تجمع للي تربي عيالها بروحها single mothers

[اثمان]

السلام عليكم

شلونكم يا حلوات؟؟؟


اليوم بعد الدوام بروح ادور لبنتى بدله للعيد عشان اخلص وان شاء الله القى

انتوا خلصتوا والا بعدكم؟؟

 

[اثمان]

عزيزاتي بنات هالتجمع

خواتي الغاليات....

راح ادعيلكم بإذن الله في صلاة القيام .. ان ربي يرزق كل وحده فيكم باللي تتمناه ... ويكفي ان احنا متحابين بالله وهذه احلا نعمة .. واسال الله ان يظلنا في ظله يوم لا ظل الا ظله

جزاج الله خير حبيبتى:yaaaaaarb:

 

[ام هزاع]

هلا وغلا اثمان

اجمعين يا رب

لا والله بس ناويه اروح باجر .. وبروح اشتريلها من محل بالافنيو روووعه دايم عنده شغلات ذربه واغلب البدلات على اوف وايت وبيج اعتقد اسمه بوتيت . واذا مالقيت عنده شي .. في محلات فوق صوب جرانت .. ماركات وذربين ....

 

[هيبة ملك]

أنا معاكم هالرجال مايشبع سفر

 

[StrOnG WoMeN]

هلا اختى

الله يبارك لج بعيالج واهلج

بس ليش ما تتدربين على السواقه؟؟

ترى الموضوع مو صعب

strong woman

حياج معانا وعسى الله يخليلج عيالج

سلام عليكم
اشلونكم
بنت سبب اني ما اسوق وانا كنت عند طليقي اهو يوديني ويبني
ولكن بعدين ماقدر لانه لازم اسوي عمليه قرنيه حق عيني
ثنتينهم

 

[جلكسيه اس 3]

اشلونكم بنات شخباركم
الحمدلله انا اسوق و متى ما احتجت اشتري شي او اروح طبيب
او اروح مكان ما انطر احد اقوله يوديني

 

[jawaa]

انا حسبت حساب طليقي واهله بالقرقيعان ولا مسويتلهم سبيشل بعد فكلمت طليقي بالوتس اب طلبت عنوان بيتهم ودزلياه وطبعن يتغشمر ويخفف دمه جنه مومسوي شي جني ليلحين على ذمته المهم بعدها بيوم دشيت عليه وقتله اذا تقدر تمر تاخذ القرقيعان من المحل قالي طبعن ومن عيوني ومن هالحجي ويناديني ام رشدااان لووووول دمه خفيف المهم بعدها جان يقولي بطلبج طلب قتله امر خير قالي ابي اشوف ولدي اذا سمحتي لووووووول بصراحه انصدمت اول مره يقول ولدي ويطلب يشوفه قتله الله الهادي بالعكس وين وما وين جان يقولي باخذه بيت اهلي @@@@@@ تبون الصج وقف قلبي وقامت عيوني تغورق وقمت ارجف مادري ليش امبي شلون بيروح معاه وانا موموجوده شنو بيسوي ولدي بيبجي اكيد الف فكره وفكره براسي المهم مرني البيت وخذا ولدي ثاني يوم طبعن مع الخدامه مالتي وبس كل شوي ادش عليه ها وين ولدي شيسوي بجى ولا لا شقيته وبس رده لي الساعه ١١ وبس هذا اللي صار يا حلوين فلم هندي مدبلج كويتي

 

[unapproachable]

جوا .. عسى الله يهديه لولده يارب بس لا تكلمينه بالواتس اب لانه الحين حسبة ريال غريب

 

[unapproachable]

strong woman عسى الله يشفي عيونج .. ولازم تسوقين بوضعنا احس صعبه ماتسوقين او اذا عندج سايق خاص تحطين

والله لو مااسوق جان اتوهق معنى اهلي من اروع مايكون .. لكن الوحده لازم ماتثقل على اهلها وتسوي شغلها بنفسها

 

[unapproachable]

انا خلصت ولدي للعيد .. شريتله دشداشه صبح العيد وبدله ثانيه

 

[برونزية رشيقة]

بنات مداخلة :

أنا هالأيام شفت إعلان على قناة أبو ظبي
ولد متفوق وكرموه بالمدرسة

الأبو يقوله :

أنا مستانس عليك بارك الله فيك يا ولدي
لأنك رفعت راسي

مكافأة لك لأنك متفوق أطلب أللي تبي؟؟؟؟


قال الولد :

يبا أي شي أطلب ؟

رد الأبو :

أي شي

رد الولد :
أي شي .. أي شي ؟؟؟؟

رد الأبو : أي شي .. أي شي

قال الولد : يبا طلبتك تعال تغدا معانا بالبيت
أنا وأمي ..

