تجمع لأولياء امور طلبه مدرسه الرساله ثنائيه اللغه

[sadeem yam yam]

هلا حبيبتي سر .. اخيييييييييييرا تصادفنا لوووووووول عاد كنت توني بطلع من المنتدى
عاد على هالجو الحلو يبيله كابتشينو ولا لاتيه امممم
الاوراق الي مصلحينهم علوم مو رياضيات .. واهي اصلا اوراق العمل الي نحلهم وياهم بالبيت
وبالنسبه للتحدث طبعا بالعربي واتوقع يكون بحصه العربي ؟ مادري بخصوص هالشئ الاكيد ان التحدث بالعربي اهم شئ يعبر عن نفسه ويتكلم ويعزز الثقه عنده
واذا تبين جاكيتات افااا عليييج ترا ااجر باليومي .. يعني اليوم بدينارين .. واذا كان الجو بارد حيل ب3 دنانير ههههههههههه

 

[سر القلوب]

لوووووووووووووول اجار لا واستغلال اذا بارد ب 3
ترى ببلغ عليج حماية المستهلك اللي يفتشون عن زيادة السلع


تستاهلين الخير والله سدومة

 

[مدرسة مكروفة]

رفع

 

[sadeem yam yam]

مدرسه مكروفه شلونج حبيبتي .. شاركينا بالموضوع .. عندج عيال بالمدرسه ؟ وشرايج فيها .. قوليلنا رأيج عنها وانتي مستانسه من مستوى بنتج او ولدج فيها ؟
شاركووونا ياامهااات بلييييييز مايصير جذي

 

[سر القلوب]

السلام عليكم

انا رجع اليوم من الشايه وقلت ادش اسلم عليكم

اشلون عيالكم بتودونهم باجر المدرسة

انا عن نفسي بوديه
انا سالتهيوم الاربعاء في يهال غايبين
قال ايه يمة وايد غايبين وصلنا بس ثلاثة !!!!

بس ترى شرحوا وحلوا في الكتاب ومشوا عادي

على العموم انا داشة اسلم عليكم
سدومة وينج ولهانة عليج وعلى سوالفج حبيبتي

 

[sadeem yam yam]

شلونج سر حبيبتي .. بشري ياقلبي ان شاء الله استانستوا .. بهالعطله .. والله وانا ولهانه عليج اكثر .. الموضوع من دونج مايسوا
وبالنسبه حق الدوام باذن الله راح يداوم .. توني دريت منج انه فيه غياب يوم الاربعاء .. ولدي مايقول اذا فيه غياب او حظور عااادي طااف
كنت بسالج سر راح تشاركين ولدج بمسابقه القران ؟
انا كنت ناويه وتشجعت حق هالفكره .,, تالي هونت .. اهو بروحه يالله يحفظ السور المطلوبه هالدور بيحفظ سوره القيامه ..واحس اني مضغوطه ماراح افضى له عدل هالفتره ومابي اشركه واظلمه
قبل امس رحت شريت خام ثقييييييل نفس لون لبس المدرسه وفصلت له اثنين نفس مالوت الرياضه .. طلع علي الخام مع خياطتهم ب40 دينار تقريبا.
بعد لبس المدرسه بروحه يالله يدفي .. وبردنا ماشاااء الله ينخر العظم .. والله طلعت هذاك اليوم وحاشني صداااع من البرد ,. الله يعينهم والله ..
صغار وبروحهم مايهتمون للجاكيت كل شوي مضيعينه وذابحهم البرد ..
انتي شخبارج واخبار النونو واخووه .. والله الصغير كاسر خاااطري بهالبرد .. صعب تسبحينهم ولا تبدلين لهم الجو كلش مايساااعد .. ياااحلووهم لووول

 

[ReeMaN]

كل سنه وانتو بخير

 

[سر القلوب]

هلا بالغالية سديم

والله احنا استانسنا كنت مع حمولتي بالخيران وعيدنا بس البرد شوي يظيق الخلق مااحبه والنونو خليته عند امي خفت عليه من البرد

وعلى طاري البرد وسباحتهم ترى انا حاطة تكرمين بالحمام دفاية خاصة للحمام تتعق بالطوفة وماتتاثر بالبخار والله صارلها 8 سنين عندي مرة اختربت الشموع وقالولي مافي قطع غيار فشريت غيرها ماتسوى رخيصة انا شاريتها ب 8 بس الحين غلوا صاروا ب 16 اعتقد بس هم رخيصة يم عازتها كل حمام تكرمين وحدة والله على طول الشتا شغالى سواء بنتسبح والا لا مااطفيها تهبل لاتطوفج تلقينها عند اليوسفي

وبالنسبة للملابس تصدقين مافكرت اغير ملابسه ناوية بس اندر وير دافي وجاكيت بس
فكرتج حلوة عيل علميني من وين شريتيله الخام ووين بتخيطينهم يالله يمدي هذا السبوع المربعانية داشة علينا وخوفي من الازيرج الله يعين

