حاط عينه على نومتي!!! ش سوي!!!

[ود=الحب]

والله حبيبتي انا نفس حالتج عيزت منه اول رمضان
اقوله خل اليهال ينامون معاي عقب السحور يقولي
انا اقعد بروحي والله الله وكيلج عقب السحور اتسبح
واحط راسي وانام ولدي الصغير اللي عمره سنه
اخليه وياهم قاعد بس اجهز حليبته وهات شخير
اقعد سبع ثمان اشوفهم القى عيالي الصغار نايمين
بفرشهم وصغير بفراشه واهو قاعد مع الكبير بس لا اعور
راسي ولا اتحاوش ابوسه على راسه واروح اكمل نومتي
حبيبتي عقب رمضان يرد الوضع طبيعي تبلش المدارس والدوامات

جني قرقت واايد

 

[احساس امومة]

مشكووووووووووووووووووورين يا احلى كويتيات
ما قصرتو

 

[احلام هزيله]

مفروض يساعدج تنامين وترتاحين وويوفر لج الجو المناسب للنوم ؟

اسواء انواع الحسد اللي يحسد على النومه ( ليش مرتاحه ونايمه )
الله يعينج ؟​

 

[ربي سبحانك]

طوفي حبيبتي الله يهدي ان شاءالله

 

[سلطة]

زوجج معاه حق فشله شلون نايمة لي المغرب مو حلوة بحقج ولا بحقه وشلون على الصلاة ولا تجمعين عادي

 

[احساس امومة]

راح اكمل ش صار
كان زعلنا والهوشة اللي صارت بعد صلاة العشا... وبعد ما سبني وقالي طلعي برة ما قدرت اقعد دقيقة بالبيت... لبست بنتي الصغيرة وخذيتها الافنيوز ولعبتها ب بروي... قعدت بالافنيوز لي الساعة وحدة بالليل... طبعا ما دق علي لانه كان نايم...

يا بنات والله اني احبه ... ما اقدر اتحمل نقعد مزاعلين ... وكلمة ( طلعي برة ) تون باذني... وطول ما انا بالالعاب مع بنتي وانا افكر.. لازم ما اكبر المشكلة... لازم نتراضا... ماني عارفة ش سوي... قررت ان لمن ارد اروح اصلي القيام مع امي...
امي مو نفس منطقتنا بس كنت محتاجتلها..ابي حضنها الدافي... عيوني غرقانة دموع.. منقهرة...

على فكرة انا اصلي القيام بالبيت لاني عيالي صغار ويسهرون وما اءمن عل الخدامة خصوصا بالليل نفسيتها تعبانة ...

رديت البيت عل الوحدة بالليل وما صعدت فوق... قلت حق بنتي الكبيرة(برابع) تخلي بالها على خواتها عشان بصلي القيام...
طلعت ع ال2 بعد ماراح ريلي القيام.. طبعا ما التفت علي حتى... رحت المسجد اللي امي تصلي فيه.... كنت ابي امي... ابجي وانا اسوق ... متضايقة .. بس ابي اشوف امي... وصلت المسجد والا القاه حده زحمة... والناس يصلون برة.. يعني مافي محط ريل.. رديت البيت ... ولقيت بنتي الصغيرة نايمة.(سنة). والباجي يتهاوشون والخدامة منحاشة تحت... خذيت بنتي الوسطية ونومتها بالدار عندي وقعت اصلي وادعي... لمن صارت الساعة 3 لبست عباتي مرة ثانية وطلعت... ابي اشوف امي ... ابي نصيحتها... ابيها...
ركبت السيارة وفعدت ابجي وابجي وادق عل امي يشيله اخوي ... اساله وين امي؟؟ يقول ليلحين ما ردت... ودقيت كذه مرة.. ليمن اهي دقت علي وعلى طول قالت ( ش السالفة!!)
انا على طووووول بجيت: ماما مادري شفيه فجاة عفر علي!! امس كنا شحليلاتنا... مافينا شي .. وفجاة ما خله عيب ما قاله فيني!! اهو السبب... خرب نومة البيت كلها ,, بعدين اهو اذا تعب نام اي وقت وانا حرام علي ارتاح.......)

طبعا امي اللي اموت فيها اول شي قالته: تعوذي من ابليس... ولا تصارخين... \لاني كنت منفعلة\ ... هدي.. ولا تحاجينه الا لمن تهدين.. وهو اكيد تنرفز عشان جذي سبج ودزج وقالج طلعي برة... روحي سوي اي شي يهدي اعصابج.. تسبحي.. اقري قران.. لعبي رياضة.. اي شي يخلي اعصلبج هادية... بعدين لمن تهدين حاجيه وعرفي اسبابه ووليله اسبابج تنحل المشكلة... ردي بيتج الحين ولاتفكرين تنامين عندي!!!

