هلا وغلا يا - اي اسم - العفو يالغالية .. صراحة كانت اختي معاي بالرؤية بس ما عندي اخوان بالمدرسة بس اعرف رفايجي عندهم اخوان وكل اخوانهم تخرجوا من الرؤية وفي الحين بعضهم للحين بالمتوسط والثانوي قريب يتخرجون ومرتاحين والله في الدراسة ، وفي واحد اخو رفيجتي طلع ورد للمدرسة ماقدر يحبها ههههه ..
مستوى الانجليزي قبل كان مو ذاك الزود صح وعلى ايامي في الابتدائي فعلا ما كان بذاك المستوى لكن الحين حيييييل تغير وبالعكس صار احسن ، وعندهم توازن كبييير في كل المواد ، لا تخافين ولدج لي تخرج من المدرسة بترتاحين معاه بالنسبة للانقلش وكل المواد ، وعندج مادة العربي النحو الحين وايد قوية لان اللي ماسكين العربي سوريين ، واللي ماسكين الانقلش عندنا ابلات مصريات بس مو مثل اي وحده يعني لسانهم مو خربوطي بالعكس ثقافة كبييرة حيل ، والتغيير صار لأن المدرسة خذت الشهادة العالمية من سنتين تقريبا ..
وصدقني شبابنا - شباب مدرسة الرؤية - حييل حييل غير ، لو وديتي ولدج مكان ثاني مادري ما راح تكون البيئة نظيفة مثل بيئتنا ، كل شباب الرؤية اللي تخرجوا وسمعنا عنهم وين الحين وفي دفعة 2008 فازوا في مسابقة انجاز على مستوى الكويت وسووا لهم الحين شركة اسمها Green Target ولهم موقعهم الخاص ومنتداهم وهالشركة تعتني بالبيئة وجذي ..
وفي خريجات الرؤية مممم اذا تعرفين سفينه الحرية اللي مسكوها اليهود خخخ كان فيها 3 او بنتين من خريجات الرؤية وحده منهم صارت نائبة في اتحاد الطلبة في جامعه الكويت واتوقع فيه خريج من الرؤية بعد .. والداعية سنان الأحمد اللي كانت بسفينه الحرية كانت مسوية عندنا بالمدرسة بعد محاضرة وايد حلوة ..
يعني خريجين الرؤية لا تستهينين فيهم كلش ولا تستهينين في المدرسة كلش وين الحين ، ومعروفين عيال الرؤية بس تشوفين تعرفينهم من طريقة كلامهم سبحان الله ..
وبعد الأنشطة وايده للصبيان مثل سفرة العمرة الحين .. قبل كانت خاصة للصبيان الحين حتى البنات يسفرونهم في وقت عيد المولد النبوي او قبله عشان عطلة وتاخذ البنية محرم وتسافر مع المدرسة وفي انشطة في وقت العمرة .. وبدا هالنشاط من السنة اللي طافت قبل لا اتخرج وسافرنا والله واستانسنا ، والصبيان بعد كانوا رايحيين بس اتوقع عقبنا او شي .. والحين صارت العمرة نشاط سنوي في شهر 3 ..
وهمن في سفرة لاوروبا كل سنة للصبيان يعلمهم التأثير ويطبقون منهج الرؤية وبانظباط طبعا اما المدارس الثانية يعني ماني متكلمة صراحة ما تدرين وين يروحون العيال ..
يعني لا تفكرين بجانب وتهملين جانب التعليم مو بس شهادة التعليم تربية يالغالية ... مدرسة الرؤية تربي وتطلع فعلا قادة والله اول شيء يقودون نفسهم وترا حييل الشباب يطلعون قلوبهم رهيفة ويحبون الخير وحيل محترمين ، مع ان ساحة البنات يم ساحة الصبيان والله ما في ولا سالفة مغازل ولا شي وقمت النظافة باخلاقهم ، روحي لمدرسة ثانية شوفوا المصايب والله تفشل البنية تستانس انها مصورة مع رفيجها بالصف ..
