خريجة حقوق وتشتغلين بوحده من الوزارات تعالي شاركينا وشوفي مطالب نقابة القانونيين

[ScarletteO'Hara]

^^^^
شكو؟؟؟
عاد مو من زين وزارة العدل عشان يطلبون معدل و لا من زين رواتبهم
انزين انا معاي جم بنت من رفيجاتي معاي بالقسم نسبهم اقل من 75 اصلا يمكن كلهم
شدعوة حسستوني ان احنا الفتوى و التشريع و انا ما ادري
منو قال لج هالحجي و كنتي انتي تبين اي مسمى؟؟؟؟

 

[uicчנ ρinκ]

امس رفيجتي قاريه اعتقد بالجريده قالتلي يبون من 75 وفوق تحبطت
انا بروحي مابي وزارات وقاعده اتفسق عندي اتدرب عند محامي ابرك ولاقعدة البيت
صج اولها 3 شهور ولاراتب بس بعدها راحه شوي شوي احصل اللي ابيه
وانا بعد ودي لو قطاع خاص بس مادري وين يبون قانونيين

 

[ScarletteO'Hara]

^^^^
و الله شوفي انا رفيجاتي بعضهم ما صار لهم سنتين متوظفين كلهم نسبهم مو ذاك
و كاهم ضباط دعاوي محد سأل عن نسبتهم
يمكن رفيجتج غلطانه لانه جد بعد تخفيض الرواتب ما اتوقع لهم عين يحددون نسب
ما المشكلة ان التدريب مع محامي انا ما انصح فيه
المحامي حاط ريل على ريل و منو يركض بالشغل و يحضر جالسات عند ىالقاضي غير المتدرب المسكين؟
انا ما ارضاها حق نفسي احس حالهم حال المناديب المصريين و البدون
و ما يعرفون كوعهم من بوعهم
انا احب انتي استفيد من شغلي مو كراف و بس نفس المتدربين
انا بودي افتح لي مكتب لاني سمعت ان مدة خدمتي مع ضباط الدعاوي ممكن تطمرني لي محامي ب مو أ
بس تو الناس بخليه اخر حل لي اذا ما تعدلت اوضاعنا
و الخاص اذا تبينه جربي قدمي على بنوك بس مو شرط تكون وظيفة قانونية
و لا شوفي شركات النفط
و عموما من ناحية العدل انا افضل انج تروحين الوزارة بقسم التعيينات تسألين عن مسألة المعدل
لانها يمكن حق مسميات معينة مالها علاقة بالقانونيين
الله يوفقج حبيبتي و تحصلين الوظيفة الي تتمنينها

 

[سمو ذاااتي]

غلطانه حبيبتي يبون 75 لنيابه بالعدل والاعلان لذكوور فقط

شركات النفط حلو بس مادري يبون قانونين ولا ...؟

 

[ScarletteO'Hara]

و الله يا سمو الفترة الاخيرة بإعلاناتهم ما كانوا طالبين قانونيين
بس الديره ماشية بالواسطة اذا عندج واسطة تشتغلين بالمكان الي تبينه
ما ادري متى يفتحون المجال للبنات انهم يقدمون بالنيابة خلاص المرة وصلت للوزارة و المجلس يت على القضاء؟؟؟

 

[ON_LY]

بناااات تفائلوا خير تجدوه والنقابه لازم تتحرك على هالخبر وانشالله قرب الفرج (( ضاقت حلقاتها فلما استحكمت ,, فررررررررررجت وكنت اظنها لاتفرجووو ))

لقيت هالخبر ودعواتكم

«الخدمة المدنية» يدرس زيادة الرواتب المتدنية لتتوافق مع غلاء المعيشة وارتفاع معدل التضخم وتراجع قيمة الدينار الشرائية

وذكروا المساواه بين التخصصات الواحده اصحاب المواقع المختلفه (( قانوني الوزارات مقارنه بقانوني البلديه والتحقيقات والنيابه والفتوى والتشريع ))

بجريده الوطن تاريخ2\8\2011

http://watanpdf.alwatan.com.kw/alwatanPDF/2011-08-02/1.pdf

انشالله ديوان الخدمه بشهر9يقرونه وبشهر10يصوتون عليها وتصرف لنا بشهر11ولا12بالكثير ,, دعواتكم بنات

 

[ScarletteO'Hara]

on_ly
و الله ما يندرى عنهم
غسلت ايدي من تعديل اوضاع القانونيين بالكويت
بس ان شاء الله صج
و ما يكون المبلغ تافه

 

[ON_LY]

سكارلت حبيبتي

الكلمات الغير تشجيعيه مالها داعي خصوصا لازم نزرع بقلوبنا شويه امل

وبعدين حيل الله اقوى ,, مالنا الا بهالرمضان ندعي ربنا ان يعطف علينا وعليهم ويزيدوننا قولي امين

 

[ScarletteO'Hara]

لا تلوميني حبيبتي النفسية تعبانة شوي
و ان شاء الله يرد لي تفاؤلي
و يا رب ان شاء الله يا رب صج الاوضاع تتعدل
اللهم آميييييييين

 

[نادية_]

الحين الاماكن اللي بالحكومه وتعطي رواتب زينه للقانونيات

بس _ مجلس الامه - الوزرا - الفتوى والتشريع - ديوان المحاسبه - البنك المركزي - بنك التسليف - الخارجيه - التحقيقات - كونا - معهد الابحاث ؟؟؟ بس

اقصد بكلمه المعاشات الزينه 1000 وطالع

 

[ON_LY]

ناديه_

الي متاكده منه ان بنك التسليف وكونا ومعهد الابحاث هالثلاث اماكن رواتبهم مايتعدى ال900 مو الف

اما الباجيين مادري عنهم

 

[ScarletteO'Hara]

نادية
كل الاماكن الي ذكرتيها يبيلها واسطات قوية

 

[law love]

بنات انتو مشكلتكم بس المعاش ؟
جم معاشكم بالضبط ؟

 

[Violetta]

اشصار على الاضراب جنه بس كان جذي و نسو السالفه ؟!