سويت بنصيحة امي... تسبحت .. قريت قران.. صليت الفير.. وقعدت اقرا الاذكار... جان ايي زوجي ويصكر الليت ويقول تبين تقرين اقري بالصالة!!!!

قتله: انا ش سويت... انا ما غلطت... كنت تعبانة... ومن بدت العشر الاواخر بدت مشكلتنا...\ لانه اهو ينام بعد صلاة العشا لي صلاة القيام... فيكون شابع نوم بالنهار... اما اول كان ينام معاي ويقوم معاي .. وما حس اني على طول نايمة وما ادري عن عيالي...\
المهم انه اهو ما يبي يتفاهم.. بس شاطر يقول: ابي اشوفج مع عيالج .. والخدامة مشغولة بالمطبخ .. واليهال ياذون امي!!!

عرفت ان امه بالسالفة!!!!!
بس من قحه .. هذي امه ويبي راحته.. ما الومه...

المهم... ان المشكلة ما نحلت وانا بديت اتنرفز مرة ثانية وبدا صوتي يعلى... وتذكرت امي يوم تقول ( لا تصارخين)
سكتت وبجيت ليمن نمت... حتن كنت اقوم شرقانة من دموعي... اللي قاهرني اني احبه وابي رضاه بس مادري شلون...
صارت الساعة 10 الصبح ويات بنتي الصغيرة ونامت يمي ... ها المرة خليتها... وما شلتها فراشها... ظلينا نايمين لي ال1 الظهر...
قامت بنتي وانا كانت الدموع ليلحين بعيني... ضايق خلقي .. لان انا و زوجي متهاوشين... طلعت الصالة وهو كانت قاعد ومقعد عيالي الكبار ويطالعون بو كريم...
خذيت بناتي الصغار الثنتين ونزلت تحت وقلت حق خدامتي تسويلهم ريوق ( ريوق الساعة 1ونص!!!!) المهم... كنا بالصالة... وانا راسي يعورني... وانا اوكلهم زوجي نزل من فوق... وشافني وياهم... وبنتي الصغيرة ماسكة ايدي وتبوسها.... زوجي ما تكلم.. وطلع...

بعد ما خلصت ريوقهم.. صعدتهم فوق... عطيتهم الاي باد وشغلتلهم التلفزيون.. وقلت حق بنتي الكبرة: حياتي بغفي شوي ,شوفي خواتج.
بنتي يوم شافتني تعبانة وعيوني طالعة لي برة (من البجي) قالت: خلاص يما ارتاحي...
طبعا انا نمت بدارها... خفت ايي زوجي و يقول هاذي ما منها فايدة... لاني كنت ناوية اصلي العصر وانزل اسوي حلو المانحا حق زوجي لانه يحبه...
دخلت غرفة بنتي وما حسيت بروحي الا وانا نايمة ل الساعة 4 ونص... كنت حالمة حلم( زوجي يا عندي وقعدني وهو يبوسني وانا زعلانة.. ويقول خلاص والله اني احبج) ... صحيت من نومي ولمن شفت الساعة وقف قلبي... خفت انه يا وشافني نايمة وعيالي ماذين امه.. يعني المشكلة ما راح تنحل....
طلعت من الغرفة ... وسالت بنتي : ابوج يا ؟ قالت ؛لا.. .... قلت الحمد الله... بسرعة دشيت الدار وغسلت وحطيت ثلجة على ويهي عشان يروح اتتفخ.... صليت ونزلت عشان اسوي الحلو بس مافي كريمة... رديت صعدت وخذيت مصحفي اقرا بالصالة.. جان يدش زوجي معاه جياس!!!
دخل الغرفة وقال حق بنتي تناديني... دخلت الغرفة وانا ماسكة مصحفي... وعدت هل الكرفاية اقرا... ولا طالعته... لاني انا زعلان منه من اسلوبه معاي بس بنفس الوقت ابي ارضيه وما بي اقصر معاه .. لاني احبه .. ومقهورة من الكلمة: طلعي برة يا...

