بنات والله مو حالة حتى بشهر رمضان مناشبتني

[Dam3t-7zn]

بنات انا تعبت من خالتي ام زوجي الله يهديها

كلة منفسة بويهي وتططنز علي, تعلقاتها ماتخلص تقط كلام مو بس جذي حتى على ولدي تعلق

قسم بالله عاملتها بالطيب وحب الله بس مافاد حقرتها زادت اكثر واكثر

الحين احنا رمضان واهي مكشورة بويهي وبقوة تسلم اذا رحت لها

اولت امس كان الفطور عندهم سالني زوجي متى نروح حق اهلي قلتلة بس اسويلي جم طبق اخذة معاي ونروح ,,يعني نروح لهم قبل الفطور بساعتين المهم دق عليها وقالها جان تصارخ وتزفة وتصكة بويها , اهو طق تلفونة بالطوفة من العصبية وقام يصارخ علي يلا قومي الحين ترحين عند اهلي

الريال انقلب فوق تحت,, قبل شوي كنا نضحك وشحلاتنا

المهم رحنا من دخلت سيدة راحت لغرفتها رحت وراها اسلم عليها ولة تنسدح على سريرها سلمت من بعيد وبالقوة ترد السلام ,,والله بنات تعبت من هل العيشة ليش تسوي جذي والله ماتفطرت اكلت لقمة وقمت من القهر رحت سيدة للمطبخ وغسلت المواعين


بنات انا اروح لهم مرتين بالاسبوع كل جمعة وثلاثا وهذا حالي معاها المشلكة لازم اقضي يومي كلة عندهم واذا مارحت تقلب الدنيا على راسي

المهم نفسيتي تعبت نصحوني اشلون ابرد اعصابي اشلون اتجاهلها اشلون اقضي هل اليومين من غير قهر والله ثم والله قمت اكرة يوم الجمعة والثلاثاء بسبتها


ساعدوني محتاجتكم

 

[سندس 90]

ولله لو مكااانج شلي حااادني اروح لها

خل تعدل معاملتها بالاول

حبيبتي لا تروحين واذا لزم عليج زووجج بالبدايه تعذري
قولي علي الدوره
ضرسي يعورني
عيوني ذابحتني
هههههههه
المهم تعذري

واذا رحتي خلي حالج حال الكرسي
لا احساس ولا مشااعر
ولا تضحكين ولا تكشرين


ملينا من هالمجاملات اللي جابت لنا غير عوار الراس والقولون العصبي

قلبي متروسه هههههههههههه

 

[صمتي عذابي:(]

طنشي. اذا. جلستي. تفكري. بتتعبي. الله. يصبرك.

 

[نونه المنكوشه]

كلمي ريلج وفهميه انج شخص غير مرغوب فيه وبصراحه منتي ملزومه اتروحين اذا الجو مكهرب اللزم ماعلي الواحد راحته وخلي ريلج يروح يتفطر عندهم وانتي قعدي ابيتج وله روحي لهلج والله يعينج ويسخرهم لج

 

[ليدي بجد]

الله يكون بعونكانت سوي الحلا او اي صينيه مالكه. اليوم الي قبله باليل وحطيها بالثلاجة
أريح لك عشان ما تتتاخرين




بحاول اخمن معاك اسباب زعلها
جربي تمدحين اكلها وتقولين ياربي مهما اسوي هالاكله ما تطلع مثل ماتسوينها مشاء الله
واكلي على الفطور يمكن تشوفك ماتاكلين من اكلها الي تعبت فيه فتزعل
يمكن تمر بمشاكل بعايلتها. فنظامها تخانقك مثل ما تخانق عيالها يعني ادري مو عذر بس على الاقل يهون عليك انها مو كارهتك بشكل شخصي


لو تطنزت على ولدك. جاريها وقولي صادقه. واضحكي لو الموضوع يضحك
وحتى عليك عادي نفس الشي
جربي يمكن بهالطريقه تفقد الطنازه تأثيرها بالنسبه لك. زايد هي ما تشوفك انقهرتي. فتبطل


احيانا كثيره الانسان يقهر غيره. عشان يخفف من القهر الي هو عايشه بحياته.


