توني مالجه عفيه طمنوني

[nkrf]

بنات أنا توني مالجه صارلي شهر زواجنا زواج تقليدي بس عندي مشكله

زوجي يطلع معاي تقريبا ثلاث أيام بالأسبوع نشتري أثاث و باجي الأيام دايما يقولي مشغول
يروح دواوين و قهواي أو يقعد في بيتهم ما أحس مثل باجي البنات
إلي أعرفه أن الريال أول مايملج يكون طاير بالمرة مايهدها

و حتى بالتلفون يكلمني باليوم إلي مانطلع فيه ربع ساعه يقولي شنو سويتي اليوم
و بسسسسس عادة تكون المكالمه المغرب
مو المفروض يتصل بالليل ؟يعني أنا زوجته و عاداتنا و تقاليدنا أنا معاه تسمح بهالشي

ما أدري هل هذا الوضع طبيعي ؟؟
إلي أعرفهم يكلمون رياييلهم طول الليل و يقولون رياييلهم يدوخون ليما يكلمونهم

هل أنا مو عاجبته ؟ مع أن مرات يمدحني
هل يكلم بنات من وراي و ماله خلقي ؟
ما أدري شسوي حدي محتاره و ضايق خلقي مالي خلق حتى العرس

 

[توتة UAE]

اممم للحين ما خلصتوا الأثاث؟ أنا ريلي كان له يوم واحد يشوفني فالأسبوع p:
ممنوع أكثر عشان ما يتعود عقب يمل . . أحس وايد 3 أيام فالأسبوع . .

صراحة مابا أتفلسف عليج بس دامج ماشفتي شي غلط منه لا تشكين ولا تعبين
عمرج والمفروض هالمرحلة تستانسين فيها . . قوليله مرة أنا مشغولة الحين
اتصل علي الساعة 11 ونص عندي لك موضوع حلووو وإذا سأل وحن شو هو
قولي سر . . ولما يتصل ترومين تحولين السالفة إلى رومانسية وبعد تغيرين
روتين اتصالات المغرب . . سولفي عن مواضيع يديدة خبريه عن شي يضحك حصل
حق حد . . خليه يتفاعل وياج عشان هو بعد يخبرج سوالف ومنها تعرفينه أكثر . .


اكتبي فالنت حركات الدلع فالتلفون ولا حركات المالجات بتشوفين بنات مالجات
مسويات تجمع هههههههههههههههههههه دشي واستفيدي . . ماعرف اسم
الموضوع بس اكيد وايد بنات مسويات تجمعات . .

ربي يسعدج :*

 

[لوولوو_88]

انا اقول بادري بالتغيير .. انتي غيري و عوديه يعني نفس ما قالت توته انتي خليه يدق بليل تعذري .. انتي طولي المكالمه و سولفي معاه

احنا الحريم دايم ننطر و نبي الشي منهم . ما ندري انه بيدنا كنز انه نعود ازواجنا على اطباع احنا نحبهما و في ريياييل يتجاوبون ..

حاولي حبيبتي .. ولا تقارنين وضعج بوضع غيرج حبي و الله المقارنه بتعبج رياييل البنات مو نفس ريلج .. يمكن مو مستوعب بعد او ما تعود

يمكن باجر لا عشتو مع بعض يتغير الريال .. انتي شدي صوبج حبي و خلي يعاف الطلعه و ربعه و يعطيج وقتج ..

و انشالله ماكو الا العافيه و ربي يسخره لج و يجعله مثل ما تتمنين

 

[dalo0oa121]

عااادي ماشوفه هاملج بالعكس

 

[نبض السعاده]

الله يهديج عادي تري بالعكس احسن جذي ووقت الزواج غير احسن
والله يتمم عليج

 

[Lady A]