وبالنسبة للانقلش قمة قمة وتحفة الحين ، وعن الواجبات والهوم ورك لا تخافين بالعكس خليه يتعود الولد لا تحلين له بالعكس ترا الرؤية احسن من اي مدرسة ، الواجبات صح كل يوم كل يوم بس والله تثبت المعلومة واااايد ، ولا تحلين له يعلمون الطفل من اول مراحل الدراسة شلون يتحمل انتي تبين ولدج يصير ممتاز بالدراسة ساعديه وخليه يتعلم وساعديه باللي ما يعرفه بس ..
والتقارير راح تصير كل اسبوع بالثانوي بالنسبة لي انا درست عند مس هيام الانقلش بس شنو صرت ارنط انقليزي ، ولا بعد الحين لي تكلموا الناس عن عالم اجنبي والله اعرف احسن منهم يعني لا تخافين كلش من هالناحية ، صح تعب والله بس صدقيني تعب الحين وترتاحين وتفتخرين بولدج بعدين .. وما يعلمونه اي شي .. بالعكس دراستنا خوش دراسة مثلا مممم المتوسطة يبدون يدرسونا روايات ومسرحيات اجنبية للكتاب المشاهير مثل شكسبير وجارلز ديكنز وغيرهم ويعلمونا شعر بالانجلش بس طبعا مو حفظ شرح ومو اي شعر طبعا ، ويعلمونا ويدرسونا عن حقبات زمنية مثلا اذكر بالثنوي درسونا عن عصر النهضة في اوروبا ودخلوا التاريخ .. يعني الانجليزي اللي ندرسه على مستوى كبير .. والابتدائي اللي يعلمونا قرامر - نحو- وسبيلينز - وخط - handwriting - عشان لي تخرج ولدج يطلع خطه والله فنان ههههه ^_^ والله خطوطنا تهبل هههههه
والتقارير اللي ياخذها الحين عادية بس خليه يكبر يتعود عليها يصير عادي ، واذا قعد مع عيال حكومة ولا مدارس ثانية يتحلطمون عن واجباتهم وجذي يقولهم عادي احنا متعودين على الشغل بالعكس احسن !!
لا تقللين من هالشيء صدقيني والله بيرتاح ، والله بعد انا اشوف قبل شغل الصبيان وييين احسن منا ممم مثلا عندج الرسم وبروجكتات العلوم وغيره ما شاء الله عليهم بس !
والرياضيات عندنا حيييل قوي خاصة سنة ثالثة ورابعة ثانوي - علمي - وبالنسبة لصف تاسع وعاشر سهل ويساعدونا ورفيجتي ما اتخيلين جم كانت علامتها ما شاء الله في تاسع كانت مادة الرياضيات هندسة جابت 99 وربي ما شاء الله وانا جبت تقريبا 92 شي جذي .. او 90 ماذكر والله .. بس والله لو مثلا كانت البنية مو زينة بالعلامة والله يراكضون وراها ويشوفون شفيها ليش جذي ويحاولون يسوون لها تقوية او واجبات اضافية عشان اذا جاوبت عدل يشوفون يعادلونها او وقت الفرصة تروح للابلة تعلمها الغلط من الصح..
والعلوم ابلاتهم بعد يهبلون وانا اموت بالعلوم وايد عندج تاسع يدرسون احياء -biology - اذكر شرحنا جبد وقلب خروف ههههه بس تحفة وخذيت A ، بس اللي اشوفه عندنا البنات يدرسون اكثر من الصبيان ، بس الصبيان اذا تخرجون تسمعين عن شركات سووها او مشاريع نجحت بكلياتهم وجامعاتهم ونشاطات يسوونها وتطوع ما شاء الله يعني يدشون بين الناس ما عندهم اي مشكلة =)
والمواد الاختيارية عندنا اغلبها ما فيها فاينل بس حق العلمي الاحصاء ومادة ثانية ناسيتها والادبي فرنسي . .
