خاص بأطفال التوحد

[ريحانة_14]

رد : رد: خاص بأطفال التوحد

هلا فيج حبيبتي الريم ..

بنوتج صغيره الله يحفظها .. فحصتيها إذا في ماي ورا إذنها والا لأ ؟
بنت أختي الله يحفظها ماكانت تتكلم ولا كانت تقدر تعبر عن إللي تبيه ودايما تبجي
أثاري في ماي وره أذنها الثنتين وسمعها ثقيل .. سولها عملية شالوا الماي من وره أذنها وإسم الله عليها الكلام عندها تطور لأن توه صارت لها فرصه إنها تكتسب لغه
إذا الطفل مايسمع من وين بيكتسب اللغه ؟؟

بس ماقدر أحددلج الحين إن إللي فيها توحد والا لأ

وطمنينا عن بنيتج الله يحفظها

o<الريم>o<, post: 14087987, member: 14756"]خبيبتي انا عندي بنتي عمرها سنه و9 شهور ما تتكلم بس بين فتره وفتره اسمعها تقول ماما وبابا يعني بالشهر مره تقولها بروحها بس اقعد معاها احاجيها وهي لا مبالات بالمره انزين وهي عندها رخاوه بالجسم كله ما تمشي للحين اول ما جبتها كان فيها خلع والحمدالله حطيتلها الجهاز لمة 6 شهور وبعد ما شلت الجهاز نطرت عليها ما تحبي ولا تزحف ولا تحاول بالمره ولا تناغي وطلع اصوات نفس اللي بعمرها بس لاحظت عليها شغله كلا تعظ ايدها اذا عصبت واذا شلتها من شي تبيه تحاول تعضني بشكل مو طبيعي
اهي اللحين قام تزحف مثل الجيش بس ماتحبي مثل القطوه >>كلام الدكتور
انا اللحين اوديها علاج طبيعي وعلاج بالعمل
مرات احسها ما تسمع تكون في الخيمه مالت الالعاب ومعطتني ظهرها اناديها واصرخ ما تلف الا نادرا وسويتلها فحص للسمع الدكتور حط الجهاز على اذنها اليسار ما تلف بالمره وعلا الصوت وهمن ماتلف بالمره وسوالها على اذنها اليمين لفت عادي وبعدين رد على اليسار ولا تلف بسرعه >> ما ادري يعني اهي استيعابها بطيء
مرات عليها نظرااات اتخوف احسها اكبر من عمرها بواجد بس بالخز تخز بطريقه ما ادري مرات اخاف منها
تقوم من النوووم تبجي حييييييل واذا جيتها وشلتها تكون شاده جسمها حيل وجنها ما تحس فيها يالله تستوعب اني عندها
ما ادري اذا هذا التوحد ولا لأ لاني مو عارفه بنتي شنو فيها
حدي خايفه

 

[ريحانة_14]

رد : رد: خاص بأطفال التوحد

ياحبي لج

لاتقاطعين بس هذا اللي بقوووله

بعد عمري والله يالذاهبه
كاني بين الأيادي وإن شالله ما أقاطع :eh_s(7):

 

[الصابرة المحتسبة]

رد : خاص بأطفال التوحد

هلا وغلا بالغالية ريحانه

عساج على القوة يارب ويعل كل اللي تسوينه في ميزان أعمالج.

 

[ريحانة_14]

رد : خاص بأطفال التوحد

بعد عمري ( الصابرة المحتسبه ) فديتج والله

أجمعين يارب العالمين

وعيدج مبارك ياحياتي

 

[حوري2004]

رد : رد: خاص بأطفال التوحد

مرحبا ريحانه
انا مو عارفه درجة التوحد اللي عند ولدي شلون اعرفها ممكن تدليني وين ارح بالضبط وابي اعرف نوعه بعد
لاني مرات احسه ان شاء الله طبيعي ومرات لا ذابحني هالشعور المتخربط

 

[ريحانة_14]

رد : خاص بأطفال التوحد

مرحبتين حبيبتي حوري

حياتي جم عمره ولدج إسم الله عليه ؟

وإذا متأكده إن فيه توحد وبس تبين تعرفين درجته

وديه عند دكتورة عبير عوض

وإن شالله مافيه إلا العافيه

وحياج الله حبيبتي

 

[shadona]

رد : خاص بأطفال التوحد

السلام عليكم ..

