رد : تقرين كتب ، طيب تعالي ..
1- اذا تقرين ، طيب شنو نوع الكتب الي تقرينها ... ؟ ( روايات - كتب ادبيه - سياسيه - تطوير الذات - اقتصاديه ...)...
أقرا كل شي باللغتين العربي والإنجليزي .. ديني .. روايات (الروايات المحترمة ما أحب أقرا تفصيل جريء وأشمئز من المبطن .. بصراحة أخاف أستاثم) .. أدب عربي .. إدارة أعمال .. تطوير ذات .. تاريخ .. تكنولوجيا .. طبي .. علم نفس .. لكن أكره السياسة والاقتصاد إلا إذا كان على شكل سير ذاتية وتاريخ
2- وشنو هدفج من القراءة ، التسلية وتقضيه الوقت ، زياده الحصيلة الثقافيه ، والا مظهر بس .. لانه هالأيام في ناس صايره تشتري كتب وتقراها على اساس انو انا قريت الكتاب الفلاني ...
...
هدفي زيادة الحصيلة الثقافية والاستفادة من وقتي ومما تحمل الكتب من أفكار وقيم ومبادئ .. أحس إني أعيش مع الكاتب وأقرا عقله وبجذي بدال ما يكون عندي عقل واحد يكون عندي أكثر من عقل وأعيش أكثر من حياة وبدل ما يكون عندي خبرة بعمري بس يكون عندي خبرة بحجم خبرات الكتاب اللي اقرا لهم .. فعلاً أحترم نفسي لما أقرا وأحترم كل اللي يقرون .. وأكيد هدفي مو مظهر .. وإلا راح تلقيني أقرا جدام الناس بس ههههههه ..
3- شلون قدرت القراءة تغيير بحياتي ... هل تغيرت افكارج ، طموحج ، نظرتج للأمور ؟
...
أنا أقرأ من وانا صغيرة .. فما حسيت بالتغيير لما كنت صغيرة وخاصة إني كنت أقرأ بنهم.. لكني للأسف تركت القراءة بعمر 19 أو 20 تقريباً أي قبل 12 سنة .. ولما رجعت لها قبل كم سنة غيرتني كلي .. قلبت كياني .. حسيت إني ظلمت نفسي الفترة هذي كلها اللي تركت فيها القراءة .. ندمت وقاعدة أعوض ..
طبعاً تغيرت أفكاري للأحسن .. تحسنت نفسيتي وعزيمتي وغيرت من تأثير الأحداث الخارجية علي كوني أحب أقرا كتب تطوير ذات فهالشي طورني وصلح أمور كانت مأزمة حياتي ..
4- شنو تأثير الكتاب عليج .. اذا كان جيد واذا كان سيء ؟ ...
إذا كان جيد أرجع أقراه وأتصفحه أدور على النقاط الحلوة اللي قريتها فيه .. وإذا كان سيء أوبخ نفسي إني ما سألت عنه ولا عرفت محتواه قبل لا أشتريه
5- كتاب تصنفينه من النوع الجيد والممتاز - كتاب سيء ندمتي على قراءته ؟...
كتاب جيد .. امممم .. كتاب attitude is everything أو طريقة تفكيرك هي الأهم .. قريت ربعه وتحسفت إني وقفت ما كملته .. كتاب أكثر من ممتاز وأسلوب الكاتب مشوق لأبعد الحدود .. وحبيته أكثر لما شفت فيديوات في الإنترنت عن الكاتب وطريقة كلامه ..
كتاب سيئ .. نفس ما قالت (أبي قطوة ميو) كتاب الشجرة .. وbreakin dawn .. أنا مادري انه الجزء الأخير من توايلايت وقمت شريته .. ولما دريت انه عن مصاصي الدماء .. كان هذا حالي :eh_s(16)::eh_s(11): مع احترامي لمحبي توايلايت واهما على راسي .. لكن لا يمكن أضيع وقتي بقصة مصاص دماء .. بشنو أستفيد.. وخاصة لما تصفحت تجمع قراء بريكنج دون هني في المنتدى وقريت ان البشرية تحولت مصاصة ولما حملت تذكرت ان المصاصين جسمهم ما يتغير لما يحملون .. صعقت من هول الصدمة ههههه وطالعت الكتاب وقلتله .. حسافة فيك الفلوس والورق
6 - هل في احد من اهلج يقرأ ، احد من رفيجاتج ، ناس تعرفينهم ، اصدقاء يحبون القراءة والا انتي بس الي تحبين القراءة ؟
...
اللي يقرا من اللي أعرفهم .. خواتي .. صديقاتي المقربات .. مديري ما شاء الله عليه كل كم يوم لازم كتاب مختلف على مكتبه ويتصفحه لما يفضى مع انه ما يفضى ومشغول أكثر مني لكني أشوفه كأنه يختلس من الوقت عشان يفتح الكتاب ويكمله
7- شنو نظرتج للأدب العربي ، والقراءة بالوطن العربي وشنو رايج بالقارئ العربي ونوعية الكتب الي يقراها ؟...
الأدب العربي سابقاً لا يعلى عليه .. أيام العقاد والمازني وطه حسين ومن عاصرهم .. والآن .. مادري لأني اعتبر الأدب العربي هو القديم ..أما بالنسبة للروايات العربية المعاصرة فالله يوفقهم فيه الزين وفيه الشين
أما قراء الوطن العربي .. ففي مأساتهم يترنحون .. الغالبية العظمي مجلات وجرايد فقط إلا من رحم ربي ..
أما إذا تحدثنا عن القارئ النهم للكتب وغيرها .. فأغلب قراءاته إنجليزية .. مع انه ضروري يهتم بلغته فالشعوب المتحضرة تهتم بلغتها بعدين تلجأ للاهتمام باللغات الأخرى .. لكن بشكل عام الممتاز في القارئ العربي (النهم للكتب) انه يقرا كتب تطوير ذات وبجذي يستفيد من تجارب وأفكار تصنع النجاح والناجحين بحياتهم . بعد توفيق ربهم طبعاً
8- شنو احساسج تجاه الكتاب ؟
...
الكتاب حياتي الجميلة .. الكتاب عالمي اللي أتخلص فيه من الإزعاج والملل وحسد الناس .. الكتاب بذرة تطوير لذاتي وروحي وعقلي
انتي شكراً يمامتي على هالموضوع القيم .. حافظج الله حبيبتي :fun:
غدير
