تجمع مواليد ( مارس & ابريل ) 2014 الله يحفظهم

[مآيكبرني نك]

حبيبه عززز

يآختتتي اشتقت لج والله

فقدت سؤالفج الحلؤؤة

طمنيني عنج وعن عوآش :*

 

[همي رضى خالقي]

فوفو بالعكس عندج وقت تهتمين بشعرج خلطات وجسمج وكل شي

انا شريت جم دراعه جاهزه وبفضلي وهم بشتري حق العيد بفتك

 

[fofowa_q8]

مايكبرني سكتي انا حدي متازمه من كرشتي

يوم طلعت من نفاسي ببنتي ماكو بطن كلش

رديت نفس قبل بس الحين لأ لأ شكل بطني يضيق الخلق

الحمدلله خف وايد عن اول ماولدت بس لي الحين

في بطن بس امي تقولي طبيعي جذي من القيصرية

يبي لها جم شهر ياالله تروح وماتروح نهائيا بعد

شنسوي بعد الحمدلله وان شاالله هذي اخر مرة


همي عليج بالعافية انا ماالبس دراريع كلش

بس لازم حق رمضان والقرقيعان دراعة

وافضل القصار مااحب دراعه طويله لاني قصيرة


واي حمره الله يعينج ٤ سنين رمضان بره الكويت!

مو شي كلش.. الحمدلله انج بتردين هالسنه

صج رمضان بالكويت طعمه غييير ياحلاته

والقرقيعان ودي اسوي شي حلو عشان هالمرة

قرقيعان عبودي وشيوخه

بالنسبة للشعر مادري عن الصبغ انا مااصبغ

وايد اخر مرة قبل ٣ سنين تقريبا

ومادري انتي شعرج شطوله عشان تقصين بوي؟

اذا طويل حرام تقصينه هالطول

 

[Q8_QT]

كيوت انا ماني مسويه نيولوك حق منو بسوي

بس ناويه عالحمام المغربي لما اكمل شهرين

مادري ليش متخوفه منه اخاف ياثر عالجرح

مع ان قالو عادي ودكتورتي هم قالت عادي

ناويه اهتم ببشرتي وشعري واسوي خلطات

بس اخلص اختباراتي ان شاالله الاحد اخلص

وهم ناويه اعدل نظام اكلي صايره اخرب بالاكل

بشتغل على نفسي هالجم شهر لين يرد زوجي

بالسلامة وقبل لايرد اسوي عاد نيولوك واشتري

لي ملابس يديده ان شاالله

ليش فوفو بالعكس حقج مو كل تغيير عشان الزوج هم احنا محتاجين ونفسيتنا محتاجة انا هالمرة جذيه سويت مااهتميت باللبس كثر ماكان همي اسوي شي حق نفسي وناوية بعد على تنظيف بشرة بسوي بعيادةانا اقول سوي شي بسيط الحين عشان نفسيتج تتغير والنيولك الكبير حق ردة زوجج بالسلامة ان شاءالله وعالحمام المغربي انا سويت اذا كملتي شهر سوي عادي ولا تقربين صوب الجرح قوليلها بس تفرك ظهرج وايدج وريلج

 

[Q8_QT]

همي


انا جربت كيراتين لايسو كان حلو وهالمرة سويت بروتين بصالون انصحتني فيه حمرة يزاها الله خير حاطة اسمه فوق والنتيجة حلوة والله




مايكبرني وفوفو



الكرش مزعجة صج وانا حاليا ماني قادرة اسوي كنترول على نفسي مادري شفيني مع اني مستعيلة بضعف

والقرقيعان خاطري اسوي بس يبيلي ميزانية عايلتنا كبيرة اهل امي واهل ابوي غير اهل ريلي وانا ناوية اسافر حق امي وابوي آخر رمضان يعني العيد عندهم اذا الله سهل فمحتارة واختي راح تكون نفاس برمضان بس ناوية تخلي طلعتها حق القرقيعان فبس بشتري دراعة وحدة ولا ثنتين ولو اني مالي خلق مليت من الدراريع اساسا مااحبهم لبسه وحدة وبعدين اعلقهم بالكبت




حبيبة



طمنينا عن عواشة شلونها

 

[حمرة الورد]

