خبيرات سويسرا تعالوو شويه

[FeShinGoOo]

بنات الي بيروحون المانيا ترى الجو بارد الناس مشتيه وانا وريلي كله صيفي اندقرنااا ديرو بالكم عالاقل يبو جاكيت خفيف او شال

 

[قلب عشتار]

ام ابيها شهر يوليو عفيه بلغينا برد والا حر انا منقرصه من المانيا كله موجه حر بويهنا

 

[FeShinGoOo]

قلب عشتاار اتصدقين صج قرصه اول يوم بالمانيا كانت الناس مشتيه وجاكيتيااات الي اهو تاريخ 1-6 ثااااااااااااني يوم طقوهاا شورتات وعلاق حررررررر خييييييييييييييسه ماكنت اقدر انامم من الحر وااااااي فرق بين جوهم وجو سويسرا بس اخر يوم طلعنا منها الي اهو امس كانت اتطمر بس ماكان برد نفس اول يوم بشهر 6

 

[قلب عشتار]

الله يعينج حبيبتى قلبى معاج ياربي الواحد يسافر ينفه عن نفسه نبي براد وجو حلو نهد ديرتنا اللى اليوم الظهر 52 الحراره
انا اذكر سكنت بميونخ فندق هوليدى ان وكان حر والتكيف كبر علبه كلينكس صغيره ومكانها تحت الشباك
تخيلى اذا سكرتى البردا عن الشمس يتسكر عليه (المكيف) واذا بطلتيها تيييك الشمس الحارقه عاد تدرين نهارهم طويييييييييييل واذا بننحاش نروح الحديقه الانجليزيه نلقى المفاصيخ زلط ملط عمى بعينهم عمى موخوش ذكرى

 

[فله]

ام ابيها شلون الجو بسويسرا
واذا انت فيها اوصيج ع شلالات الراين وهايدي لاند وفي لوقانو حديقة سويسرا المصغره
واي شي عن سويسرا انا حاضرة

 

[شغفـ]

صح كلام البنات ..ستراسبورغ شي مو طبيعي وحرام ماتروحين لها ..
تهبببببل

 

[Espaniya]

هااي حبيبتيزيورخ : تقدرين تروحين منطقة تيتليس titlis تصعدين بالتلفريك وهي قمم ثلجيه
2- مصنع الشوكلاته Maestrani
3- قمة ريقي Rigi the queen swiss mountains تصعدين بالتلفريك وتروحين بحيرات ومنطقة ريف انجلبيرج يسمونها ارض هايدي
4- شلالات الراينthe Rhine falls ,وتقدرين تروحيلها بالقطار في اقل من ساعه وقريب منها في منطقة شلالات ومنطقة بحيرة كونستانس
وانترلاكن
تقدرين تروحين 1- قمة جونقفرو jungfrau اعلى قمة في اوربا 2-الزحلاقيه heimwehfluh
3- شلال تروميل باخ

 

[معلمة انجليزي]

حبيبتي زيورخ مملة وغلقة روحي انترلاكن احسن

 

[FeShinGoOo]

بنات انا رحت ورديت وبالعكس زيورخ حلوه وجوها وطبيعتها عجيبه ورحت انترلاكن ولوزيرن

 

[ريسان]

ام ابيها حمد الله على سلامتج انشا الله استانستي بس ابي اسالج انترلاكن جم يوم يبيلها؟ لان انا ودي اروح انترلاكن و بلاك فورست و بادن بادن بس ما اعتقد يصير

 

[Samurai]

ريسان

ليش ما يصير

سفرتي كانت قبل اسبوعين
منها اسبوع بادن بادن في الغابات السوداء وبعدها انترلاكن

ومن اجمل الرحلات ولله الحمد

بادن بادن قعدت فيها ثلاث ايام ورحنا جم منطقه في البلاك فورست وستراسبورغ وتودناو وترايبرغ قرية ساعات الكوكو
وانترلاكن خمس ايام

 

[ريسان]

الله سفرتج حلوة

انا مشكلتي ان السفرة كويت جنيف كويت و احنا قلنا يعني اسبوع بسويسرا و اسبوع بفرنسا يعني بالاخير لازم نرد جنيف فاشلون تتضبط؟؟؟

 

[FeShinGoOo]

والله انترلاكن رحتلها يوم واحد كان ودي اتمشي فيها بعد بس وصلنا متاخر وكلشي مصكر فيها تل فريك وفيها كهف وفيها قارب هذا غير الطبيعه ..

