حامل وآكل علاج .........؟

[ريميه حلوه]

بسم الله الرحمن الرحيم
صباح الخيرات لاحلى منتدى
يابنات انا حامل وآكل علاج مضاد اكتئاب مشكلتي كيف اوقفه عشان الرضاعه واخاف ان وقفته ترجع لي الاعراض لاني كنت مستخدمته اول ولما اتركه فتره وترجع الاعراض بحملي الاول اكلته وتركته فجاه مع الولاده يعني مو قبل بالتدريج ورجعت الاعراض بعد 20يوم وكرهت بناتي وكرهت بيتي وبس اصيح وماابي شي كرهت كل شي وكنت ارضع غصب لكن انحديت افطم البيبي عشان آكل مضاد اكتئاب
سؤالي هل احد منكم مر بحالتي او تعرف احد مثل حالتي ووش سوت وكيف اعالج هالاكتئاب بدون علاج لانه قرفني,,,,,,,,,,
يارب تشفيني وتشفي كل مريض وتفرحني بضناي بدون اكتئاب وتثبت قلبي وعقلي ياارحم الرحمين
وسلامتكن

 

[الريشة]

معروفة إن اللي تكون بالنفاس يحوشها اكتئاب و تبجي ....
ترى هالشيء طبيعي بسبب تغير الهرمونات و إنجاب طفل جديد تعتبر مسئولية للأم.
انا أقول التزمي بقراءة الرقية الشرعية كل يوم.
و الاستغفار 1000 مرة باليوم
و قولي: سبحان الله - الحمدلله - لا إله إلا الله - الله أكبر - لا حول و لا قوة إلا بالله.
و دفعي صدقات وايد
و تركي عنج الدواء.
قولي الحمدلله على النعم اللي الله أنعمها عليج
انتي ترى ما فيج شيء بس التزمي باللي قلت لك عليه
قال تعالى في سورة طه: ((وَمَنْ أَعْرَضَ عَنْ ذِكْرِي فَإِنَّ لَهُ مَعِيشَةً ضَنكًا وَنَحْشُرُهُ يَوْمَ الْقِيَامَةِ أَعْمَى * قَالَ رَبِّ لِمَ حَشَرْتَنِي أَعْمَى وَقَدْ كُنتُ بَصِيرًا * قَالَ كَذَلِكَ أَتَتْكَ آيَاتُنَا فَنَسِيتَهَا وَكَذَلِكَ الْيَوْمَ تُنسَى))[طه:124-126]"

 

[ام لين3]

اختي العزيزه الاكتئاب مابعد الولاده طبيعي بس هم اهوه درجات في بعض الحريم يكون جايد وعند الاجانب لانه ماعندهم ايمان ودين يحفظهم ويخفف عنهم توصل معاهم ان يأذون عيالهم بس احنه الحمدلله عندنا نعمه الاسلام وعندنا اهل يكونون حوالينا بعد الولاده اتزمي بقرآه القرآن والادعيه ولزمي لستغفار على طول
وياعزيزتي اذا حالتج تستدعي ادويه شتسوين لايكلف الله نفسآ إلآ وسعها فطمي البيبي واخذي ادويتج
ولاتحسين بذنب انتي مضطره الحين اكو بنات مايرضعون بس دلع لكن انتي مضطره
والله يطمن قلبج ويشفيج ويحفظلج عيالج ويبارك لج فيهم

 

[يا كويتنا]

رد : حامل وآكل علاج .........؟

الله يفرج عنج ما عندي فكرة بس سبحان انا مريضه واعاني وتجي اوقات اكره نفسي وبيتي وكل الناس واحس اني وجدت لكي اتعذب فقط


الحمدالله التفاؤل ثم التفاؤل لا تتركين الحزن يكبر علتطول انسيه وتلهي باي شي بالبيبي غيري بالبيت جددي الاثاث


والصدقه والاسنغفار سحر جربيه وادعيلي عسا الله يشفيني ويشفي كل مريض

 

[@ام يوسف@]

رد : حامل وآكل علاج .........؟

الله يشافيج يارب وكثري من الاستغفار

 

[ريميه حلوه]

رد : حامل وآكل علاج .........؟

الله يسلمكم ماقصرتوا هذا عشمي فيكم ردودكم تشرح الصدر انا مسالة الاكتئاب معي وانا بعمر 15 بس كانت تجي وتروح من حالها عاد بعد الزواج لماجتني اخذت علاج والى الان موقادره اخليه اتركه فتره وبعدين تحوشني الحاله وارجع آخذه رحت لشيوخ الي يقول عين والي يقول مس وبعدين قالوا ماندري شفيكي لاني ماابكي لما يقرون علي يعني عادي اسمع قرآن واقرا واقول الاذكار الحمدلله بس الافكار السلبيه ترس راسي اعوذ بالله

 

[ريميه حلوه]

رد : حامل وآكل علاج .........؟

والمشكله لما اقول لاحد اني آكل علاج اكتئاب ينهبلون ليش تاكلينه اتركيه ماادري ليش يخافون من الادويه النفسيه خاصه مضادات الاكتئاب وهالشي يحبطني زياده