فوفو اخر ظهري شعري متحسفه عليه ونفس الوقت راح يكون كله لافته مادري

كيوت اجمعين ياقلبي فعلا حلو بروتين بسويه هم انا

القرقيعان حتى لو يكون لبس وشويه شغلات لاتكلفين على نفسج اهم شي الجهال يستانسون

 

[مآيكبرني نك]

فؤفؤ

صح كرشه القيصريه يبالهآ وقت

ان شاء الله الؤﻻده اليايه تكون طبيعي وترتآحين

بس ف ذمتج كيف رؤحتيها عقب وﻻدتج بشؤاخ

دخيلج فيديني ابا اردها نفس قبل

 

[fofowa_q8]

حراااام حمره لاتقصينه هالطول قصريه شويه

او درجيه مادري احس حرام ماشاالله شعرج طويل

ليش لافته على طول تقدرين تسوين فيه حركات

والقرقيعان لازم لو شي بسيط حق اليهال غلى قولتج


كيوت بالنسبة لي اكيد ان شاالله قلت اج بهتم

بشعري وجسمي واسوي حمامات مغربيه بس اقصد

القص والصبغ والملابس اليديده ماني مسويه شي

الحين من هذا ان شاالله بعدين حق ردة ريلي مرة وحدة

وصاجه يبي لي شي يغير النفسيه بعد الحمال والولادة

والدراسة ابي ارتاااااح بالصيف وايد تعبت هالسنه

كنت مضغوطه حيل

 

[حمرة الورد]

فوفو اي حركات اصلا لو يصير على الصفر ويكون شكلي حلو مثل الامريكيات بسوي نفسهم ههههههههه انا يالله اخذ شور وقلبي عند علاوي وعبودي عند ابوه والعيال عليهم تتدريس اخوهم وهم مو ملحقه اذا رحت الكويت بسوي حركات لوووول

الكرشه لاتحاتين بتروح وخاصه اذا ترضعين طبيعي لاتحاتون

 

[fofowa_q8]

ههههههه حمره الله يخليهم لج ويعينج صج

صعبه بهالغربه مع اليهال انا اقصد اذا رديتي

الكويت ان شاالله


مايكبرني بنفاسي ماكنت اخربط كنت حيل

محافظه على اكلي مااكل عيش كلش ولا خبز

ولا شي مقلي ولا حلو كله مشوي وسلطات وعصاير

وبطني لبست كورسيه عقب ماولدت باسبوع ماكنت

افصخه الا حزة النومه بس وكنت اشرب اعشاب

على طول وزنجبيل وقشر القهوة يوميا ٤-٥ مرات

والحمدلله رد بطني نفس قبل حتى ريلي

اذكر اول ماشافني قال وين راح

بطنج شلون جذي الله اياااااام وطبعا هم الرضاعة

الطبيعية لها دور حتى لما ترضعين سبحان الله تحسين

بعوار ابطنج وهم انا مامتنت في بنتي كنت ضعيفه

ومن قبل ماكان عندي كرش .. اشوه ان ريلي مو موجود

يمديني ارد شوي واطير الكرشة ودي البس كورسيه

بس خايفه ناس يقولون لبسيه يشد وناس يقولون

مايصير لازم ٦ شهور احترت مع ان دكتورتي

قالت عاااادي لبسيه بس الصراحة ماقمت اثق فيها

من بعد اللي صار لي .. تصدقون بنات زوجي

طلب منها تقرير العملية وشنو صار بالضبط

لانها قالت العملية صعبه حيل وصارت فيها اشياء

فقال لازم نعرف شنو صار عشان اذا ان شاالله مرة

ثانية حملت وراجعت عند غيرها سواء هني او بره

يكونون عارفين حالتي تصدقون ان التقرير كله جذب

بجذب حسبي الله ونعم الوكيل تبي تبرر حق روحها

اللي صار عشان تطلع نفسها لان التقرير يوقع عليه

مدير المستشفى.. انا ماتكلمت فيها ولا قلت اللي صار

ولا كتبت قصة ولادتي عشان مابي اتكلم فيها او اقطع

رزقها قلت الحمدلله الله سلمني وسلم ولدي والله يسامحها

بس بعد ماشفت التقرير صج طاحت من عيني فوق غلطها

مصره انها تجذب وتقول انها مو غلطانه !

