حمله لإسقاط الديون عن المواطنين

[غلطة حياتي]

حمله لإسقاط الديون عن المواطنين (الموضوع اخذ حقه بالنقاش)

بنات الواقع إللي قاعدين انعيش فيه مرير تري الحياة صعبه وإللي أصعب هذه الديون المتراكمه على المواطنين بصراحه البنوك قاعده تعطي قروض بالهبل يغطي ثلاث أرباع الراتب وين الحكومه عنهم ابلشونا بهالقروض والفوايد إللي مالها أول ولا تالي وشوفوا الغانم يعطيكم أقساط حتي لو مديون قد شعر راسك يبا هلكنا وهذيل الحريم إللي بالسجون والشباب بسبة الديون والشيكات بدون رصيد نبي حل نبي الحكومه تحط حد للبنوك والشركات بأن الأقساط عن المواطنين يجب ألا تتعدي الربع الراتب ونطالب بإسقاط الديون الكويتين أولا بصراحه (الأقربون أولى بالمعروف) بنات منو يأيدني0

 

[قـ(عيوني)ـرة]

والله ياعذاري انا معاج الكويتيين حالتهم تردت بسبب هالقروض والله مابارك بمعاشاتهم من هالشي والفوايد كل مالها وتزيد
المفروض الحكومه تحط حد لهالمهزله الي صايره
وان القرض مايتعدى ربع الراتب
وخل دهنا فمكبتنا
يطيحون القروض عن الي غزونا واستباحوا ارضنا واعتدوا على بناتنا وذبحوا عيالنا ولغوا اسم الكويت واستبدلوه بالمحافظه 19
وعيالنا الي دافعوا عنها ودفعوا دمهم فداها ماتطيح قروضهم!!
والله ظلم
((اذكر في فترة الغزو كل ماشوف كلمة الكويت المحتلة ابجي عند امي واقول ليش يكتبون جذي ))

 

[شدن76]

انا صراحة مااايد اسقاط الديون

شنو تحطون قروض على ظهوركم وتحملون نفسكم فوق طاقتكم شلي حادكم

كله عشان المظاهر وتعالي ياحكومتنا طيحي قروظنا

انا صراحة نظرتي مستقبلية نبي الكويت تتغير شوفوا الامارات شلون صارت مستشفياتهم الحكومية تقولين خاص
مدارسهم شوارعهم منتزهاتهم اهتمامهم بالدولة ككل

والله فرق

واحنا بس تفكيرنا بالديون والمنحة كل يوم مطلعين اشاعة فيه منحة جديدة​

​

 

[قـ(عيوني)ـرة]

حبيبتي شدن
انا ماانكر ان في ناس خذوا قروض لمظاهر جذابه وللسفر لكن في ناس كانوا محتاجين عمليات فاضطروا ياخذون قروض
بس اعتقد ان الغبي اهو الي مايستفيد من هالفرصه ويرد يحمل نفسه قرض ثاني
انا اشفق على الشباب الي تلقينه بالجامعه وفاتحين له حساب الشباب
والي بيكشخ بسياره جديده آآخر موديل واخرتها يتحسفون
عندج زوجي ما أخذ قرض الا واهو محتاج عمليه ولما راح يحط قرض سيارتي عليه رفضوا بحجة ان عنده قرض قديم
فحطيته علي

 

[بنت بلادي]

آنا ضد اسقاط الديون!

تدرون ليش؟

لأن احنا ناس ما علينا قروض شكو يطيحون عن اللي عليهم ويخلون اللي ما عليهم هاذي ما فيها مساواة أبد.

 

[كلي غلا]

بصراحة انا مع اسقاط القروض عن المواطنين

انا صراحة مااايد اسقاط الديون​

شنو تحطون قروض على ظهوركم وتحملون نفسكم فوق طاقتكم شلي حادكم​

كله عشان المظاهر وتعالي ياحكومتنا طيحي قروظنا​

انا صراحة نظرتي مستقبلية نبي الكويت تتغير شوفوا الامارات شلون صارت مستشفياتهم الحكومية تقولين خاص
مدارسهم شوارعهم منتزهاتهم اهتمامهم بالدولة ككل​