المهم... خذا المصحف من ايدي.. وبطل الجياس اللي يايبهم... وقام يطلع الهدوم اللي شاريلي اياهم... يقول : ها شرايج؟ حلوين.. وانا منزلة راسي ولا ابي اشوف اشاري.... راح وفصخني ملابسي وقام يلبسني اليديد ... اهي بجامة.. حلوة اعجبتني... ياتني ضحكة من حركته.. بس انا ولا كلمة .. ورديت قعدت عل الكرفاية.. جان يقول : ما تبين تشوفين عيديتج؟... خذا ايدي ولبسني ساعة... وكان يايبلي عطر.. بطله ورش علي... انا هني ابتسمتله.. ولميته وقمت ابجي... قال: اول ما شفتج قاعدة تريقين عيالج قلت لازم اراضيج، وانا لمن دزيتج كنت متنرفز وانتي كنتي تصارخين وانا ما حب المرا اطول صوتها ع الريال..
وقالي كل شي بخاطره.. فهمته .. وفهمني..
والحمد الله انحلت مشكلتي
وسجدت سجدة شكر لله

كتبت مشكلتي وحلها عشان تستفيدون
البعض ب شوفها مشكلة والبعض ب قول سخافة
بس اللي تحب زوجها بتفهمني

 

[مجنونه هواهـ]

حبيبتي عادي وايد رجال جي لا تقلقيل مع الوقت بيرد زي ما كان قبل واحسن بواايد بس الحس معاه الحق لانج من كلامج فهمت تنامين كثير يعني ساعه صاحيه و10 ساعات نايمه العفو اختي على كلامي بس الوحده تقوم برمضان تجلس ويا زوجها وتسولف وياه تطبخ وياه وجي يعني مو نايمه وقايمه نايمه وقايمه

 

[جلكسيه اس 3]

ويع ما احب هالنوعيه. يسهرج و بالاخير يحط لوم عليج

 

[من يشابه ديرتي]

الله لايغيـر عليكم

 

[غارقة بأحزانها]

وأي حبيبتي ونستيني ودمعت عيني من الوناسة
الله يتمم عليج ويخليكم حق بعض امين يارب
ادعيلي حبيبتي ان تنحل مشكلتي مع زوجي
انا نفس مشكلتج
وصارلنا اسبوع ما نحاجي بعض

 

[الغاليه نونو]

شوفي يمه اللي بقلبه الصلاة الحمد ماتطوفه

انا مابي اجاملج ولا اقول لج وسعي صدرج عليه تدرين ليشش؟؟؟؟؟؟؟

لانج غلطانه ايييي يمه انتي غلطانه ومليووون غلطانه لانج مره تحبن الرباده والنوم وايد وهالشي مو كل الرياييل يتقبلونه الريال مل واهو يشوفج نايمه مهما يكون هم هذا ريال يبي مره يسولف وياها يبي مره يشوفها جدام عينه المفروض تعرفين اطباعه حتي لومايبي فطور باشريه تدرين متي يكون بالبيت عالفتره هذى اكون قريبه منه واليهال مسؤوليتج انتي تنومينهم وتعودينهم علي النوم بالساعه اللي تبينها ون رفض قوليله بقعد بسولف وياك ياحياتي وبعدل نومة اليهال مابقا شي عالعيد والدوامات مابيهم يتعلمون السهر وومن هالكلام الطيب تكسبينه غلاتي

ثاني شغله ليش يتفطر بره البيت حلاة رمضان انه يلم شمل العايله كلهم علي سفره وحده اقترحي عليه يوم فطورج بيت اهلج يوم بيت حمولتج يمه يوم تفطرون بره وسوي روتين حلوووو بدال النوم


ياعل عيني العما اذا انام وريلي قاعد وااااااااااي ياكبرها عند الله والله ماااااااتغمض عيني قبله حتي وانا مريضه اصحصح بشوفته

حياتي سمعيني دحري الشر وطيحي علي راسه واعتذري منه وياييج العيد لاتخلين ايام العيد تصير حسره بقلب عيالج يشوفون اليهال مع اهلهم وانتي بالعيد بصوب وريلج بصوب

والمره العاجله مااااتلاسن الريال حبوبه لي شفتيه حمق بلعي لساانج وسكتي واستغفري بقلبج وادعيله الله يمسح علي قليبه ويسخره لج

الاعتذااااااااار مطلوووب والصلح نور ياقلبي عسا ربي يوفقج ويسعدج يمه

 

[shak!shoka]

عادي لا تكبرين الموضوع انتي فيج حره مو متعوده ع السهر و اليهال الله يخليهم مزعجين
فالاجواء مشحونه

لا تكلمينه و طنشيه بس اذا قالج شي سمعي وخلاص خليج رسميه

ونامي مبجر و خليه اهوا سهران مع عياله و قصعدي سوي شغلج ولا جنه موجود
علشان لا يدقق وايد عليج و يطلعلج سالفه يديده


الموضوع تافه ترا ما يسوا كل واحد فقد اعصابه

و مريييييت بهالحاله واااااااايد و يا كثر تناجرنا على نومتي !