كل شي بوقته حلو
لا تستعيلين ع وايد اشياء
يمكن حياوي او مو نظامه بمعنى ان تفكيره مكالمات الملجه
في رياييل مع هالنقطه وفي لا حتى لو محيطه يسمحله !!
و دام يسأل عنج و يبادر ويدق شي أحسن من لا شي
وجدامكم إن شاءالله العمر كله بتجابلون بعض
فتفرغي حق نفسج وعنايتج وتجهيزج او دورات عن الزواج وبداية الحياه اليديده
اقري شلون تحافظين عليه شلون تكسبين سواء يوتيوب او نت و كتب هالنقطه تفيد
حاولي تنشغلين بنفسج وشي يفيدج و ابدا لا تشكين بسوالف بنات و عنده وماعنده وتراقبينه
هالشي حطيله بلوك من حياتج ترى الشك ماييب الا المرض يصير هوس والعياذ بالله منه
خلج واثقه من نفسج بس تجنبي ثقة المثالية لا تفكرين ابدا اهو بيعجبه او لا انا عاجبته او لا
خلي تفكيرج انتي شنو عاجبج؟
ترى في اشياء مايلاحظها الريال ابدا لو عيب واضح ووضوح الشمس بس احنا الحريم نفتح عينه ع هالعيب
عشان لو كان عيب اساسا جدامنا بيمدحونه ف عشان جذي لا تفكرين انج مو عاجبته بالعكس لو مو عاجبته حبيبتي
جان ماختارج شريكة حياته خليه يفرغ كل مشاعره قبل العرس وبعد العرس لج الحق تزعلين لو كان وقته مو لج
بس فترة الملجة فترة كل واحد يستعد لحياه يديده فلا بد يستفرغون اخر طاقة عزوبيتهم بعيد عن بعض وكل واحد يتجهز لهذي
الحياه فلا تزعلين ان مادق او ماطول معاج بالمكالمه للحين ماعرفتيه عدل يمكن نوعه مايحب يطول بالمكالمات
وسوري طولت عليج و موفقه حبيبتي

 

[chocolateBon]

بالعكس عادي جدا حبيبتي تعوذي من ابلييس وركزي أكثر على نفسج وتجهيزج
أنا ماكنت أشووفه كلش وبالإتصال يدووب مره بالإسبوع بس عادي كل شي طبيعي​

 

[مطيريه قول وفعل]

بالعكس حبيبتي احس موهاملج

بعدين هذا شي عادي قبل الزواج
ماتطلعون او تكلمون بعض كثير
خليه يشتاق لج خليه اهو يتعود يدق عليج اذا يبيج

لاتفكرين كثير بالاشياء الي مو زينه ترا كذا راح تصير

فكري ان يغير عليج فكري انه مشغول

وبس

 

[مذهلة2013]

حبيبتي على طبيعه الريال بعض الرياييل يحبون يسولفون وجذي وفي العكس
ليش شاكه فيه ؟؟؟؟ توه ماتعرفينه ولا تستعيلين مو من اولها تشرهين عليه
ركزي على العرس هذا المهم

 

[البارونـه]

اساسا هاي الوضع الطبيعي، الي ايي بسرعه يروح بسرعه
ودايما البنات يحذرون من الريال الاندفاعي الي اول مايملج يقولج احبج
طبعا ريلج طبيعي لان الحين يتعرف عليج ويتصرف بطبيعته صدقيني مع الايام بيحبج وبيموت فيج ان شاءالله
بس بعد من جانب ثاني خليه يشتاق لج لانج يديده بـ حياته فالمفروض يكون متحمس يكلمج
خل سوالفج حلوه وونيسه سولفي عن الذكريات الطفوله الطموح دراستج مواقفج ، يعني هالاشياء الحماسيه وبتلقينه مايفج عنج
بالتوفيق

 

[Patcholli]

انا يوم ملجت كنا كل يوم نشوف بعض
الا اذا عندي ظرف او اهو مشغول بشي مهم
بس جذي بدون سبب وماعنده شي ماصارت معاي
بس مادري يمكن اهو طبيعته جذي او يمكن يبي يعودج من الحين على هالوضع
مو سالفة اعجاب وترى يبين من نظراته وحركاته معاج
اذا عاجبته او لا
و حبيبتي سالفة ليش موًكليوم يشوفج ماتحتاج تحمينات
اذا متطايقه كلميه بصراحه وقوليله انا مستغربه من وضعنا
لا تاخذين كلام عشوائي واراء احنا مانعرف الريال عشان نقول عنده وحده ولا يخربط
يمكن في اسباب ثانيه صفي النيه ولاتحرقين اعثابج بالمحاتاة علميه انكم تص

 

[Patcholli]

تصارحون بعض لاتخشين بقلبج هاذا ريلج
وهالفتره فترة ان تعلمينه على اطباعج

 

[M-88]