والله فرق​

واحنا بس تفكيرنا بالديون والمنحة كل يوم مطلعين اشاعة فيه منحة جديدة​

​

مع احترامي لوجهة نظرك بس انتى تفضلين اسقاط القروض عن العراق
احنا أولى بفلوسنا واحنا أولى انهم يسقطون القروض عنا
ترى 99 % من الكويتين كاسره ظهورهم القروض
تدرين ليش الكويتين يفكرون بمنحه لان فلوسهم كلها تروح للقروض
قرض للبيت وقسط أثاث وقسط سياره وقسط أجهزه كهربائية
يسقطون ديون العراق والكويتى يقعد طول عمره يدفع بهالأقساط ......

 

[bnt_kwt]

اي والله انا مع اسقاط القروض لانه احنا اولى بالاسقاط من العراق وغيرها
والحمدلله على كل صج انه حالتنا زينه وعال العال
بس في ناس الله يعلم بحالهم بسبب هالقروض وحلاته دهنا ابمكبتنا
والصراحه الكويت صايره عين عذاري تسقي البعيد وتخلي القريب

 

[Q8tya_GirL]

انا مع اسقاط القرووض احنا اولى بدال لا يعطون لعرق ما لعراق
لانه اغلب الكويتين عليهم قروض تكسر الظهر و يمكن 1% من الكويتين ما عليهم شي والله اغلبيتنا ماخذين القروض الا واحنا محتاجين هالقرض والمعاش ايي الشهر والا مافي شي والسبه البنك الركزي كل شوي وزايدين الفايده
ليش مستخسرين يعطون الشعب وحق بره طاقين الصدر

 

[( نـــور البيـــت )]

لا والف لا لإسقاط القروض
لان اللي يستفيد منها ناس وناس يعني اعيش على قد راتبي واضغط احياناَ على نفسي حتى لاأخذ قرض.
واخرتها اللي ماخذ قرض عشان يتكشخ ويسافر للنقاهة يكافؤنة بإسقاط الديون عنه.
انا مع شدن شوفوا مستشفيات الحكومة ومدارسها تقولين بافريقيا من عصر الطواعين،
فيه فائض زينوا فيه ديرتكم ابرك>>>الكلام للنواب
نبي مصافي لللماء +مولدات كهربه جديدة +مدارس سنعه تصلح للأوادم+توسعة للشوارع(جسور)+قطارات (اقل شي للي سيارته تمشي بالعزر )<عارفينهم>+جامعة تصلح للأوادم بعد(الى متى الشبرات المؤقته)+معاهد سنعه+إدارات تصلح لمراجعات الأوادم لها مثل الهجرة الجوازات....
تعبت!!!!!
مافيه شي سنع بهالديرة قولو لي شي صالح؟؟؟؟

 

[MaYoOoma]

ياليت يطيحون القروض والله

واللي تقول انا ضد اسقاط القروض لان فيها ظلم

انا اقول حمدوا ربكم مليون مره ان ماعليكم قروض

غيركم متنتف

ومو كل واحد ماخذ قرض عشان سفره والا كشخه

ماتدرون الواحد شنو ظروفه

والله بس لاتخلوني ابجي الحين :eh_s(2):

ان شاء الله تطيح القروض

 

[الغاليه نونو]

:eh_s(9): انا مع اسقاط القروووووووووووض بس يكون فيه موازنه بالموضوع يعني ماتنظلم ناس علي حساب ناس :eh_s(9):




متي متي متي تطيح؟ هذا السؤال

 

[بنت بلادي]

MaYoOoma كلمتج غلط شنو فيها ظلم!!

حبيبتي مثل ما في ناس منتفه من القروض في ناس ماخذه قروض علشان اترفه عن عمرها وفي ناس عندها احتياجات وايد وحارمه نفسها لأنها ما تبي اتحط على ظهرها قروض فما يصير يتساوون كلهم مع بعض أبدا!

اذا الحكومه بتطيح القروض لازم اتعلمنا قبلها علشان هم احنا ناخذ قروض حالنا حال العالم!

والا خل يعطونا فلوس كلنا بالتساوي علشان ما ينظلم أحد.

