تعلمت من الغرب ..واستمريت عند العوده للشرق :)

[جاكليت]

يعطيكم العافيه

و يسهل أموركم ان شاء الله

موضوع شيق

 

[Japanese]

اوبيه وايد صراحه :/

عاد انا ييت اميركا بروحي وسكنت مع ناس ماعرفهم كلش ومن قبل ماطب اميركا معتمده ع نفسي

وهني تعلمت هالشي بزود بعد ،، الشي اللي ماحبه هني " العرب " ياربييييي مب كلهم بس اغلبيتهم 2 thumbs down


اكثر الآشياء اللي تعلمتها : إحترام آراء الآخرين ! ،، عندنا بالدوحه الكل يحاول يفرض رايه وقناعاته ع الآخرين :/

تعلمت آحترم وماآقلل من قدر اي انسان من جنسيه غير جنسيتي

احترام ديانات الآخرين وتقاليدهم ومعتقداتهم ،، وانا هالشي بعد يختص بتخصصي الدراسي ،، هالسمستر ابتديت اخذ كلاس

عن الشعوب وتقاليدهم وعادتهم " علم الانسان " ف غصب طيب لازم اتعلم هالآمور يعني مب بس خارجيا لا حتى بكلاساتي

تعلمت افتخر بنفسي ،، بآني عربيه وبآني اتكلم عربي وبآن ديانتي الإسلام ،، هالشي كنت كلش مافكر فيه وايد

لكن احين وبعد ماعشت بآميركا فتره صرت احس فيه ،،، صرت افتخرررر وايد باني اتكلم عربي خاصه

تعلمت اعتمد ع نفسي وماآنطر مساعده احد ،، اذا لي حق من احد باخذه باخذه مافي شي اسمه يضيع حقي هني

اوبيه وايد وايد اشيا صراحه ،، برد اكتب مره ثانيه

ثنكس وايد ع الموضوع

 

[Japanese]

تذكرت شي وايد مهم !

تعلمت مثلا لو عندي كلاسين وبينهم ربع او نص ساعه ،، " اخلص بهالوقت شي بدال مايضيع الوقت بلوشي "

استغلال الوقققققققت

 

[Bronze ● lady]

السلام عليكم :
اثاري كل الدول الاجنبيه طلع فيها تعاليم الاسلام !! عبالي بس الاستراليين ؟؟ لوووووووووووول

في حديث للرسول ( ص ) " تبسمك في وجه اخيك صدقه" _ وحديث ثاني " افشوا السلام بينكم " هالحديثين سبحان الله

مطبقين عند الغرب بحذافيرهم .. ليش احنا مانبتسم للناس ولبعض ؟؟ ليش الحرمه لاشافت حرمه بالشارع لوت بوزها مع

خزة حره مادري قهر !! واذا سلمتي اقعدوا يطالعونج مستغربين !!!

شي ثاني النظاااااااااااااااااااام يالله بكل شي منظمين _ دواماتهم .. مواعيد نومهم باليل من بعد التسع خرمس

ماتسمعين صوت والصبح الكل بدوامه _ والويك اند عندهم فعلا يعطونه حقه !!

الاحتراااااااااااااااااااااااام والهدوء امبيه حتى جهالهم هاديين _ لاطلعنا مكان عام بس صوتي انا وعيالي

لا وطالعونا مستغربين ياااربي شلون يسيطرون ع اليهال ياناس عيالهم هاديين وشايفين خير

شالسر بنات قولولي ؟؟؟؟ امبيه جد جد انا عيالي يفشلون

تصدقون بالالعاب اذا فيه جهال يلعبون ولعبوا عيالي معاهم ينزلون من اللعبه ويخلون عيالي ياخذون راحتهم

وااااااااااااااااااي ماشالله اش هالذوق خلف الله علينا

موضوع حلو حيل

وانه بعد خاطري اتغرب

يارب ترزقني بسس بخير ان شااء الله

بالنسبه للردج اختي . على طاري سالفه الالعاب

حنا بدول الخليج الياهل يلعب 20 مره وتبين تشيلينه من اللعبه
يقعد يصارخ ويصيح ويمكن يرافسس في الارض ويشدخ بروحه

يااربي مادري ليشش اولادهم غير !!

