بيوتنا متروسة خردة .. شتسوون فيها؟؟

[mrs_sugar]

السلام عليكم

شخباركم يا حلوين

بدش بالموضوع على طول

انا متأكدة ان بيت كل وحدة فينا بينفجر من الخردة ... صح و لا لأ ؟؟

انا وحدة منكم

احترت وايد ليما نفذت هالفكرة

يمعت كل الخردة اللي بالبيت


و فرزتهم بأكياس صغيرة كل كيس حطيت فيه خردة مشكلة بقيمة دينار

كم تتخيلون طلع المبلغ ( طبعا اللي بالصورة كان غيظ من فيض)




35 دينار:eh_s(9): :eh_s(15):

بخلي شوية بالسيارة حق المواقف ولا البنزين ولا راعي البرد تدرون الصيف بلش و الحمد لله

هذي كانت تجربتي

ودي اسمع تجاربكم خلونا نستفيد​

 

[زلابيا]

بس البيت بينفجر !!

السياره والبوك وبالجناط شوي محذفين خخخخخخخ ..

انا هالمره يمعتهم وعطيتهم وحده اعرفها تشتغل بالبنك المركزي خليتها تصرفلي اياهم ارباع عشان اتصدق فيهم اي عامل بشوفه انشاءالله بعطيه

شرايج تودينهم الفرع يصرفونلج اياهم تستفيدين منهم حق نهاية الشهر تره هم حلوه 35 دينار حق وقت الازمات

 

[mrs_sugar]

اي و الله و انتي اصاجة يا وخيتي يا زلابيا عاد انا هالشهر تحت الحديدة
يرضى راعي الفرع ياخذهم كلهم دفعة وحدة؟؟

دمتم بخير

 

[lolo77]

انا حاطتلي حصالتين ؟؟؟
حصاله ايمع فيها حق نون اعيالي بس احط فيها الميات والخمسينات
وحصاله مالت الفقراء احط فيها الخرده كل الفئات والحمدلله
وحاطتلي حصاله انا مسويتها ايمع فيها الارباع بس
لان مرات احتاجهم لمن يخلص المعاش فارجع حق ارباعي اللي خاشتهم

 

[om_jenan1978]

أنا حاطه حصالتين : حصاله أيمع فيها اميات وخمسينات حق بنتي وحصاله ثانيه ايمع فيها 20 فلس و10 فلس و5 فوس حق صدقه

 

[زلابيا]

اي و الله و انتي اصاجة يا وخيتي يا زلابيا عاد انا هالشهر تحت الحديدة
يرضى راعي الفرع ياخذهم كلهم دفعة وحدة؟؟

دمتم بخير

انتي عاد لاتصدمينه تودينله ال 35 دينار مره وحده خخخخخخخخخخخ وديهم على دفعات :eh_s(6): انتي سأليه شوفي يرضى ولا لأ ماتوقع بيقول لأ انشاءالله

 

[ايفيان]

خوش فكره ...

راح اجربها وبشوف شكثر اقدر اجمع؟؟؟؟

 

[mrs_sugar]

توني استفتحت براعي الفطاير يبي 3 دنانير
جان اقول حق ولدي اخذ 3 أكياس عط الريال
ولدي قام يطالعني : يمااااااااااااااااااااا فشلة .. ماكو شغل
قلت له مو شغلك عط الريال و قول له اذا وده يعد يقعد بالسيارة يعد براحته

يوم رجع و لدي يقول الريال خذاهم و قام يطالع الأكياس الصغار و يضحك​

ضحك ولا عاد كيفه .. فلوس هذوله ولا طعام؟؟:eh_s(13): ​

 

[زيـنـه]

اخلي شوي بالسياره للمواقف و العدادات ..

و كل ما زادوا بالبوك حطيتهم بالحصاله ..تالي لا تيمعوا اوديهم الجمعيه (حدهم يبون الخرده) اصرفهم انواط و اتصرف فيهم مثل ما ابي

 

[تونه الكويت]

انا مرة حطيت خردة بالحصالة وكل ما ألقى خردة فلوس حطيتهم بالحصالة
لما انترست جان افرزهم واطلعوا حوالي 27 دينار ------>> مبلغ حلو حق الازمات اخر الشهر
جان اوديهم حق فرع الجمعية وما صدق اخذهم على طوووووووول

 

[banota49]

والله أنا حصالتي لغايه الحين 11دينار ..هذا غير حصاله بنتي احطفيها بس ميات وخمسينات حق البقاله والبرد ..هذاغير السيارة ..

 

[bnt q8 in usa]

شويه احطهم بالسياره ................وشويه بصندوق الصداقات شبه يوميا ينقط فيه............والباجي بالحصاله

 

[Filakawyia]

خوش شي مسس شوقر :eh_s(15):

خل باجر ايمع خردتي و اشتري هالجياس الصغار و اسوي نفسج​

 

[المزيــونه]

بصراحه انا عندي حصاله الفقراء لازم اقط فيها كل يوم
وكل ماصار عندي خرده حطيته فيها

 

[رفرف]

والله انا اخلي شوي من الاميات والخمسينات بدرج السيارة حق الباركينغ او عمال الجمعية أو بياع البرد ....
وشوي ابوكي ....

والباقي + العملات الصغيرة التناتيف كنت ايمعهم بحصالة بنتي بعدين ادخلهم بحسابها واعطيها منهم مبلغ تتصدق فيه تستانس ...

بس شوفو شصار فيني !!

يمعت المسكينة شكثر كلما شافت خردة بالبيت قطتها بالحصالة لما تيمع مبلغ حلو طبعا مالي خلق اعدهم عديت الاميات والخمسينات صكو ال30 ..
وداهم ريلي بيت التمويل مادري اي فرع اهوه فرع واحد اللي ياخذ خردة ..
طبعا قالهم انه مو عاد الخردة .. وعطاهم رقم حساب بنتي ..
ما عطوه وصل ولا شي قالوله احنا نعدهم وندخلهم بالحساب ..
والا مدخلين بس عشرييييييييييييين بالحساب !! وعشرين صافي بدون خردة ..
انا مت من الحرة بوق عيني عينك اذا انا عادة نصهم وصلو 30 !! وين الباجي بالله ؟؟؟؟
ولا في وصل ولا شي تشتكين عليه ..

هالمرة قلت بعدهم واما اوديهم الجمعية اصرفهم والا اكون عادتهم واخذ وصل ..
لأني ماااااااحب احد يستغفلني الصراحة ..

 

[طير الحب]

خوش فكره

 

[Pink GirL]

انا شاريتلي حصالة من دايسوو احط فيها الخرده اللي ايأذوني بالبوك لوول وساعات اكون محذفتهم على الكومدينا وياخذهم ولد اختي حق حصالته هههه

 

[قمه النعومه و الأنوثه]

مشكورين خواتي على الأفكار بشن حمله خرده على البيت وبحط حصاله ان شاء الله شوقتوني......:eh_s(9):​

 

[برميته.]

ساعات اروح فيهم سوق بو اميه ومرة قالي اختي ماناخذ خردة قلتله هذي مو فلوس والا اقطهم يعني ؟ بعدين خذاهم ,وساعات الجمعيه يستانسون عليهم لانهم يبون الخرده.

 

[سيدة الكويت]

ساعات استخدمهم حق النون وحق راعى البرد والخبز الأيرانى