تنصحوني ابيع ولا عيب؟؟؟

[مروقه على الكوفي]

السلام عليكم
اخواتي ابغى استشريكم بموضوع
اناطبعامخلصه الثانوي وجالسه في البيت والسنه الجايه ان شاءالله بكمل الجامعه وابوياوامي الحمدلله كلهم يشتغلوا
ابغى اسوي بطاقه اختبار القدرات بس ابويا موراضي يقولي تحلمي تدخلي الجامعه مدري مومتحمس ليش؟
امس شافني اسوي خلطه للجسم قالي ليش ماتشتغلي تبيعي خلطات احسلك
انااسوي بسبوسه ومخلل جونان ماشاءالله
افكرابيعهم بس اقول صعبه بمركز امي وابويا قلت لوابيع بقول لامي تبيع وتقول انه جارتي سوت موانا
واسوي خلطات وابيع؟لان امس جلست ساعه اسوي خلطه وتعبت يعني في ناس يعطوك الطريقه للخلطه ويبيعوافي نفس الوقت لان بعض الناس مافيها(مافحالها)تسوي فتشتري اريح
مدري تنصحوني اعمل خلطات واكل وابيع؟وبكم تعطوني اسعارالبيع؟
وعادي اخذمن الكتب والنت طرق خلطات واسوي طبعابعدمااجربها؟ولالازم استاذن من صاحب الخلطه؟؟
اناعندي الامانه اهم شي وجزاكم الله خير

 

[amna_83]

عادي عزيزتي
والتجارة شطارة
تقدرين تاخذين خلطان من الكتب والنت وتضيفين عليهم مكونات أنتي تشوفينها أنها ممكن تكون مفيده للخلطه
ومايندرى يمكن لي السنه اليايه أبوج يغير رايه ويخليج تكملين دراستج
والله يوفقج بحياتج سواء بالتجارة أو الدراسه

 

[أديــــــــــم]

اختي نصيحه لوجه الله كملي دراستج

واذا ابوي ما يبي الجامعه عشان بنات وشباب ترى في جامعات للبنات بس وترى العلم نور

صدقيني راح تتحسفين قد شعر راسج اذا ما كملتي

انا اشوف هالموضوع اهم من الخلطات واذا تبين تسوين خلطات سوي ما يضر وبيعي بالانترنت بدون لا احراج لج ولا تقولين جارتنا تسوي

والله يوفقج حبيبتي

 

[رنه خلخال]

ليش لا بس هم حاولي اتكلمين ابوج ان اتكملين دراستج موفقه

 

[PinkY Dreams]

بيعي جنه العيد

 

[M!Ss Smart]

نصيحه ولله كملي دراستج ماااااينفعج احد الا هالشهاااده ماتدرين ظروفج باجر شنو تصير ترى الاهل مو دايمين لج ولله يوفقج ان شالله

 

[am_kshaa]

اهم شى دراستج
لان التجارة ماراح تفيدج كثر الدراسه الحين بزمنا الى ماشى الواحد مع شهادته لانها اهيا الى بتفيدج وفى جامعات خاصه حق البنات بس مثل بوكسهل
وعندك كليه البنات بالعدييله او ادشين التربيه الاساسيه واذا موحابه عندج كل كليات ودورات التطبيقي بس بنات

 

[غــ السعوديه ــلا]

وانا بعد رأيي من رأي البنات (( كملي دراستك )) صدقيني اذا تركتيها الحين راح تندمين بعدين

وفي كليات للبنات ادخليها مو شرط جامعه مختلط واذا كلمتي ابوج راح يقتنع لاتستسلمي

بالتوفيق ان شاء الله .....

 

[^البارونه^]

"وعن أبي سعيد الخدري رضي الله عنه قال:قال رسول الله - (لن يشبع المؤمن من خير يسمعه حتى يكون منتهاه الجنة) رواه الترمذي. والمراد بالخير: العلم. وفيه أن زمان الطلب من المهد إلى اللحد، وأن عاقبة طلب العلم الجنة. وهذه بشارة وأي بشارة لمن يعلم أو يتعلم. جعلنا الله من أهليه وحشرنا في زمرة ذويه."