نصيحة حق خواتي اللي يعطون وصف حق حالة عيالهم و يبون تشخيص !!!

حبيت اقولكم خواتي الامهات ترى هالمنتدى بكبره ما في دكتور او دكتورة متخصص بطب الاطفال التطوري !

واللي موجودين كلهم امهات نفسي يحبون يعرضون تجاربهم و خبراتهم للاستفادة من بعضنا لا اكثر و لا اقل !

و اللي موجودين اهني اخصائيييين يمارسون تعديل سلوك فقط و ليس دكاترة و يعطون تشخيص و وصف ادوية حق عيالكم !

اصلا حتى عبير عوض و فاطمة العوضي اللي اهم الوحيدين بالكويت اللي مهنتهم اطباء اطفال - طب تطوري !

ياخذون ساعة و نص .. يقعدون مع الياهل عشان يتاكدون من التشخيص الصحيح و بالتالي يعطون و يحددون العلاج المناسب لحالتهم

لانه الصفات متشابهة سواء طيف التوحد او توحد او بس نشاط زايد مع قلة تركيز او تخلف دراسي او عقلي

الاعاقات كثيرة و احيانا صفاتها متشابهه و متداخلة و مشتركة وااايد و لكن الدكتور الدارس و المتخصص اهوا للي يقدر يفرق

فنصيحة خواتي راجعوا الدكاترة المختصين احسن ما احد يفتي عليج و يطمنج و الولد فعلا محتاج مساعدة و تحسفين انج ما بكرتي بالعلاج عشان يستفيد اكثر

او العكس يطلع ولدج صاحي ما فيه شي وهما يخرعونج و تدخلينا مدرسة الخطا مثلا .. انتبهوا يا خواتي الامهات اليدد عيالكم امانه

و رجااااء لحد يفتي وهو مو دكتور مختص و لا مارس مهنة دكتوراه بالطب التطوري .. الموضوع مو هين

 

[ريحانة_14]

رد : خاص بأطفال التوحد

يعطيج العافيه أختي شدونه وماقصرتي

ملاحظتج مهمه

شاكرتلج مرورج

 

[shadona]

رد : خاص بأطفال التوحد

يعطيج العافيه أختي شدونه وماقصرتي

ملاحظتج مهمه

شاكرتلج مرورج

يا هلا الله يعافيج .. والله ما قلتها الا من حرصي و لاني شفت وايد امهات محتارين مساكين بحالة عيالهم و يسئلون اهنيه فقلت لازم نوجهم حق المكان و الشخص المختص :rerrerek:

 

[ريحانة_14]

رد : خاص بأطفال التوحد

صاجه ياحياتي

لازم إلي يشخص يكون إنسان مختص .. مو أي واحد
وإنتي ماقلتي هالكلام إلا من باب حرصج على الأمهات وأطفالهم الله يحفظهم
ومن باب إحساسج إنج مسؤوله

الله يكثر من أمثالج حبيبتي

 

[ام التوحد]

رد : خاص بأطفال التوحد

مرحبا ريحانه شلونج
بعد قلبي انا سويت القميص والزرارات حطيت اول واحد كبير واصغر فاصغر تصدقين يصكرهم بسهوله فاجأني بس صعب انه يفتحهم بعد قلبي وانا ما كنت افكر اشتري شي في زرارات حقه ابي البسه الجينز الحين ابو كرشه :eh_s(9):
ومازال التدريب مستمر
ماكو افكار ثانيه

 

[ريحانة_14]

رد : خاص بأطفال التوحد

هلا وغلا أم التوحد

بعد عمري فديته صدمج عيل بقدراته
الحين عيل جربي معاه شلون يربط جوتي الرياضه

وإن شالله خلال جم يوم بحاول أفكرلج بأنشطة ثانية ياقلبي

 

[ام ادهم المصريه]

