تجمع مواليد وامهات شهر ديسمبر 2013 .. أحلى المواليد

[sh-q8]

احبك ليش


ماوديتيها عن الطبيب

وساعات في يهال مايشربون حليب بس هالشي موزين يمكن الحليب مخفف او شي

انا حق بنتي حليبها ايبتاميل كومفرت ون. اللي بالاصفر مو البني وماشاءالله طايح عليها

سألي طبيبج. لاتسكتين وكثره تغيير الحليب موزينه. حق الطفل

الايبتاميل ثقيل شوي ويشبع الطفل

 

[sh-q8]

نيو بيبي

صلي عالنبي وخيتي

موزين جذي بنتج عليها حق عليج

موزين كله عند الخدامه ضغطي شوي على نفسج

وارضي باللي كتبه ربج. وريحي بالج وغيرج

لاتهملين بنتج وبيتج

بينرد عليج عكسي بعدين بنتج ماراح تعرفج

عطيها حنانج

فكري تعوضينها عن اللي طاف من اشهر بعدج عنها خلتتعلق فيج

وين حنيت الام وين الاحساس اللي داخلج خليه يصحى وقولي الحمدلله غيرج يتمنى الضنى ويششم. ريحته ويضمه بصدره

وانتي عندج هالنعمه ومتجنبتها

 

[Om_HoBi]

قوه بناااااات شلونكم
انا صارلي فتره مو داشه


واااي عمر عيالنا يزوووغ بادين يفهمون و يضحكون و يقولون اغوووو واضحه
الله يحفظهم لنا يااارب

امس شريت حمام سباحه حق بنتي و سن بلوك عشتو هههه
و من قبل شاريه مايو و طفاحيه قايله بسبحها الظهر انشالله
باجر بطعمها تطيعم شهر 4 تأخرت فيه كنا مسافرين الله يعين احاتيه ماحب تبجي وايد

 

[كيميائيه]

شلونكم ياحلوين
وكلتو عيالكم؟
انا للحين ماوكلتها

 

[احبك ليش؟]

الحمدلله بنتي غيرت حليبها عطيتها اس 26 حلو قامت تشرب شوي احسن من قبل الظاهر سيميلاك ثقيل حيل من جذي ما كانت تشرب عدل بس هذا خفيف احس احسن لها

 

[Om_HoBi]

Sh q8
بس غيري حليب بنتج عطيها العىدي رقم 1 مو كومفورت لأن خلاص الغازات راحت الحين مو نفس قبل
انا قالتلي وحده بالجمعيه مالت ابتاميل ان من 3 اشهر خليها عالعادي بس الحمدلله انا من شهرين ونص بلشت بالعادي ليلحين


انا امي تقول ان وكلت بنتي بسكوت و حليب و كلت و تقول ان اسهل لها من المميه
و انا عطيتها وكلتها و كله اتفله ليلحين
ماراح اعطيها غير البسكوت و الحليب ليما تكمل 6 ابدي بالكوسا
بس ابي تتعلم عالقفشه و البلع عشان 6 تاكل
لأن الياهل يحتاج اكثر من الحليب بعمر 6 فمو من 6 ابدي اعلم و على ما تاكل

 

[chocolateBon]

السلام عليكم يا حلويين
ربي يحفظلكم عيالكم يارب ويبلغكم فيهم ..
بنفبه لبخاخ ماي الملح ترى كثرته موزينه يتعب صدر الجاهل وإذا حيل حيل محتاجينه لما تبخون لا تسدحونهم خلوهم قاعدين عشان ماينزل للصدر ربي يحفظهم ،،،

بالنسبه للأكل بديت وياها بشويه تمر بس بنطر تكمل 5 شهور وإن شاء الله أبدي بالتدريج ..
وأحسن شي للطفل توكلينه أكل غير مملح خلوهوم يتعودون على طعم الخضره بدون منكهات أحسن وأفيد لهم .

بنتي جم يوم وتكمل 5 شهور بإذن الله وزنها طبيعي وطولها طبيعي وكل شي فيها زين بس الناس ذبحوني كل شوي بنتج متينه بنتج وبنتج وبنتج!
شي يغث حيييييل :eh_s(11):!!!!

إسم الله عليها نومتها أريح بواجد أحاول كثر ما أقدر ما أنومها بعد الساعه 6 المغرب أنطر تصير 9 ونص أبدي أزهبها للنومه ساعات تقول نص الليل بس مو دايما ً ..

لما تكمل 5 أشوه ماكو تطعييم راااحه!​

 

[sh-q8]

شلونكم بنات عساكم بخير

والله خالتي ام ريلي تبيني اوكل بنتي ومادري اوكلها او لا

اهيه انولدت ١/١ يعني ماخلصت شهرها الخامس الحين

مادري فيدوني يابنات

وصج شريت من ايكيا قفاش وطوس للاكل وقلاثات الماي اللي عليهم غطاا يعني شوي مووايد لاني احط في بيت ابوي لان ريلي يسافر وايد وبعد احط في بيتي

ام هووبي يالغاليه تصدقين دكتور بنتي ماقال غيريه قال عادي خليه دامها مرتاحه عليه واي بسكوت تعطينها

ماشاءالله عيالنا كبروا

الحين تحب تمسك الاشياا وتعصب مراات وماتحب القرقاشه الصغيره تبي تحطها بحلجهاا وتعصب تبي العاب كبيره الاخت
وتحب تطالع تلفزيون والتلفون تبارك الرحمن غرامها ههههه