حطو الكامرا على عين الأبو :
وألا نزلت دمعة ..

وصل ولده للبيت ( يايبه من المدرسة من حفلة التفوق )

الأم فتحت الباب والأبو بالسيارة

الأم ابتسبت لولدها ولمته وباسته ..
ويحطونه يكلمها وتهز جتوفها يعني لأ ..

بعدين طالع أمه وطالع أبوه ..

وخذا الشهادة وشقها بالنص وعطى أمه نص

وراح لسيارة أبوه وعطاه نص ..

ودخل البيت ركض ..

توقف الصورة على ويه الأم والأبو

وتطلع كلمة :

لاااااااااااااااا تمزقوهم !

بنات .. أللي بوصله لكم قد يكون ريلج
فيه عيوب الدنيا والدين ..
يمكن صلاتج على قدج .. صيامج على قدج
أعمالج وعباداتج على قدج ..

والله سبحانه يحبج ويبي يدخلج الجنة


بس شلوووووون ؟

لازم يبتليج بالدنيا علشان يشوف صبرج
وتدخلين الجنة بمرتبة الصابرين أللي
لهم جزااااااااااااااااء عظيم ..


شلون ؟

بصبرج على ريلج أللي فيه عيوب الدنيا والدين ..


أمهاتنا الأوليات صبروا وتحملوا ..
وايد من بناتنا ألحين دلع ومتربين عالدلال
وأنهم ما يتحملون شي ..
وما ترضى أحد يكلمها حتى لو كان زوجها.

تقولج غيور .. مو الدين يسائله أذا ما علق على لبسج وعدله ..

أنا أعرف وايد بنات تطلقوا والسبة تبي
تلبس الضيج وتحط حمرة حمراااا

وتبيه يسكت ولا كلمة !

الريال عنده رجولة مراح يرضاها على نفسه ..

وأللي تقول أهله يدخلون ..
وآخر شي تعرفون الحقيقة المرة أنه
أهلها مشيشينها على أهله ..

وأللي تقول عنده خرابيط بنات ومغازل ؟؟؟
نص رياييل الكويت عندهم علاقات

مع الدعاااااااااااااااء بيقين أن الله يهديه

والله ربي مراح يتخلى عنج

راح ينهدي عاجلا أو آجلا ..


أسباب تافهة وواهية ..

والمشكلة الأهل ما ينصحون ..

لأ ..

خل بنتنا تتحمل نتيجة قرارها ..

لأ ..

مابي أغصب بنتي على شي .. هذي
حياتها ..


يا معودة إذا بنتج عمرها 19 و20 و21
سنة

نصحيها .. علميها .. نوريها ؟؟؟

تشيل لقب مطلقة وهي بهالعمر ؟

والناس يتكلمون فيها من وراج ..
وشماتة ..


وإذا عندها عيال يضيعون ..


بنتج إذا وصلت 30 أو 40 سنة
وهي مطلقة

والله ثم والله باجر تنقد عليج تقوووول:
أمي ما نصحتني لمن شلت قشي ورديت
بيت أهلي ..

الأم أللي تحب بناتها تصبرهم ..
تبطل عيونهم ..
تسمع شكوتهم ..

مو سييييييييييييييييدة تطلقي ..
خل يولي ..
تعالي عندي ..
البيت أللي يابج مو عيزاااان عنج ..

أخذيها عندج ..

شنو استفدتي ؟؟؟؟


الكلام وااااااااااااااااااااااااايد ..


بس بنات يا ليت أللي فيه أمل
ترد لريلها ترد ..

ترى محد بشيلج ألا عيالج وريلج
إذا كبرتي ..

وتذكروا هالكلمة :
إن الله لا يغير ما بقوم حتى يغيروا ما بأنفسهم .


لا تزعلون من كلامي .. محترق قلبي على بنات صغار وكل وحدة عندها عيال 2 و3 و4 .. وقاعدين في بيت أهلهم ..

الله يفج كرب كل أخت منكم قولوا آمين..

نصيحة :

الاستغفار عجيب ..
وقراءة سورة البقرة ..
والصدقة ..

وسامحوني على كل كلمة مقصودة وغير
مقصودة ..


تذكرووووووا ::::

لااااااااااااااا تمزقوهم !

يا ليت تدورون الإعلان وتشوفونه .

