توصيل اليهال من عليه ..؟؟ انتي ولا زوجج ..؟؟

[Patcholli]

مساء الخير ..


زوجي طنقر ونام بسبة نقاش مو حاد بس مادري شحقه طنقر لوول :d

سمعو وحكمو ..

الحمدلله دوامه وايد زين صج كراف بس كافي انه يطلع ويدش على كيفه لا بصمه ولا توقيع ولا بطيخ ..

والحين ناوي يروح شركة النفط وانا مو راضيه لان كلشي راح يتغير

الحين يرد وحده باجر راح يرد 3 ونص

الحين يداوم 8 ونص باجر راح يداوم 6

الحين يقدر يزرق اذا صار شي لا سمح الله على طول يطلعلي وييلي باجر راح يكون حكره

وكافي ان له مركزه بدوامه الحالي وواعدينه بترقيه حلوه .. احنا راح يبدي من الصفر

المهم .. مو هاذا موضوعنا بس ذكرت الكلام السابق عشان ابينلكم اسباب رفضي

وهم مالي شغل يعني انا بس قتله دوامك احسن بس ماعصبت ولا تدخلت اكثر من جذي ولا شقيت هدومي وقتله لاااااااا ماتروح

السالفه ياطويلات العمر انه يقول اذا رحت النفط تقدمين استقالتج وتقعدين بالبيت ..

هالشي حلو لا باس فيه لوول

بس اللي مو حلو انه يقول توصيل المدارس عليج ..!!

قتله شكو .. اصلا انا انقد على الحريم اللي يوصلون عيالهم .. واقولهم هذا شغل الريال والحين اصير نفسهم << طبعا هالجمله تأليف مو صج بس بجس النبض

جان يقول يعني شنو ماراح تعاونيني عشان مستقبلي ..؟؟

قتله امبلا اعاونك بس توصيل المدارس اكررهه .. وياحلوي مقدمه استقالتي عشان افز من الصبح اوصل مدارس .. اظل على دوامي ابرك خو قايمه قايمه


جان يقول بعد شغلي راح يجبرني على هالشي

قتله وظيفتك الحين وايد زينه ومريحه ليش تروح حق الشقى بريلك وتشقيني معاك ..؟؟

طبعا انا اتكلم بس من داخلي ميته ظحك لان قاعده اطفره واهو ماخذ الحجي جد .. باجر بس يصحى بقوله ترى كنت اطفرك لوول

يحليله عصب وماتعشى ونام ..

المهم بنات

شرايكم بسالفة توصيل المدارس تحسونها مسؤلية الزوج ولا الزوجه ..؟؟


ولا تشوفونه شي عادي وشراكه بين الاثنين ..؟؟

الصراحه انا فعلا اكره هالسالفه

كافي تفز تبدلهم وتصحيهم وتغسلهم وتريقهم .. لي هني اشوفه دور الزوجه

ودور الزوج انه ياخذهم لي السياره ويوصلهم ..

ماحب الاعتماد الكلي يكون عالزوجه اوكي تساعده اذا يوم مريض او مايقدر يوصل بس اهي تصير المسؤله لااا


شرايكم ؟؟






​

 

[Dancing^Queen]

صباح الخير والنوير

حبيبتي قريت موضوعج
وبردلج علي الشغلتين اللي طرحتيهم

توصيل اليهال:
مسؤوليه وشقاء للي يقدررررر وظروفه تسمح
هذي مشكلتي حاليا
ومتوهقه حييييييييييل معاهم انا اوديهم الصبح لاني اطلع قبله (موظفه بترووووووووووووول لوووول) اهو ايبهم الظهر لان يطلع من دوامه ابجر
والصغيره دوامها مدرسه خاصه يقلها سايق بيت اهلي لان بالسالميه
العله الحين ان دوامه بيطبقون بصمه وانتبهي علي انقطه هذي يعني مايقدر يطلع 1
وبتوهق بباليهال
الحين مسؤوليه منوو
اهي مو سباق ولاصراع من اجل البقاء ولا اللي تيب عيالها شايله المسؤوليه عن الريل ومريحته ووويييييييييي شحقه تسوي جذي!!
ولا اللي ريلها اييب اليهال يعني مهنيها ومسستها ومسؤوليته لان عياله
الحياه تعاون ومدامها تقدر تساعد بشي هذا بيتها وهذول عيالها بدون لاتتنازل عن شي او تضر نفسها
يعني مستحيل استاذن واييب اليهال واهو نايم بالبيت ماعنده شغله
بس اودي اليهال لان علي دربي ومو علي دربه ولاني اطلع ابجر منه بوايد مافيها شي
مو صراع وانا اقوا منك وكيفك مسؤولتك
تفاهم
مافيها شييي

