تجربتي بين ايديكم..العلاج...ثم الحمل ولله الحمد

[لؤلؤية]

السلام عليكم ورحمة الله وبركاته

حبااايب قلبي

اولاااااا يعلم الله انه كتابتي للموضوع هذا ما ابتغي منه اي شي الا الاجر
ومنفعة البنات اللي دايما اقراااا اسئلتهم عن الابر والتلقيح و......

وبما اني مريت بتجربة ونجحت...فقلت افيد خواتي بتجربتي
وارد على اسئلتكم

بس ابي منكم انكم تدعووون لي الله يتمم علي حملي...
ويرزقني بولد صالح بار فيني وفي ابوه.. كامل الخُلق والخلقة لانقصان فيه ولا زيادة....

للمعلومية انا عندي بنااات وولد واحد

آخر بنت عمرها 7 سنوات...والله سبحانه ما اراد لي الحمل...رغم اني ما اخذت حبوب منع الحمل
كنت استخدم طرق ثانية..بس ما آخذ موانع...لاني اساسا حملي عزيز

بديت العلاج من سنتين ونص تقريبا
مع دكتورة...قريت عنها بالمنتديات...وشفت مدح مو طبيعي لها...
طبعا كلشي توفيق من عند الرحمن..
وتوكلت على الله ورحت لها

بديت معاها رحلة العلاج..بالتحاليل
واكتشفت انه معاي خمول بالغدة...وطبعا ضعف التبويض

تعبت نفسيا من الابر...حتى انه دورتي كانت منتظمة جدااااااا كل 28 يوم
وصارت مخربطة..من الكلوميد والابر

وظليت مع دكتورتي فترة..تعالجني فترة ونريح فترة
ودايما تنصحني انزل وزني..
بس انا مشكلتي ممكن انزل 10 كيلو...بس ارجعهم لاني ما اعرف احافظ على وزني

وفي يوم قررت لي التلقيح الصناعي..بعد كورس الابر
ووصول البويضة للحجم المناسب
اخذت الابرة التفجيرية...وعطتني موعد باليوم الثاني
عشان التلقيح

وسبحان الله

رحت بالموعد..مرتين..وكان في امور تقف عائق امام الامر


تصوروا ....!!!
الدكتورة كان عندها حالة ولادة...وطالعت من عيادتها (للمعلومية انا اراجع عند دكتورة بعيادتها الخاصة)

ولما رجعت لها بعد فترة

ماكان فيه بوكس للعينة...تصوروا..؟؟؟!!!
كل البوكسات استنفذت..
تضااايقت...من الدكتورة...ومن الموظفة ومن........... ومن الظروف
لكني وكلت امري لله
رحت للبيت بحالة ما اقدر اوصفها لكم..وزوجي كان يحاول يخفف الامر علي
ويقولي الحمدلله على كل حال
طبعا زوجي كان معاي على اساس نسوي التلقيح..

وقبل مانوصل البيت..دق موبايلي
والا دكتورتي عالخط..قالت لي تعالي الحين للعيادة..وصل بوكس
قلت لها لااااا اعذريني يادكتورة ماني راجعة..انا مستخيرة اكثر من مرة...ويمكن الله موقاسم لي هالامر
وعطله عني مرتين...خلاص يمكن الله مو كاتب لي

حسيت انه الدكتورة ضااااق خلقها
بس قعدت تعتذر لي ووصتني بالجماع الاربع ايام القادمة وقامت تنصحني بامور كثيرة........
و.....ختمت المكالمة معاها

وكانت هذي آآآآآآآخر مراجعة لي عندها

وبعدها ريحت 6 شهور تقريبا
وبديت مع دكتور ثاني...وكنت حريصة انه يكووووون بمستشفى..مو عيادة عشان ما يحصل معاي نفس اللي حصل قبل...

تعبت

اكمل لكم بعدين...بس لاتنسووون تدعون لي بالولد الصالح

 

[سراج الليل]

يووووووووووووووووووووووووووووووووووووووووووووووووووووووووووووووووووووووووووه أم فيصل الله يهداج كملي


والله يرزقج بالولد الصالح البار فيج وفي أبوه ان شالله

 

[@@@ام حمووودي@@@]

الله يرزقج ويتمم حملج ............

كملي

 

[لؤلؤية]

اكمل لكم...