 

[غلطة حياتي]

بنات مع احترامي للأخوات اللي قالوا لا لإسقاط القروض بقولهم شي:

1- أول شي انتو ما تدرون بضروف غيركم إللي حدتهم الظروف لأخذ هذه القروض وقولوا الحمدالله والشكر لأن الله ما بلاكم بهالقروض0

2- حب لغيرك ما تحبه لنفسك حبوا للناس الخير خل يطلعون الكويتين من السجون أنا ما اقولج اهم مو غلطانين لا غلطانين ونص بس الله يسامح احنا ما نسامح والإنسان مو معصوم الغلط حرام عندهم عيال وبيوت وقاعدين بالسجون

3- عن مبدأ خل يسوون مستشفيات سنعه ومدارس سنعه بدل اسقاط القروض ، احنا مو ضد العمار وازدهار الكويت بس الكويت والحمدالله بخير ونعمه قاعده تطيح ديون العالم حبكت على الكويتين والشيخ جابر رحمة الله عليه طيح الديون ايام الغزو وإللي ماعنده اديون ما طالب الحكومه بالمساواه0

وسلامتكم ولا يزعل مني احد ولا ابي تزعلون من بعضكم كل واحد حر برأيه خلكم ديمقراطيين

 

[الحــبـ كذبــهـ]

كلناااااااااااااااااااا معاج بس هالحكومه الله يهداهم بس توزيع بفلوسنااااااا على اللي يسوي واللي مايسوى ويقولن لك يصير عجز مالي

طيب اذا اسقطت ديون العراق مايصير عجز مالي شي يقهررررررررررررر والله

حسبي الله ونعم الوكيل

 

[خبيرة اعشاب]

خير الكويت للكويتييييييييين

انتم لازم تلقون نظره اول شي على العوايل اللي ما يبقا من معاشاتهم الا 100 دينار يعيشون فيها 6 افراد ....

وين الحكومه عنهم ؟؟؟؟؟؟؟؟

في ناس توقفت حياتهم بسبه القروووض ...و انا اخو زوجي كان سوا حادث و اضطر يدفع ديه 60 الف دينار ..حطها قرض على ظهره غييير قرض السياره فالحين معاشه تنتف ما يبقى منه شي ..و صارت مشاكل بينه و بين زوجته و طلقها و راحت لاهلها ..و بالتالي تشتت اسره كامله بسبه القرض هذا ...

في حين ان خزينه الكويت تذخلها ملايين الدولارات يوميا ..و ديون الشعب كلها ما تتجاوز المليار و نص ليش ما يدفعونها مع العلم ان نص البنوك في ملكيه الحكومه يعني رح يدفعون مني و ترد لهم فلوسهم مني ...

المواطن الكويتي مو شايف من البترول اي شي ..ما عدا ملاليم يقطونها عليها كل سنه و الثانيه ..

صراحه انا اشوف ان اسقاط الديون ضرووره ...ما عليها اي اشكال ..

 

[kokotaa]

السلام عليكم ورحمة الله وبركاته
أنا الصراحة مع اسقااط القرووض .. إحنا صج أولى من غيرنا بإسقااط القرووض وبالنسبه حق إللي ما يأيدون إسقاط القرووض أقول لهم إحنا أولى من غييرنا ولما أخذنا قرووض مو حق التفلسف وكسار الظهر خذيناها لأن عندنا ظرووف يمكن علاج بالخارج يمكن ديون ... ويمكن ويمكن .. ولا شرايكم ؟؟​

 

[قـ(عيوني)ـرة]

والله صاجه عذاري
تذكرون برنامج السنعوسي عن المسجونين بسبب القروض!!
الله يفرج همهم

 

[بنت الحزن]

ياليت يطيحون القروض

 

[أميرة الورد]

ايه والله جان زين يطيحون القروض وكلامج يا athari كله على راسي شدعوة اللي ماتبون القروض اطيح يعني المديونين مو كويتيين اخوانكم ؟؟؟ما تبون لهم الفرج من هالكربه والله العالم شنو النتايج اللي بتنتج عنها هذي الخطوة قصدي نتايج ايجابية واللي ايده بالماي مو مثل اللي اييده بالنار

والله يفرج عن كل كويتي وكويتيه قولوا آمين

 

[حلم السنين]

ان شاءالله تطيح ونفتك من القروض وبلاويها