تعالوا شوي اندردش

[english muffin]

شلووونكم ياحواامل
وشلون البيبي ؟
ان شاء الله كلكم تولودون بالسلامة
بنات انا طبعا توني الاسبوع الثامن من الحمل لا اعرف جنس البيبي ولاشي بس كله اقعد افكر لين يبت بنت شبسميها ولين ولد وجذي تعرفون من الوناسة
عاد تنرفزت من موضوع واحس مابقدر اقرر اي اسم ابي حق بنتي مثلا واقتنع فيه !!
يعني مثل ذاك اليوم قاعدة مع اختي اقول لها ان شاء الله اذا الي ببطني بنت بسميها ... وصفيت لها يمكن 10 اسامي
جان ترد وييييييع ولااسم حلو !!
ويوم اليمعة عماتي كل وحدة تقترح اسم ولااسم عجبني
فسؤاااالي اهو
شلوووووون اخترتوا اسم للبيبي ؟ واقتنعتوا فيه ؟
لازم اعطي راي اختي طاف يعني ؟ وما افتكر لرأي الناس؟
انا ااذا ولد اسمه معاه بس اذا بنت نوو ماعندي اسامي ابيها لحين اكيد

 

[c a t w o m a n]

الإسم تختارينه إنتي وريلج فقط وفقط

لو تسمين عيالج إسم من ذهب هم راح يعلقون الناس

ولا تهتمين حق كلام الناس

أنا برأيي الشخصي .. لا تخلين أحد غيرج و غير ريلج يقرر أسامي عيالكم بس هذا ما يمنع إنج تسمعين آراءهم

رأي إختج يظل رأي .. بس القرار الأخير راجعلج

الله يتمم و يهون عليج و تولدين بالسلامة

 

[english muffin]

اتحسين جذي ؟
مممم مادري احس ابي اختي بعد يعجبها اسم بنتي
مادري الصراحة مايعجبهم شي واسم البيبي اكيييد بيني وبين ريلي بس

 

[noo7a]

اختاري الاسم الي يعجبج انتي و زوجج

خل اقولج شلون اخترنا اسم ولدي

ايام الملجه كنا انا وريلي نلعب لعبه الاسامي الي مثلا انا اقول اسم و ريلي يقول اسم ثاني يبدي باخر حرف من الاسم الي انا قلته

مثل

دلال

لولوه

هاجر

راشد

دانه

هاشم <<< جان اقوله الله حلو اسم هاشم شرايك نسمي ولدنا هاشم والحمدلله هم اهو عجبه

لووول هذي قصه تسميه ولدي



والله يتمم عليج

 

[english muffin]

حلووو اسم هاشم الله يخليه لكم يارب

 

[kokim]

انا قصتي قصه مع اسم ابني كنت كل فتره الحمل محتاره شو اسمي و كل ما اقترح اسم يحكيلي لاااا مو حلو او يطلعلي بكلمه على وزن الاسم و يخليني اكره الاسم اخر شي قررت اسمي بدون اسم بس ولدت سبحان الله اجى اسمه معه و سمينا على جده وهلا بالنت نفس الحاله لا و الاخ بيعطيني اسمااااء غريبه متاثر بايام سالي و فلونه و باربي بدو يكون نفس الشي ناعم وحلو مبارح بحكيلي شو رايك باسم بيرلا .
الاسماء ال ببالي ( ريماس - سديل - ريتاج - رنيم - تسنيم - سدين ) وللاسف ولا ااسم عاجبه مأساة

 

[Eng.Kokoro]

الأسامي بس بينج وبين ريلج
حمدلله البنت محددد وخالص لووول اما الولد محددين أسامي
والله يسهل على كل حامل

 

[english muffin]

كوكيم نفسي
كل اسامي البنات الي اقولهم مب عاجبينه

 

[c a t w o m a n]

فكري .. من الحين لي الولادة يطلع إسم انشالله

^_^

 

[الهيــام]

والله اسم البنيه صعب ويبيله تفكيييير واجتماعات مع الزوج لووول
وهواش هههههه
لان الريال مايعجبه العجب
والمره تحب الاسامي الغريبه الي مب مكرره
بس اخرتها لازم الكل يكون راضي

بقولج عن بنتي اتفقنا على اسم لبنتي 8 شهور وخلاص احنا عارفين ان اسمها جذي
دخلت التاسع وحسيت اني مب متقبلته مادري شلون
وبسرعه بسرعه دورنا اسم ثاني واقتنعت فيه الحمدلله والحين صار احلى اسم عندي

 

[فلافل وبطاط]

انا بنتي البجر ابوها اختار الاسم وكان مصر عليه
ومحد موافق او عاجبه الاسم وانا كنت محايده مو رافضه
ولا مقتنعه عادي ... مؤمنه ان بولادتها تتسمى ... وتحدا
ابوها الكل وسمى شيخه الاسم اللي يبيه .. والحين كلهم
يموتون على شيوخه ...

وانا حامل ببنتي الثانيه الحين وانا قبل لا ادري بحملي
كنت اقول حق ريلي بسمي شهد .. وموافق عالاسم بس
محد بالعايله موافقي وقاعدين يعطوني اراء واختيارات
بس انا ابيه ... وريلي يقولي مثل ماسميت شيخه اسمي
شهد انا اللي بقيد الاسم مو احد غيري ... ومازلت نفس موقفي
اتوقع لي ولادتها يا يتغير اسمها او يتم ...

والله يسهل علينا وعليكم ويحفظهم لنا ...

هههههه تذكرت كانوا يقولون اشمعنه ريلج يبي شيخه ماعندنا
هالاسم ... يمكن اسم حبيبته ....!!!
وكنت اضحك واقول كيفه خل يسمي المهم ماخليه بخاطره ...
وامقررين قبل مانسمي اسم موجود بالعايله لا امي ولا امك
لا ابوي ولا ابوك ولا عمام وخوال ومادري منو نهائياً ...

ماعدا المرحوم اخوه اذا الله رزقني ولد بسمي على اسمه

 

[english muffin]

^^^
ايييي مو هاي المشكلة
نبي اسم مو موجود في العائلة وماشاء الله عائلتنا مسيطرين على كل الاسامي ههههههههه