فاضين هالرياييل ماكو شغل
بس زين منه مطلع اليهال يعني في مجال ترتاحين شوي

 

[نونه المنكوشه]

الله يعينج صج الواحد اذ

 

[احساس امومة]

وأي حبيبتي ونستيني ودمعت عيني من الوناسة
الله يتمم عليج ويخليكم حق بعض امين يارب
ادعيلي حبيبتي ان تنحل مشكلتي مع زوجي
انا نفس مشكلتج
وصارلنا اسبوع ما نحاجي بعض

الله يوفق بينج وبين ريلج انشا الله

وحبيبتي نصيحة... العناد ما يحل المشكلة .. بالعكس يزيدها...
حتن لو هو غلطان بادري انتي بالتفاهم....
والله يحل مشكلتج انشا الله مثل ما حل مشكلتي...

 

[freakiya]

انا توني متزوجه ما كملت شهرين و نفس حالتج نجره على النومه..
يبي انام بالوقت اللي ينام فيه و اقعد معاه و وقت الدوام اقعد حتى لو مو هني
وايد اتحلطم و كل ما كلمت امي تعطيني حل تقولي الكلمه المعتاده "كل الريايل جذي و انتي خلج سنعه ريلج يبيج معاه 24 ساعه بسج رباده"
و انا من اذيته شخير يون يفز مادري شيسوس ما انام مشكلتي نومي خفيييييييييييييييييف اقل حركه اقوم
و للحين ما عندي حل ​

 

[غلآوي .~]

مهمآ يكون ي قلبي المره لازم تجآبل بيتهآ والرجآل ما يحب يشوف المره نايمه لي المغرب يحبها تقعد الصبح وتهتم ببيتها ودام اول مره يسوي هالحركه طوفي وسامحيه ترى ماتسوى تزعلين على هالشي هذا زوجج وابو عيآلج الله يخليه لكم ويمكن هو متضآآيق من شغله ما عليه اعذريه ولا تطلعين من بيتج .. انتي راعيه البيت وام العيآآل ..

وعسى الله يخليلج عيالج ويسخر لج زوجج ..

: )

 

[um khaled]

حبيبتي اكيد يعصب كل هذا نايمه
قومي جابلي البيت ولا تنامين لي المغرب وفووق هذا تطوفج الصلوات
بصراحه ولا تزعلين

 

[قصيمية موت]

حبيبتي بنصحك ولاتزعلين لان اللي ينصحك اكيد يبغى مصلحتك انا اشوف انك غلطتي بنومتك للمغرب مهما كان مو كويس المرأه نايمه و زوجها يصيحها مو حلوه ابدا يحس انها مو مهتمه فيه و مو مباليه ... كمان حبيبتي المفروض لما جاء ينام ماحاولتي انك تصارخين عليه وترفعين صوتك مهما كان .. كان طلعتي غرفه ثانيه وخلاص انا اشوفك الله يهديك انتي اللي حطيتي نفسك بهالموقف وخليتيه يقلل احترامه لك ... اعتذري له ايه مافيها شي زوجك وتسامحو مو حلو الخواطر يصير فيها شي واشرحي له انك تكرهين نظام هالسهر وانه هو اللي خلاك تعصبين من دون ماتحسي .. والله يوفقك

 

[miss.unique]

وااااااااااي حرااام
يايبلج اشياء عشان يراضيج
thats so nice
الله يخليكم حق بعض

 

[مزيوونه حيل]

تقعدين معاهم للصبح لأنج تخافين عليهم بس اذا قاموا الظهر ما تخافين عليهم وتقعدين معاهم؟ .. انا اقول مالج شغل بزوجج صلي الفجر ودخلي عيالج ينامون واذا مارضوا قولوا ابووكم يهاوشني اذا قعدت معاكم للصبح وسمعييه وضبطي نومتج وطنشيه لا تكبرين الموضوع

الرجل عموما ما يرتاح الا لما يقلب السالفه على راسج انتي لا تعطينه مجال واسكتي وانشالله يخلص رمضان وتنتهي هالسالفه