.. صلي الاستخاره .. وماخاب من أستخار ..


صدقيني


(( ســــــــــلاح البنت شهادتـــــــــها ))

 

[~*~الملكة~*~]

دراستج اهم

بس عادي مافيها شي اذا بعتي

 

[Judy abbott]

حبيبتي اول شي انا انصحج تكملين دراستج لانه ماراح تنفعج الا شهادتج

كملي دراستج واذا انتي حابه هالشغله سويها

وبالعكس التجاره شطااره والي قاعده تسوينه لا عيب ولا حراام عشان تستحين منه
الله يوفقج حبوبه

 

[بنت الاحلام]

بالعكس عمر البيع والشرا ما كان ياثر ع الاسم

والرسول صلي الله عليه وسلم
اثني علي التاجر الشاطر


وهذا قدام هني بنات عوايل تاجرات معانا بالمنتدي

ما فيها شي يعيب بالعكس تشغلين وقتج بشي مفيد لج
ولغيرج

دام انتي حاسه انج تقدرين تسوين شي ينفع البنات



وانا مستعده اساعدج باي استشاره بما اني تاجره قديمه مر علي اكثر من 3 سنوات

انا حاضره يا قلبي

ولا تطالعين المراكز وغيره

كلنا عيال حوا وادم


والرسولاشرف الخلق كان راي غنم


والشغل عمره ما عاب الانسان

 

[baby johnson]

كملي تعليمج حبيبتي والله شهادتج اهم شيييييي

 

[مروقه على الكوفي]

اكيد ان شاءالله بكمل وببيع بس عسى استفيد من البيع واكسب لان اقاربي نذاله مايدفعوا لوتبعوا
وببيع للجيران مو المنتدى لاني مااعرف للشحن
بس ماقلتوا استاذن اذا بعت طريقه وحده من المنتدى ولاالكتاب
رغم اني مجربه الخلطات وربي تجنن وطريقتها صعبه يعني تكلف
وماهي اصول البيع؟وتنصحوني لورحت جمعه ابيع اشياء لاصعبه؟
نفسي ابيع بس احس ماعندي جراءة يعني عادي امي تبيعلي بس اناابيع نو وي

 

[كريستال ليدي]

كملي دراستج الدراسة اهم شي و ما فيها شي بيعي و انتي تدرسين
يعني عصفورين بحجر

 

[shai5at al3arab]

ما فيه مانع تبيعين

بس الاهم كملي دراستج

ترى الايام هذي غير عن قبل

اهم شي الشهااااادة

الحين يمكن ما تحسين بهالكلام بس باجر لي كبرتي بتحسين اهم شي انه عندج شهادة ووظيفة محترمة ومعاااش

 

[• قلبه نصيبي •]

اهم شي دراستج فكري فيها واذا ابوج مو راضي ع الجامعه روحي مكان ثاني مو شرط الجامعه !!

وتقدرين تبيعييين بالوقت نفسه ! يعني مافيها شي انتي مو مسويه شي غلط !

 

[tolay]

نصيحه ولله كملي دراستج ماااااينفعج احد الا هالشهاااده ماتدرين ظروفج باجر شنو تصير ترى الاهل مو دايمين لج ولله يوفقج ان شالله

صح كلامها

بيعي عشان وقت الفراغ

اما انج تظلين طول عمرج تبيعين وهاده الدراسه لااا غلط

 

[G!RLooNa]

والله انا اشوف اهم شي الحين الشهاده

اهم من خلطات وغيره

خلي الخلطات وقت العطل او وقت فراغج

بس ظروري تكملين دراستج

 

[اميره جورج]

الدراسه اولى 0000000000000