تنميـــــل بالأطراف و تشنج .. شنو يعني ؟؟

[أبلة مس]

أولا .. مبـــــارك عليـــكم الشهـــر

آنا اليوم داومت بالمدرسة ... و كانت جدامي وحدة تسولف علي .. فجأة حسيت بتنميل مو طبيعي بإيدي اليمين و تشنجت (( ماخذة وضع معين )) .. بس ما عطيتها واايد أهمية لأن صايرة لي هالسالفة من قبل .. بس لما رديت البيت اليوم زاد معاي الموضوع .. بس صار التنميل و التشنجات بس جهة اليمين من جسمي .. و أخذ وقت أطول .. آنا أذكر قبل أحس بتنمل و تشنج بس ما يطول كثر ما طول اليوم .. حتى و آنا قاعدة عالسرير .. تشنجت ايدي فجأة و خلت زوجي يلاحظ إيدي شلون جفست و خذت وضع معين (( كأني الله يكافينا الشر و يشافي كل مسلم -معاقة )) ... أخذ زوجي يدلك ايدي بس ماكو فايدة و ترجع لوضعها (( متشنجة )) .. بعد خمس دقايق تقريبا وقف التشنج ..

ألحين و آنا أكتب لكم أحس بتنميل خفيف بالجهة اليمين من جسمي ..

شنو تنصحوني أسوي .. أروح للدكتور سهيل الشمري .. أو أنطر شوي على روحي و إذا زاد الوضع رحت له ؟؟

الله يجزاها خير اللي تفيدني بهالموضوع​

 

[NoWay2know]

علينا وعليج حبوبه

من اسباب التنميل نقص في الفيتامينات والحديد (كالسيوم) ، ومرات يكون اسبابه مرض ومرات يكون ضغط عضلي وسبب هالتنميل.

لازم تسوين تحليل دم وتحليل شامل.
ماتشوفين شر حبيبتي

 

[النوري قمر]

حبيبتي وجهك تحسين انه يتشنج بعد؟؟؟

 

[شانيل نمبر 5]

انا نفسج تنميل الاطراف ودايم اصابع ريولي بارده وراح حق الطبيب قال لي فيني
نقص بالفيتامين د

وتر تحليل هالفيتامين وايد صعب يعني يطول حيل بالخاص يأخذ اسبوعين

 

[بنت لكويت]

حبيبتي جيكي على فيتامين د والكالسيوم اخاف نازل عندج (الدكتور يوسف بوعباس ممتاز) عن تجربه واذا

مافيهم شي انصحج اتروحين دكتور اعصاب وانشالله ماكو الا العافيه يارب .....

ادعولي بالشفاء والتوفيق وشكرا....

قصتي الحقيقيه معاناه مايعلم فيها الا رب العالمين اتمنى انكم تستفيدون منها.. - منتديات كويتيات النسائية

 

[whitish]

الله يشافيج اختي

مالج الا الدكتور علشان تطمنين

وما تشوفين شر

 

[هنـــد]

حبيبتي قبل لاتروحين للمدرسه اقري على نفسج

والتنمل هم من اساب العين الله يكفيج الشر ان شاء الله

 

[@ الحلوة @]

كله نقص فيتامين لان بنتى حاشه مثلج خدار مع اطرافها واظافرها تصير زرقة رحت الصيدلى عطانى فيتامين على محار والله جم يوم وكل شى راح وكملت العلبة والحمدالله ما رجعت الحاله

 

[أبلة مس]

الله يجزاكم خير على ردودكم .. و آنا إن شاءالله باسوي تحاليل آخر هالأسبوع .. و باخذها معاي و أروح للدكتور يوسف بوعباس .. بس هو عيادته وين بالضبط ؟؟

و اللي سألت عن تشنج ويهي .. لا بصراحة ماكو ....

و أنا أدري والله العين حق .. وآنا يمكن أكون مقصرة و ما أعوذ روحي .. بس إن شاءالله أحاول كثر ما أقدر ..

الله يجزاكم خير جميعا .. ما قصرتوا

 

[NoWay2know]

ويجازيج الف خير وماتشوفين شر،، وان شاء الله مافيج الا العافية حبوبه

 

[om es3af w eleef]

انا اقول سوي اشعه على رقبتج احتمال فيها خشونه بسيطه اهيه اللي مسويه التنميل او روحي حق الدكتور طارق الشيخ بابن سينا ترا ممتاز