تجمع اولياء امور مدرسة الخليج الانجليزية في السالمية

[mr000]

سلام أمهات الخليج اشلونكم ماعندكم فكره اذا بيعطلون المدارس بيومين المؤتمر وألا لأ؟ أمس كان زحمه موطبيعيه غصب وصلنا حق ولدي 3ونص بس أتصور أنتوا طريجكم غير عالبحر ماله علاقه بالشوارع المسكره

 

[ملكة بيتها]

هلا مروو مافي خبر عن عطله أو شي وصح كلامج إحنا على البحر بس أمس كان في زحمه عند دوار البدع وإنتي رايحه في إتجاه الدائري السادس ...
أمهات الخليج وينكم غاطين ..إن شاء الله المانع خير

 

[Lemona]

صبااااااح العسل يا عسل

اشلونكم يا امهات؟
زوزو الحلوه , عزيزتي , ملكة بيتها , mr000 , الفرسان الثلاثة ... بعد منو امممممم و كل ام حلوه وياناه هذا اهداء لكم :aha::aha:

فكره السينما واايد حلوه , جان زين ياخذونه معاهم , حتى احنا محتاجين نغير جو :ada:

 

[mr000]

سلام أمهات الخليج أشلونكم! ليمونه اشلون شغل البنوك آنا بنتي ميته على أنها تشتغل في بنك لما تتخرج من الجامعه!!والله خوش فكره السينما آنا كنت أشوف بنت أخوي بمدرسة الكويت الأنجليزيه وايد يودونهم السينما وحديقة الشعب وأماكن ترفيهيه وولدي مسكين كان بالتكامل كلش مايودونهم!

 

[الفرسان الثلاثة]

هلا بنات شلونكم ... صج فكرو السينما حلوة تغيير جو ليمونه شخبار بنتج في الكي جي ؟؟ اهيا بأي كي جي؟ انا ولدي السنه اللي طافت كان في كي جي فيوليت إذا كانت بنتج الحين عند مس ليلى تمام خوووش وحده اتهبل وايد حبوبه و حنونه ومتعاونه ماشاء الله عليها الله يعطيها العافية

 

[mr000]

سلام أمهات الخليج اشلونكم... عطلتكم معانا نهاية الأسبوع الياي؟الله يعدي هالأسبوع على خير لأنه متروس امتحانات حق الريبورت..... الله يوفق عيالكم وعيالنا...

 

[ملكة بيتها]

هلا مروو صاجه الله يعدي هالأسبوع على خير إحنا بيوزوعون الريبورتس وبعد الإجازه إجتماع أولياء الأمور ...شيصبرنا على الإجتماع أنا ما نطرت الخميس قابلت مدرستها وسألت عن مستوى بنتي

 

[mr000]

سلام أمهات الخليج اشلونكم!ملكه أشلونج! احنا تصدقين اجتماعنا يالله بشهر 2 وايد بعيد مايصير جذي نبي نسأل عن عيالنا بعدين في مدرسين متغيرين لازم نعرفهم!!يالله بس خل تيي الاجازه ونرتاح!

 

[ملكة بيتها]

الله يسلمج مروو صاجه الإجازه قربت واي بنرتاح شوي من التدريس شوي ولو إني حاطه لبنتي برنامج مراجعه باللي خذته عشان ما تنساه خبرج هي في مرحله تأسيس ومهمه هالمعلومات ما تطلع من مخها ...وبالنسبه لإجتماعكم وايد بعيد ليش شذي والله إذا مشغول بالج على ولدج طلبي مقابله مع مدرسينه قبل الإجازه عشان تتطمنين وصج ليش مغيرين المدرسين عندكم لبش ما بلغوكم ترى شي يربك الطالب من مدرس لي مدرس الله يعينكم

 

[الفرسان الثلاثة]

وااي بنات شسوي لي الحين بالي مشغول مادري وين بودي ولدي بأي مدرسة السنه الياية صج قرار صعب حيل .. ابي مدرسة ثنائية اللغة عشان اقدر احوله بعدين حكومه و فيها رياضيلت بالعربي و عدد الطلاب بالصف قليل ... قاعدة اتشرط جنه على كيفي والله مشكله احترت صايرة مالي شغل كل ليله إلا فاتحة النت و اشوف اسماء المدارس ..وااااي مليت عفية لو انتوا بمكاني شتسوون؟؟ ابي ادخلة مدرسة عادي يحول منها للحكومة .. سامحوني ازعجتكم بس حدني محتاجة نصيحتكم

 

[ملكة بيتها]

الفرسان الثلاثه إنتي بتنقلينه من الخليج حق مدرسه ثنائيه وعقب في أي مرحله بتنقلينه للحكومه ؟؟؟

 

[الفرسان الثلاثة]

اييه عشان اخاف بعدين يتوهق ان الرياضيات بالانجليزي و العربي ماعندهم حصص وايد التركيز صاير على الانجليزي اكثر .. انا اتمنى اخليه بالخليج بس ظروفي ما تسمح لي السنين الياية

 

[ملكة بيتها]

حسافه إنج تطلعينه بس الظروف تحكم الواحد الله يوفقج بمدرسه زينه إن شاء الله بصراحه كان ودي أساعدج بس ما أعرف عن مدارس ثنائيه اللغه بس الأحسن تمرينهم وتطلعين على المناهج من الحين لأن أغلب المدارس بتفتح التسجيل شهر2

 

[الفرسان الثلاثة]

