تغيرت شخصيتج ولا على ماهي عليه ؟؟؟

[ورق عنب]

السلام عليكم ...

يقولون والعهده على الراوي ههه انه شخصية الانسان تتغير مع مرور الوقت .. ما اقصد تغير جذري ! بس يعني تغير في الاهتمامات في الهوايات في الاسلوب بطريقه التفكير .... هل تغيرتوووو انتو ولا لا ؟؟؟

بصراحة انا حاسه اني متغيره عن قبل جم شهر مثلا

واللي يلاحظ سوالف محتارة قبل ويلاحظ ورق عنب حاليا بيحس بالفرق هههه ... احس اهتماماتي شوي تغيرت ... تعاملي مع الاوادم تغير

واللي هم اثر علي بطريقة او بأخرى او ساااهم نوعا ما اهو دكتور الفكر الاسلامي ...

فقولولنا يا حلوين بشنو تغيرتو ومنو أثر عليكم ....

 

[مرامي 1]

السلام عليكم

والله حبيبتي انا احس الوقت واللهوة يغير يعني اول ما تزوجت تغيرت شخصيتي ولما يبت اول ولد تغيرت اكثر لأني حسيت بالمسؤلية ولما يبت بنتي وسافرت امريكا تغيرت واايد بس للأحسن الحمدالله وهذي الدنيا كل يوم تغير

 

[ورق عنب]

مشكورة مرامي ...........

 

[طماشه]

انا بعد وااااااااااااايد تغيرت بفضل المنتدى وسوالف البنات ونصايحهم

ويسلموووو وروووقه على الموضوع الحلو

 

[ميســـا]

انا بعد
شخصيتي وايد وايد تغيرت

قبل كنت طيبه زياده عن اللزوم كنت اشوف الدنيا ورديه كنت ماشوف الشر ابد عندي كل الناس طيبين وحبوبين

بس .....



بعد ماداومت تغيرت شخصيتي 360 درجه
صرت اشوف الشر والحقد بين الناس والحش والدس كل هذا عشان مصالح شخصيه
وتغيرت شخصيتي صارت قوويه حيل وصارمه الحمد لله
انا حبيت شصيتي الجديده لان فعلا عرفت الطيبه مالها مكان بهالزمن
اصير طيبه مع اللي يستاهل

وسلامتكم

 

[Filakawyia]

انا بعد مثلج ميسا

كنت طيبه لدرجة السذاجة كل شي اي و ميخالف و عادي

دخلت الجامعه و تغيرت . . صرت اطيب من الطيبين و نحيسه مع النحيسين

شسوي الدنيا تبي جذي

و في اشياء ودي اغيرها بعد

العناد اللي فيني ماحبه . . و اسلوب الدفاشه ساعات مو حلو ​

 

[ورق عنب]

يسلمووو بنات ... انا بعد غيرت سذاجتي لانه في ناس مو كفو طيبة .. بس هم الانسان المفروض يعامل حتى الاشرار بالزين بس يتحذر منهم ولا يصير ساذج ..

 

[ضحكة الدنيا]

انا بعد احس اشياء وااايد فينى تغيرت والفضل راجع
لهالمنتدى الرائع
صارت عندى معلومات اكثر
وصرت ملمه باشياء واايد كنت اجهلها

 

[جروح تبتسم]

اول شي مشكوره ع الموضوع الحلو
ثاني شي مافهمت انتي يعني قبل محتاره ؟والحين ورق عنب؟؟؟
ثالث شي بجاوب : انا اواعوذ بالله من كلمه انا الصراحه تغير360 د
قبل كانت شخصيتي ضعيفه وانطوائيه( قبل يعنـــــــــــي قبل الزواج )
اما الحـــــــــــين ماشـــــــــــــــــــــــــــــــــاءالله تغيرت الله العـــــــــــــظيم
تشوفيني عند الناس هيبه والكل يحبني ويحترمني سبحان الله
حتـــــــــــــــــــى الكـــــــــــــل يقــــــــــــــــــــولي هالشــــــــــــــــــــي
وفي شي ثاني قبل ماكنـــــــــــــــــت صبوره الحين صرت اصبر

 

[سبائك]

طبعا تغيرنا يعني سبائك الحين غير عن سبائك قبل سنه

الانسان كل يوم تمر بحياته تجارب يديده تخليه يعيد التفكير بالصح والغلط

والي المفروض يسويه والي مفروض يصد عنه وهكذا دواليك.....

ودايما لازم ندعي ((اللهم ارنا الحق حقا وارزقنا اتباعه وارنا الباطل باطلا وارزقنا اجتنابه))


سيتم النقل للقسم المختص

 

[Alia]

تجارب الحياة خلتني اقوى الحمدالله وتفكيري انضج

 

[BaiTotia]

أنا أول حساسة أكثر من الحين

يعني لأي شي تنزل دمعتي

الحين لا تضايقت أحاول أمسك نفسي علشان لا أبجي مع إن يبين علي بس وايد فرق عن قبل

و الشي الثاني عرفت إني لازم ما أثق بأي بنت

 

[أم روعة]

انا تغيرت شخصيتي بعد ما تزوجت واشتغلت
في شغلات تغيرت للاحسن بواااااااايد بشخصيتي مثلا صرت أتحمل المسؤوليه واعتمد على نفسي
وفي شغلات تغيرت للأسوأ يعني اول اهتمامي بنفسي اكثر وطموحاتي كبيره بس الحين لهيت مع الزواج والبيت والدوام وأهملت شغلات وايد كنت احب اسويها

 

[ياسميين]

