خبيرات المانيا والنمسا ساعدوني

[هــــامــورة جنيــف]

مرحبا بنات حبيت اخذ رايكم انشالله ناوين نصيف انا وزوجي مابين ربوع فيينا وزلمسي وميونخ ..
حاجزين 12 يوم
الروحة كويت الى دبي ترانزيت 4ساعات عقب فيينا
والردة من ميونخ الى دبي نقعد في دبي تقريبا يومين وبعدين من دبي الى الكويت
السؤال هني ؟؟
جم يوم تقترحون نقعد في فيينا؟ زلمسي ؟ ميونخ ؟
واالي راحوا ميونخ ينصحوني امر على كولون او ديسلدورف ؟

ثانكس ​

 

[Tender Heart]

هلا حبيبتي انا باقترح عليج الفتره في كل مدينه .... فينا 5 يام \ زلمسي 7 ايام \ ميونخ 4 ايام لان زلمسي بصراحه جوها حلو مو نفس فينا معتدل لا يميل للبروده وفيها وايد رحلات مثل : البحيرات السبع والزحلاقيه الصيفيه وقريه الملح ومصنع الشوارفسكي و ثلج جبال كابرون ناسيه اسمهم بس مرتفعات كابرون وعندج بعد سالزبورغ تروحيلها من زلمسي ورحله فلوج بلاتز تركبين طياره صغيره بروحج معع الطيار يعني وايد انشطتها غير طبعا القعده جدام فندق جراند عند البحيره والقوارب ياحلاتت زلمسي ... بالنسبه لفيينا سوقها ايهبببل وعندهم مدينه ملاهي روعه حق اليهال ناسيتها لان من زمان رايحه فينا مو مع زلمسي ومبانيها عجييييييبه صج منطقه نظيفه عندهم جمعيه كبيره اسمها بيلا تلقين كل شي تبينه هناك .. بالنسبه لميونخ مارحت رحلات وايد لها غير اليوروب بارك مع انها بعيده وايد عن ميونخ بس كنت مصممه اروحلها يعني تبعد ست ساعات عن ميونخ في القطار احلى شي في ميونخ سوقها ايهبل عندج المارين بلاتز شارع فيه اسواق طبعا كل اللي تبينه فيه وعندح شارع الماركات ماكسيميليان ستريت وفي اوت لت بس ناسيه اسمه القريه اللي فيه شن شتاين او شي جذي بالنسبه لكولون ودوسلدورف مارحتلهم بس لما رحنا يوروب بارك مرينا منهم بالقطار مانزلنا وشفتهم جنها مناطق ريفيه وماعجبتني بصراحه لان كنت راجعه من زلمسي وعقبها عفت كل المناظر لانه صج زلمسي جنه ولاتنسين روحي من زلمسي اخنسي عجيييييييييييبه رحله سعيده

 

[& الذاهبه &]

فيناا لاتطولين فيها مافيها يومين كاافي عليهاا
زلمسي خمس ايام اطلعي منها يوم لسازبورغ تهبل اهي اللي صور فيها فلم لحن الحياة ويوم لأنسبورك اللي فيها مدينه الشوارفسكي
ميونخ اربع اياام
يوم دخلي جارمش بالمخطط لأنها تهبل فيهاا بحيره اسمها ابسي تهبل


وبالتوفيق يا الغلا

 

[louraa]

زال ام سي كل اللي يطبها تعجبه وشكثر اللي يروحنلها جم مره
الله ذكرتنيtender heart بالكراسي اللي مجابله البحيره وفندق جراند
عا اهناك انأجر قواري اول شي كنت مستحيه بعدين قلت خنستانس
ونتمشى بالقواري عالبحيره وتاكللين البرد و توكلين البط ووووااااي:dddds:

عاااااد بالذات زل ام اس كله خليجيييين تمشين وتسلمين ميزه وعيب لووول
اذا انتي من النوع اللي يحب يشوف العرب بكل مكان راح تستانسين ...

