انا اعشق الدورات
اكتب لج من تجاربي الشخصية
بالنسبة للدكتور علي الجناعي وايد يطلع بره الموضوع يعني تروحين الدورة عشان موضوع معين تطلعين سامعه عن اشياء ثانية
معجل العبجل: دوراته حلوة و مفيدة و فيها تدريبات عملية يعطي عن البرمجة العصبية اللغوية و تقدير الذات
صالح البارود: يعطي عن تقديم البرامج الاذاعية و التلفزيونية و عن تقدير الذات
للأسف بخيل بالمعلومات يعطي اقل قدر ممكن و اذا سألتيه يحاول يتهرب من الاجابة
و للاسف معلوماته مو وايد قوية
د.حمود القشعان: غني عن التعريف محاضراته و دوراته عن العلاقات الزوجية بالنسبة لي شخصيا واااايد يعجبني هالانسان
د.ابراهيم الخليفي: بتاع كووولوووو يعني يعطي دورات بوايد مجالات
اسلوبه حلو بس من النوع اللي يطلع عن الموضوع حيييييل و لازم تقتنعين بوجهة نظره مايرضى تكون لج وجهة نظر خاصة مختلفة عنه
في شغلات ما يقنعني فيها لأن الزمن تغير ، وقت الصحابة انتهى احنا عيال القرن 21 نحتاج نوع مختلف من المعلومات
استاذة نبيله النغيمشي: أكثر من رائعة ، أكثر دورة استفدت منها بحياتي هي دورتها اللي اسمها أحب نفسي
فعلا فعلا عجيبة و غيرت من شخصيتي و نظرتي لنفسي و للاشخاص و الأمور
اعتقد هذي الدورة كل وحدة لازم تاخذها
يعجبني بالاستاذة نبيلة انها على طبيعتها و ما تتصنع و حدها متواضعه و تحب تساعد
و وااااايد كريمة بالمعلومات يعني ودها تعلمنا كل اللي تعرفه انا احب جذي
و اذا سألتيها عن شي مو متأكدة منه 100% تقولج مادري سألي الشخص الفلاني أو اسأل و
بعدين اجاوبج ،
و دمها خفيف
تعطي معلومات مكثفة و الأهم انه معلوماتها حديثة و تطبيقات سهلة عملية قدرنا نكمل تطبيقها
حتى بعد الدورة بسنتين و لازلنا نطبق كأنه تونا ماخذين الدورة امس ما تنسينها
لحد الحين اهيه أحسن دورة أخذتها و فعلا استفدت منها
و لحد الحين اهيه احسن شخص اخذت عنده دورة
د.ناصر الفريح: معلوماته حلوة و حديثة في علم الطاقة لكن اسلوبه ينوم
استاذة بشاير الزواوي: حبوبة و تعطي دورات عن نظرية الاختيار ، اسلوبها حلو بس اكثر من مرة احضر لها تكون مرتبكة
د.منى غريب: معلومات جديدة و اسلوب حلو و فعلا تستفيدين منها و تنبهرين لكن بعد فترة تنسين اللي قالته
د.جاسم المطوع: في مجال الحياة الزوجية و التربية و الاعلام ،مع احترامي الشديد له و اعجابي بوجود كويتيين متميزين و يفيدون الناس لكن انا ما تعجبني معلوماته القديمة و اسلوبه شوي بارد
د.محمد الثويني: عجيييييب ، أسلوب رائع ، كريم بالمعلومات، يعطي معلومات مكثفة تخصصه المراهقين و العمل المؤسسي مع المراهقين
استاذة ليلى الربعي: علم الطاقة و الالوان و الاحجار، تهبل ، اسلوب حلو و كريمه بالمعلومات و دقيقة
استاذ محمد القلاف: نوعه أيضا بتاع كووولوووو يعني يعطي بأي موضوع تبينه ، يعطي عن تنظيم المؤتمرات و عن النجاح و الارادة و عن التدريب و اللإلقاء ، أسلوبه حلو و يشد بس المعلومات جدا قليلة يعني الدورة تستانسين فيها لكن ما تستفيدين وايد لأن المحتوى متواضع
طبعا انا آرائي شوي دقيقة لأن هوايتي الدورات و فلوسي رايحة عالدورات و الكتب
يمكن هذا الشي اللي يخلي اغلب المعلومات بالدورات تكون قديمة بالنسبة لي
يعني عشان تعجبني دورة لازم فعلا تكون معلوماتها يديدة و اسلوب جدا راقي و يشد لأني امل بسرعة
تعبت أكمل الباجي بعدين
انشالله تكون تجاربي مفيدة بالنسبة لكم