ميته من الحره انقهرت قمت ابجي يوم قريته تذكرت

اللي صار مااحب اتذكر هذاك اليوم

 

[همي رضى خالقي]

الي صارلج مو شويه فوفو الله يعينج

 

[Q8_QT]

فوفو اخر ظهري شعري متحسفه عليه ونفس الوقت راح يكون كله لافته مادري

كيوت اجمعين ياقلبي فعلا حلو بروتين بسويه هم انا

القرقيعان حتى لو يكون لبس وشويه شغلات لاتكلفين على نفسج اهم شي الجهال يستانسون

هلا حبيبتي ئي طلبت لهم لبس من وحدة بالانستجرام بس المشكلة اهلنا وايد ويزعلون اذا ماعطيتيهم عاد قلت بشتري زبيل واحط فيه واخلي ولدي العود يدور فيه ويوزعه او احطه بالعربانة القديمة بسلال صغار خاطري نفس العربانة اللي بافتح يا سمسم مادري جان تعرفينها مالت العم عبدالله واحط داخلها القرقيعان وسوالف من بو 100 حق اليهال وكان الله غفور رحيم

 

[حمرة الورد]

فوفو شنو تقطعين رزقها من صجج هذي مال الحين اقول حسبي الله عليها وخلاص لاتفكرين فيها

كيوت يزعلون بعد هههههه سوي اللي يريحج بس شنو نظام اللبس الي طلبتيه

 

[fofowa_q8]

عادي كيوت مو الا تكلفين على عمرج القرقيعان حق اليهال

واذا بتعطين الكبار عطيهم شي بسيط .. احنا جذي اهلنا

وايد ماشاالله بسوي لهم شي بسيط واهم اصلا ماعندهم

فناتق وحركات نظاهم زبيل وفيه قرقيعان نفس ماقلتي

بس حق اهل ريلي بشتري شي زين يستاهلون بصراحة

وماقصرو معاي بولادتي


اي والله ياحمره حرتني ماتدرين شصار فيني

بكتب القصه اطلع اللي بقلبي مقهوووووره

 

[همي رضى خالقي]

على طاري القرقيعان انا مادري ليلحين صراحه اهم شي تذكرون اليهال لانه اهم الي بيفرحون

بس صراحه نصب بسعر ملابس القرقيعان كله لبسه وينقط

 

[حمرة الورد]

ناطرينج فوفو

همي فصلي طلعي موديل على قولتج انا دايما افصل لعيالي بس اخر رمضان خذيته من معرض ب 30 جنه مادري اثنينهم ب 30 الصبيان رخيص بس مادري عن البنات اهم شي عشان التصوير ولان ورانا عيد ومدارس بعد صرف الله يعين

 

[ليالي العاشقينه]

كيوت لا حبي السستر
الي يبتيها

 

[fofowa_q8]