جربوا بالعرباله تطلعون عيالكم ومشوهم عالبحر بيستانسوون صدقوني

شوكوولااااااا وخيتي ماعليج منهم خليهاا تمتن وااي حاطين دوبهم دوب بنتج عاد تصدقين حتى بنتي كله يقولون عنها متينه اقول لهم خلتمتن بتفش لي طلع لها اسنان عاد بنتي بس خدود مسكينه

والمشكله بنات. ان خالتي ولدت عقبي ب ٦ ايام يعني كله يقارنون بنتي في ولدها
ومااحب هالشي
لان بنتي حرجه الله يحفظها وتسولف اكثر ونشيطه



مادري شالحل

والحين اواجه مشكله الاخت تقاوم النوم وتسهر شسوي

 

[sh-q8]

بخصوص اللي تبي تطقم مع بنتها

العربيد مايخيطون حق البيبي او يحسبون سعرها نفس سعرج



مرت عمي مخيطه ب فحيحيل مجمع العنود
حسب حق بناتها ب. 18 واهيه ماتذكر يا 35 او 45 لان شتا والخام عليه


المهم اللي تلاقي شي زين تقول لنا


وصجججج بخصوص القرقيعان
ابي نفنوف قديم تذكرون اللي لونه ازرق مورد او اخضر جذي خاطري مادري ليش


وطبعت لي وحده بالانستغرام تبانه جنها تيشيرت فيها جم وفيها تصميم بطل فيمتو وهلال يعني البسها ياه اول يوم رمضان
سوته لي ب. 10

وطبعا بطبع لها وايد سوالف بس تكلفه بيطلع علي

وادور وادور اخد شي لقيت بالانستغرام واحد يطبع تيشيرت للكبار والصغار بنفس السعر يعني. 4 دنانير قلت زين اطبع لي ولبنتي

تهقون سعره زين ولا لا

بصراحه اول بنت وبفنتك فيهاااا

شرايكم

 

[amonitta]

بنات شخباركم وشلون عيالكم

من زماااان عنكم

انا داومت صارلي شهر ونص وبعد جم يوم بسافر واخلي ولدي عند امي كاسر خاطري :eh_s(16):

24 بالشهر يكمل 6 شهور وانا اكون مسافره بس برد اول رمضان ان شالله وأبلش أوكله

نومته مرات حلوه ومرات لأ

العيار أنومه بالليل واحطه بفراشه شوي ويقوم يبجي يبي ينام يمي !! من أحطه يمي شوي أرضعه يسكت ويناام بس لازم يمي مايبي بفراشه مادري شسوي

امممم شنو بعد.. صاير يقول با با بس مو واضحه عدل... وطلعوله ضرسين تحت وااااي يهبل حده بس مسكين يتأذى منهم واحطله جل التسنين بس هم يحن حبيبي

تصدقون ارتاح بشقتي بس من اروح بيت امي يمكن عشان لويه وماشالله يهال وجذي مارتاح كثر شقتي

بشقتي مرات أحطه يجابل اللتفزيون ويسكت مده وانا ادش اتسبح او البس اذا وراي طلعه وعادي ما احاتيه بس ببيت امي ماقدر أخليه جدام التلفزيون واروح وفي يهال يروحون صوبه وجذي

صج انه التلفزيون مو زين بس ما احطه وايد... ويموت على قناة براعم هذي قناته المفضله

آخذه معاي بره مرات أطلعه وحليو مايأذيني بره مرات يحن بس من أركب السياره يدوخ وينام


----


وبس هذي آخر اخباري انتو شلونكم ولهت عليكم يالله ماتبون نحمل بالثاني p;

ههههه لا أتغشمر انا مفكره عقب سنه من الحين يعني يكون عمره سنه ونص أحمل ان شالله يعني لي أولد يكون عمره سنتين ونص أو 3 سنين على حسب متى ماصار حمال

 

[Om_HoBi]

شلوووونكم بنات شخباركم

و شلون العيال و ننووو حملت و منو ولدت مره ثانيه ولا ليلحين شطار صامدين ههههخ

انا الحمدلله صامده ناويه بعد جم شهر مابي الحين عشان لا اولد بلشتا نفس بنتي كان الاربعين جدا سيء بلشتا

 

[شموووخ بدويه]

سلاااااااااااااااااام
شلونكم والله ولهنا على ايام تجمع الحمل ..

ولدي عمره الحين سنه وشهر ونص بس للحين ما مشى.

عادي الدكتور يقول 15 شهر عادي ....لا وماينطق عدل ادا ادا اكثر شي يقولها قال اما وبا شوي بس وهون

اظاهر من عيونا انا وابوه واخوانه مستانسين عليه حييل وحييييييييييل دلوع بس يهههبل

 

[Om_HoBi]

انا الحمدلله بنتي اسمله عليها مشت 11 ونص
صارلها الحين شهرين تمشي بس لويه اسمله عليها من دار لي دار شريت لها حباسه اللي تصير مثل السور و داخلها العاب حاطه عشان احبسها لأن بسرعه يتهضم الاكل كل مالها و تضعف من الحركه ماشالله

 

[amonitta]

فجأه ذكرت المنتدى وقلت أدش اسأل عنكم شلونكم وشلون عيالكم

ولدي حبيبي مشى بس تأخر مشى لما كمل سنه وشهر والحين يركض بس مشيته تضحك وكله يكفخ بالباب

والاكل الحمدلله اكله زين واعطيه مميتين باليوم مميه بنومته العصر والمميه الثانيه لما ينام بالليل

وبس مو مفكره حاليا بالبيبي الثاني قبل لا يكمل ولدي سنتين

 

[كيميائيه]

شلونكم بنات
من زمان عنكم