خاطري عبندي يصير ذووق وذرب جذي

انا ماقول انه شيطان . بسسس فيه شطانه ويحب يتحكم واناني

بسس بيني وبينج لو عندنا بالخليج ياهل ترك لعبته جان قالوا عنه اهبل صح ؟؟

وامه عطته داك الجمع .. ليش اتسوي جدي ياغبي

 

[جاكليت]

الغربه تجبر الانسان على التعلم

 

[vi-lady]

موضوع خطير وعجيــــــــــــــــــــــــب ويستاهل *****
ايــــــــــــــــــــــــــــــــه والله ذكرتوني بشغلات حلوه
صح انا تعلمت وايد شغلات بس من تردين الديره الناس تجبرج انج تغيرين اللي تعلمتيه كله.
انزين اللي تغرب تغير لانه شاف بعينه شي مو موجود عنده وشي حلو وعادات ذربه وراقيه ,السؤال اهني؟ انزين اللي ماراح وشاف الفرق وعايش بين الهمج والتخلف شلون يتغير؟؟؟؟!!!!
الله المستعــــــــان

 

[ام سعود ديكسون]

انا ما تغربت بس رفيجتنا بالدوام درست بالuk تقول تعلمت التوفير والبساطة والابتسامه بويه الناس كنوع من الود واللطافة والحمدلله استمرت معاها هالعادات الحلوة

 

[كندية]

والله تبين الصج مووضووعج يكسر الصخر...مثل بااجي مواضيعج....

والله تبين الصج اعتقد الغربه اكثر شيء غيرت فيني هي التعامل مع الناااس و العنصريه اللي نشووفهاا في دولناا...مثل هذاا من هالدووله وهذاا من الديين الفلاني...والكره للاسف ...وان اشووف الانساان واحكم علييه من افعااله مو جنسيته واصله وفصله....
يعني لما رديت الديره طريقتي في الكلام مع الغير كاان غيير ومراات كنت انحط في مواقف صعبه لان الناس مو متعوديين على بعض العاداااات

وغير النظااام اللي للاسف صعب في دولنااا (اتذكر اول مارديت الكويت بطلع واللى اشووف طاابوووور ههههههههههه جاان اوقف وراااهم الشرطي يااني يقوولي شتسوين اقووله انطر دوووري قاام يضحك علي يقوولي طلعي لا تنطريين...الطابووور طلع ماال الخدم واناا ماادري راازه الويه)

بصرااحه لما تكونين متغربه فتره طويله وترديين تحسين انج في عاالم ثاااني وحيل تتعبيين...يمكن البعض يشووفنه قااعدين نتشييحط على ابو ان والله مسافرين بره...بس مايدروون الصج.....

بس احلى صفه تعلمتهاا وان شااءالله تظل معااي دوووم هي ابسااطه و down to earth يعني ماافي سوالف شاايفه عمرهاا ورافعه الخشم على فانه وفلتااانه....
​

 

[نيولوفر]

خووووووووش موضوع

 

[د.شريفة]

الحلو في الغربه الانسان يكسب خبرات حلوه ويغير من اطباع كثيره
الموضوع حلو وانا من المتابعين

 

[So0oNa]

استمتعت بقراة الموضوع .. المشاركات .. الاراء والردود

لي 11 شهر بأمريكا .. وماتكفيني 11 سنة اعبر فيها عن اللي تعلمته

طبعا انا بنت وحدة بين شباب .. متعلقة باميمتي .. مبتعثة جامعه .. سعيت للبعثة بعد استخارة .. لعدة اسباب