وبالنسبة للمسابقة انا ناوية اشركه خصوصا ان هالسورة بالجزء اللي بياخذونة السنة الياية يعني علينا علينا واللي شجعني بعد بالموضوع انه موعد المسابقة بعيد يعني ان شاء الله يمدينا حتى لو باليوم اية وحدة بيمدي انشاء الله بس اليوم اخر يوم تسجيل وانا نسيت والحين بتصل واسجله بالتلفون

ريمان كل سنة وانتي طيبة حبيبتي

عندج عيال بمدرستنا ؟

 

[sadeem yam yam]

شلونج حبيبتي سر .. وشلون عيالج .. انشغلت هالفتره حييل الله يعين
وعلى الدفايه الي بالحمام تكرمين عندي من سنتين تقريبا ,, مادخل الحمام الا وهي تستقبلني فديتها بدونها الحمام مايسوى لوووول
بس بحمام ولدي لاوالله ماعنده ,, والصغير صعب اسبحه بالحمام .. انا اشغل الدفايه واسبحه بالغرفه الي نقعد فيها على طول .. اسبحه مني والبسه على طووول .. بالحمام ماراح اخذ راحتي ..
وبالنسبه حق السوره .. والله جنج شجعتيني ,, بس ماودي اضغط على ولدي وهذي اول سنه له .. بروحه تعبان وعنده مواعيد الله المستعان
شفتي التقارير راح يوزعونها الاربعاء والخميس ننقاش الابلات .. انا محتاره اي ساعه اروح ,, مابي اروح ويكون لويه وزحمه
بالنسبه حق الملابس تصدقين خالصين وللحين ماطلعتهم انشغلت .. بشوف من وين شريت الخام يعني بشوف لج اسم المحلات لاني عيزت على ما احصل خامه حلوه ,, حتى الي اخذتها مو ذاك الزود بس احسن من غيرها واهم شئ تدفي ,, الي وهقني فيها اني مالقيت نفس درجه عنابي المدرسه فلمن شفتها اقرب وحده لملابسهم خذيتها ,,
بطلعها ان شاء الله باجر واشوف

 

[سر القلوب]

هلا سومة حبيبتي

انا بالنسبة للملابس شريت تي شيرت نفس موديل المدرسة وبيج بس كم طويل من بينتون وتحته اندر ويير دافي وفوقة جاكيت متين كافي

وبالنسبة للتقارير الله يستر وبالنسبة للاجتماع انا بعد محتارة متى اروح ...الله يسهل ان شاء الله

انا رحت يوم الخميس وكلمت مدرسة العلوم وقالت التعاريف مومطلوبة حفظ بس المهم انه يفهمها وونعطيه صور يعرف اي وحدة فيهم دزرت او فورست او اوشين لوووووووول مالها خلق تحول انجليزي ...

وان شاء الله الخميس بنسالهم وبنتاكد منهم عدل


ولا تطولين علينا ترى الموضوع يحلى بحظورج ولو انه مافي غيرنا بس ان شاء الله يحنون علينا

 

[حدي غالية]

السلام عليكم انا و لدى بمدرسة الرسالة كان فى ون بى و بعدين انقلوه ون اى مو عارفه شسبب و بغيت اسالكم لان ولدى غايب ثلاث ايام بعد العيد هل وزعوا الشهادات وصار اجتماع مع المدرسات ومشكورين

 

[سر القلوب]

هلا والله حدي غالية
حياج الله معانا في التجمع نفيد ونستفيد وياريت تبلغين اللي تعرفينهم من اوياء امور معانا عن التجمع عشان نثري تجمعنا

وبالنسبة للغياب ماانصحج تغيبين الغالي ولديج لان المدرسة مشت بالمنهج ودرسوا وعطونا واجبات

وبالنسبة للشهادات ان شاء الله يوم الاربعاء ولازم دفع الرسوم عشان يسلمون الطالب الشهادة والاجتماع بيكون يوم الخميس ان شاء الله صباحا والله نسيت متى يبدي بس ينتهي الساعة 2 الظهر وبهاليوم راح يكون عطلة للطلبة يعني الخميس الياي مافي دوام

وبالنسبة للنقل : الله يسلمج مدرسة الانجليزي لاحظت ان في بعض الطلبة من 1 اي و1 ب و1 ج محتاجين تاسيس اكثر باللغة الانجليزية فقررت ان تجمعهم بصف واحد وتكون حصص اللغة الانجليزية مكثفة يعني ياخذون من البدنية والرسم فجمعوهم في صف 1 ب واللي ماشاء الله مومحتاجين تاسيس ودوهم 1 اي و1 ج

وسلامتج

ولاتحرمينا من طلاتج احنا تقريبا يوميا ندش التجمع نستشير بعضنا ونستفسر ونفضفض لبعضنا حياج الله معانا