رد : خاص بأطفال التوحد

السلام عليكم للاخت ريحانه ومشكوره علي موضوعك الشيق والمفيد طبعا واللي حيفيد من الاهالي حديث العهد بمرض التوحد انا ام ادهم المصريه من مصر وابني طفل توحدي سنه الان 13 سنه واعجز معه في دخول الحمام بالنسبه للبراز خاصه فهو يذهب في حاله البول لكن البراز لازم يلطخ نفسه وما يقول انه فيه شئ لكن بيقعد ويكمل لعب وعادي جدا بالنسبه له كأن لم يكن شئ ارجو اجد لديكي برنامج اتبعه لهذا الموضوع حيث ان العلاج في مصر بالنسبه لهذا الموضوع غالي ومكلف لانه عباره عن معسكرات بعيده عن بيت الاهل وانا والحمدلله لقد اخذوا مني تجار الالم في مصر ما هو ثمين وغالي ولم يتبقي شئ لدينا للدخول في كثل هذا البرنامج ولكي مني تحياتي وارجو ان اجد منك رد في اقرب فرصه تحياتي مره تانيه

 

[ايطاليه]

جزاج الله خير حبيبتي ماقصرتي

 

[ريحانة_14]

رد : خاص بأطفال التوحد

أختي أم أدهم .. راح أتواصل معاج عما قريب .. أرجو منك الإنتظار لأن أبنك يحتاج طريقة تدريب محددة ومرسومة بالخطوات

================

أختي إيطالية .. شاركتلج مرورج يالغاليه

 

[أم حمـاده]

رد : خاص بأطفال التوحد

السلام عليكم

أختي ريحانه الله يخليك ياليت تجاوبيني أنا الدكتور صرف لولدي علاج اسمه risperdal

كثير متخوفه منه يقول أنه يهدي الطفل ويقوي التركيز 3 استشاريين انصحوني به

عندك خبر عنه لأني بين نارين أخا ف أعطيه ويضره وأخاف ماأعطيه وأتحسف اذا كبر


أنا أنتظرك

 

[ikilled barbie]

رد : خاص بأطفال التوحد

موضوعج رائع
وجهدج مشكور عليه
الله يجعله بميزان اعمالج
بارك الله فيج اختي

 

[جيفارار]

رد : خاص بأطفال التوحد

استاااذتنا جزاك الله خير على تبرعج بالرد على الاخوات
وان شاءالله بميزان حسناتج
اختى ياااااا ريت لو تشوفين طريقه تحاضرين فيهاااا برياض الاطفال
لان من الملاحظ هالمرض منتشر والاهالى ما زالوا ما يعترفون فيه والضحيه الطفل ؟؟
مع العلم ان فى حالات كثيره شفت من وعى اهلهم ومتابعتهم من الصغر
قدموا طلب جزاكم الله خيرررررررررر لوزاره التربيه بعمل
محاضرات برياض الاطفال

 

[ريحانة_14]

رد : خاص بأطفال التوحد

شرفتيني بمرورج أختي الغالية جيفارا

ياريت والله عندي وقت إني أحاضر وأعطي محاضرات بكيفية وضع الخطط التجريبية للأمهات بالبيت يدربون أطفالهم على المهارات الإجتماعية ومهارات العناية الذاتية على وجه الخصوص لكن بصراحه صعب علي جدا بهالوقت ..

وبالنسبة لي في مدرستي الثانوية ألقي محاضرات على طالباتي لتعرفيهم بإعاقة التوحد .. وتواصلت مع كثير من طالباتي إلي عندهم أخوات وأخوات توحد وتواصلت أيضا مع أمهاتهم والحمدلله رب العالمين صارت لي الفرصة إني أعلمهم الكثير من المهارات ماشالله

أمممممممممم

وإذا في روضة معينة إنتي تتواصلين معاها ماعندي مانع ألقي فيها محاضرة عن التوحد لكن بشرط تساعدوني بترتيب سير المحاضرة والبوربوينت

لأن بصراحه ماعندي وقت كلش

لكن لعيونج ماراح أردج

وشاكرتلج مرورج عزيزتي

 

[الصابرة المحتسبة]

رد : خاص بأطفال التوحد

يعطيج العافية

وتستاهلين الشكر والتقدير يالغالية