بديت رحلة علاج ثانية مع دكتور عماد غزاوي..بمستشفى رويال حياه

اهو كان بمستشفى المواساة...ولما فتح مستشفى رويال حياه اخذووه من عندهم

رحت له اول مرة وكنت مستحية منه ومستصعبه موضوع فحصه لي

لكني كنت مضطرة...
رحت له في ثاني يوم بالدورة...وقلت له قصتي
وانه عندي ولد و4 بنات...وما احمل الا بعلاج و...........

قالي راح نبدأ على طووووول..لانه مافيه مجال جدامنا
لازم نلحق الوقت

وشرح لي انه بيسويلي تلقيح صناعي...مع فصل اجنه...كمساعدة باختيار جنس المولود..واكد لي انها شيء مو مضمون...بس هي تعتبر عامل مساعد

وقال لوفشلنا بالتلقيح الصناعي بنحاول بالانابيب

قلت له >>>> انتبهوا للسؤال الغبي:dddds:

طيب فصل الاجنة ماراح يؤثر على جنس المولود لو كانت بنت..؟؟؟!!
انصدم الدكتور من سؤالي...وصمت شوي وقالي يعني كيف..؟؟؟؟


قلت له يعني لو اجيب بنت اخاف تكون مسترجله
قالي ليش احنا بنفصل عينة زوجك...وانتي وضعك مثل ما هو...بيئة الرحم نفسها...كيف يأثر...
انحرجت من سؤالي وسكتت

قالي اهم شي مانبي الاحباط يمر حوالينا..ممكن العملية ماتنجح من اول مرة...فنبي التفاؤل
قلت له ان شاء الله..وانا ناويه لو ما نجح علاجي معاه...خلاص اوكل امري لله

((نسيت اقولكم يابنات انه عمري 40 سنه))

طبعا تعرفون انه فرصتي محدودة ..ولازم الحق نفسي

المهم طلب يفحصني...وماقدرت اسيطر على نفسي..قلت له لاااااااااا
مالقيت عذر ...قلت له علي الدورة...قال بالدورة افضل

رفضت...قالي خلاص



تعاليلي بعد شهر...وكتب لي تحاليل اجيبها معاي
ومشيت وانا ندمانه...والوم نفسي على تصرفي...


طلعت من عنده....وجيته بعد شهر ومعاي التحاليل

رحت لهم بموعد دورتي الثانية..كان تاريخ 21 /12 /2007

شافهم قالي ماشاء الله التحاليل تمام
وكتب لي على ابر جونال...وسألني اذا ابي توأم
قلت له لو يحصلي نعمة من ربي..قال اوكي

من ثاني يوم الدورة

بديت آخذ 2 بودر + 1 ماي

ومراجعتي عنده كل ثلاث ايام..او يومين
يتابع البويضات بالسونار الداخلي...كنت اخلي الممرضة تحط لي الجهاز...والدكتور بس يطالع
الشاشة

بالمراجعة الثانية..قالي البويضات استجابت..نكمل على الجرعه

بالمراجعة الثانية..بعد يومين

قالي ابس نبي استجابتها اكثر

وعطاني 3 بودر + 1 ماي

((لاحظت انه الممرضة بالمستشفى تخليني استرخي فترة بعد الابرة...تقولي لازم تظلين مسترخية 10 دقايق))

هالشي ما قالولي عنه قبل

استمريت آخذ الابر لمدة 10 اياااااااااااااااااااام

و...المراجعة اللي بعدها حدد لي يوم 1/1/2008 موعد الابرة التفجيرية


و موعد للتلقيح الصناعي بيوم 2 /1/2008


ورحت يوم التلقيح...

كان زوجي رايح قبلي

واخذوا منه عينه...وسألوه عني اذا بغيت تخدير او لا
اتصل علي زوجي يسألني ابصراحه خفت...وحسيت انها تعور

>>>>>>اول مرة اجرب

بس قلت لزوجي لا باتحمل..والله يعينا

رحت بعد ماخلص زوجي بساعه ونص تقريبا
ودخلوني مكان ذكرني بغرف الولادة..دخلوني بغرفة بروحي...وكنت خايفه وادعي ربي

حتى صليت الظهر بغرفتي...وظليت انطر وصول الدكتور

ووصل...وقلبي قام يرررررقع

ودوني بنقاله لغرفة اوسع من غرفتي...وفيها اضاءات وكشافات

وكنت ارررررجف من الخوف...قالي الدكتور هاااااه يا...... شلون النفسية...قلت له خايفة
قالي لاااااا تخافي العملية بسيطة...ما تاخذ 5 دقاااايق

قلت له سالوني لو كنت ابي تخدير...العملية تعور يادكتور...؟؟؟
قالي لاتعور ولا شي...كلها 5 دقايق واحنا خالصين...