 

[ام لين3]

رد: رد : حامل وآكل علاج .........؟

اختي الناس يخافون عليج ومايبونج تتعودين على الادويه وساعات مضادات الاكتئاب يزيد الطين بله ويصير مثل الادمان يالغاليه اذا بتاخذين لازم يكون بمتابعه نع دكتور فاهم يختي آنه ماقدر اقولج اخذي ولاتاخذين لانه آنه مادري شنو مشاعرج وشنو في قلبج بس اختي قوي ايمانج بالله ولايقصون عليج ويقولون لج سحر وعمل وخرابيط ترى بتدخلين في دوامه مالها آخر ديري بالج على نفسج وتذكري ان عندج اكبر نعمه هي نعمه الامومه ولعيال غيرج يتمنون ظفر ياهل الله يرزق يارب كل محروم

 

[ريميه حلوه]

رد : حامل وآكل علاج .........؟

صادقه اختي ام لين والمشكله اني كان لي 8سنين محرومه من نعمة الامومه وبعد الله ثم العلاج حملت عن طريق اطفال الانابيب وجبت توم الحمدلله بس هالضيقه والاكتئاب وكثرة التفكير ووساوس خلتني مافرح بشي كنت اركض ادوره من 8سنين عشان كذا لجات للعلاج النفسي وش الحل طيب ياربي تراف بحالي وانا اللحين حامل وآكل علاج ماادري شيصير لاتركته يارب اتركه ولا ارجع له يارب ادعوا لي تكفون وا لله اني عايشه الحمدلله احسن عيشه ومو ناقصني شي مار ماني حاسه بهالنعمه الا لما آكل علاج ارتاح وانسى واعيش حياتي بس انا ودي اعيش حياتي بدون علاج
يارب يارب يارب اشفيني واشفي كل مريض

 

[نونه الزعفرانه]

ما تشوفين شر
الله يشفيج ويشفي كل مريض

 

[ام دليار]

رد : حامل وآكل علاج .........؟

الله يشفيج ويشفي كل مريض
روحي لعند شيخ خليه يقرا عليكي

 

[Diva-Q8]

رد : حامل وآكل علاج .........؟

شنو اسم العلاج اللي تاخذينه اذا ماتحبين تقولين عادي

بس كنت بسألج الدكتور لانه في انواع مادر بالحليب يعني مافيها ضرر على الجنين لاني انا بعد حامل واخذ علاج بس مو للاكتئاب والدكتور قالي اوقفه لانه يدر بالحليب يمكن نوع علاجج مايظر اذا تبين اسألج قوليلي اسمه بالعام او الخاص على راحتج

وعسى ربي يشافيج ويشافي كل مسلم

 

[ريميه حلوه]

رد : حامل وآكل علاج .........؟

عادي حبيبتي ديفا اسم العلاج الي آكله لوسترال 50جرام هذا النوع الوحيد الي يناسب للحامل بس مشكلتي الرضاعه ماودي احس بالحسره اضم طفلي وماارضعه بسبة العلاج واخاف ان تركته ترجع لي الحاله واكرهه واهمله

 

[Diva-Q8]

رد : حامل وآكل علاج .........؟

اذا تاخذينه فتره الحمل عادي مايضر عيل شنو المانع تاخذينه فترت الرضاعه ماسألتي دكتورتج بهل خصوص؟

وانا بعد بسأل دكتوري عن نوع هل حبوب اذا يدر بالحليب او لأ

 

[ريميه حلوه]

رد : حامل وآكل علاج .........؟

انا قريت النشره الي داخل العلبه انه مناسب للحامل ومو مناسب للرضاعه شكله يدر مع الحليب وانا صراحه موعد مراجعتي بعد اسبوعين عاد ان شاء الله لارحت للدكتور اساله وانتي ماقصرتي حبيبتي الله يوفقك ويرزقك الي تتمنيه

 

[حـنـيـن 83]

رد : حامل وآكل علاج .........؟

الله يشفيج يارب

 

[خارج الزمن]

حبيبتي قولي لدكتورج يمكن يوصف لج علاج ثاني
ديري بالج تقطعين العلاج مرة وحده اذا بتقطعينه اقطعيه بالتدريج الادوية النفسية بعضها وكثير منها غير ادماني

 

[الريشة]

منو الطبيب النفساني اللي تراجعين عنده؟
الدكتور بشير الرشيدي شكله زين لعلاج المشاكل النفسية
جربي روحي له يمكن يساعدك

 

[ريميه حلوه]

رد : حامل وآكل علاج .........؟

حبيبتي الريشه انا مو من الكويت ومشكوره على ردك ماقصرتي

 

[الباحثات عن الجمال]

أسال الله العظيم رب العرش العظيم أن يشفيكي .
شوفي يا حبوبه رجعي الطبيبة المختصه وهي تشوفي الشيء المناسب لكي وإن شاء الله عندها الحل