أول كان تفكيري .. أني لو أحس ( يعني مجرد احساس وماني متأكده ) لو أحس أنه محتاج
أطق الصدر وأعطيه لو يبي بطاقتي بكبرها ! وأنا راضيـه
لكن بعدين عرفة أني تفكيري غلط بغلط خصوصا بأول الزواج يعني للحين ماعرفتي معدنه عدل
اذكر في دورة من دورات ناعمه .. وحده من الحريم قالت لها .. لما زوجي يطلبني أستحي أرده
حتى لو من داخلي مابي أعطيه لكن أعطيه لاني استحي أرده .. وبعدها تعود وكل ماياخذ يقولي
راح اعتبرهم دين وراح ارده لج .. وبس ياخذهم ينسى كلامه ..
فعلقة ناعمه وقالت
هذي مشكلة أغلب المتزوجات ..
يعودون الزوج على شي معين .. وبعد ماتركض فيهم لسنين .. تتذمر وتعصب وتحاول تغيره
والزوج يقاوم لانه تعود على زوجته انها تعطي .. فـ كل واحد وأسلوبه بعضهم اذا الزوجه ماعطته
يعصب عليها على اتفه سبب , بعضهم يهجرها , بعضهم يحقرها ويتعمد يكلمها بالقطاره كلمه ورد غطاها
الريال يحب يصــرف .. الصرف يحسسه برجولته
لكن اللي تطق الصدر وتعطي زوجها .. ع اساس انه اذا عطته راح يكونون قراب من بعض اكثر وراح يحبها
هذي غلطانه .. لانه الزوج يحب يكون سي السيد بالبيت .. فلما الزوجه تعطيه جنها صارت اهي سي السيد
فـ تقول ناعمه .. لو طلب الزوج .. لاتعطينه توافقين على طول .. سكتي ع اساس تفكرين ..
او اذا عطيتيه اكيد بيقول انه راح يرد لج هالمبلغ .. فالزوجه وقتها تقوله .. اي حبيبي لاني محتاجه هالمبغ
للشهر الياي مثلا ً ..
وتعلل ناعمه السبب .. انه ليش صارت القوامه بيد الريال ؟ لانه اهو المسؤول واهو اللي يصرف وهذي طبيعته من الله
فعشان جذي الله خلا القوامه للرجل
فلما الزوجه تعطي الزوج .. اهي تعطيه بدافع الحب .. لكن الزوج اللي زوجته تعطيه يحس بينه وبين نفسه بالنقص ..
فعشان جذي .. تقول .. ديرو بالكم لما ازواجكم يتكلمون ويقولون انهم
بضائقه ماليه ووووو الخ .. انتوا كزوجات دوركم توقفون معاهم لكن مو بفلوسكم عشان ماتحسسونهم بالنقص
توقفون معاها ( معنويا ً) لانه هذا الي يحتاجونهه بهالوقت .. مثلا تقولين له انت قدها .. ومن هالكلام اللي يرفع معنوياته
هذا كلام ناعمه ..
::
أما أنا .. فمقتنعه بكلامها ..
لكن لما أشوف زوجي فعلا فعلا فعلا محتاج ومافيه غيري .. أكيد بعطيه
وبيني وبين ربي بعتبرها عطيه ودفعة بلا عن بيتي .. او صدقه لوجه الله .. يعني بعطيه وأبي من وراها الاجر
عشان اعطيه وأنا مرتاحه نفسيا ً لووول .. ووقتها ماراح افكر اذا بيردهم او لا ..
وهذا نهج ماشيه عليه .. لما احد يتسلف مني .. بيني وبين ربي اعتبرها عطيه او صدقه او دفعة بلا
لانه وايد اللي يتسلفون .. وان خذوا المبلغ ماتشوفين غير غبرتهم ..
