السبت 8-7-2006 حتى الأربعاء 19-7-2006

على مدى فترتين

الفترة الصباحية من 8 إلى 12

الفترة المسائية من 4 إلى 8


في البرامج التالية :

* برنامج تقنيات المعلومات والحوسبة

* برنامج اللغة الإنجليزية وآدابها

* برنامج إدارة الاعمال ( انظمة اداريه )

* برنامج ادارة اعمال ( الاقتصاد )



والوثائق المطلوبة :

1- صورة طبق الاصل من شهادة الثانوية العامة أو ما يعادلها

2- خطاب معادلة لشهادة الثانوية للمدارس الخاصة الأجنبية في دولة الكويت ، ولشهادة الثانوية ( من خارج الكويت ) من إدارة التعليم الخاص - وزارة التربية - دولة الكويت

3- صورة عن اثبات شخصية ( البطاقة المدنية أو البطاقة الأمنية أو صورة شهادة الميلاد )

4- صورة عن جواز السفر ( الاسم باللغة الإنجليزية )

5 - عدد (2) صور شخصية مقاس 4 في 6

6 - نموذج طلب القبول بعد تعبئة البيانات والتوقيع على صحتها من قبل المتقدم

7 - رسوم تقديم طلب القبول 10 ( عشرة ) د.ك



كما يرجى من أصحاب الطلبات القديمة والتي لم يتم قبولها وما زالو يرغبون في الالتحاق

في برامج الجامعه العربية المفتوحة ( ماعدا برنامج بكالريوس التربية ) ضرورة مراجعة

قسم القبول والتسجيل في فرع الجامعة العربية المفتوحة لتحديث البيانات



عنوان الجامعة : خيطان الجنوبي - ق 2 شارع زيد بن خيل - محاذاة الدائري السادس

ت 4767398 - 4767531



وتسلمين

 

[أمواج البحر]

مشاركة: بنات منو تدرس بالجامعه العربيه المفتوحه او عندها فكره عنها ياريت تردون علي

ما شاء الله زمن العجايب كفت و وفت

ومن يقول عنها فاشله؟؟ بالعكس كفااية شهادتها معترف فيها

بس سبحان الله بعض الناس تحب تهبط من عزوم الناس

انا اول ما دخلت الجامعة الكل يقول ليش و شحقه و تراها فاشله و من هالكلام البايخ

الحين ثلاث ارباع الاوادم اللي قالوا لي هالشي ودهم يدشون الجامعة

توكلي على الله و سجلي

 

[أوركيد]

مشاركة: بنات منو تدرس بالجامعه العربيه المفتوحه او عندها فكره عنها ياريت تردون علي

لولو...

الجامعة العربية تخصصاتها أدبية..

هذا موقعهم ان شاالله يفيدج ..

http://www.arabou-kw.edu.kw/

 

[طال السكوت]

مشاركة: بنات منو تدرس بالجامعه العربيه المفتوحه او عندها فكره عنها ياريت تردون علي

زمن العجايب........وامواج البحر

ابي اسالكم لو سمحتووووووا وعسى الله يجزاكم خير.....ياليت تريحون بالي وتجاوبوني؟؟

هل صحيح ان الاعتماد كله على اللغه؟؟ ولازم اكون بلبل بالانجليزى؟؟

وسؤال ثانى بعد......الدوام كم يوم بالاسبوع وكم ساعه تقريبا؟؟ لان قالوا لي ناس ان الدوام ساعات 8 بالليل

 

[طال السكوت]

مشاركة: بنات منو تدرس بالجامعه العربيه المفتوحه او عندها فكره عنها ياريت تردون علي

وانا متزوجه وعندي عيال؟؟ تهقون لو ادخلهااا راح تناسب توقيتي؟؟

 

[نملة^فاصلة]

مشاركة: بنات منو تدرس بالجامعه العربيه المفتوحه او عندها فكره عنها ياريت تردون علي

بنات مشكورين على الرد وايد وايد لانه صج فيه ناس حبطوني بس انا راح اسجل فيها بس بغيت اعرف شي دراستها كلها بالإنجليزي انا انجليزيتي جيدة وهم اشكركم مرا ثانيه ما تقصرون)

 

[lolO29]

مشاركة: بنات منو تدرس بالجامعه العربيه المفتوحه او عندها فكره عنها ياريت تردون علي

بنات مشكورين على الرد بس كان في ناس ما مدحوها لي بس انا كنت ابي اتأكد اكثر وانا ودي ادرس وكمل وصج في ناس تحبط ناس بس راح اسجل وتسلمون

 

[أميرة الورد]

مشاركة: بنات منو تدرس بالجامعه العربيه المفتوحه او عندها فكره عنها ياريت تردون علي

بنااااااااااااات هلب فيها ماجستير للغه الأنجليزيه ؟؟؟؟؟

 

[معلمه متميزه]

مشاركة: بنات منو تدرس بالجامعه العربيه المفتوحه او عندها فكره عنها ياريت تردون علي

الي تسال عن الماجستير .. ما فيها حاليا بس بيفتحون بس اعتقد لتخصص ادارة الاعمال والتربيه الانجليزي ما عندي فكره ..