مو متقبلة مدارس الحكومه كلششششششششششششششششششش ... عالاقل التأسيس يكون بالمدارس الخاصة عشان يغرسون فيه حب التعليم وينمون شخصيته .. الحين الظروف اوكي اقدر ادخله بس بالمستقبل باقي خوانه بدشون معاه ويمكن ورانا بيت مادري مابي احطه بمكان يمكن ما اكمل فيه عشان جذيه ابي مدرسة لو اضطريت اني انقله للخاص مابي يتأزم و نتعب معاه .. رحت شفت المدارس الاهليه ما عجبتني كلش حده زحمة و حوسة

 

[الفرسان الثلاثة]

مشكووورة حبيبتي يا ملكة ماتقصرين الله يوفق الجميع في مدرسة اسمها الرواد تابعة لمؤسسة التعليم الاهلي نفس الخليج سامعين عنها شي ؟؟

 

[ملكة بيتها]

الله المستعان مدارس الحكومه الله لا يحوجنا لها إن شاء الله تلاقين مدرسه ثنائيه تعجبج وتعجب ولدج جربتي الحياه بس هم أعتقد الماث دايما بيكون بالإنجلش

 

[ملكة بيتها]

بصراحه ما عندي فكره عنها

 

[الفرسان الثلاثة]

الحياة لي تجربة معاهم ما عجبتني كنت محتارة بينها و بين الخليج رحت سويت مقابله حق لدي عشان ال كي جي الله لا يوريج كلش مو عدل مقعدين و لدي جنا امتحان ثانوي و عليه عليه كان عمره ماكمل 3 سنين و شوي ماكمل4 سنوات في غرفة مافيها درايش وقعدوه بطاوله و كرسي ويات مدرسة مصرية يايبة اوراق تختبره حشا جنه حق قريد 1 و مسكين بجى مستغرب جان سمعت تقول تيشر من بعيد الله يعيننا هذا بيي عندنا !! حدهم ما عجبوني بعدين دقوا علي ان ارجع لهم قلت لهم مابي مع اني دفعت لهم .. وطبعا النقيض صار يوم رحت الخليج قابلتنا مس سوزان يحليلها عطته تركيب و شافته يلعب و قالت اهوا صغير و توا بدش الكي جي ما انطالبه بشي و سألتني شنو يعرف وقعدت تسولف شوي معاه كانت حدها ايزي .. الحمدلله رب العالمين و كل واحد مقسووم له رزقه الله يسهل لنا و يهدينا حق المكان الصح و كل واحد يختار اللي يعجبه يمكن في ناس اتشوف الشي غير

 

[Lemona]

سلااااااااااااام يا امهات
اشلونكم؟؟ مع المدرسه و القمه الخليجيه؟

الفرسان الثلاثة اشلونج و اشلون ولدج ؟؟
الله يوفقج بمدرسه زينه يارب .... انشالله خل اسالج عن المدارس و اذا عرفت شي اكيد راح ارد عليج

روحي تحب , ملكة بيتها , زوزو الحلوه , و كلكم يا بنات , اشلونكم مع الجو الحلو ....؟

mr000
شخبار بنيتج الصغيره ؟؟؟
خل اقولج على دوام البنوك , حلو و متعب في نفس الوقت
حلو حق الواحد اللي يحب الشغل , اذا توها راح تتخرج انا انصحج انج تشجعينها لانها راح تتكتسب خبره قويه
حتى لو عقبها تطلع و تروح اي مكان حتى لو حكومه راح تحس انه كل شي عندها سهل لانها شافت و جربت الضغط .
بعدين في الخاص صدقيني لها فرصه تثبت وجودها و تتعلم اشياء راح تفيدها بعدين , من دورات و لغه و نوعيه الشغل. ممكن تتوظف في الحكومه في مجال مو مجالها او مجال ما تحبه , و ممكن يخلونها بس تختم وتطبع ... انا ما اقلل من احترامي للوظايف الحكوميه, بس هذا الواقع ,يعني يا مكان تروح له بالواسطة وله يحطونها في مكتب مع 6 او 7 بنات ما عندهم شغل غير الحجي اللي لا يودي ولا اييب

على الاقل خليها تجرب الوضع دام ما عندها مسؤليات زوج و عيال , اذا حبته راح تكمل , و الله يوفقها يارب

يلا بنات ابي اروح اتريق

 

[mr000]

سلام أمهات الخليج! الفرسان الثلاثه آنا أقول بدامج ناويه عالحكومه بعد ليش تودينه ثنائيه وتالي تردين تنقلينه حرام جذيه الولد يتأذى علما يتعود عالمدرسه ويتكيف معاها ومع مناهجها وطريقتهم تردين تنقلينه الحكومه سأليني آنا عن سلبيات النقل آنا نقلت ولدي 3 مدارس خاصه لأني بالبدايه مااخترت مدرسه قويه ومااكتشفتها ألا عقب 5 سنين تالي هم مدحولي مدرسه ووديته 4 سنين وماحبها ولاارتحنا حق معاملتهم وتالي نقلته العالميه ! ألحين أذا انتي ناويه عالحكومه ييبيله مدرس بالأجازه 3 أشهر يقويه بالعربي ويعلمه الرياضيات بالعربي وخلاص وديه حكومه سنه اليايه وماراح يكون صعب عليه آنا بنت عمي سوت جذيه وكان ولدها مخلص غريد 4 بالغانم يعني أكبر من ولدج ومايعرف الرياضيات بالعربي كلش يابتله مدرس بالعطله وهم بأول كورس وتالي الحمدلله مشى بالحكومه وهالسنه هو بصف 12 آخر سنه له ويتخرج!