اتغدينا اهناك واتمشينا شوي عالبحيره الروعه الصراحه لو تقعدين فيها سبوع ماتملين من جمال المنظر اهناك

بسس اتوقع 3 تيام كافي اذا تبي تروحين كل مكان اول يوم البحيره وتتمشون فيها وفي سوق اهناك بعد
وثاني يوم روحو الكهف والقارب والتل فريك

 

[ريسان]

مشكورة حبيبتي اي انترلاكن انا لما شفت صورها حسيتها احلى من النمسا

 

[FeShinGoOo]

وفيها قلعه انتي اول ماتوصلين روحي حق الانفرميشن ويعطونج خريطه عن الاماكن الحلوه اهناك بس روحي مبجر عشان تستغلين اليوم كله احنا رحنا العصر واتحسفنا حسبالنا بس طبيعه ماكان ندري ان فيها قلعه وكهف وهالسوالف
وايد وايد حلوه وجوها يهبل واذا تاخذون سياره راح تستانسون اكثر صج صج متعه وماتحسين بالرحله وانتي تشوفين المناظر

 

[جاكليت]

الحمد لله على السلامة

احنا سفرتنا الاسبوع الياي ان شاالله

شلون الجو بسويسرا ؟

ولوزيرن حلوة ؟ تسوى الواحد يتعنى لها ؟ لأنه عندي اربع ايام في انترلاكن

وشلون قرية هايدي تسوى ولا ما تسوى ؟

 

[ريسان]

ام ابيها مشكورة وايد عالمعلومات و انشا الله اروحلها

 

[FeShinGoOo]

جاكليت لوزيرن مو ذاك الزود مافيها شي خلج على انترلاكن وايد احلى ولوزان هم حلوه عجيبه

هايدي لاند مارحت لان قالو مافيها شي وماتسوى الواحد يروحلها ..

 

[Samurai]

جاكليت

شوفي الطقس في موقع ياهو
او اذا عندج ايفون ايبود او ايباد شوفي الطقس وضيفي مدينة انترلاكن يطلع الطقس لمدة اسبوع وشكله الاسبوع الجاي حار شوي درجة الحراره توصل ٣٠

ولوزيرن. انا عن نفسي عجبتني بالتمشي وخصوصا الجسر الخشبي اقدم جسر خشبي في اوروبا
وبطريقج الى لوزيرن مري قرية لونقرن Lungern قريه حلوه على بحيره احنا قعدنا فيها ووقفنا بكافيه شربنا قهوه ومشينا

 

[noor sultan]

جاكليت

شوفي الطقس في موقع ياهو
او اذا عندج ايفون ايبود او ايباد شوفي الطقس وضيفي مدينة انترلاكن يطلع الطقس لمدة اسبوع وشكله الاسبوع الجاي حار شوي درجة الحراره توصل ٣٠

ولوزيرن. انا عن نفسي عجبتني بالتمشي وخصوصا الجسر الخشبي اقدم جسر خشبي في اوروبا
وبطريقج الى لوزيرن مري قرية لونقرن lungern قريه حلوه على بحيره احنا قعدنا فيها ووقفنا بكافيه شربنا قهوه ومشينا

عفوا بس ما عرفت اطلع الطقس فى ياهو ؟ بس يطلع الخليج ؟

شلون الطريقه عشان اطلع يوروبارك ؟
مشكوره