يوم الثلاثه تاريخ ٤/٨ كان عندي موعد مع الدكتورة الظهر وكنت بالاسبوع ٣٩ ويومين فحصتني وقالت لي مفتوحه ٣ سانتي انتي حدج هاليومين وتولدين روحي امشي وشربي دارسين واكلي انناس .. سالتها عن وزن البيبي ووضعه قالت كل شي تمام واوكي ووزنه زين وراسه زين ونازل بالحوض وعنق الرحم لين انتي بوضع مناسب للولادة ( للعلم مثل ماتذكرون كانت قايلة لي وانا بالشهر السابع ان البيبي راسه شوي كبير وحوضي صغير طبعا من السونار قالت الحوض صغير قلت لها دكتورة مولازم اسوي اشعة بالتاسع عشان قياس الحوض والراس لان هذا اللي اعرفه وامي مسوية جذي من قبل يوم كانت حامل فيني وقالولها ان الراس كبير عالحوض قالت لا لا لا مو لي هالدرجه عادي انتي بس وقفي الفيتامينات والكالسيوم وكل شي يصير اوكي واذا ماصار اوكي ادخلج اول التاسع اولدج بطلق صناعي قلت لها اوكي وبعدين مراجعاتي بالسابع والثامن والتاسع كنت كل مااسالها تقولي لاااا وضعج تمام والراس صار حجمه زين لاتحاتين عادي عادي قلت لها دكتورة في احتمال قيصرية قالت لا لاتحاتين وتفكرين طمنتني حيل) المهم اكمل القصة طلعت من موعدي الاخير وقالت لي اشوفج بالمستشفى ان شاالله اليوم او باجر طلعت ورحت اكل رطب واشرب دارسين وبالليل رحنا البحر مشيت على رمل البحر ساعه تقريبا وكنت اكلمكم بالتجمع وماكان فيني ولا عوار ولا شي.. ردينا البيت ياني عوار خفيف قلت من المشي يمكن بدش اسبح بماي حار اذا زاد معناته طلق وماكنت متوقعه انه طلق ابد مع ان ريلي قال انا حاس ان الفير راح نروح المستشفى المهم دشيت سبحت وطولت تحت الماي وراح العوار اول ماطلعت بلبس جان ينزل الماي على ريولي وانا اطالع مو مصدقه هذا ماي شنو هههه المهم نطرت واقفه اطالع جان يمسكني عوار طلق لا لا جنه صارت الصجيه طلعت رحت الغرفة حق ريلي جان اقوله جنه فيني ولادة بس مادري مو متاكده والماي ينزل خفيف وانا لي الحين مو متاكده قالي يله المستشفى قلت له لا بنطر المهم مارضا بدلت ملابسي بسرعه وكان اييني عوار بس ماحسبت كل شكثر كان لازم اروح لان الماي مستمر كل شوي ينزل شوي .. بنتي كانت نايمه كانت الساعه ١ بالليل خليتها عند خالتي وطلعنا دشيت على دكتورة الطواري فحصتني وشافت الماي قالت ولاده ٤ سانتي وهذا ماي البيبي كانت ريحته حلوة نفس ريحة البيبيات سبحان الله .. قعدت بالويل جير وكتبت لكم ادعولي بدش ولادة كنت في قمة الهدووووء ومرتاحه حيل مادري ليش مو حاسه بذرة خوف سبحان الله قالت لي الدكتورة تبين ابرة ظهر قلت لها مادري طالعت ريلي قالي كيفج بس مادري شنو اللي ياني قالي اخذيها قلت له انا مستخيره وقايله مابي اخذها بس في شي يقولي اخذيها انا احس بطول بالولادة جان تقولي الدكتورة لا حدج ٣ ساعات وتولدين انتي مو بجر وبعدين الماي نازل راح يحمي الطلق ماراح اطولين بس احساسي كان يقولي اني راح اطول واتعب .. قلت حق ريلي شوف اذا في دكتورة تخدير مره ابيها واذا ريال مابيها مابي يشوفني ريال وصعدت غرفة الولادة وانا مستانسه ومرتاحه مادري ليش سلمت عالسسترات اللي داخل يطالعوني هذي شفيها ههههه يو بيلبسوني لبس العمليات قلت لهم انا البس ودشيت الحمام وانتو بكرامة ابدل واطالع نفسي بالمنظرة اقول بولد الحين جنه صارت الصجيه واقعد ابتسم وطلعت انسدحت ومحد كان معاي ريلي تحت يسوي الاوراق جان اتذكر امي