هلا بنات شلونكم
زيتونه الحمد لله على السلامه
أبلة كويتيه
عندى كم سؤال واللى يعافيج يا ليت تردين علي يمكن نروح بالعيد تركيا
1- بالنسبة لمدينة معشوقيه وازمت كم تبعد بالمسافه والساعات عن بورصه ؟؟
2- اماكن القوارب اللى في بحيرة ازنك وين مكانها بالضبط لانى كل سنه اروح وما اشوفهم ممكن تقولين لى وين مكانها بالضبط ؟؟
3- هل يوجد شلالات في معشوقيه وازمت وهل يوجد اماكن سياحية ؟؟
4-هل اوت ليت في إزمت وهل فيها سوق وألعاب وكم تبعد عن ازنك ؟؟
5- هل بالامكان القيام برحله لازنك ومعشوقيه وازمت في يوم واحد والالا ؟؟
6- السواق اللى تتعاملون معاه يتكلم عربي والالا ومن وين تاخذونه ومن بورصه ليلوا بكم ؟؟ وشنو المكتب اللى تتعاملون معاه ؟؟
اسفه طولت عليج بس الاسئله زوجى هو اللى كاتبها لي ههههههههههههههههههههه
هلا والله يالغالية وآآآآسفة جدا طولت ما رديت عليج
تدرين مع السفر ما عندي وقت أشبك على طول
بالنسبة لرحلة معشوقية
رحنا لها مرتين من مدينة تيرمال إللي بجزيرة يلوا ..الباص سعره من 190 دولار إلى 200 دولار
طبعا لأنها بعيدة ..تبعد ساعتين من يلو تقريبا
بس من بورصة أقرب بوايد يعني تقريبا ساعة على ما أظن أو ساعة ونص وأكيد السعر بيكون أرخص
طبعا معشوقية وبحيرة إزنك وآوت لت ومدينة ملاهي إزمت كلها تكون بيوم واحد
شلون ؟؟؟ .......آنا أقولج
تاخذون لكم باص من الصبح مبجر حيل ...يعني على ال 9 الصبح وتروحون
1- قمة الجبل الموجود في معشوقية ..تخلينها يصعدج لي فندق إسمه ... ((جرين بارك ))
هذا الفندق في قمة الجبل الجو فيه وااايد حلو ..بس للأمانة الحلو فيه المناظر الخلابة والتزحلق على الجليد وهذا يكون بس في الشتا ..
وبالصيف عندهم البقي أو البانشي ....كل شخص ياخذ بقي د ويطلع معاكم قايد يدخلكم بين الغابات مثل رحلة السفاري بصراحة كانت الرحلة رووووعة بمعنى الكلمة ..
سعر البقي الواحد للشخص 40 ليرة نص ساعة و75 ليرة ساعة ...والسيارة إللي على بانشي للشخصين 60 ليرة نص ساعة و100أو 80 ليرة ساعة
طبعا هذي الأسعار بالصيف يمكن بالعيد تتغير ( الله اعلم )
وتقعدون بالقهوة عقبها تشربون شاي وتاكلون برد وتصورون وتركبون الحصان تحت بالفندق بعد حلو وعندهم بعد على ما أظن تأجير قواري
بس إنتبهي بصراحة عندهم كل شي فوق غالي بزياااااادة يعني إذا معاج يهال خلي يكون معاج بسكوت وبطاط وعصير يعني هالسوالف والكبار عادي شربوا قهوة أو برد عادي
2- بعدها تخلونه ينزلكم لمعشوقية تحت ...فيه وااايد مطاعم فيها أحواض السمج فرش يصيده جدامكم ..دخلو لكم واحد من هالمطاعم وأكلوا عندهم سمج بالجبن ..إسمه ميرتر كشار بلك بالتركي...إذا كنتي من عشاق السمج...وإذا ما تحبين السمج طلبي كفتة أو دياي كل شي عندهم ...أغلب المطاعم تطل على إمتداد الشلال الموجود في المنطقة يعني نهر ,,الشلال بعيد مشي على الريل تقريبا ساعتين أو ساعة ونص والسيارة ما توصله
عشان جذي قعدي على المطاعم إلي تطل على نهر معشوقية
3- بعدها على الساعة 2 أو 3 روحوا لبحيرة إزنك وقولو له إنكم تبون صوب القوارب والقهاوي إللي تكون وايد ويم بعض
(( إحنا المرة الأولى ودونا حق هالمكان لأنه منبهينهم ..المرة الثانية ليش ما نبهنا المكتب ودانا لفندق عند البحيرة غالي وما عنده قوارب ..عنده بس قواري لليهال ))
يعني إنتي نبهي المكتب قولي له الباص أبيه يوديني عند القهاوي الوايدة يم بعض ويكون عندهم قوارب للتأجير
هناك اجري لكم قارب نص ساعة ب 10 ليرات وبعدها إكلو برد بالقهاوي الموجودة
4- بعدها على الساعة 5 خليه يوديكم لآوت لت سنتر مال إزمت ...إنتبهي عندهم كارفور ومكان إسمه ريال ..هذيلا غير عن الآوت لت سنتر ..
الآوت لت سنتر عبارة عن شارع حلو فيه ماركات مثل روبك وتومي ومحل فاكو وإل واكي مالهم ومحلات جواتي ...حلو تلاقين عندهم شغلات
5- عقب ما تخلصين من الآوت لت ..بالليل روحي حق مدينة الألعاب مالت إزمت حلوة القعدة فيها بالليل ..لعبوا واستانسوا وعلى ال 11 بالليل ردوا بورصة
هذا هو سير الرحلة بالترتيب ..إحنا رحنا مرتين ,,بصراحة ستانسنا حيل الحمدلله ..خاصة في قمة جبل معشوقية المنظر روعة والأحلى رحلة السفاري إللي في البقيات كانت روعة
موفقة يالغالية وأتمنى لج رحلة سعيدة
7
7
