بنات مينة بجي

[lovely~Noora]

السلام عليكم
بنات احنا بغينا نروح العمرة
اللي نصير انا واخواني الاثنين وحريمهم
وحده عندها ولدين وبنت توها بتكمل سنة
والثانية توها متزوجه
انا ادري ان اخوي ومرته اللي عندهم عيال ماخذيني معاهم عشان امسك بنتهم بالعمرة يعني جني خدامتهم وانا اطلع ومو مستفيده شي <لا تقولولن شلون مرت اخوي واعرفها عدل
وانا قلت ما فيني على بنتهم صراخ وبجي وشلي بوار الراس بروح بعدين مع اهلي
دزيت لها مسج قلت لها انا ما رح اروح معاكم انتوا توكلوا على الله
ولا جات لنا البيت وقالت حق امي ان اهي ما رح تروح العمرة شفتوا؟؟ لانه محد بيمسك بنتها
بقت مرت اخو الثانية واخواني 2 اللي اهو زوجها وحماها
وقالت انا ما رح اروح بروحي مع رجال 2
وتكنسلت العمرة
وكلهم الحيين يلوموني يبوني اروح مع مرت اخوي وكل واحد قاعد يزفني من صوب
ليش جذي يا ربي ؟؟
حتا امي قامت تزفني قدامهم كلهم واخوي قام يقولي يا حمارة!!
بنات قولولي شسوي والله محتارة؟؟؟؟؟

 

[perfect 2010]

اذا انتي ماتبين تروحين فهذا قرراج ومحد له حق يجبرج او يلومج... ومرت اخوج تقدر تروح مع زوجها مو تربط عمرها فيج

 

[ابي قطوة ميوووو]

وييييييه

صاارحي امج قولي لها يما اهيا تبي تاخذني عشان امسك عيالها وانا مابستفيدي شئ وماراح اصلي على راحتي واعمر على راحتي
وقووولي حق امج انتي وياه وواحد من اخوانج تروحون على يوم بروحكم بدون مرت اخوج ما ادري هذا راايي !؟

 

[أم بدر المطيري]

شنو اي شي اللي بقلبه الصلاه مايطوفها اختي شنو متعطلين عليج ولا من صجهم يبونج تمسكين عيالهم شنو وانتي ماتتعمرين يعني امبييه شوفي انتي توكلي على الله روحي ونيتج صافيه وقوليلهم شنو اللي انتي حاسه فيه وانج مو خدامه وانج تبين تشوفين بيت الله مثلهم فهميهم حبوبه ليش تسكتين وفهمي امج بللي حاسته وربي يكتب اللي فيه الخير

 

[ڕۆۆحــي ڣــڍااگ]

هذا قرارج
انتي رايحة تدعين وتصلين وتعبدين ربج وبتستغلين كل ثانية هنااك
مو رايحة خدامة لهم
ماعليج ياحلوة ان شاءالله ترؤحين قريب
ولاتبجين ولاشي خلج طبيعية
والله يرزقنا ويرزقكم العمرة قريب ان شاءالله ياارب

 

[lovely~Noora]

مو المشكلة ان انا قلت لها بس اهي كله تزفني
كلهم مو بس اهي
هذا وانا توني 15 سنة عيل لو كبرت شبيسوون فيني
استغفر الله بس

 

[^^ريهام^^]

شكو

خدامة عندهم والا مربية

مالج شغل زين سويتي

خوش من يايبينج من المكتب

 

[lovely~Noora]

بنات انا وحيده بين 6 اولاد وما عندي احد اشكيله اختي متزوجه وما اشوفها اصلا لما كانت مو متزوجه هم مو ذاك الزود معاها يعني مو مثل باقي الخوات والله حرام اللي قاعد يصير فيني

 

[ريف الخفوق]

قـــــــــوليها بكل صراحه قدامهم قولي انا ابي اذا رحت افضى للعباده مابي شي يشغلني عن العباده ماني مربية اطفال الي تولد تحمل المسؤليه ولا لاتولد

 

[الغاليه نونو]

انا قريت العنوان كاتبه مينه بجي قلت السالفه جايده البدليه مايت من فراغ


سمعيني يمه اول شي ضحكي اشوف ضريساتج ياحلاتج والله

العمره انويها لله سبحانه واطلبي منه سبحانه مايحرمج الاجر وبالنسبه حق مرت اخوج قوليلها اللي اوله شرط اخره نور ياخيتي انا اروح ومنه علي ان رفضت العمره بهالايام الفضيله من يحصل له عمره ويردها غير المقرود ههههههههه
قوليلها بنتج انتي مسؤوله عنها اذا بتودوني معاكم تكسبون فيني الاجر زين علي زين بس انا ماتحمل يهال وبجيهم ولويتهم انتو تروحون الحرم وتحكروني بالفندق مع ليهال من الحين علمتكم علشان ماتلوموني تالي

