بنت المنصور
New member
- إنضم
- 6 نوفمبر 2009
- المشاركات
- 1,706
- مستوى التفاعل
- 0
- النقاط
- 0
الموقف هذا صار من 3 سنوات تقريبا وحبيت اشاركم فيه .....
قبل 3 سنوات كنت مسافره لاحد الدول الخليجيه انا واهلي وكان عددنا مو شوي يعني كبييير المهم ثاني يوم
من وصولنا الديره كنا ماخذين اكثر من شاليه وقاعدين فيهم بما انو العدد كبير يعني فصار كل عايله بشاليه
والحمدالله ان لقيناهم جنب بعض فتقدرون تقولون ان سوينا لنا فريج لنا بروحنا مع ان كان فيه اكثر من شاليه
بس كنا كلنا نيمع بشاليه واحد بس لان احنا يايين عشان نجتمع مو عشان كل واحد يقعد بشاليه بروحه
فكنا طول اليوم مع بعض ولما اييي وقت النوم كل واحد يروح الشاليه الخاص فيه ، ترتيب الشاليهات شلون كان
كانو على طول البحر طبعا وكلهم جنب بعض المسافه بينهم قريبه نوعا ما حنا كنا ماخذين 4 الي بنص
وبما ان حنا بالنص فيعني اول واحد من مجوعتنا يكون الي جنبه شاليه غريب واخر واحد بالمجموعه بعد
الي جنبه شاليه غريب يعني مانعرف الناس الي فيه ا،لشاليه مالنا كان بالنص والجمعه كانت تصير في هو
لان كانت يدتي معانا وبما انها اكبر وحده فكان الكل يجي عندها وتصير اليمعه عندنا لي الفجر ، ظلينا
بالمكان هذا تقريبا اسبوع وانا من اول يوم انتبهت لريال كله بروحه ومايكلم احد
وكبييييير بالسن بس يبين عليه انه مهتم بصحته كل يوم الفجر اشوفه يقوم يمشي له ساعه ويرجع الشاليه ماله
الي ما ادري وين يكون اصلا هادي ماله شغل بغيره وكان محترم واااايد وسبحان الله مايطلع الا في ويهي
مرت اول ثلاث ايام تمام عادي كل شي كان اوكي وحلو اليوم الرابع كالعاده الجمعه عندنا ومجتمعين
وازعاااج ويهال وانا كنت ابي اصلي العشا وما ادري ليش باليوم هذا بالذات العفسه زاايده وكانو يلعبون الكبار
مع بعض والصغار مع بعض وبنفس الوقت!! فمتخيلين قوه الازعاج وانا ابي اصلي مو قادره فقلت بطلع
بروح شاليه عمي الي جنبنا بصلي فيه طلعت ولما قربت من الباب تونه ابفتحه انتبهت انه بالداخل فيه صوت
شباب ويبين من الصوت ان عددهم كثييير فنزلت ايدي مافتحته وتوني بلف بمشي الا ولد عمي فج الباب
وطلع لي وسكره قال لي انا انتبهت ان في احد ورى الباب شفيج فيج شي قلت له لا لا بس كنت ابصلي وهناك
ازعاج قلت اييي هني وانا ما ادري انك موجود مع باقي اولاد عمامي بالشاليه هذا على بالي انكم طالعين يعني
عموما خلاص برجع بصلي هناك قال لي لا نطري روحي صلي بشاليه عمي ولحظه ابي اييب لج المفتاح
وبيي معاج وشاليه عمي هذا كان اخر واحد بمجموعتنا والشاليهات الي جنبه كانت كلها فاضيه او هذا ماكنا حاطين
في بالنا انها فاضيه بس طلعت لا عموما فكان شكله وهدوءه يخوف عشان جذي ولد عمي قال لي بوصلج
للباب قلت له اوكي نطرت وطلع هو ومعاه المفتاح ورحنا نتمشى ليما وصلنا له وفتحه لي وانا دخلت
وهو رجع الشاليه الي كانو مجتمعين فيه ، الشاليه كان مظلم وهاادي وانا داخله اسمع صوت البحر
دخلت وفرشت سيادتي ابصلي وانا توني ابصلي انتبهت ان الشاليه الي جنبه انفتح فيه ليت استغربت
لان مثل ما قلت لكم كلنا كنا حاطين في بالنا انه فاضي فلفيت ويهي اشوف من الجام لمحت احد يمشي بالشاليه
عادي رجعت لسيادتي وصليت وخلصت وطبعا قمت وما ركزت منو بالشاليه ولا شي طفيت النور وطلعت وانا
عند الباب ابي اقفله ريال طلع من الشاليه الي ولع منه ليت بس انا مالفيت ويهي قفلت الباب وانا انزل من الدري
الريال يقول لي حرما ان شاء الله !!!! لفيت اشوف منو هذا طلع نفسه الريال الكبير وهو ينطرني ارد عليه انا
لفيت عيوني على الشاليه الي هو كان ساكن فيه والي كان واضح ان بس هو الي ساكن فيه فكنت اسال
نفسي الشاليه كبير وهو فيه بروحه وانا دايم اشوفه بروحه امممم الريال هذا ما ادري بس ماعجبني وضعه
وهو للحين واقف ينطرني ارد وانا عيوني ليما الحين على الشاليه وبعدين هو انتبه علي فلف هو يشوف
الشاليه ماله وقال لي في شي؟ انا هني انتبهت عليه لان كنت سرحانه قلت له لا ابد سلامتك ومشيت
وانا امشي قال لي ( يابنيتي انتي جم عمرج ) وقفت انا ولفيت قلت دام بداها بكلمه بنيتي وهو كبر يدي
حرام خل ارد عليه قلت له عمري 21 وقتها قال لي العمر كله قالي ممكن اسالج سؤال ؟ قلت له خير
قال لي ليش صليتي !!!!! قلت له نعم ؟؟! قال لي اسالج ليش صليتي ؟ قلت له اذن العشا وصليت يعني
هذا سؤال قال لي لا فهمي سؤال بوضوح قلت له انت تكلم بوضوح عشان انا افهم بوضوح قال لي ليش تصلين!!
