تجمع مراجعات مستشفى رويال حياة

[Aloe Vera]

اي والله جان زين نبي قصص ولادة

يالله ان شاء الله ولادتج قريبة و ميسرة

بلغينا اول باول


انا قصص ولاداتي برويال حياة قديمين من ٦ سنين و من ٣ سنين
نبي قصص يديدة

 

[Aloe Vera]

صباح الخير ياحلوين

انااللحين بالاسبوع38 وثلاث ايام ادخل الاسبوع 39 مااحس بشي بس ثقل وتعب ونومي مقطع تعبت الله يكتب لنا الاجر ويهون علينا بنات انا لما رحت حق نداء اخر مره قبل اسبوع قالت لي اذا حسيتي بولاده تعالي لي وبس بناتاي وحده تولد تكتب لنا قصتها عسى الله يهون علينا

ثاني ولادة لي ولدت 39 اسبوع بالضبط و ماكنت احس بشي لا تجاديم و لا عوار بس فجأة ياني طلق حامي بنص الليل
بس كانت الدكتورة فاحصة قبلها باسبوع كنت 3 سانتي و الراس نازل
انتي شنو قالتلج الدكتورة؟

 

[سيكولوجية]

ربي يسهل عليكم يارب ويفرحكم بضناكم

وناطرين قصص ولادتكم

 

[noufb]

بنات انا وايد خايفه من دكاترتهم ملوت الطوارئ والسسترات يقولون خواره

 

[Aloe Vera]

انا اول مرة اولد فحصتني دكتورة مصرية هااادية و مريحة و تذكر الله
و كانت معاي بالولادة مع وجود دكتورتي

و ثاني ولادة رحتلهم موصلة فا دكتورتي مالحقت عليي فا ولدتني دكتورة الطوارئ لبنانية اسمها سوزان عجيبة و نفسيتها حلوة مع ان بنص الليل و من عقبها حبيت اللبنانيين و راجعت عند منى ابو طعام هههه لانها لبنانية

و هم رحتلهم بالطوارئ مرة حاشني التهاب بالبول و كانت عنايتهم وايد زينة و طبت بنفس اليوم

انا تجاربي مع الطوارئ وايد زينة

و كل شخص تجربته غير انتي ادعي ربج يوفقج و يسخرهم لج و بس توكلي عالله

 

[Aloe Vera]

اب اب

نبي قصص و تجارب

 

[يتيمة جابر العز]

الوي

حبيت منى بؤ طعام من مدحج لها ودي أشوفها وآجربلي مراجعه عندها لي يوم

 

[Aloe Vera]

يتيمة جابر العز

انا صح امدحها بس ليلحين ماجربت ولادتها
اللي يعجبني فيها
مراجعاتها خفيفة ماكو زحمة ماكو دور و نطرة و تحسينها ريلاكس ماوراها شي نفيستها حلوة
و العضوة درة التاج والدة عندها و تمدحها خلاص توكلنا عالله بس صج اتمنى تكون ولادتها حلوة يا رب

 

[Aloe Vera]

يحليلها دكتورة منى اليوم موعدي معاها تقول تفكر تلغي سفرتها لان عندها جم وحدة راح يولدون بنفس الوقت

استغربت بصراحة الدكاترة الثانين يسافرون ماهمهم

قلتلها غريبة قالت لان هذيلي ثاني مرة راح اولدهم ما اقدر اخليهم

 

[besko0o0otah]