الحمدلله .. سافرت لتحقيق هدف .. وهو الاستفادة .. وكسب ديني ودنياي

عسى الله يوفقني ويكتبلي الخير

تغربت مع اخيي الصغير (محرم) وحاشتني مواقف صعبة .. الوالد كان معانا اول 3 شهور تالي سافر ومن ثم صارلي حادث وتميت شهور ما امشي على رويلاتي

احتكيت بالمجتمع الامريكي .. الطاقم الطبي .. الطاقم العلمي .. عدة طبقات وعدة فئات

وطلعت بخلاصة جدا جميلة

رأيت الاسلام بغير المسلمين وجدت اسس اسلامية كثيرة مقدسة اهني لكن بدون لائحة دين

اسسس تبتدي من الابتسامة الصغيرة وتمر بالصدق والاخلاص بالعمل والتعاون .. انتهاءا بالعدل

تعلمت اكون نفس وروح وجسد يعمل بعقل حكيم تسيره النفس الاسلامية

تعلمت اكون سفيرة ديني وبلدي .. تعلمت اتعلم

احترام وقت .. احترام رأي .. احترام شخصيات .. واحترام الاحترام نفسه

الكلام كثير وانا ترا هذارة ماخلص ===> تعلمت اخفف الهذرة p:

كلي خوف .. من اني اخسر اللي تعلمته لكن باذن الله الارادة موجودة .. وهي اللي لها النصرة باذن الله
وماقول الا توني باول خطوة معاج ياغربة ..

لي عودة مع خبرتي كأم .. ام حق اخوي p: انا توني عزباء

واشكرج من كل قلبي اختي على هالموضوع الجميل .. فعلا نحتاج عصارة وكوتيل مفيد يبرد على القلب ويطمئن النفس :**

 

[AnnaLina]

هههههههه صراحة ما تعلمت شي ! امووووت على اسلوبنا احنا الكويتين ودفااشتنا بالكلام وكل شي فيينا عسل على قلبي والله :ggdw:

واذا عن الغرور والنفسية وفرض الراي واسلوب الحوار...انا من قبل لا اغترب مافيني غرور ونفسيتي واسلوبي تمام مع الكل وعمري ما كشخت عشان فلانه تشوف ولا عشان الفت انظار ودايما احب البساطة ومن انا صغيره معتمده على نفسي بكل شي...يعني ما نطرت الغربه تعلمني هالاشياء

بس اذا في شي واحد تعلمته من الغربه....اهو القسوة ! الغربه خلتني شوي قاسية صرت المراه الفولاذيه ههههههه :krkrkr:

وفي شي بعد انتبهت عليه انا بعد...ان غربتي قربتني من الله حييييييييييل وبالفعل حسيت شنو يعني ان " الله صاحب كل وحيد"

وثلااااامتج ومثكووووووورة وايد وايد على الموضوع الحلو يا حلو <<<<<< لساني دغدغني لوول

 

[الاريام****]

[موضوعج جاي على الوتر لاني اليوم الصبح طلعنا نتريق انا وزوجي العزيز وعيالي الله يحفظهم بنتي 4سنوات الناس قاعده على الكراسي واهي واقفه على الكرسي ياماما قعدي ياماما عييييب شوفي الجهال كلهم قاعدين بالاخير زعلت وقفت بعيد عني تخزني احراااااج كل من مر يطالعني وانا اتبووووسم لهم

 

[فلونة احلى وردة]