طبعا الواحد يتغير كل ما مر بتجربه في هالدنيا وكثر ما تقرب من الله سبحانه كثر ما صار أقوى

انا مرض أخوي اللي كان قريب مني حيل وبعدين وفاته ( الله يرحمه ويغفر له )

وايد غير فيني أشياء وأحس اني مو مثل أول أهتم بكل صغيره وكبيره

صار كل شي عندي عادي وكل شي له بديل ​

 

[BlackRose]

انا مو تغيرت الا انعفست فوووووووووووووووق تحت

وين قبل وين الحين

قبل كنت عصبيييييييييييييية جبريييييييييييييييييييييت وكله طالعة ولاهية بوناستي وصديقاتي وهالكفيهات والطلعات ومهتمة بلبسي ومكياجي

بس بعد الزواج

تكنننننننننننت وطخييييييييييييييييييييييت وايد وايد وايد

وطبها لهيت مع زوجي وبيتي وعيالي

والحين الطلعة بالقطارة

ولبست عباية وماكو ميك اب

غير جذي اعصابي وايد هدت مع العيال والمسؤلية

وصرت واااااااااااايد اعقل

وصدري وسيييييييييييع اسمع كل شي واطوف كل شي وحسيت ان الدنيا ماتسوى

حتى يسموني فوزية دريع

لان اي واحدة بالعايلة عندها مشكلة تلجا لي

 

[[]نهاوند[]]

انا ما احس اني تغيرت هذي انا وهذي شخصيتي

نفسيتي هي اللي تتغير حسب الوقت وحسب المواقف اللي اتعرضها واحيانا حسب الصدمات اللي انصدمها

تعرضت لصدمه قبل كم سنه هي ما غيرت شخصيتي بقد ما خلتني التزم اكثر واترك عادات سيئه كانت فيني قبل

الحمدلله منها حافظت على الصلاه بطلت احف حواجبي كسرت كل الأشرطه اللي كانت عندي

والى الآن وانا على هالحال من 6 سنين تقريبا

والله يهدي الجميع ويثبتني على طاعته ويبعدنا عن معصيته ​

 

[ام كرز]

موضوعج وايد حلو وصراحه الواحد يتغير مع مرور الوقت من الظروف والمواقف وحسب الشخصيه

يعني فتره من الفترات مريت بحساسيه مو طبيعيه لدرجه مسلسل ولا ياهل يبجي ولا خدامه تكسر خاطري ابجي بدون سبب بس الحين الحمدلله اتحكم بروحي وامسك نفسي

ومثلا اول اعاند ومايعجبني ولازم اقنع الحين صار عندي عادي احترم راي غيري والاختلاف بالراي لا يفسد للود قضيه اول لا لازم يقتنعون وانا الصح ..ألخ يعني شوي صعبه وراسي يابس بس لان ويا الزمن هههههههههههههه

يعني التصرف قمت افكر بعقل مو بس بقلبي وايد امور اخذها من باب العقل ما اتعاطف وياها ابد وسلامتج:>

وفي امور ماتغيرت كرمي الزاايد عن حده وحبي حق أهلي وزوجي والطيبه والحنان والاشياء اللي بالقلب

 

[قمر ضاوي33]

طبعا الإنسان يتغير ومع تغير ظروفه


اول ما دوامت كنت ساذجة وبس بعد سنة طلعت لي اظافر وانياب وصرت شريرة هههههههههههههه شسوي بعد .... الدوامات للأسف تبي جذي


وبعد الزواج همن تغيرت بس مو وايد ...

ولكن بعد ما يبت بنتي ... تغيرت شخصيتي 100% ...

صرت انسانة مسؤولة ... وإجتماعية اكثر ... ونظرة الناس لي تغيرت والكل يحسب لي حساب مو مثل اول الحمولةوالأهل يقطون حجي وانا اطالع بعويناتي واسكت ما اعرف ارد الحين لالالالالالالالالالا ارد ... ما اسكت كلش عن حقي حتى مع زوجي ...

صرت جريئة وااااااااااايد ... قمت اعرف اتصرف اول كنت خدايوه ...

بصراحة ارتحت وايد على شخصيتي الجديدة ... وقاعدة اطور شخصيتي اكثر بعد

 

[ريماا]

انا مااقول تغيرت لا انا كسبت مهارات جديدة فى التعامل مع الناس المثل يقول كل اطراق بتعلوووومة وفعلاااا
صححت كل غلط بحيااااتى ماسرت ابااالى باحد كلش اهم شى بالدنيا راااحتى اقوم بالواجب فقط لاغيررررر لاازيد ولاشى
مو اى وحدة اصحاحبها واتكلم معاها
كلامى واااايد سار رسمى وصرت ابتعد عن القاال والقيل ولا لى شغل بالعالم
عرفت شغلة مهمة انة الدنيا فعلا فاااانية فلازم الانسان يكرس حياتة بالتقرب الله وفعلا لقيت راحتى وسعادتى وثقتى بالايمان الله يثبتنى
بعد كل البعد عن المجاملات خصوصا لناس اللى مايستاهلون
عرفت انة الناااس معادن وماسار يغرنى الظاهر
اعتبر حبوبة بس يااااااويلة اللى يدوسلى على طرف انا مو من النوع اللى الهيلقى البنت جنها دلالة ترد الكلمة عشر على صراااخ واخبال وكلام بذيى انا ماتربيت جذى ردى دايما محرج وموزووون
ومرااات الصد يكون رد
وبس

 

[ورق عنب]

يزاكم الله خير بنات على مشاركاتكم ...

جروح تبتسم ... اي محتاره اهي ورق عنب ههههه