انا ايام الملجه ريلي اخذ اجازه من الدوام و جابلني !!
كل يوم نطلع و اذا قطني البيت يكلمني لييييييييما ينام !
والله ان ننام على التلفون و نقعد على المنبه

بس بعدين تعبنا و ملينا ما خلينا شي حق العرس
قلت له نخفف
و قبل العرس بشهر ما شفته كللللللللللللللللللللللللللللللللللللللششش
عشان اوله عليه لان مصخت السالفه لوووول

فماشاء الله عليه ريلج شاطر
3 ايام بالاسبوع واااايد زين
و هذا عشان يعودج حق بعد الزواج تره الريايل ما يحبون يطلهون وايد
شفتي ريلي اللي بالملجه كل يوم نطلع !!
اللحين اطر الطلعه منه طراره لوووووول
فبالعكس 3 ايام ممتاز و الباجي خليهم حقج روحي صالونات جابلي عمرج
انا كنت اتعذر اقوله بروح صالون بحط تريتمنات بحط حنه ما ابيه لازق فيني

نصيحه اتبعي نظام زوجج و خاصه وراج عرس و لووويه

ربي يوفقهم و يهنيكم

 

[mariam mohamad]

طيب انتي عوديه على نفسج دقي عليه قبل لتنامين قولي بغيت ارتطمن عليك واقولك تصبح على خير ومن هالكلام الحلو
او كلميه بالواتس مسج ترى البنت لها دور بأنه يتعلق فيها

 

[Um Tuki]

شدددددخل لازم تتكلمون بالليل ويدوخ
هههههههه

مستعيلة حبيبتي ؟؟

الريال عارف السنع



كل شي بوقته حلو

يبي يعلمج على طبعه ان مو ٢٤ ساعة لاصق فيج ولاصقة فيه

لازم محال لنفسه ولج

بهالوقت تجهزي و شوفي سوالف ديكور

شكلج ماتشتغلين عشان جذي مركزة

و نصييييييحة

لا تقارنين نفسج و زوجج باي احد لان مايصير

كل واحد له شخصيته و تفكير يختلف

 

[مذهلة2013]

لا تقارنين نفسج و زوجج باي احد لان مايصير

كل واحد له شخصيته و تفكير يختلف

يسلم راااااااااااااسج هذا الي بقوله وبوصله لج :rerrerek::rerrerek::rerrerek:

 

[اذوب بكلامه]

بالليل ويدوخ؟!!
لاتستعجلين على رزقك واللزقه مو زينه

 

[امـ خــزامـى]

زوجك مو ضروري مثل زوج اختك او صديقتك

يمكن ينام بدري ومايسهر


اكيد دوامه شاغله


وبالنهايه احب طبع الركاااده والحب على نار هاااديه


اي شي يجي بسرعه يروح بسرررعه


وبالنسبه لي كنت انا شارطه عليه مكالمه وحده بلليوم ولانه كان مايشتغل وكان عطله نكلم بعض
من بعد وحده ولو اتصل قبل ١ ماارد عليه
لان اكون مشغوله

وماكان عندي لاحبيب ولا صديق
بس السالفه كلها مااحب كثرة المكالمات واتعب منها
والطلعات مارحت معاه الا مره بس
و٣ مرات جاني البيت
وغيره مااافي.

ريلاكس ياعسل وماله داعي الوسوسه والتشاؤم


والله يوفقكم

 

[mmloo7a]

حبيبتي عادي توكم مالجين شي طبيعي اثنين طالعين من بيئه مختلفه عن بعض

موشرط من اول يوم بتعيشون برومانسيه خالصه

شوي شوي حبيبتي تقربي منه قدري وضعه يمكن ماتعود عليج مابادر انتي بادري خلاص انتي زوجته

لاتخلينه يدري انج متضايقه او تتشكين كل شوي عشان لايمل منج ويعوفج

ترى اعرف ثنتين جذيه من اول الشهر جنه مايبيني جنه مايحبني واهو مافيه شي ترى لان توه متزوج واخرتها انفصلوا وهم للحين ماتزوجوا

شوي شوي حبيبتي عالريال المره موكل يوم لها ريل

صدقيني بعد الزواج راح يكون غير عن ايام الملجه لانكم للحين ماتزوجتوا بعد ولا عرستوا هالفتره راح تكون شوي حساسه وصعبه لانكم ماتعرفون بعض