طريقة الدراسه ومواعيدها ..

تاخذين محاضرات وكل محاضرة مدتها ساعتين ..

عندج وقت من 8 صباحا الى 8 مساءا .. تاخين المحاضره بالوقت الي يناسبج ..

المحاضرات كل مادة مرتين بالشهر يعني محاضرة كل اسبوعين ..هذا بالنسبه للتربيه .. اما باقي التخصصات على حسب المادة في مواد نفسنا محاضرة كل اسبوعين وفي مواد المحاضرة تكون اسبوعيه ..

بالنسبه للي تقول انا متزوجحه وعندي عيال .. بالحقيقه انا معاي واااااااااايد امهات عيال وابهات عيال .. وما شاء الله ماشين ... لاكن انتي وقدراتج .. يعني لا تاخذين مواد وايد اخذي على مهلج لانج ان كثرتي مواد راح تتعبين حييل ..

لان كل مادة لها واجبين وبحث غير الامتحان او الامتحانين .. على حسب في مواد واجبين بدون بحث في مواد بحثين بدون واجبات يعني على حسب المادة ..

وطبعا واجباتنا ما تنحل بسهاله وبيوم واحد لاااااااا يبيلها بحث وتحري ومصادر .. فاذا انتي مستعده لها الشي توكلي على الله ..

البحوث نفس الشي يبونج لي كتبتي البحث تقرين وتكتبينه باسلوبج .. وهكذا .. بس ترى سهالة ان شاء الله انتي جربي وشوفي نفسج منتي خسرانه يمكن تكون الجامعه سهل بالنسبه لج .. يعني كلمن وقدراته ..

الي تسال عن الانجليزي .. والله شقولج .. صراحه صعب انا كنت ادارة اعمال استلمت كتاب حق مادة تخصص الله وكيلج عباره عن 6 كتب وانجليزي ابي افهم شي ما فهمت هذا وانا شاطره بالانجليزي بالثنوي ..

غير الانجليزي عندنا المستوى الاول والمستوى الثاني .. هذيل مشترك على كل المواد .. الثاني سقطت فيه صراحه وعدته .. بس بيني وبينج هم يعتمد على المدرس بعضهم يدقق وايد وبعضهم يمشي وانا الي سقطت عنده نحيييييييس اما الي نجحني هو نفسه الي درسني المستوى الاول ومعروف عندنا بالجامعه كلمن يبيه ..

الزبده يا بنات .. انتي وقدراتج ومستواج .. دشو اخذو مادتين ثلاث وشوفو نفسج يمشي معاكم المستوى وطريقة الدراسه تناسبكم .. اذا اي كملو .. والله ويفقكم ويوفقنا وياكم ..


ملاحظه بنات : المواد صح انها بالشر محاضرتين .. بس اذا اخذتي مواد وايد تقريبا 5 مثلا راح تلاحظين انج كل اسبوع تداومين ويمكن ثلاث ايام بالاسبوع تحضرين محاضرات لان المواد وايد فتصير كلها باسبوع واحد مثلا فلما تداومين هالاسبوع تبدي وحده من موادج الاسبوع الي وراه فهم تداومين فاهمين علي ..

وهالشغله تعتمد على عدد موادج اذا موادج وايد تكثر محاضراتج بالاسبوع والعكس صحيح ..


بالنسبه للتكاليف ..

رسوم التسجيل للمستجدين تقريبا 20 اعتقد .. سعر المواد كل مادة على حسب مواد التربيه بحدود ال60 واقل مع الكتب .. اما مواد باجي التخصصات اغلى اذا ما ني غلطانه .. يعني انا عادة يكلفني الكورس تقريبا 350 دك باقي التخصصات ماعندي فكره صراحه جم بالضبط روحو وسالو ..بس هو يعتمد على جم مادة تاخذين ..