اهم شي روحي الزحلاقيات اونسون تتزحلقين بسرعه الحشيش يمج و الصعدات وناااسه اسمه

فينا حدها 4 اياام
فيها اطول نهر ماردري شلال بس صعدته اتعب لوووول من زود اللياقه
روحي قصر الشامبرن عجييب
وفي ملاهي حلوه هناك
وسوقتها حلوه

ميونخ انصحج تقعدين اب فندق الهوليدي ان
مع ان ازعاج والعرب اموصخين المكان
بس شنو ميزته ان تحتتج ال UNDER GROUND ابد يقطج على المكان اللي تبينه
وروحي محطه المارين كله اسوقه انواع واشكال ماركات وعادي
و هم في رحله بميونح حق جبال ثلجيه اسمها قارمش

 

[كعبية]

اعتقد يكفي علي كل وحدة 3ليالي ولاتطوفين كولون ودوسلدورف حلوين

 

[سنعة مسنعة]

نصيحتي فيينا لاتطولين فيها تملل
وزل ام سي حلوة وتونس بس هم مو مالت تقعدين فيها وايد
ميونخ مالت سووووق
ونصيحتي لاتطوفين دسلدورف وكولون
دسلدورف راقية وحلوة
وكولون سوقها عجيب

 

[هــــامــورة جنيــف]

طيب جم تبعد دسلدورف وكولون عن ميونخ؟ يكفي يوم كامل بس الاقامة تكون بميونخ طبعا ؟؟؟

 

[fa6m al-s]

مشكورة اختي على الموضوع لان حتى انا محتاجة نصائح البنات لان بروح نفس المناطق الي تبين تروحين لها

 

[عصير ليمون]

مرحبا

بصراحه من رأي لا تطولين في كل مدينه تروحين لها حدها 4 أيام صحيح حلوه زلامسي وما
تملين منها ،، بس لأنك رح تاخذين جوله في كذا مدينه فأنصحج كل مدينه تمرين علهيا 4 أيام
أنا لما رحت ألمانيا قعدت في جارمش اسبوع فلما رحت زلامسي بعدها كنت حدي ماله ، ومالي خلق من كثر ما طولت في جارمش ،، مع أن زلامسي طبيعه خياليه ،، ​

زلامسي وما أدراك ما زلامسي ،، جنه الله على الأرض ،،،، ​

 

[sara_77]

مرحبا بنات حبيت اخذ رايكم انشالله ناوين نصيف انا وزوجي مابين ربوع فيينا وزلمسي وميونخ ..
حاجزين 12 يوم
الروحة كويت الى دبي ترانزيت 4ساعات عقب فيينا
والردة من ميونخ الى دبي نقعد في دبي تقريبا يومين وبعدين من دبي الى الكويت
السؤال هني ؟؟
جم يوم تقترحون نقعد في فيينا؟ زلمسي ؟ ميونخ ؟
واالي راحوا ميونخ ينصحوني امر على كولون او ديسلدورف ؟

ثانكس ​

فينا مافيها الا متاحف وقصور وجوها حاار يكفيها 3 ايام وزلمسى جوها حلو وطبيعه عجيبه ويكفيها 3 او 4 ايام عشان تروحين الرحلات اللى بكابرون مثلا كولون مافيها شى وديسلدورف سوقها حلو ويكفيها زياره يوم او تقعدين فيها يومين

 

[.. مـــلاكـ ..]

واااي يا حلاااات زلامسي

انصجح قعدي بزلامسي 5 اياااام طبييييعة واتينن ما تملين منها
وفينا 3 اياام
وميونخ تكفي 4 ايام لأنها سوووق

رحلة سعيدة

 

[سنعة مسنعة]

دسلدورف وكولون واااايد بعيدين عن ميونخ
يبيلهم طيارة مو قطار