موضوووووووووووع روووووووووووووعة نفس صاحبتة ونفس البنات المشاركات
انا مو مغتربة بس اغتربت فترة بدولة عربية
تعلمت منها اللباقة والذرابة وحسن الضيافة واكرام الضيف
والكلام الحلو
اتوقع عرفتوا الديرة
المهم انا فعلا وايد سمعت ان ناس تعلمت اصول الاسلام على يد غير المسلمين ولمستة وشافتة منهم مع انهم غير مسلمين للاسف
ودي انبهكم اهمية انكم تدعون لدينكم بشكل غير مباشر
شفيها اذا حفظتي جم كلمة للرد عن الشبهات المثارة ضد الاسلام
مثل ليش الورث للمراة نص وماكو تساوي
نبين لهم ان المراة ما تصرف بينما الريال يصرف على البيت وعلى المرة
ولو كانوا متساوين جان صاروا الحريم اغنى من الرياييل لان بيحفظون وبيحصلون من يلبسهم ويوكلهم ويسكنهم
تعلموا دخلوا مواقع دعوة عشان تكونين انت مقتنعة وتقنعين بالرد
وبالنسبة للاخت اللي صارت لها مواقف وايد بالغربة
براي انها تصبرررررررررررررر وباجر بتضحك وبتستانسمن قوتها وتحملها
وانا بعد ببداية دراستي واجهتني صعوووووبات بس تحملت وصبرت ونلت
الله يصبركم وياليتكم تضلون على طبعكم اللي متعلمينة عشان نقدر نغير هالغرور اللي بالديرة
اللي يشوف المصري والهندي والبنغالي بنص عين حتى لو كان بروفوسور ومستشار
ويالينكم بالاول تشيلون شوفة النفس بين البدو والحضر والسنة والشيعة
حكموا على الناس بشخصياتها وطبعها مو بخلفيتها البيئية والثقافية

نسيت اقولكم واحد اعرفة صرح لي بان الغربة فتحت عيونة جنسيا وخلتة يكرة مرتة وطاحت من عينة عقب ما شاف البلاوي
هم لها سلبيات الغربة صح ولا لا؟؟؟ بالتفكير والعادات بعد اعترفواااااااااااااااااااااااا محد بيعرفكم
ههههههههههههه

والله كريم اكون منكم على خير بدراستي
عشان نتعلم ونشاركم ما تعلمناة
الله يوفقكم

 

[UK_Girl]

صباح الخير
اولا اعتذر للتاخير ..تعرفون الدارسه وظروفها الوقت مو ملكنا ابدا ...

شكرا جميعا ع المشاركه اثريتاو النقاش وانا شخصيا استفت
واللي عنده اي اضافه في اي وقت لا يتردد الموضوع موضوعكم حياكم الله

 

[ريشه فنانه]

الموضوع وايد حلو والردود احلي

انا احس الوحده بالغربه كانها في دوره لذاتها الانسانيه

فعلا الواحد يحس بقيمته وبقيمة الوقت اللي عنده فيحاول يستغله بكل شيء مفيد

لان يشوف الناس الي حوالينه كلها جذي(معقول اكو ناس تستغل وقتها بهالسوالف )

وهذا واحنا في بريطانيا هذي الدوله اللي يقولون متخلفه وايد بالنسبه لامريكا عيل الجماعه اذا يو عندنا شنو رح يصنفونا ؟؟؟


انا ودي اذكر نقطه يمكن محد تطرق لها واهي احترامهم للاطفال امبيه شيء يا ناس مو طبيعي لو احجي بهالموضوع ما رح اخلللللللللللللللص

تخيلوا تصير مناسبه في مدرسه بنتي يقدمون فيه عروض اللبس اللي لابسينه كله من شغلهم الاطفال من كبابيس وغيره

تعالوا شوفوا شنو مسوين (لا تعليييييييييييييييييييق اكثر )


بس ما في مجال اكمل والله قلبي يعورني من هالسوالف ​

 

[UK_Girl]

مسا الخير ..

شكرا خاص لفلونه احلى ورده ..على المشاركه تسلمين على اثراء الموضوع

وشكرا مع باقه ورد حمرا لكل من شارك من الخوات تسلمون قلبي ......والله يوفقكم دنيا واخره..

الموضوع مفتوح للكل للمشاركه لنستفيد ونفيد غيرنا من البنات وننقل خبراتنا وتجاربنا وتطلعاتنا لبعض حتى لغير الممغتربات لتعم الفايدخ باذن الله وشكرا