تعالوا على الفطور بنفس الوقت الي تبيه ولا تقدمين او تاخرين
بعد الفطور قومي سوي الشاي من نفسك
قدامها شيلي حطي لا تقعدين ضيفه انت كل يومين عندهم وطول اليوم فبيني انك بنت البيت ومتعاونه ومنها تسلين نفسك وما تتتقابلون ويكثر الاحتكاك
لو دخلت تسوي سحور ادخلي معاها ساعديها لو تسوين سلطه او تحركين قدر
انتبهي من ولدك لا يوسخ ويخرب وانت تشوفين وساكته
لا تتكلمين ابتسامه و ردود بسيطه وحلوه على كلامها مثل الله يعطيك طول العمر. وانت الخير والبركه. والله لا يحرمنا منك. وما نحس برمضان صح الا واحنا مجتمعين معاكم هنا هالفطور. يمكن يبين عليك مغصوبه بالجيه عنده. ما تدرين
واهم شي اذا سولفت اسمعهيا بانصات وتركيز واهتمام خصوصا عن مشاكلها او شي تاعبها او شي يخص العيله او نصيحه. نظره الاهتمام بكلامها والانبهار بنصايحها لها *** تخليها تحبك بإذن الله




اقولك شي


مو انت برمضان. والآجر فيه اكبر بكثير من غيره من الشهور
احتسبي الأجر وقولي بنفسك لما تزعلين بلحظتها يارب اكتب اجري وصبرني. صدقيني هالحركه بتخلي رده فعلك على حركتها حلوه لان تعابير وجهك بتكون راضيه مو حاقده

جيبي لها هديه حلوه باول رمضان كل سنه. دام زيارتكم كثيره
وبيني وبينك. شوفي شيزعلها منك وتجنبيه يعني أكيد في شي ينرفزها حتى لو بسيط وما يستدعى كل هذا بس انت اقطعي اي سبب عشان ترتاحين هالايام

زوجك كسر خاطري لما رمى التلفون. هو بعد يتعرض لضغوط. منها فعاونيه ولا تزيدينها عليه ولا تقولين ما ني رايحه. لانك انت الخسرانه راح يطلع غضبه او زعله كله فيك


تقريبا نص رمضان راح عديها والله معك
اعذريني على الاطاله

 

[امـ خــزامـى]

^^^
كفت ووفت جزاها الله خير

 

[دانة_ دبي]

اختي بقولج شي
كفاية عليج روحي مرة بالاسبوع فقط​

انا اروح عند ام زوجي كل جمعة و اروح قبل الفطور بنص ساعه او ربع ساعه
و اخذ معاي جدري اكون مسوية شي او سويت او اكله او سلطة او شي
مثلا يأذن المغرب الساعه 7:15
اوصل بيتهم الساعه 7:00 او 6:45 و اطلع من بيتهم قبل صلاة التراويح و استسمح منها
و اقولها خالتي بروح اصلي التراويح حوالي الساعه 9:00
كفاية عليج ساعتين فقط ف رمضان​

لا تقولين مجبورة
ولا وحدة فينا مجبورة تتعامل ها المعاملة ​

 

[Zinab BH]

حبيبتي اذا زوجج عصب ان ماتروحين اذا هدا كلميه قولي له معاملة امك تشوفها معاي بعينك و اتعب نفسيتي روحي لهم ساعتين بالكثير و ردي واذا لزم لازم تروحين قعدي صم بكم ماتسمعين ولا تردين سلمي بصوت واطي و قعدي ولاتقومين تغسلين ولا تلحقين وراها وان كلمتج بشي يبط جبدج فجي لها حلجج و راويها السنون اللولو لا تسببين لنفسج امراض انتي بغنى عنها حبيبتي

 

[M!ss CoLoRz]

زوجج ملاحظ هالأمور ولا ؟؟

+ ليش تروحين قبل الفطور بساعتين؟؟؟!!!!!!!!!!!!

انا بيت اهلي اللي اهمه اهلي ادش عليهم قبل الفطور بخمس دقايق بعد البيت يبي له وقت ومجابل وإذا بسوي طبق ولا اثنين يطير الوقت

وعقب الفطور اقعد على راحتي والوقت اللي آبيه

وانتي سوي جذي ومن يأذن العشا قومي و رجعي بيتج او روحي صلي التروايح بعد ما بينقدون عليج على الصلاة

أه شكلها مزاجية و يوم معاج وعشرة ضدج من جذي ما انصح تسايرينها او تقعدين وتتحملين

 

[Kocheko]

ليش تسوي جذي ؟؟ أنا أستغرب من بعض أمهات الأزواااج طيب أهمه يرضوون أحد يعامل بناتهم جذي ؟
ليش ما يرضون على بناتهم ويرضوون على بنات الناس ..