وتسلمون

 

[اعذريني يالهدايا]

مشاركة: بنات منو تدرس بالجامعه العربيه المفتوحه او عندها فكره عنها ياريت تردون علي

انزين زمن العجايب كل التخصصات تعتمد على الانجليزي ؟؟

 

[معلمه متميزه]

مشاركة: بنات منو تدرس بالجامعه العربيه المفتوحه او عندها فكره عنها ياريت تردون علي

انا ذكرت بالصفحه الاولى ان كل التخصصات انجليزي الا التربيه .. والتربيه حاليا موقف يعني مو مطروح للمستجدين .. وتسلمين

 

[أمواج البحر]

مشاركة: بنات منو تدرس بالجامعه العربيه المفتوحه او عندها فكره عنها ياريت تردون علي

زمن العجايب ماااااااا قصرت

والدراسة تعتمد على الانجليزية و على الاقل لزم يكوم الانجليزي مستواه جيد

لان الامتحانات كلها بالانجليزي

وانا عندي عيال و موظفة والحمدلله قادرة اوفق بين الاثنين

اهم شي توكلي على الله و مسحي من قاموسج كلمة صعب

ولا يهمكم كلام الناس يا بنات طيعوني بالنهاية انتي اللي بتدرسين و تستفيدين

والله يوفقكم حبيباتي

 

[أميرة الورد]

مشاركة: بنات منو تدرس بالجامعه العربيه المفتوحه او عندها فكره عنها ياريت تردون علي

مشكورة زمن العجايب والله محتارة مادري شسوي ودي اكمل بس مو لاقيه تخصصي ووضع يناسبني

 

[معلمه متميزه]

مشاركة: بنات منو تدرس بالجامعه العربيه المفتوحه او عندها فكره عنها ياريت تردون علي

على فكره .. الدراسه بالجامعه مسموح لج تقعدين فيها اكثر شي 12 سنه .. عشان جذي يقولون ان الجامعه تناسب الموظفين وربات البيوت لان عندهم مجال طويل ينسقون فيها دراستهم بحيث ما يظكون عمرهم بمواد وايد بالكورس .. وتسلمين

 

[دهن عود مبخر]

مشاركة: بنات منو تدرس بالجامعه العربيه المفتوحه او عندها فكره عنها ياريت تردون علي

زمن العجايب ماشالله عليك كفيتي ووفيتي

وجزاك الله كل خير

وانا موظفه وقاعده ادرس بالجامعه بعد تخصص تربيه ..

وهذا التخصص بالنسبه لغيره يعتبر الاسهل..

والحمدالله قادره اوفج بين الوظيفه والدراسه..

ونصيحتي للبنات اللي عندهم طموح يكملون دراستهم..

اقولهم توكلوا على الله وكملوا دراستكم .. ترى الشهاده والمستوى التعليمي العالي يلعبون دور قوي في

زمنا ... وأسأل الله التوفيق للكل

 

[lolo77]

مشاركة: بنات منو تدرس بالجامعه العربيه المفتوحه او عندها فكره عنها ياريت تردون علي

انا زوجي يدرس بالجامعه العربيه
وصارله الحين تقريبا ثلاث سنوات
جامعه قويه
بس ملاحظتي عليها
اشوف وايد يعطونه واجبات والله يكسر خاطري
لان نظام الدراسة يعتمد عالطالب نفسه اكثر من الدكتور
عشان جذيه يعطونهم واجبات وايد عشان يعرفون انهم افهموا ولا لآ

وزوجي عنده محاظرات وحده بالاسبوع ومرات محاظرة اسبوع فيه واسبوع ما فيه
حسب الوحدات

والله اعلم
اله يوفق ريلي ويتخرج وانا ارتاح بعد
ويوفق كل اللي يدرسون انشالله

 

[اعذريني يالهدايا]

مشاركة: بنات منو تدرس بالجامعه العربيه المفتوحه او عندها فكره عنها ياريت تردون علي

رحت سجلت اداره اعمال انظمه اداريه


بس جفت وحده هناك حبطتني وكسرت مجاديفي ونزلت من معنوياتي الله يسامحها كان عندي ذرات من الشجاعه
احس الحين اطشرو ذراتي


بس قلت بسجل انا وحظي
والحين رديت قريت كلامهم احس ردتلي جم ذره هههههه

عالعموم انصح البنات يسجلون عشان نشجع بعض ونبطل لنا قسم بالمنتدى

 

[HoNeY_GirL]

مشاركة: بنات منو تدرس بالجامعه العربيه المفتوحه او عندها فكره عنها ياريت تردون علي

مشكوورين ماقصرتوا سألت عنها عشان اختي ونفس اللي قالته زمن العاجيب
وانا استانست عليها وقلت بكمل فيها

بس مالقيت تخصص يناسبني احسه كله ادبي !

انزين ماعندكم فكره تخصصي معدات طبيه حيويه مساعد مهندس شنو اقرب تخصص له او ماراح يفتحون بعد تخصصات ؟؟ بلييز فيدونا بنات

والله يوفق الجميييييييع

 

[معلمه متميزه]

مشاركة: بنات منو تدرس بالجامعه العربيه المفتوحه او عندها فكره عنها ياريت تردون علي

على حد علمي ماراح يفتحون تخصصات يديه بالفتره الحاليه على الاقل .. مادري شنو يناسبج يا هوني قيرل بس ليش ماتدشين حاسوب صراحه هو المطلوب اكثر شي الحين .. وتسلمين