وروحي والله ولاعليج اعتمري وصلي وادعيلي الله يكتب لي عمره وحج"
ولاتبجين ولاتأزيمن نفسج واخوج قال لج ياحماره قوليله مشكور وماقصرت بميزان اعمالك ياخوي وخليج بومسامح طيبه هينه لينه ولا تزعلين عمرج يااااقلبي قلبج

انا مستعده اقظب عيالكم تودوني العمره هههههههههههههههههههه اروح بدالج ههههه

عليج بالعافيه مقدمااااااا روحي يمه العمره ماتنعاااف ياحظيييييييييييييييييييي

 

[مولاي الفرج]

حبيبتي احد يعوف بيت الله ؟؟ روحي سوي عمرة وجابلي البنيه مافيها شي بنت اخوج مو غريبه

وماعتقد العمرة بطول اكثر من اسبوع

مصيرج الله بيرزقج اطفال ان شاءالله وتجابلينهم صح ولا لا

انا لو منج استانس لان بيودوني وانتي براحتج

 

[أسيرة_أحزاني]

الله يعينج عليها !!

 

[honey lust]

بعد قلبي لا تبجين ولا شي

و منتي مجبوره تروحين معاهم و اللي مو عاجبه كيفه

بس اهم شي رضا امج قوليلها يما حرام اروح و ما اقدر اخذ راحتي بالعباده حسافه هاذي عمره و ابي استغل كل دقيقه فيها

و اتفقي مع امج تخلي بنت اخوج عندها

 

[سكوتي بذوقي]

مو مجبوره تروحين وياهم

وزوجة اخوك عيب عليها اهي تمسك بنتها

انتي مو مسئوله عنها

ولا ليش تاخذها ليش ماخلتها عندكم ولو ماتبي تخليها عند أهلها

انتي مو ملامه واخوك عيب يهنيك قدامها بعد ويقلل من قدرك

الله يريح بالك اختي ويسعدك يارب

 

[@ كويتيه @]

وووييييييه ..~


قولي لامج هالكلام قوليلها يرضي لج يصير فيني جذي ان قلت مابي اروح يقولي ياحماره انا مابي اروح حماليه لبنته؟؟
وبعدين انتي مو مجبوورهـ تروحين قوليلهم مو مجبورهـ ارووح موغصب واذا بتروحين تتعبدين هناك مو حماليه !!

 

[دلع العتبان]

لاغلطانه حبيبتي انتي من الاول معطيتهم ويه بالاول قوليلهم جي انج تبين تروحين بس بشرط مالي شغل بعيالكم والله والرجاجيل الي يتحكمون فيهم حريم الله اكبر وقفت العمره مرت اخوج طقرت يبووووي

وانتي قولي بروح بس مابي امسك احد والله يوفقج حبيبتي

 

[خالف تعرف]

روحي ولاتقظبين عيالهم عندهم ام وابو قوليلهم مو ملزومه فالياهال بتحملوني مسوليه وانا اصغيره

 

[chocolate&coffe]

هاااه شنو الشغله غصب لا حياتي اذا قالوا مره ثانيه انتي السبب قولي ليش روحوا لدرجه هذي انا مهمه ؟؟

وبعدين قولي انا يوم فكرة قلت اروح مع اهلي واذا ع امرتك انتي ويها امشوا انتوا شكو فيني

اعيالكم حطوهم عند جدتهم ام امهم او عند امج حياتي لاتتضيقين انتي سويتي الصح

احسن انتي سويتي شي حلو ..

وبعدين هي راح تعتمد عليج باجر بكل شي
​

 

[ツ】ઇ需 3NnaNY 需ઇ]

من رااايي لاااا اترررروحين

واااذا انتي غيرتي رااايج وقلتي بروووح بس بشرط انه ماااااشيل اليهااال صدقيني بيغصووون عليج

بيرررضووون بشرررطج بس اهناااك يله تعااالي شيلي

لااانه اهماااا من الاساااس يبووونج تروووحين مووو عشااانج عشااان اتشيلين اليهااال

وااااذا ع الزززف ماااااعلللليج جم يوووم وبيهقدون ツ​

 

[∫ ∫ ∫ ∫ جــوان ∫ ∫ ∫ ∫]

خلج على كلمتج لا تروحين وكلمى امج بينج وبينها خليها تصير بصفج هذى مهما كانت بنت الناس مو مثلج انتى بنتها

اكره الاخو الى يصير مع مرته على اخته

المدام ما عندها احد يمسك بنتها خل تنثبر ابرك لها