مواد الاختياري فرنسي - احصاء - دراما يعني تمثيل - دعوة باللغة الانجليزية بس الحين المادة هذي شالوها عشان اللي كانت تدرسها ابلة وحده وطلعت من المدرسة عشان اخر بناتها تخرجت من المدرسة بس كانت المادة حلوة دعوة غير المسلمين للاسلام باللغة الانقليزية وتتعلمين بعض المصطلحات الانقليزية الاسلامية - ومادة المناظرة debate هذي يدرسونها ابلات الانقلش يعني مناظرة وينقسم الصف فريقين ويصير بينهم مناظرة طبعا باختيار موضوع محدد - هذا اللي اذكره من مواد الاختيارية - اممم فيه مادة علمية اسمها تغذية باللغة الانجليزية يدرسونها ابلات العلوم عن صحة الانسان والتغذية السليمة والسعرات الحرارية والاكل الصحي وااايد كانت حلوة ,,
مممممم اي في عاد مواد العادية العربي ويدرسونا ابلات سوريات وفيه مصريات بس ثقافة وايد وايد عالية وشهادة على مستوى ، والكتب اللي ندرسها من الحكومة بس الدروس باختيار الابلة وكتب النحو والبلاغة ما نعتمد عليهم وايد وايد يعني نحل التدريبات ونراجع مع بعض بس فيه بعض الدروس ما ناخذها من الكتاب لان احيانا تكون فيه اغلاط او الابلة بتدرسنا الدرس بتعمق او بطريقة ابسط واوضح من الكتاب ، والقواعد نكتبها مع الابلة ما ناخذ كل القواعد من كتب الحكومة ندرسها بتعمق وتخصص حتى لو كانت البنية تخصصها علمي العربي تدرسه مع البلاغة والنحو ما في تخفيف مثل الحكومة يعني لو تخرجت البنية تصير تحفة بالنحو =)
والاملاء والتعبير يصير احسن مع الوقت لان عندنا بالعربي نشاط اطلاع خارجي مثل الحكومة بالثانوي والمتوسط عندنا قراءة حرة يكون لج دفتر وعليه درجات تقرين كتاب او موضوع طبخ او قصة او اي شي مثلا شعر او خاطرة تكتبينها وتساعدج الابلة وتقراه وتعطيج عليه درجات ، وعندنا بالتقييم مال الدرجات في كل المواد تقييم السلوك - سلوك الطالبة او الطالب صوته مع المعلم او المعلمة ، تأخير عن المادة ، اخلاقه مع الطلبة .. وهذا وايد فادنا عليه 10 او 5 درجات ,,
وعندنا مممم مادة التربية الاسلاميييية واااي احبها عندنا ابلتين معروفات بالمتوسط والثانوي المدرسة الأولى للتربية الاسلامية اسمها مس اعتدال ، حبيببببة خريجات 2009 ههههه نموووت عليها فعلا طيبة ومثل امنا والله ، وفعلا كانت قدوة ونيتها وقلبها صافي .. وكانت لها مواقف تضحك ، وفيه ابلة ضحى الله يذكرهم بالخير والله .. وهمن اساتذه وشيوخ التربية الاسلامية كلهم زينين يمكن فيه واحد ما يمدحونه بس اتوقع طلع من المدرسة وعندج القارئ صلاح الراشد يدرس بمدرستنا بالرؤية طبعا هذا قارئ ومعروف .. =)
مممممم شنو بعد اي في مادة الاجتماعيات روووعة بعد خخخ ادري كل شي قلت عنه روعه بس فعلا فعلا روعه الدراسة شي شي ..
طبعا الاجتماعيات يساعدونا الابلات ويحطون لنا اسئلة في كل درس ويساعدونا طبعا في التخطيط يخططون معانا الكتاب وجذي والامتحان حق كل المستويات سهل ومتوسط وشوي صعب ..
وبس اي شي ثاني انا حاضرة ^_^