 

[ScarletteO'Hara]

بنات انتو مشكلتكم بس المعاش ؟
جم معاشكم بالضبط ؟

المعاشات اكيد جزء من مشكلتنا
بس مو مشكلتنا الوحيدة
احنا نبي توحيد لمسيات جميع القاونيين في جميع وزارات الكويت لتحقيق العدل ما بيننا
شمعنه المدرسين و الاطباء و المهندسين و المحاسبين يتوحدون بالمسميات و احنا القانونيين في تفاوت بمسمياتنا و رواتبنا؟
نبي على قد الكراف الي قاعدين نكرفه بالدوام و الارف الي قاعدين نحصله من المراجعين و الرووس الكبار انه تتعدل اوضاعنا
و لنا الحق انه نتذمر من رواتبنا
يرضي منو ان انا مسمياي ضابط دعاوي عندي اربع علاوات راتبي 860؟؟؟
المفروض يكون 910 بعد بعد ما خصموا من ضباط الدعاوي و الموثقين 50 دينار صار هذا الراتب
هل تتوقعين ال860 تليق بحاملة شهادة حقوق؟
و الي يعور القلب اني احب طبيعة شغلي و ما يسوى اني اهد دوامي الي انا احس نفسي مبدعة فيه و مرتاحة فيه مع زميلاتي عشان الراتب
بس شكلهم بيحدوني على هذي الخطوة

 

[ScarletteO'Hara]

اشصار على الاضراب جنه بس كان جذي و نسو السالفه ؟!

قالوا انهم مأجلين سالفة الاضراب لانهم قدموا جداول للزيادات المرجوة للقانونيين لديوان الخدمة المدنية و ناطرين الرد عليهم
و اذا تم رفض الجدول هني راح يرتبون اضراب و لا يوصلونها لمجلس الامة مو متأكدة
بس عموما انا ضد الاضراب لانه المرة الي فاتت محد عبرنا لما اضربا و ما طلعنا بنتيجة

 

[شوق والدمعه]

بناااات حبيتباتي ادري داشه عرض

بس عفيه سوال انا ادرس حقوق والدراسه حيل كارهتها وتعب من صجكم معاش 860؟

معقوله الحقوقين ليش جذي شوي؟

مالنا كادر>>جيكو علي لنا لوول ان شاءالله كلها حديدن سهل واتحجا مثلكم ان ربي اراد لووووول

المهم

شنو الاماكن الزينه لي الراتب فيها زين انا وحده ماعندي واسطه والله رفيجتي معاي ابوها يدور واسطته من الحين
انا واسطتي ربي والله كريم بس عطوني خبره

 

[ON_LY]

شوق والدمعه

نصيحه لوجه اللله اذا من الحين توج سنه اولى ولا ثانيه حولي للتربيه احسلج
دراستها اسهل ولا فيها عوار راس وشوفي الفرق بالمميزات الي بقولها اياج الحين

الراتب بالوزارات في الشؤون القانونيه780مع قصه التامينات
وتشتغلين بالعدل موثقه ولا ضابط دعاوي ولا منفذ احكام<<--تدخلينهم بواسطه خفيفه860ومع قصه التامينات
الاماكن القويه تحقيقات وديوان المحاسبه ولا القتوى والتشريع يبونج امتياز ولا جيدجدا مرتفع وواسطه جايده من الاخر

هذي الحقوق فلو ماعندج واسطا مثل ماتفضلتي فالاحسن مدرسه راتبها870احسن من الموثقه ولا ضابطه دعاوي وبدون واسطتهم الخفيفه
ودوامج عند بيت اهلج وعطلتج بالسنه ثلاث شهور لا وتطلعين قبل الهده اذا ماعندج حصص اخيره عالساعه11راده بيتكم وهذي نصيحتنا لج

 

[سمو ذاااتي]

الله كريم حتي توثيقات وضباط الدعاوي بوااسطه !!

المؤوسسات بواسطه هم

الحمد الله الوزارات مو بالواسطه يلاا شي احسن من شي

الشوق ودمعه مادري شقولج بس انا كنت اعرف ان وضع القانونين وايد تعبان بس مع هذا دخلت حقووق لاني واايد احب تخصصي ماتخيل نفسي بغير هالتخصص فانتي يعتمد اذ حابه تخصصج ولا داشه لان عبالج ان الحقوق وظايفها زينه ومعاشاتها قويه اذ عشان هالشي تووكلي علي الله وحولي *

 

[law love]

صح معاشاتكم شويه لكن الصراحه مو سبب للتذمر من كليه الحقوق او الدراسه بهالكليه يعني بنفسكم قلتو تحبون شغلكم وهالشي واايد زين شالفايده معاش و انتو لايعه جبدكم من شغلكم ولا ماكو شغل بس معاش !

ان شاء الله يكون فيه عداله بالمعاشات