الموضوع الثاني شغله بالقطاع النفطي
خل يستخير
قبل كل شي
ماتدرين وين الخيره
انا موظفه بترول واقولج
صج الدوام ساعاته طويله
بس شعور انج تنجزين شي وتشوفين جدام عينج نتيجته روعه
بلس المزايا حلوه ياحلوه
فرق بين الوزارات والبطاله المقنعه والبترول
لاتحرمينه وتحرمين عيلتج من هالفرصه وهالمزايا
هالامور واليهال تنحل سايق يحل كل هالمشاكل

 

[انثى عاشقة]

انا زوجي موظف بقطاع النفط ودوامه زفت
وحكرررررة
الله يعين بس
بالنسبة لتوصيل العيال هع هع هع
الحمد لله بالسعودية ما نسوق ريحونا خير شر ​

 

[Gifts&Occaions]

ليلحين ماعندي عيال البنات يفيدونج

 

[LuLiTa]

عادي اشفيها حبوبة ؟ الحياة مشاركة و تعاون ... احنا كانت الوالدة اتوصلنا حق المدرسة ...و دامه بيروح النفط فـ وقت دوامه ما راح يكون بإيده و يتغير على طوول ...اشحقى تكرفينه و اتحملينه فوق طاقته و انتي قاعدة بالبيت و حاطة ريل على ريل ؟



و اذا عن الوظيفة بالنفط فـ أحسن بوووووايد ... فررررررق بين السما و الأرض ... و اللي يتنازل عن وظيفة بالنفط اسمحيلي اقولج ما يعرف مصلحته ..

 

[منال $]

اول شي حبيبي ما يرفض الوظيفة عشان ساعات الدوام
بشوف المميزات زقارن بين الوظيفتين
وممكن ياخد اجازة 3 شهور من شغلة الحالي بدون راتب ويجرب في النفط
والله اادا هناك افضل واضمن بالمستقبل اكيد يروح وبدون تردد وشو يعني يصحي الساعة6 هدا مستقبلة يصحى هو المستفيد وادا جا متاخر بتكوني اشتقيلو

رجع لموضوعنا تبع التوصيلة والله مايفرق انا او هوا اهم شي عيالي يروحو المدرسة ويتعلموا
ممكن تتقاسموها بالنص واحد يوصل الصبح المدرسة والثاني يرجعهم عالبيت الضهر
وخلص الحياه سهالة

وبعدين حرام عليكي خليتية ينام بلا عشا شريرة

 

[الأميرة جوري]

عادي اختي ساعديه ظروفه ماتسمح ...او حطي سايق

 

[انوثتي غير وياك]

عادي شراكه بين الاثنين

او يبي سايق :d

 

[شـيـوخـهـ]

لا تكبرين الموضوع توصيل اليهال ماتفرق منو الي يسويه

مدامه اول ما شاف وضعه بيتعدل بحكم انه يشتغل في مكان له مزايا حيل ممتازه فكر براحتج وان ماله داعي تشتغلين يستاهل منج
انتي بعد تساعدينه بسالفه التوصيل وتقولين ان قومة الصبح مدام فيج فيج تقعدين على دوامج احسن !! بالعكس حلو تشوفين عيالج كل يوم الصبح تقعدين على ريوقهم وتسمعين سوالفهم معاج بالسياره لين يوصلون احلى من انج تنامين لي الظهر على ردتهم هالشي بيلزمج ان نومج مايخترب وتستغلين فترة النهار بشي لج من بعد ماتردين الصبح لي الظهر سواء نادي ولا صالون ولا غيره احس ان شي حلوو لا تفكرين منو يشيل المسؤليه خلي الموضوع بينكم مافيه حزازيه من ناحيه منو يشيل الثاني عشان مصلحة الطرف الثاني ادعمي ريلج بموقفه بسالفة نقلته للبترول لان وضعه المالي بيتعدل و هالشي بعدل الوضع معاج انتي بعد

ارد انا شخصيه التوصيل على حسب ظروف كل شخص فينا منو يوصل ولدي وعادي الامور ماشيه مافيها منو المفروض يسوي جذيه بالعكس كل شي بينا شرااكه والحياه الحمدالله ماشيه

 

[popa]

مره انا مره اهو
وهكذا

 

[حجيه هيونه]

ليش ما تحطون سايق حق توصيل العيال

او تحطينهم باص سنع اذا امكن !!