كانت معاه دكتورة وممرضة

وابصراحة العملية ماتستاهل اسم عملية..

خلصت...وطلب مني اني اظل بمكاني ما تحرك...وقالي ياويلك يا........ لو ماحملتي

قلت له ياااااااااارب
ابتسم وقال موعدنا مع التحليل يوم 17 /1/2008
بالتوفيق ان شاء الله

كتب لي ادوية>>>>> ((الدوفاستون))

وظليت من الساعه 12 ونص الظهر للساعه 2 الظهر وانا بالسرير

ورجعت للبيت على فترة اذان العصر...وتحممت بماي دافي وصليت العصر

>>>>>ماعندي فكرة لو كان الشاور يأثر على العملية...كنت اتصرف على سجيتي

واحساس الجنابة ...مضايقني...

المهم بنفس الليلة يا بنات جاني ضيوف..وصار عندي عشاء...ماطبخت الاكل كان من بره
بس..وقفتي...ومجاملة ضيوفي...وكنت لابسه كعب عالي

وبديت احس بافرازات تنزل علي...وتأكدت منها...طلع دم ينزل علي

قلت هي خرباااااااااانه خربااااااااااااانه
الله يختار لي اللي فيه الخير

وبنفس الليلة ماااااااااانمت من الالم...كنت ابكي بفراشي...من الالم الداخلي
والدم استمر علي يومين..وانا احس انه مؤشر فشل للعملية


باريح شوي وارجع

 

[لؤلؤية]

ماني مطوله عليكم لاني اكره اسلوب الاطالة

نسيت موضوع التلقيح...لانه احس الظروف كلها ماكانت مضبوطة 100%

بيوم 17 /1/2008

الظهر رحت لاقرب مختبر لبيتي...وحللت...واقسم بالله يابنات انه موظف الاستقبال عطاني الظرف اللي فيه النتيجة...ومافتحته

رحت لسيارتي...وقعدت داخلها افكر قبل ما افتحه
ودعيت ربي من كل اعماق قلبي

انه لو فيه خير لي..يعطيني اياه...ولو مافيه خير يصرفه عني ويبعده

وفتحت بهدوووووء

وانصدمت لما شفت كلمة (( positive ))

ظليت فترة اطالع بورقة التحليل...والوجوم يسيطر علي...آآآآخر مرة شفت هالكلمة قبل 7 سنوات

شغلت السيارة...ورجعت طيرااااااااااان للبيت
وتوضيت...وصليت صلاة شكر لربي اللي مانساني..واستجاب لدعائي
وبعدها
طررررت للمستشفى
بدون ما اتصل بزوجي ولا احد

ووصلت للمستشفى...والاستقبال قالوا انه الدكتور بيطلع خلاص...آخر مريضة عنده...ترجيتها قلت لها ما راح اطول..بس يشوف نتيجة التحليل

وكلموه...ووافق...ودخلت عليه
(( بهالاثناء اختي كانت تتصل علي...ولا ارد عليهااااا ..كانت تبي تعرف شصار معاي))

وعطيته الظرف بدووووووووووووون اي كلمة

وفتحه وهو متوقع انه النتيجة سلبية...لانه ماكان مبين علي اي مشاعر فرررح

وفجأة ضحك...وقالي مبرووووك...والممرضة اللي جنبه باركت لي...وقال لي استمري على الدوفاستون..وعطاني ادوية ثانية... فيتامين


وموعد بعد اسبوعين عشان يشوف الحمل...

وبعد ماطلعت...اتصلت باختي...قالت بشري

قلت لها حامل...والله يابنات انا مصدومة من ردة فعلي
صررررخت اختي بالتلفووون...وسألتني ان قلت لزوجي...قلت لها ماقلت لاحد للحين

و..............الباجي ما راح يفيدكم...
بس الاهم اني بعد 3 شهور من الحمل غيرت الدكتور ورحت لدكتورة...عشان الحرج...