محلفتني اقول لها وجنطتي عندها بس الحين الساعة ١:٣٠ المهم دقيت عليها جان ترد على طول قلت لها انا دشيت ولادة بس شكلي مطوله توني ٤ نامي وتعالي لي الصبح طبعا مارضت ودقت على ريلي قالت له تعال الحين اخذني ماعندها احد اييبها.. وياني ريلي قالي في دكتورة تخدير من حظج انها موجوده كانت بتطلع قلت الحمدلله الله سهلها ويتني وقزتني الابره ماحسيت بعوار ولا شي وقاعده اسالها عن الابره واهي مالها خلق حدها دايخه بتروح تنام غصب تجاوبني اخر شي قمت اسال اسال ماقامت ترد علي لوووول وقعدت اسولف مع السستر .. كنت اتمنى تكون معاي السستر اللي كانت معاي بولادتي ببنتي احبها حنونه حيل وساعدتني وايد بس قاعده اقول اكيد ماراح احصلها من ٣ سنين ونص مولدتني وبعدين في كذا غرفة ولادة وشفتات وين احصلها حتى اسمها ناسيته المهم قاعده السستر معاي وقامت تسولف يحليلها كان عوار الطلق محتمل الحمدلله لين اختفى من الابرة ونااااسه هالابره *** وقعدت احمد ربي واتذكر الناس اللي بدعي لهم وادعي والماي ينزل علي وهم تكرمون دم .. يت امي وريلي وقعدو يتناوبون علي كل شوي احد يدش لين اذن الفير وكل شوي يفحصوني وكان الرحم يتبطل كل ساعه تقريبا سانتي وصلت ٥ وبعدين ٦ والساعة ٦ الصبح يت دكتورتي استانست وايد لما شفتها قالت لي عندي بعد غيرج ٢ قاعدين يولدون قلت ماشاالله وكل شوي تروح وترد ويفحصوني ويوسعون وماكنت حاسه بأي شي كان في دكتورة هندية اللي اهي المناوبة ودكتورتي شوي جان ادش علي سستر ثانية ياربي هذي اعرف ويهها واطالعني وتبتسم وتكلم السستر اللي عندي بالهندي جان اقول حق ريلي هذي السستر اللي ولدتني بشيوخه ولا انا قاعده اتخيل؟ قالي لا مو معقوله اهي شهالصدف واهو يدري اني ابيها من دشيت التاسع وانا اقوله جان زين اتيي السستر هذي ابيها.. جان تقرب تقولي انا كنت معاي بولادتج الاولى تذكريني انا هني نقزت قلت لها اييييييس اذكرج وكنت ابيج هالمرة والله ودعيت الله يسخر لي وحدة زينه الحمدلله ياربي قعد ريلي يضحك يقولي ماشاالله الله عطاني على قد نيتي وخلص شفت السستر اللي كانت عندي وقعدت معاي سوجانا ياربي شكثر احبها هالسستر وقاعده تسولف معاي وامي كل شوي ادش وتطلع ويدش ريلي ويفحصوني ويقولون سوي بوش واسوي بوش من الساعه ٧ تقريبا لي الساعه ٩ الصبح مابقى احد مافحصني ووسع بس ماكانو يقولون لي شي الوضع كان عاااادي جان اتيي دكتورتي تفحصني جان تقول يله وصلتي ١٠ سوي بوش واسوي ماكو فايده جان تقولي راس البيبي فوق مو نازل بالحوض وانا كنت حاسه انه صاعد على ضلوعي .. جان تقولي دكتورتي اللي دشو عقبج ولدو وخلصو بس انتي بقيتي يله عاد انا بققت عيوني شسوي يعني !! جان تقولي انا بوقف ابرة الظهر عشان تسوين بوش اقوى وينزل البيبي وبحط طلق صناعي لان طلقج برد وقفت الابرة وحطت لي الطلق الصناعي بالدرب وقمت احس بعوار من طبيعي قمت احوس بالسرير من العوار و اون وادعي ودموعي تنزل العوار كان فظيييع وماويوقف الطلق ورا بعض ورا بعض وامي يمي قاعده وتبجي جان تقول الدكتورة انتي شكلج مطوله انا بمر على عيادتي شوي واييج وانا ماكلمتها طبعا مو يمها من العوار وهم امي ماكلمتها قاعده يمي وتبجي وانا واصله ١٠ سانتي خلاص والطلق ذابحني يعني البيبي ممكن بأي لحظة يطلع واهي خلتني وراحت عيادتها!!! وننطر نص ساعه ساعه ساعتين