أختكم : برونزية رشيقة

 

[jawaa]

مشكوره حبيبتي عالكلام حلو بس ماتوقع في احد منا تطلقت على شي تافهه وكلنا عندنا كرامه أنا عن نفسي حاولت بس لي شفتي الريال بايع ومايدري عن مرته وبيته وولده ولاشافه اشهر ولا يصرف شاللي بيصبرنا عليه كلنا عندنا مشاعر والريال لي باع تعوفه الدنيا والخاطر وريايل قبل غير الحين قبل عالاقل فيهم ذرة رجوله لو تزوج ٢ و ٣ ريال عكس الحين تي وحده تقص عليه يهدم بيته عشانها

 

[unapproachable]

برونزيه رشيقه مشكوره وجزاج الله خير .. الطلاق تم بالنسبه لي وخلص الموضوع وحبيبتي اول سبب بطلاقي ان ولدي مايتعقد في حياته عشان ولدي ياخذ شهاده على قولتج نفس الدعايه لازم ابعده عن ابوه .. لان ابوه اهو الضرر وانا ماابالغ بكلامي

احيانا يا ناس الطلاق واجب على المره ليش المجتمع غبي مو راضي يفهم شلون الولد يعيش مع ابو يطق امه وممكن يمد ايده على ضناه مو الافضل يعيش اهو امه معززين مكرمين بدون عقد نفسيه من الابو

اوافقج الراي ان في حالات المفروض تصبر لكن في حالات حتى لو تروحين لشيخ دين يقولج الطلاق اهو الحل

 

[unapproachable]

وحبيبتي كلمه مطلقه مو عيب ولا حرام صححي معلوماتج .. والناس اللي تتكلم من وراي هذوله ناس ماتفهم وافتخر اني مطلقه ابدا ماراح انزل راسي لاني مطلقه!!! الحمدلله الله كاتب لي طلاقي مثل ماكتب لي زواجي

المجتمع معقد الناس لازم تتثقف وتؤمن بقضاء الله وقدره وتؤمن ان الطيبون للطيبات زين اذا الريال ردي وخسيس ومايخاف الله فيني وبعياله شيقعدني عنده اذا مافي احساس بالامان؟؟

 

[ام هزاع]

مشكووووره اختي على كلامج وجزاج الله خير


والله يا اختي مو كل وحده تطلقت على سبب تافه ... ويشهد الله اني صبرت وتحملت على حساب نفسيتي وصحتي واهلي ودوامي ..

والله يا اختي اني تطلقت ولا اعرفت شنو علة زوجي بالضبط ... !!!

اذا الوحده ممكن تموت بين ايد زوجها بسبب شكوكه واوهامه .. وتخيلاته انها تخونه ... شيقعدها عنده؟؟؟؟؟


الله حلل الطلاق وخلاااه رحمة للمرأه ...


قولي امين :

عساج ما تنحطين بموقفنا علشان ماتذوقين اللب ذقناه ... كل وحده فينا وراها قصه ... اقصد غصه .... ووراها مخده خلتها في بيت زوجها شاااهده على الاف الدموع اللي انزلت من عينها لما كانت على ذمته ......


انا متأكده .. ان كل وحده تطلقت مظلومه .... ربي سبحانه خاش لها شي احسن .... واروع ....


والحمدلله على كل حال

 

[دمثة]

الله يوفق الكل والجميع

 

[unapproachable]

((وَاصْبِرْ نَفْسَكَ مَعَ الَّذِينَ يَدْعُونَ رَبَّهُمْ بِالْغَدَاةِ وَالْعَشِيِّ يُرِيدُونَ وَجْهَهُ ۖ وَلَا تَعْدُ عَيْنَاكَ عَنْهُمْ تُرِيدُ زِينَةَ الْحَيَاةِ الدُّنْيَا ۖ وَلَا تُطِعْ مَنْ أَغْفَلْنَا قَلْبَهُ عَنْ ذِكْرِنَا وَاتَّبَعَ هَوَاهُ وَكَانَ أَمْرُهُ فُرُطًا ))

 

[ام هزاع]

اللهم اقسم لنا من اليقين ما تهون به علينا مصائب الدنيا


​

 

[jawaa]

ربي لاتنهي شهر رمضان الا وانت راض عنا واجعله شهر تتبدل فيه ذنوبنا الى حسنات وهمومنا الى أفراح واحلامنا الى واقع ربي ارزقني وارزق خواتي في الدين بما يسر قلوبنا وارحم حالنا وعوضنا بما هوا خير لنا وبارك لنا في مالنا وبنيننا يارب
اللهم امين

 

[unapproachable]

اتمنى اختم القران برمضان.. حيل تاخرت بالقرايه .. ان شاءالله بقرا مكثف بهالايام المباركه


خلصتو للعيد؟؟ ... اليوم رحت الافنيوز ورا الفطور وناسه وصلت 8 ماكو زحمه .. انصح اللي بيروح يروح هالحزه تلقين مصفط ومو زحمه بالسوق