تجهيز اغراض المدارس

[SARA*]

السلام عليكم اخواتي اشلونكم وشخباركم ومبارك عليكم الشهر اطلب منكم المساعده انا بناتي انشالله بيدخلون المدرسه الكبيره اولى ابتدائي والثانيه روضه وللحين ماجهزت ولا اخذت اي شي فحبيت اسالكم شنو لازم اخذ من الشنط وشنو نوع الشنطه احسن السحب اوعلى الظهر وروضه اخذلها شنطه لو لا لوبس شنطه الاكل وشنو بعد اخذ مطارات ماي لو ماله داعي واخذ دفاتر والقرطاسيه الحين لو انطر طلبات الابلات وبعد مادري ياريت تردون وتكتبون شنو اخذتوا لعايلكم ومن وين وبالتفصيل رجاء يعني الشنط الملابس وانتم بكرامه الجواتي و................

 

[حلم الطفولة]

السلام عليكم وكل عام وانتي بخير // أهم شي تشترين لها الشنطه اللي كون حزام الظهر فيها عريض ومبطن اسفنج وفيها دعامه من الخلف مو مرطرطه ،، وعوديها دايما تشيل ملف كتب ,, الملف اللي تقدر تحط فيه كتابين ودفتر وتشيله جدام بين إيدينها تلمه على صدرها ،، حق يتوازن جسمها شي على الظهر وشي جدام ,, منعا لانحناءات الجسم أثناء النمو ..
وإذا تحبين تشترين الشنطه أم تواير - دراج - مو مشكله بس آنا ماحبهم أفضل اللي عالظهر مع الموازنه بملف تحمله أمامها .
الروضه يكفي شنطة أكل وبوكس داخلها للأكل ,,
ان شالله يكون في ردود من الخوات ماراح يقصرون ، حياج الله

 

[**(فـيـلا دانـتـيـل)**]

انا مثلج ظاااايعه ..

إذا راح تلبس جنطه وملف

راح يظييع الملف .. ما اتوقع الياهل بتحرص عليه !!

جنه جنطه سحب احسن ؟

 

[Killer^Girl]

جنطه سحب وبنفس الوقت تكون خفيفه


بالنسبة للروضه
بس ملابس الروضه
اشتري من الحين الملابس لان الناس طق مطاقق ماشالله
احنا روضتنا مانعين جنطه الاكل
لانهم يبون اليهال ياكلون من الاكل الصحي الي بالروضه
اشتري الملابس للمدرسة من الحين والدفاتر والاغراض ا نطري طلبات الابلات احسن

 

[**(فـيـلا دانـتـيـل)**]

والله انا مثلج
مادري شالطبخه
ولآ ادري شنو اشتري

اخاف انطر لي بعد العيد
يصير قتل بالسووق والمكتبات
مثل كل سنه

طوابيييييييييييييييييييييييييييير بالمكتبه !!

 

[ميمي777]

رد : تجهيز اغراض المدارس

الطوابير فينا فينا ماكو فكه.. في الابتدائي انا افضل الجنطه التروللي لانها اسهل بالحركه مع الياهل

 

[SARA*]

مشكورات خواتي على الرد وناطره بعد مشاركة الاخوات لان جديده على جو المدراس واليهال يلا بعد صرت ولية امر طالبه
لازم نتحمل مثل ماتحملو امهاتنه يارب اشوف بناتي وعيالكم خريجين