مرحبا بنات

كل اللي سالني عن قصة ولادتي .. الله يسلمكم انا كان عندي موعد مراجعه بتاريخ 6/5 كان يوم اثنين و فحصتني الدكتوره بس ما سوت تحفيز و قالت لي ان الرحم مفتوح سانتي و كنت ماخذه من التاسع اسبوعين بعدين رجعت البيت و بدا معاي الم بسيط و انا بالاساس هذا الالم كنت احس فيه يروح و يرجع من اول ما دخلت شهري قمت و رحت امشي قدام بيتي فيه حديقه رحت و مشيت فيها يجي تقريبا نص ساعه بعدها ريحت في البيت و كان باقي عندي خروع بعد عملية انتحاريه كنت مسويتها ولاجابت نتيجه هههههههه كملت على اللي بقى في الغرشه و كملت مشي حوالين الصاله بعدين بداني الله يعزكم اسهال و هذا شي عادي من الخروع .. و استمر الاسهال لحد تقريبا اول المسا ووقف و بعدها نزل مني دم بسيط و كلمت دكتورتي و قالت لي شي عادي هذا من الفحص و بعدين و بدا الطلق يزيد بس ماكان الم قوي مره يعني كانه الم دوره عادي ... بعدين بالليل بدا يزيد وكل مره تقرب الطلقات من بعض لحد ما صارت الساعه 5 وربع الفجر نزل مره ثانيه دم و ووقتها الالم كان اقوى كلمت امي و علمتها بالسالفه و قالت لي روحي المستشفى و انا بجهز شنطتي و اجيك ( انا اهلي في السعوديه ساكنين الخبر) انا على ما بدلت و رحت انا وزوجي المستشفى كانت الساعه 6 ونص الصباح دخلت غرفة الفحص قالوا لي مفتوح الرحم 3 سم و خلوني بالغرفه على ما يجهزون غرفة الولاده وكانوا بيعطوني تحميله عشان تفضي بطني بس علمتهم اني ماخذه شوية خروع و ما عطوني التحميله .. بعدين ودوني غرفة الولاده الساعه 8 ونص تقريبا و كان الرحم مفتوح 4 سم و سالوني تبين ابرة الظهر و قلت لهم طبعا ابيها كان الم الطلق رهيب .. سالوني تبين دكتور معين لابرة الظهر قلت لهم لا بس ابي الشاطر قالوا لي المناوبه عند وحده اسمها الدكتوره هناء و الله اني ما اذكر الاسم بس الدكتوره عجيبه و الابره مثل السحر ما حسيت بشي ابد بس لما جت تحطها مافيه الم بس تحسين انك متضايقه طبعا وقت ما كانت تحطها زوجي ماسكني بقوه عشان ما اتحرك و كل ماحسيت الطلقه بتجي علمتها عشان ماتسوي شي توقف بعدين لما خلصت بدا السحر يشتغل واااااااااااااااااااااااااااااو مافيه الم ابد .. عقبها انا منسدحه و كل شوي الدكتوره المناوبه تجي و تشيك لحد ما فتح الرحم تقريبا 7 سم و راس البيبي شويه بدا يبين جت دكتورتي رايا قزويني كانت تقريبا الساعه 1 طبعا امي وصلت عندي الساعه 11 .. بعدين صار مفتوح 8 سم و الراس بين قالت الدكتور نستنى لحد ما يكون الرحم مفتوح 10 افضل بعدين لما وصل 10 سم و لدي رجع رفع نفسه سبحان الله مع ان الامور كانت كلها اوكي و الراس باين و جاهزه بس الله يهديه رفع نفسه هذا الكلام الساعه 3 العصر بعدين الدكتوره قالت نعطيك طلق صناعي عشان يساعد البيبي ينزل مره ثانيه خاصه ان الرحم خلاص مفتوح كامل .. و عطوني طلق صناعي و فعلا الساعه 5 ونص نزل راسه و بين و هذا كله طبعا انا مو حاسه بشي بعدين قالت الدكتوره خففو جرعة ابرة الظهر بس عشان احس بالدفع وكون ادفع بشكل صحيح و بديت بالدفع و يله يله يله ... بس ولدي راسه كبير و بالموت طلع الدكتوره اضطرت تشفطه لاني انا تعبت و معد فيني طاقه ادفع بس استخدمة جهاز جديد اسمه الكيوي مره صغير و ما يخلي راس البيبي منفوخ من الشفطه بعدين ينحط براس البيبي من ورا مو مثل القديم بالوسط و مره صغيييييييييييييييييير .. و شفطوه لحد بس ما طلع راسه بعدين انا دفعت و طلع الباقي كان الاحساس نفس الله يعزكم ما تروحين الحمام ههههههههههههههههههههههههه ابرة الظهر مسويه شغل طبعا ولدي طلع بالسلامه الساعه 6 ونص المغرب ( يعني انا ولدت يوم 7 / 5 /2013 الساعه 6 ونص المغرب ) ... و بعدها خلاص نضفوني و الدكتوره عجيبه خياطتها مع العلم انها ما قدرت تخيطني تجميلي لان انا طلع عندي الانسجه الداخليه مره رقيقه و ما يظبط معاي الخياط التجميلي مع انها حاولت مسكينه بس كل ماخاطت انفتح فقامت و خاطتني خياطه عاديه بس و الله يابنات اني لما طاحت الخيوط شفت بالمرايا و لامبين و لاشي ابد و هذايدل على ان الدكتوره شاااااااااااااااااطره .. بالنسبه لولدي الحمدالله بصحه وعافيه و حتى مكان الشفطه راح خلال اسبوعين تقريبا و اساسا هو مكان الشفط مره صغير و الحمدالله اني ولدت في رويال و مع الدكتوره ريا و لو حملت مره ثانيه بولد عندها و بنفس المستشفى باذن الله ...