انا قلت لكم القصة عشان...اعطيكم امل وخاصة انه الفرصة امامي محدووودة...وابيكم تتفاءلوووون بالخير دائما...ويكون عندكم قنااااااااااعه انه الله يختار لنا الخير دائما...وهالله هالله بالدعاااااااااااااااء يا خواتي
مهم جداااااا جداااااااااااااا...تراه سحرررررررر


فيه جملة دائما افكر فيها وهي انه (( لو اطلعتم على الغيب لاخترتم الواقع))
وانا انسانه مؤمنة باختيار الله لي..والحمدلله على عطاء ربي..


امممممممم في شي نسيت اقوله...عن >>>> فصل الاجنة

سويت سونار بآآآآآخر الرابع والدكتورة قالت لي احتمال البيبي بنوته ...وتراجعت وقالت مو اكيد

وحمدت ربي....ودعيت انه يثبت قلبي...ويرزقني القناعة والرضا..ماكنت احلم بالحمل...والحين الله عطاني ورزقني الخير لاني كنت ادعي بالحاح ...الحمدلله على نعمته وعطاءه لي..واكيد هو سبحانه عالم بانها لو كانت بنت هي اخير لي من الولد

الخلاصة فصل الاجنة مو مضمووووون

الضمان هو من عند الله وحدة ...ولا اله الا هو...

 

[لؤلؤية]

بالنسبة للتوائم....

بعد تحليل الحمل في اول مراجعة

قالي الدكتور يله بنشووف كم بيبي عندك...
وكشف بالسونار...للمعلومية كل فحوصاته سونار داخلي...حتى وانا حامل...

وشاف وقالي بيبي واحد

قلت له نعمة من عند الله...انا كنت طايلة يا دكتور..؟؟!!

دعواتكم لي..انا بادخل الشهر السابع...ومتوقع ولاتي باخر شهر سبتمبر...بس انا دايما اتعدى شهري...فمتوقعه موعد الولادة في اكتوبر...الله يسهل الامور

بنات الموضوع كاتبته بمنتدى ثاني..بس قلت باحطه لكم هنيه عشان افيد حباايب قلبي الكويتيات...وعشان اعطيهم امل

 

[@@@ام حمووودي@@@]

وااااااااااااااااااااااااااااااااي ام فيصل كملي بليز

عاد الدكتور عماد احبه واحترمه خووووووووووش دكتور .....

 

[لؤلؤية]

الحسبة المادية لمراجعاتي و...للتلقيح...

مراجعاتي للدكتور كل مرة ادفع 20 دينار..الكشف 10 + السونار 10
وفيه كم مرة دفعت 30 ماني عارفه ليش...بس استحي ارجع له واسأله ليش

الابر..كلفتني اكثر من 250 دينار

عملية التلقيح كلفت 100 دينار+ فصل الاجنة 10 دنانير ((زوجي اللي دفعهم ))
واعتقد انه دفع فتح ملف بالمواساة

على فكرة ترى دكتور عماد يسوي عملية التلقيح بمستشفى المواساه..مايسويها برويال حياه
يعطيج موعد..وهو يكون متواجد بنفس الموعد

يعني المبلغ يمكن وصل لل 600 دينار...ترى الحسبة تقريبية..لاني ما اتذكر عدد المراجعات بالضبط

اما التكلفة النفسية..فلا تقدر بثمن

بنات..انا اعتبرها آآآخر فرصة حمل لي...ويارب يااارب مايخيب تعبي...ويرزقني ولد
للعلم انا للحين ما عرفت جنس البيبي...قالت لي دكتورة ناهده مو اكيد>>>بس احتمال احتمال بنوته

وطبعا دكتورة ناهده ناهده آخر موعد لي عندها كان في 30/4
وموعدي اللي وراه اجلوووه لي...والحين باكمل شهرين بدووون ما اراجع...ولا جيكت عن جنس البيبي

 

[لؤلؤية]

بالنسبة للدكتور عماد غزاوي

جنسية الدكتور اعتقد فلسطيني..او اردني من اصل فلسطيني
عموما هو جنتل جدا...ويهتم جدا بمريضاته...وطريقة المستشفى مثل مستشفيات بره
حتى انه الدكتور يطلع يستقبل مريضته من عند الباب...يعني اهتمام ولا اروع

حتى لما غيرته رحت لدكتورة ناهده العلي بعيادتها خاصة...بس والله عيادة دكتور عماد انظف وارقى...واحدث