وحضرتها ماشرفت وكل شوي اتيي الدكتورة الهندية تقولي سوي بوش واسوي ماكو فايده لين وايي دكتور مصري عند الباب قالي بدش بشوف الحالة قلت لاااا لايدش بس كافي الدكتورة الهندية موجوده قالي اوكي اوكي ماراح ادش واهي اتيي اطل علي وتطلع تكلمه وحسيت الجو صار مريب وريلي يسال شنو شالسالفه والسسترات يدشون جم وحده ويطالعون الجهاز جان تقولي السستر بس لاتسوين بوش البيبي تعب جان اسمع الدكتور المصري يقول البيبي ده مش حيطلع البنت صارلها ٣ ساعات مفتوحه ١٠ وطلق صناعي وين دكتورتها ؟! طبعا هالحجي الساعة ١٢ الظهر انا نضيت من العوار والدكتورة حضرتها ماشرفت جان يتصلون عليها ويت جان تقول حق ريلي يله يله عملية يالله نلحق عالبيبي تعبان نعم !!! وانتي وينج!!! وشنو يله نلحق عالبيبي!! ليش توكم تقولون انه تعب!! جان يقولها ريلي وانتي وينج وليش ماقلتي قيصرية من اول شي المره بتموت من العوار جان تقول بكل برود امها مو راضيه تسوي عملية هههههه طبعا جذب اهي مايابت طاري العملية جان يعصب ريلي يقولها شنو موراضيه ليش ماقلتولي انا ولي امرها جان تقول اي واهي بعد ماتبي عملية طبعا انا كل هالحجي مادري عنه قاعده افرفر من العوار .. المهم ريلي مسك نفسه عشان بتسوي لي عملية وخاف انها ترتبك واهي بدون شي كانت متوهقه وموطبيعيه جان اتييب لي الدكتورة الهندية ورقة العملية وقالت وقعي وانا من العوار موقادرة امسك القلم زادو ابرة الظهر وارتحت شويه ووقعت بس ابي اولد تعبت جان تقولي ترا البيبي تعب نبضه قل وراسه طلع فيه نفس الورمه من كثر الضغط لازم بسرعة نلحق عليج قلت يارب ساعدني وامي ميته من البجي وريلي يرجف وويهه احمر خانقته العبرة كسرو خاطري ويهدوني يقولون ميخالف لاتخافين وانا ميته طبعا من الخوف بس قاعده ابتسم مابي ازيدهم اقولهم عادي والله مافيني شي الحمدلله برتاح وبشوف ولدي اكلمهم واحس حروره ابلعومي خانقتني العبرة بس مابي ابجي جدامهم ودزوني ودوني العمليات ويت السستر قالت لي مااقدر ادخل معاج غرفة العمليات قلت لها لا ابيج دشي معاي حاولي مادري شفيني تعلقت فيها هههههه ريلي واقف يكلمني وواصل حده احسه على طريف وانا اقوله عادي شفيك انا مستانسه اني بولد خلاص طولت صارلي اكثر من ١٢ ساعه ودخلوني الولادة واهو يطالعني اول مادشيت وتسكر الباب جان دموعي تنزل تنزل جنها شلال وانا ساكته وغرفة العمليات فيها ٣ دكاتره رياييل ودكتورتي ويمكن ٣ سسترات ويقعد يكلمني الدكتور يبي يضحكني وانا حاقرته وادخل شعري واغطي رقبتي بالكفر جنه يعني ماراح يشوف بلاوي بعد شوي وقعد يذكر الله ويقولي قولي بسم الله الذي لايضر مع اسمه شي في الارض ولا في السماء وهو السميع العليم قمت اقول جان اسمع دكتورتي تقول عطوها بنج بنج كامل قلت لها لا ليش!! ابرة الظهر موجودة موقاعده احس بشي ليش بنج!! قالت احسن احسن يله بسرعة وياب الدكتور الكمام جان يقولي هذا اكسجين بس شميه عشان ترتاحين جان اقوله لاتجذب علي ترا اعرف هذا بنج مو اكسجين هههههه طبعا انا مادري ليش قلت جذي مادري قاعده اخربط بس اسمع كلامي حان يضحك يقولي لا صدقيني جان اقوله يالجذاااااااب وماحسيت بالدنيا .. بطلت عيوني انا بالافاقه والسستر تقولي مبروك يبتي ولد وصحته زينه وانا ماارد عليها مو مستوعبه تقولي تسمعيني وتحركني وانا ساكته ماارد بس هزيت راسي جان يدزوني بيودوني غرفتي واجيس بطني ماكو شي انا ولدت؟ صج ولا حلم!؟ شلون ولدت توني بغرفة الولادة جان اتذكر ان قالو بيسوون لي قيصرية وارد ابجي ابجي ويهدوني السسترات قالو يله بنطلعج ريلج واقف بره صارله ٤ ساعات مارضا يقعد عالكرسي عور قلبي ومسحت دموعي عشان لايشوفني ابجي مادري شفيني ذاك اليوم ماكنت ابي احد يشوفني ابجي مابي اعور قلوبهم.. وطلعت لقيته ناطرني مشكين وويهه اصفر وعيوني كلها دموع قالي الحمدلله عالسلامة يالغالية ووراني صورة البيبي قلت له شلونه زين قالي زين يهبل جمييييل ماشاالله قبت له قول والله زين ماتقص علي ويحلف ورحت الغرفة لقيت امي هناك وخالتي سلمت عليهم واقولهم البيبي فيه شي؟ قولولي لاتخشون علي ويحلفون مافيه شي بس راسه فيه ورمه من كثر ماسويتي بوش وتعب شوي بس الحين صار احسن الحمدلله.. وقالولي نامي ارتاحي قلت بشوفه اول يابوه وشفته ماقدرت اشيله طبعا
وقتلي ريلي ان الدكتورة قالت ان العملية كانت صعبة وايد قلت له ليش قالي ماقالت لي مااهتميت اهم شي سلامتج..
قعدت ٣ ليالي مت من العوار لما شالو ابرة الظهر قمت مشيت وابجي من العوار والمسكنات موراضيه تفيد حتى الدكاترة مستغربين احس شي يتقطع داخلي اليوم اللي كنت بطلع فيه يتني دكتورتي وقبها كلش ماطلت علي جان تقول شلونج قلت لها الحمدلله بس عوار موقادره جان تقول بكل برود زين منج طلق ١٢ ساعه وبعدين فتح بطن جان اقولها ليش ماسويتي لي من اول شي عملية بالمراجعات كنتي تقولي لين كل شي تمام جان تقولي اي كنت بحاول فيج طبيعي وماقدرنا انتي حوضج حيل صغير انا لما بطلت بطنج اكتشفت انه نتتتتفه ماتتخيلين شكثر صغير انزين وانتي وينج من قبل!! ليش ماقلتي!! وقالت البيبي بعدين شكبره وتأشر بيدها وزنه ٣.٨٠٠ جان اقولها دكتوره وزنه ٣.٤٠٠ مو ٨٠٠!! جان تقول اي اي نفس الشي المهم المره اليايه ماراح تولدين طبيعي اذا البيبي اكبر من ٢.٧٠٠ جان اقول الله كريم وبقلبي اقول توج تقولين هالحجي! جان تقول يله بروح مسكها ريلي جان يقولوها نبي نعرف شصار بالعملية ليش قلتي انها صعبة جان تقول انت ماتدري مرتك بغى ينفجر رحمها لو مو ملحقين عليها!! نعم!! تكون هذا اسلوب!! ولو مو سالناها جان ماقالت .. جان تقول العملية كانت صعبه لان من الطلق الرحم تعب واهي عندها جدار الرحم حيل ضعيف وخفيف ويوم ييت بخيطه كان راح يتفتفت بيدي كان مثل الجيلي غصب مسكته وخيطته وانا ساكته واطالعها واقول الحمدلله الله طلعني بالسلامة وولدي بخير.. طبعا كان هذا سبب العوار اللي كنت احس فيه كان العوار دبل وسالتها ليش عطيتيني بنج كامل وانا كانت علي ابرة الظهر قالت احسن عشان ماتحسين وترتبكين مابي اغامر فيج اخاف تحسين شلون احس مادري!!
وطبعا كاتبه بالتقرير ان استمر الطلق ١٢ ساعه بغرفة الولادة وان المريضة ماكانت تبي عملية قيصرية وسوينا لها العملية عقب مااقنعناها واقتنعت وان البيبي كبير وزنه اكثر من ٣.٦٠٠ وطبعا كل هذا جذب بجذب عشان اطلع نفسها من السالفة .. وهذي قصتي كتبتها بالتفصيل عشان تعيشون معاي الاجواء وتعرفوت ليش مااحب اتذكر هاليوم.. الحمدلله يارب على كل حال..

 

[fofowa_q8]

امبيه توني استوعب قصتي شطولها مسلسل مكسيكي

كل يوم اقرو شويه

ههههههه

 

[همي رضى خالقي]

يستغلونا بس يدرون لبس قرقيعان قالج خياط بروحه ثلاثين موديل عادي