 

[&ريانة العووود&]

مرحبا ...
والله ي اختي الحياة تعاون وبصراحه مافي احلا من اني اقعد بالبيت والبس عيالي واريقهم واوصلهم وعقب ارد للبيت واتقضين اشغال وااجد واذا صار ظرف لاقدر الله انتي موجوده يكون ماعندج شغل ومدام الزوج بيصرف بالعكس اخذيها براحبت صدر وقولي حاضر مدام انت رايح مرتاح للدوام ومنت مقصر فينا ابشر باللي يتكفل فيهم واللي تبيه حاضر مدامك مو مقصر ان شالله اني ما اقصر ...............
بالعكس حبووبه هذي راحتج ونصيحه اخذي بكلام زوجج..
وتقبلي رايي ...

 

[الشهد كله]

حطي سايق وقفلي الشر بعداً عن المشاكل ​

 

[Patcholli]

مشكورين حبيباتي :**

واقتنعت بردودكم صح المشاركه حلوه ويمكن هالشي يكبر الزوجه بعين زوجها ..

بنتظار باجي المشاركات والاراء

 

[ام كوثر2007]

patcholli عاد انتي صج بلنسبه لي اشوفج قدوه بردودج ومواضيعج وايد وايد احترمج انتي مع اختنا التاجره بيونسيه حيل داشين قلبي واحبكم بالله ..


نرجع لموضووعنا ..


شوفي يا طويله العمر .. بحكم اني اعرفج عاقله وراعيه بيت وبنت ناس . اقولج توكلي علي الله وقدمي استقالتج لول


لا جد اكلمج ترا السالفه مو محتاجه تقديم استقاله .. اذا دوامج تقدرين تستاذنين تاخذين اليهال من المدارس والصبح تودينهم بطريجج ..

لكن اذا كان دوامج عويصه .. قدمي استقالتج وجابليني ههههههههه لاني انا قدمتها منذو مبطي وانا الدريول مال البيت الحين .. بحكم دوام ريلي

وانا ما اشوفها اهانه دام احنا نسوق سيارات الحمدلله ليش ما نودي عيالنا علي الاقل ابرك من الغرب السايق والخدامه وغيرهم ..

علي الاقل يظلون يذكرون لنا هالذكري لمن يكبرون ويقوولوون الله يذكرها بالخير امنا كانت تودينا واتيبنا طول عمرها مثل ما احنا الحين نذكر ابهاتنا قبل ..

ووظيفته بالنفط عسى الله يوفقه فيها ما عليه ترا له فيها مستقبل حلو خليه يجبل عليها لا تعارضين انتي ووقفي وياااه يا الغاليه وعسى الله يسخره لج ويبعد عنكم كل شر يارب .. ويخليلج عيالج

 

[يارب يطيب عبود]

حبيبتي زوجك عنده شغل وانتي راح تكونين فاضيه
واهو يشتغل عشان راحتك انتي وعيالك حلو انك تساعدينه
لو كنتي مشغوله ولا اهو فاضي ما عنده شي بس كذا يبيك تودينهم لك حق ترفضين
بس حرام يطلع من شغله يردهم وانتي في البيت صح ولا لأ؟

تحياتي

 

[Patcholli]

^^ تسلمين حياتي معاج حق وكلامج على راسي
والله يطيب عبود ان شاء الله :**

تحياتي لج

 

[some one waw]

السايق يوصلني انا وعيالي لوووول

 

[عسل مرت قيمر]

عادي حبوبه الحياة مشاركه

مره انتي ومره اهوا كل واحد ومقدرته يشيل عن الثاني

ويالله بعد شتبين اهوا بيشيل كل شي بروحه وبيريحج هههه 



ساعدو بعض مافيها شي

والله يوفقكم ويسخركم حق بعض ياارب

بس تدرين وااي ريلي جذي دوامه لي الثلاث ونص

تخيلي يرد هلكان يدور الفراش وعلا مايقوم الا المغرب يخلص جم شغله وراح اليوم


نص يومه يصير دوام


الله يعين بس

شنسوي بعد

 

[bitter-sweetness]

تدرين شنو احسن حل

شركيهم اب باص اريح لج و له
معاهم ناس و امان عادي