ملاحظه اللي تبي تستمتع بولادتها و تذكر اللحظات الحلوه لا تترد و تاخذ ابرة الظهر .. انا اذكر كل لحظه من دخلت المستشفى و لحد ماولدت و كنت سعيده صحيح تعب بس التعب تعب ارهاق مهو تعب ولاده والم لاني قعدت 12 ساعه .. يعين حتى لما ودوني غرفتي جابوي لي ولدي مو مثل الحريم اللي تكون تعبانه ونايمه من التعب

الله يهون عليكم كلكم يااااااااااااارب

 

[Aloe Vera]

الحمدلله عالسلامة و الف مبروك و قصة حلوة ماشاء الله

والله يرزقنا يا رب ولادة ميسرة و حلوة

 

[درة التاج]

الوي

حبيت منى بؤ طعام من مدحج لها ودي أشوفها وآجربلي مراجعه عندها لي يوم

يا حلو دكتورة منى ابو طعام ياحلو |Aloe Vera بعد:eh_s(17):

جزاهم الله خير
احلى مراجعات تيين علا موعدك وولادة حلوة ودكتوة فاهمة وشاطرة ماشاء الله لا قوة الا بالله
الله يعطيها الصحة والعافية
ويارب يرزقكم بالولادة السهلة الخفيفة الي تصير ذكرى حلوة :eh_s(7):

 

[درة التاج]

سبحان الله كنت محتارة اي مستشفى اروح واي دكتورة اراجع واستخرت والحمد لله ربي عطاني الي هو خير لي
والله كللللللش ما طرا علا بالي رويال حياة ولا حتا طرت علا بالي دكتورة منى بس الحمد لله ان الله سبحانه كتبهم لي

 

[درة التاج]

خياطها وايد زين

 

[يتيمة جابر العز]

ربج مسخرلج ياها
وحلووو دام تمدحين ولادتها هذا اهم شي

دكتورتي ما عليها كلام بس جد أنغث من الزحمة لاتطااااااق يعني تخيلي وصلت فينا نروح على الساعه ١٢ اكتب اسمي عند زهره
ونتسوق ونقضي مشاويرنا ساعه ونتغداً ساعه ونرد ننطر ربع ساعه وندش
حتى زهره عارفتني هذه طريقتي
بس يالله ماعليه نتحمل لعيون خالده المجيبل

 

[om.malak]

الي يقهر مو هالزحمه الي يقهر الحريم الله يهداهم يحللون الفلس الي قطوووه
ينرفزون حيل

 

[درة التاج]

الي يقهر مو هالزحمه الي يقهر الحريم الله يهداهم يحللون الفلس الي قطوووه
ينرفزون حيل

اتوقع انهم مو بس مراجعات حمل عادية
يمكن يراجعون عشان الاجهاضات المتكررة او حالات الحمل الحرجة او تلقيح صناعي
الدكتورة خالدة تخصصها علم الاجنة تخصص دقيق وماشاء الله عليها اقرا عنها في المنتدى يمدحونها وعشان جذي زحمة
الله يوفقها
ويسهل علا الكل
وتولدون بهون وسلامة :eh_s(17):

 

[Aloe Vera]

الي يقهر مو هالزحمه الي يقهر الحريم الله يهداهم يحللون الفلس الي قطوووه
ينرفزون حيل

مافهمت قصدج شنو يعني يحللون الفلس؟

 

[يتيمة جابر العز]

حتى أنا مافهمت يحللون الفلس؟؟؟؟؟

 

[يتيمة جابر العز]

امس رحت رويال على أساس بشوف أطقم الاستقبال والقهوة والمعجنات في قاعة الجوري

حيل عجبوني وذربين حده يعني أنا بس أجيب معاي حلو القهوة

رشحولي حلو قهوه غير واو ولازورد لان كل الي عندي طاحوا فيه

شرايكم بريبل أو امبرس أو بان كويت ؟؟؟؟