 

[bdora]

مرحبا منوعندها بكي جي ون ابي رايها بطريقة تدريسهم

 

[سر القلوب]

هلا حياج الله بدورا ان شاء الله يشاركونا اولياء امور الكي جي

انتي بنتج او ولدج بالكي جي ؟

 

[حدي غالية]

مشكوره حبيبتى يعنى الاربعاء 9 -12 يوزعون الشهايد 0 على فكره ترى انا اتصفح التجمع يس ما ادش بس الحين راح ادش معاكم 0 فحبيت اعرفكم بنفسى انا ام لاربعة اطفال بنتين و ولدين ولدى الكبير فى ون اى0 وانا موظفة ومشكلتى ان دوامى عصر من 3 الى سبع ونصف وسلامتكم

 

[سر القلوب]

هلا والله حدي غالية حياج الله ويانا الساعة المباركة

والله يخليلج عيالج

وانا اعرفج بنفسي انا ام لطفلين اولاد
الكبير بالرسالة اولى والثاني يختي على امه توه شهرين ونص تقريبا
وانا تخرجت من الجامعة وادوام في البيت لووووووول يعني مومظفة

ووالله دوامج صج مشكلة الله يعينج حبيبتي اشلون يمديج تدرسينهم على ماتيين من الدوام الا صارت حزة نومهم

وهذي الاربعاء 9-12 الشهادات والخميس الاجتماع واليهال يعطلون

علمينا شنو انطباعج عن المدرسة ، انتقادج واعجابج

على فكرة انا ولدي كان ون اي وراح ون بي مع انه متاسس بالانجليزي عدل كان في الباكستانية وهذول ماعندهم يمة ارحميني بس مادري وين الخلل

وولد سدومة كان ون بي وراح ون اي يعني مع ولدج بالصف
يالله سدومة وينج

 

[حدي غالية]

تسلمين ياحياتى -انا اتوقع انا فاهمين العكس يعنى لضعاف فى الانجليزى ون اى لان ولدى مو قوى حيل بالماده-اما بالنسبه شلون ادرس ولدى فانا جايبه له مدرسه بالبيت تحل واجباته و تابعه ولما اجى من الدوام اشيك عليه وانومه لانه يتعشى قبل لاجى بس تبين الصج حاسه بتانيب الضمير تجاهة وتجاه اخوانه وهشى مضايقنى حيل لانى ما اقعدمعاهم و ادرسهم-اما مستوى المدرسه احس تو الناس على التقييم بس مبداءا توقعتها احسن من جذى وانا احتمال انقله السنه الجايه من المدرسه لان منهج العربى والريضيا ت نفس الحكومه ورسومها 2200 احس كثير حيل على مستواها الحالى الا اذا تغيرو بعدين اوراح ادور مدرسه خاصه ثانيه

 

[sadeem yam yam]

السلام عليكم شلونكم امهات ... سر حبيبتي شلونج .. وشلون عيالج
حدي غاليه حياج الله .. الظاهر انتي ام الولد الي ولدي ذبحني حن يقول غايب من عقب العيد بغيب مثله لووول
بنات الله يستر التقارير بااجر
وبعدين دازين ورقه يقولون باجر يلبسون زي حر .. يعني البسه اي شئ عادي ؟ < مرات اتنح على هالسوالف
ولدي تعبت معااه كل يوم ينطق .. كره المدرسه بشكل مو طبيعي بس مو عشان الطق لا .. احس نفيسته تعبانه من المدرسه مادري ليش ..وكله يقول مابي اروح الابله تهاوشني .. ابله منو مادري كالعاده ؟
وهذاك اليوم عندهم املاء رفض يكتب اي شئ .. حاولت فيه الابله ومارضى .. الله يعين ضايق خلقي هاليومين وحايشتني غلقه
ربي اشرح لي صدري ويسر لي امري

 

[حدي غالية]

هلا سديم ترى فيه ولدين فى الصف حدهم شياطين حتى مشرفة الصف تشتكى منهم ولدى بعد يشتكى منهم يقول عنهم مزعجين وطقون الاطفال وانا معلمه ولدى ان من يطقك طقه وبعدين بلغ المعلمه لان هذى النوعيه اذا مادافع عن نفسه اهو ماراح يخلونه بروحه كل شوى يتحرشون فيه خصوصا اذا مافيه ابله فى الصف وصدقينى فى شئ مضايق ولدج فى المدرسه ولى يسويه ردة فعل للى فى داخله -مالج الى تروحين للاخصائه وتبلغيتها

 

[حلم الطفولة]

السلام عليكم شلونكم أمهات الرساله الساميه
بشرونا ان شالله المدرسه زينه بالنسبه لأول سنه لها ؟؟ << أتمنى لكم الخير ولعيالكم جميعا.