لكن للضرورة احكام

@@@ام حمووودي@@@

الموضوع اكتمل...
بس انا قاعدة اجيك اذا فيه شي ناااسيته..ابي احط كل شي عشان تستفيدووون

 

[لؤلؤية]

نسيت اقولكم اني اطول بين عيالي...قصدي بين حمل والثاني
احيانا يوصل الفرق ل 6 سنوات
>>>حمالي عزيز
وهالمرة ضربت الرقم القياسي بيصير اكثر من 7 سنوات الفرق بينهم ...
الحمدلله على كل حال
وكل حمله بعلاج..الا اللهم بناتي الثنتين اللي جبتهم اول شي

يعني ماخليت علاج شعبي و...دكاترة...وحجامة...وتمريخ وترديد ووصفات شعبية...ماجربتها

 

[لؤلؤية]

بنات

فيه غيري ما يحطووون تجاربهم يخافون من العين او من الحسد...

لكن انا وكلت امري لله...في كل امري...والله الحافظ ان شاء الله
ويشهد الله انه نيتي افيد غيري...وعشان ماتفقدون الامل

خاصة اللي توها باول شبابها...لمن تقرا تجربتي تتشجع...وتقوى عزيمتها

بس احلفكم بالله

لا تنسووون تدعون لي...ترى قلت لكم كل صغيرة وكبيرة بتجربتي

 

[لؤلؤية]

>>>نسيت اقولكم انه اول دكتورة تكلمت عنها
وما توفقت معاها جايز انه غيري استفاد منها بس انا ابصراحه ما استفدت

اهي >>>>> د.هدى الناصر الزكري

وقريت عنها هنيه بمنتدانا كويتيات...وتشجعت

بس ماصارلي نصيب معاها

ويله عاد سامحوني عالقصووور

باروووح انام :eh_s(8):

 

[@@@ام حمووودي@@@]

>>>نسيت اقولكم انه اول دكتورة تكلمت عنها
وما توفقت معاها جايز انه غيري استفاد منها بس انا ابصراحه ما استفدت

اهي >>>>> د.هدى الناصر الزكري

وقريت عنها هنيه بمنتدانا كويتيات...وتشجعت

بس ماصارلي نصيب معاها

ويله عاد سامحوني عالقصووور

باروووح انام :eh_s(8):

نووووووووووووومة العافية
وعسالله يتم عليج حملج وتولدين بالسلامة ...
آنا راجعت عند الدكتور عماد غزاوي لأني تاخرت بالحمل 10 سنوات بعد الزواج وسويت حقن مجهري 9 محاولات ولله الحمد نجحت وحدة ويبت حمودي الله يحفظه كنت مسويتها عنده ,, وتوني هالشهر سويتها مرة ثانية همن عنده بس ما نجحت .. الحمدالله على كل حال ,,,للأمانه الدكتور شاااااااااااااطر:tek:

 

[تمر حنا]

مشكوره
ام فيصل على ذكر تجربتج والله انج عطيتيني امل كبير من صباح الله خير والله يسهل عليج وتولدين بالسلامه ويفرحج بعيالج ويخليهم لج...........

 

[ردينه]

يا رب يثبته لج و يرزقج اللي تبينه يارب و يا رب ارزقني الحمل عاجلا ليس اجلا اللهم آمين

 

[miss-one]

وايد فرحت لج خاصه اني قاريه لج موضوع من قبل ، وعسي الله لا يخيب رجاج والف مبروك وعسي الله يرزقج بالولد الصالح

 

[شاي اخضر]

الله يرزقج من واسع فضله ويقر عينج بشوفة ضناج سليم معافى وبار ويرزقج الذريه الصالحه ويكفيج شر العين ان شاء الله آميـــــــــــــــــــــــــــــــــــــــــــــــــــــــــــن

 

[فوفه]

الله يثبت حملج يارب

وويوفقج ... ويرزقنا معاج بالذريه الصالحه المعافاه

:tek:

 

[بمبرة]

:klhfl:
عسى الله يهون عليج يا ام فيصل ويعطيج الطلقة الهينه اللينه ... قولوا آمين
وجزاج الله الف الف خير على المعلومات القيمة

 

[البيداء_77]

الله يباركلج ويجزاج خير ويثبت الي في رحمج ويجعله من الذريه الصالحه ويهون عليج

مشكوره حبيببتي على الافاده