حبوبة البنات كفو وأو وفوووو وما قووول الا الله يعينج ويصبرج

 

[الذكرى ندامة]

الله يعينج ويفرج همج.. والله يهديها انشالله..
كلمي ريلج وفهميه وخليه يلاحظ تصرفاتها معاج مو معقولة اللي تسويه حرام الله مايرضا
وعلى قولة البنات روحي يوم بالاسبوع وقعدي ساعتين مو ملزومة الصراحة تنكدين على عمرج ويخترب يومج منها ..
الله يصبرج حبيبتي :eh_s(17):​

 

[مدّهره !]

الله يعينج عليهااا ..’

 

[مذهلة2013]

انا مع كلام ليدي نجد

ربي يوفقج

 

[نـعـومـه]

قنعي ريلج انج ماتروحين دان تعاملج هالمعامله الا مره بالاسبوع وقعدي شوي تفطري قعد ساعه وطلعي

ادعيلها بالهداية

 

[طيبة83]

وااااايد اعرف خالات جذي تطلع حرتها في مرت ولدها حتى لو ما في سبب

بس الاهم زوجج شلون؟؟؟

شخصيته قويه وبقدر يفصل بين اهله وحياته الزوجية؟؟

ولا امه مسيطره عليه وتاثر بقراراته؟؟

اذا الاولي الحمدلله ارتاحي دامج ضامنته وحاولي تقللين زياراتج لهم وتعطينها اكبر طااااف

اما اذا من النوع الثاني فالله يكون بعونج رفيجتي ريلها ما في احسن منه لكن امه مسيطره عليه خربت عليهم حياتهم ووصلتهم للطلاق

 

[smo0o]

أنا مع ليدي كلامها صح

 

[Dam3t-7zn]

بنات الله يجازي خير كل من ردت على موضوعي وخففت علي, والله دعيت لكم بالخير من كل قلبي


بنات انا لازم اروح لهم مرتين بالاسبوع واذا مارحت تشيش ولدها علي ويكرهني بعيشتي

ولدها طيب وزين بس امة سكانة يعني تقدر تقلبة علية بالحظة

بنات وررررررربي تعبت من هل العيشة,,واذا اشتكيت حق اهلي يقولولي عندج ولد صبري وتحملي,, بنات والله صار عندي ظغط نفسي من وراها حاولت اكسبها بكل الطرق ومافاد

ادعولي الله يخليكم انا بس ابي تفك شرها عني وتخليني بحالي

ولدها يلاحظ كل شي بس مابيدة شي واذا قلتلة شوف امك يعصب ويصكر الموضوع

الله كريييييييييييييييييييم

 

[فوفو22]

بالنسبه لام الزوج استثنيها من اي انفعال اهي فيه


يا جماعه هالكبار ما يبون تسلمين وانتي واقفه بطرف الباب

وتقعدين حصه احتياط بصالتهم

وتؤدين الواجب وبس


الزيارات لها اصول

امشي عليها تنجين

1- تروحين وبيدج طبق او هديه
2- تدخلين بابتسامه وشوق لهم
3- تسولفين وتاخذين وتعطين وتضحكين. بمعنى انتي تكونين نجمه القعده
4- ابتعدي عن كلمه خلف الله علينا او التحسر او الندم او النغزات واللبس
5- لما تشوفين خالتج منفسه حبي راسها وقولي عسى ما شر خالتي اشفيج
6- انا شخصيا اعرف اللي جايني حابني او جايني كتأديه واجب

لا تعتبين عليها جدام ولدها بالنهايه هي ام وانتي زوجه


فوفو

 

[M!SS.LOBY]

الله يصبرج

 

[M!SS.LOBY]

حبيبتي لا تعصبين ولا تحرقين عمرج

العلاج عندي

روحي لهم وقت الزوارة وسمعي كلام ريلج كبري بعينه واخذي جم طبق معاج
سلمي على خالتج غصب عليج ولا تبينين انج مهتمه اذا عصبت خالتج او اذا ضحكت لا تعطينها اكبر من حجمها

لا تدورين رضاها سكتي عندج كلمة حلوة قوليها ما عندج شئ سكتي مثل نظامي انا


راح تتعدل معاج بالايام اليايه ودربالج لا تسبين خالتج بأي كلمة ولا تشتكين حق ريلج جدامه لان اذا قلتي اي شئ راح يقول انتي ما تحبين امي وحاقده صدقيني