انا قلت بقلبي على طول هذا يا سكران يا شام له شي يا ماهو بطبيعي بالوقت الي انا كنت افكر التفكير هذا
هو تكلم وقال لي مو عارفه تردين علي صح ؟ توهقتي؟ قلت له لا ماتوهقت بس انا ماكنت افكر بكلامك اصلا
انا كنت افكر بالسبب الي خلاك تسال السؤال هذا اصلا . ضحك وقال لي انا ما اصلي ! قلت له جد؟ قال لي
اي قلت له اوكي قواك الله ولفيت عطيته ظهري ومشيت قلت بقلبي هذا شكله يبي يسولف مو عارف شلون
قال لي ما سالتيني ليش وانا امشي وماعطته ظهري ومكمله
طريجي قلت له مايهمني جان يقول لي انتي تصلين عشانج مسلمه صح ؟!! قلت بقلبي بدينا بالاستهبال الحين
وبعد مالفيت ويهي ومكمله طريجي وانا امشي اقول له ماشاء الله عليك فطين ، ضحك وقال ماسالتي نفسج
ليش انتي مسلمه !!!!
ليش انتي مسلمه
ليش انتي مسلمه
وقفت ومالفيت ويهي له بس وقفت وماعطته ظهري واسال نفسي السؤال هذا وقعدت افكر قلت بقلبي انا مسلمه لاني
مؤمنه بالله ورسوله ولاني مؤمنه بكل شي مذكور بالقران بالوقت هذا هو قرب مني مشى ولما وصل لمقربه مني
قال لي انتي مسلمه عشان اهلج مسلمين وبس ! سكت قال لي الديانه بالوقت هذا صارت شي وراثي الي ابوه
وامه مسلمين هو يطلع مسلم والي امه وابوه مسيحين هو يطلع مسيحي والي ابوه واومه علمانين يطلع علماني
و و و و غيرها من الديانات قلت له العلمانيه صارت ديانه بعد ؟ ضحك قال لي لا تتدققين يا بنيتي بس اقول لج
يعني انو اتجاه من الاتجاهات الي موجوده بالعالم ....
بالوقت هذا مرو شباب وبنات وكان لبسهم مو شي ويبين انهم ياين يخربطون ومشيتهم مع بعض
والطريقه الي كانو ماشين فيها ويعني كل شي كان يوحي انهم مو شي ولما طافونا قال لي
هذول مسلمين يعني ؟ هذول اسمهم مسلمين بس هم لا قلت له العيب مو بالاسلام العيب فيهم
قال لي يا بنتي انا عمري 62 سنه وليما الحين ما اعرف ليش الدين صاير وراثي وعشان جذي
انا صرت علماني فقلت له وانت جذي ريحت نفسك يعني ؟ قال لي طبعا لان انا جذي ما امشي ورى اي شي
ولا اصدق باي شي ولا اكون بديانه ضد ديانه وبالاخير ماندري منو الصح ومنهو الغلط كل ديانه تقول
ان هي الصح ولما كنت اسال الناس اغلب اجابتهم تكون انا مسلم لان ابوي مسلم والثاني يقول
لان ابوي مسيحي انا صرت مسيحي ..... الخ وحتى الي يقول انا مؤمن هو مؤمن لانه اهله مؤمنين مو لانه
هو فعلا من داخله مؤمن قال لي انتي تشوفين مسلمين بمعنى مسلمين بهالزمن ؟ قلت له شدعوه اي لو خليت خربت
اكيد في وبعدين مو كل شي بالدنيا تاخذه بمسطره وقلم ومو لازم كل شي يكون علمي وثابت وجدام عينك الله
ما شفناه بس بالعقل عرفناه وبالدين وبالايمان بس ما اظن ان واحد من هالثلاثه اشيا عندك . بالوقت هذا
ولد عمي طلع ولما شافه يكلمني جاني وقال لي خير في شي قلت له لا ولا شي ومشينا انا وولد عمي وانا امشي
مع ولد عمي قال لي ضايقج بشي هذا؟ قلت له لا لا حرام ريال كبير بس كان ناقصه شي بالشاليه وعطيته
من شاليه عمي ومشيت ورجعت شاليهنا ..........
ادري طولت عليكم واااايد بس ابي رايكم هل احنا صج مسلمين بالوراثه وبس ؟َ! يعني لو انولدنا
بدون ديانه وخيرونا وقالو لنا اختارو شنو بنختار ؟؟!
ملاحظه: الي بترد تقول لي الحمدالله على نعمه الاسلام وبس افضل انها ماترد وتاخذ مساحه على الفاضي
ابي ردود تبرد قلبي شوي الله لا يهينكم .....
